- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
ءۇرىمجى قالاسى تيانشان رايونى بايگە الاڭى سولتۇستىك الەۋمەتتىك اۋماعى
نىسانالى باسقارىپ، حالىقتىڭ سۇرانىسىنا ساي قىزمەت ەتتى
جىلجىمالى تۇرعىندارعا قالانىڭ جىلىلىعىن سەزىندىردى
لي لين
2016.04.12 16:54 كەلۋ قاينارى : شينجياڭ گازەتى
ءتىلشىمىز لي لين 9 - ساۋىردە ۇرىمجىدەن حابارلايدى. ءۇرىمجى قالاسى تيانشان رايونىنىڭ بايگە الاڭى سولتۇستىك الەۋمەتتىك اۋماعى كىلەڭ ءوز بەتىمەن سالىنعان ۇيلەردەن قۇرالعان، 8 ۇلتتان قۇرالعان 5842 تۇرعىننىڭ %96ى جىلجىمالى تۇرعىندار، ونىڭ ۇستىنە مادەنيەت دەڭگەيى تومەن، تابىسى ماردىمسىز ەدى. الەۋمەتتىك اۋماق باسقارۋ مەن قىزمەت ەتۋگە قاتار ءمان بەرۋ ۇلگىسىن قولدانىپ، تۇرعىندارعا قالانىڭ «جىلىلىعىن» شىنايى سەزىندىردى، تۇرعىندار بەرەكەنىڭ تۋىن كوتەرىپ، ءبىر - بىرىمەن تاتۋ - ءتاتتى ءوتىپ، قالا ومىرىنە بالداي باتىپ، سۋداي ءسىڭدى.
بايگە الاڭى سولتۇستىك الەۋمەتتىك اۋماعىنىڭ «ساعات التى جارىم» دەپ اتالاتىن ساباقحاناسىنىڭ 2 - كەزەكتى كۋرسىنان وقۋ تاۋىسقالى تۇرعان كۋرسانت ءامينا 8 - ءساۋىر كۇنى پسيحولوگيا ۇستازى، الەۋمەتتىك اۋماقتىڭ ورىنباسار مەڭگەرۋشىسى ما حۇڭيىڭنىڭ قولىن ۇستاپ: بۇيىعى، كەم ءسوزدى قىز بالادان ءان مەن ءبيدىڭ ءسانىن كەلتىرگەن ساباق ۋاكىلى بولىپ جەتىلدىم، بۇل «ساعات التى جارىم» ساباقحاناسىنىڭ ارقاسى، ءسىزدىڭ پسيحيكالىق جاردەمىڭىز كوڭىلىمدەگى تۇماندى سەيىلتىپ، ماعان ساۋلە مەن سەنىم بەردى، − دەدى قيماستىقپەن.
«ساعات التى جارىم» ساباقحاناسى − بايگە الاڭى سولتۇستىك الەۋمەتتىك اۋماعىنىڭ تۇرعىندار ءۇشىن ازىرلەگەن، باسقارۋ مەن قىزمەت ەتۋ ۇشتاستىرىلعان قىزمەت تۇعىرى. 2015 - جىلى بايگە الاڭى سولتۇستىك الەۋمەتتىك اۋماعى قاراستى الاپتاعى تۇرعىنداردىڭ باسىم كوپشىلىگىنىڭ سىرتتان كەلگەن جۇمىسكەرلەر ەكەنىن، ولاردىڭ بالا تاربيەسىنە ۋاقىت شىعارا المايتىنىن، ءدىني ۇشقارىلاردىڭ شىرماۋىنا وڭاي ءتۇسىپ، ءدىني ۇشقارى يدەيالاردىڭ تارالۋىنا مۇرىندىق بولۋى مۇمكىن ەكەنىن ەسكەرىپ، «ساعات التى جارىم» ساباقحاناسىن اشىپ، ساباق پىسىقتاۋ مەن ارتىقشىلىقتى باۋلۋدى ۇشتاستىرىپ، سايكەس جاستاعى بالالاردى اقىسىز تاربيەلەدى.
الەۋمەتتىك اۋماق پارتيا ياچەيكاسىنىڭ شۋجيى گۇڭ يانجۇننىڭ تانىستىرۋىنشا، نىسانالى باسقارۋدىڭ ونىمدىلىگىنە قالاي كەپىلدىك ەتۋگە بولادى دەگەن ماسەلە ۇستىندە الەۋمەتتىك اۋماقتىڭ «ەكى كوميتەت» القاسى كوپ ىزدەنىس جاساپ، تۇرعىنداردى باسقارۋ مەن ولارعا قىزمەت ەتۋدە ءادىس - امالعا نازار اۋدارىپ، قۇرمەتتەۋدى العى شارت ەتىپ، حالىقتىڭ قاجەتىن جەتە ۇعىسىپ، قىزمەت ەتۋ، باسقارۋ جانە ۇگىتتەۋ جۇمىستارىن تۇرعىندار رازىلىقپەن قابىلدايتىن تاسىلدەر ارقىلى جۇرگىزۋ جونىندە ءبىر اۋىزدى پىكىرگە كەلەدى. وسى ءۇشىن، الەۋمەتتىك اۋماق ۇلتتار ىنتىماعى اۋلاسى، ۇلتتار ىنتىماعى ساباقحاناسى، حالىققا قولايلى قىزمەت ەتۋ ءتۇيىنى، «ساعات التى جارىم» ساباقحاناسى، «تەرەڭ سەزىم» مەيىر ءۇيى، «نۇرلى جۇرەك اس - تاعام ءمازىرى» سياقتى تۇعىرلاردى ومىرگە اكەلىپ، باعىتتامالى تۇردە، جان - جاقتى قىزمەتتەر كورسەتىپ، تۇرعىنداردىڭ الەۋمەتتىك اۋماققا باۋىر باسىپ، ىنتىماق پەن ورنىقتىلىقتى سانالى تۇردە قورعاۋىنا جاعداي جاسادى.
بايگە الاڭى سولتۇستىك الەۋمەتتىك اۋماعىنان ءۇي جالداپ الۋشىلاردىڭ بارلىعى الدىن الا تاربيە قابىلدايدى. ماكىت اۋدانىنان كەلگەن حايىرگۇل 30 مينۋتتىق بەينەجازبانى كورۋ ارقىلى قايتكەندە تارتىپكە بويسۇنىپ، مادەنيەتتى قالا تۇرعىندارىنىڭ ساناتىنا قوسىلۋعا بولاتىنى تۋرالى ساۋاتتىق بىلىمدەر العانىن، ىزىنشە الەۋمەتتىك اۋماق ورىستەتكەن ءبىر قىدىرۋ قيمىلدارعا ات سالىسۋ ارقىلى قالا ورتاسىنا بەيىمدەلە تۇسكەنىن ايتادى.
الەۋمەتتىك اۋماق ۇزىندىعى 350 مەتر كەلەتىن مادەنيەت ءدالىزىن اشىپ، ۇلتتار ىنتىماعىن نىعايتۋ، زاڭسىز ءدىني قيمىلدارعا قارسى تۇرۋ جانە مادەنيەتتى، ادەپتى بولۋ تۋرالى ساۋاتتىق بىلىمدەر مەن ماڭايداعى وزات تيپتەر سياقتى مازمۇنداردى سۋرەت ءتاسىلى ارقىلى ۇيعۇر، حانزۋ تىلدەرىندە وبرازدى، جاندى، ۇعىنىقتى تۇردە بەينەلەدى. وسى ءدالىز باحۋلياڭ مەشىتى، 74 - باستاۋىش مەكتەپ، بايگە الاڭى سولتۇستىك الەۋمەتتىك اۋماعىن تۇتاستىرىپ تۇرادى، جولدان وتكەن كىسىلەردىڭ بارلىعى ونان تاربيە الا الادى.
الەۋمەتتىك اۋماق 74 - باستاۋىش مەكتەپپەن بىرگە «بالانىڭ قولىنان ۇستاپ، اتا - انالاردىڭ كوڭىلىن تابايىق» دەگەن تاقىرىپپەن جەلىلەس قيمىلدار وتكىزدى، بالالارعا «ءۇشتىڭ ءبىر - بىرىنەن ايرىلا الماۋى»، «بەس وسكەلەڭ تانىم» تۋرالى بىلىمدەر بەرىپ، بالالار ارقىلى وتاعاسىلارعا اسەر ەتىپ، وتباسى مەن قوعامعا ىقپال جاساپ وتىردى.
قاراستى الاپتا قوجالىق باسقارۋدىڭ جوق ەكەنىن ەسكەرىپ، الەۋمەتتىك اۋماق سۋ، ەلەكتر، جىلۋ جۇيەسى بويىنشا حالىققا قولايلى قىزمەت ەتۋ اترەتىن ۇيىمداستىرىپ، تاۋلىك بويى اقىسىز قىزمەت ەتتى. بۇل اترەت الەۋمەتتىك اۋماقتاعى ارناۋلى شارلاۋ اترەتىنىڭ 20 مۇشەسىنەن قۇرالعان، ولار الەۋمەتتىك اۋماقتىڭ جاعدايىنا قانىق، تۇرعىندار شۇعىل اۋرۋ، قاتىناس شىرعالاڭى سياقتى توسىن جاعدايلارعا تاپ بولسا دا، الدىمەن قىزمەت اترەتىنە تەلەفون بەرىپ، كومەك سۇرايدى، اترەت مۇشەلەرى تىزگىن ۇشىندا جەتىپ ۇلگىرەدى. 2015 - جىلى الەۋمەتتىك اۋماق حالىققا قولايلى قىزمەت ەتۋ قاراجاتىنان 30 مىڭ يۋان اقشا شىعارىپ، تۇرعىندارعا 337 رەت اقىسىز قىزمەت كورسەتتى.
«بىزگە قاراستى اۋماقتا ءبىر كۇن تۇرعان ادامعا دا تۇراقتى تۇرعىنداردىڭ ولشەمى بويىنشا تاۋلىك بويى اقىسىز قىزمەت كورسەتۋگە دايىنبىز، تەك باسقارۋ مەن قىزمەت ەتۋدى قاپىسىز ۇشتاستىرعاندا عانا، ءاربىر تۇرعىننىڭ قالاعا باۋىر باسۋىنا جاعداي تۋدىرۋعا بولادى»، − دەدى ما يانجۇن.
تالماي قۇلشىنۋدىڭ ارقاسىندا، بايگە الاڭى سولتۇستىك الەۋمەتتىك اۋماعىنداعى ءوز بەتىمەن سالىنعان 191 ءۇيدىڭ 92سىنە ۇلتتار ىنتىماعى اۋلاسى دەگەن ات بەرىلدى. كەزىندە «لاس، شىم - شىتىرىق، ناشارلىعىمەن» اتى شىققان وسى الەۋمەتتىك اۋماق 2015 - جىلى ءۇرىمجى قالاسى دارەجەلى وركەنيەت قۇرىلىسىنان ۇلگى كورسەتۋشى الەۋمەتتىك اۋماق بولىپ باعالاندى.
ءتىلشى اسەرى : نىسانانى ءدوپ باسقاندا عانا، تىلەكتەر مەن بىلەكتەردى بىرىكتىرۋگە بولادى
حالقىنىڭ %96ى جىلجىمالى تۇرعىنداردان قۇرالعان الەۋمەتتىك اۋماقتى باسقارۋدىڭ قيىندىعى بەسەنەدەن بەلگىلى. الايدا، بايگە الاڭى سولتۇستىك الەۋمەتتىك اۋماعىنىڭ ءۇرىمجى قالاسى دارەجەلى وركەنيەت قۇرىلىسىنان ۇلگى كورسەتۋشى الەۋمەتتىك اۋماق بولىپ باعالانۋى ادامدى تاڭ قالدىرادى، باسقارۋدىڭ قانداي تاسىلدەرى وسى جىلجىمالى تۇرعىنداردى قالا ومىرىنە باۋىر باسىپ، كورىكتى قالا قۇرۋدىڭ جاۋاپكەرشىلىگىن موينىنا الۋعا ۇيرەتتى ەكەن؟ قىزمەت ەتۋدىڭ قانداي تاسىلدەرى تۇرعىنداردىڭ كوڭىلىن سەپتەپ، ۇلتتار ىنتىماعىنىڭ ۇشقىنىن جارقىراتتى ەكەن؟ بايگە الاڭى سولتۇستىك الەۋمەتتىك اۋماعى وسىعان جاۋاپ رەتىندە، باسقارۋ مەن قىزمەت ەتۋگە قاتار ءمان بەرىپ، نىسانانى ءداپ باسىپ، جاعدايعا سايكەس شارا قولداندى.
بايگە الاڭى سولتۇستىك الەۋمەتتىك اۋماعى قاراستى الاپتا از ۇلت جىلجىمالى تۇرعىندارىنىڭ كوپ بولۋى، ولاردىڭ مادەنيەت دەڭگەيىنىڭ تومەن، تابىسىنىڭ ماردىمسىز بولۋى سياقتى ەرەكشەلىكتەرگە سايكەس، ناقتى جاعدايعا سايكەس شارا قولدانىپ، كوڭىلگە قونىمدى، جۇرەككە جۇعىمدى تاسىلدەرمەن ۇگىت - ءناسيحات جۇرگىزىپ، باسقارۋ مەن قىزمەت كورسەتۋدى تۇرعىنداردىڭ ناقتى سۇرانىسىنا سايكەستىرىپ، جىلجىمالى تۇرعىندارعا قالانىڭ ىستىق مەيىرىن سەزىندىردى.
الەۋمەتتىك اۋماقتى باسقارۋ، تۇپتەپ كەلگەندە، اداممەن بايلانىستى قىزمەت. كوڭىل جايلاۋىنا اقيقاتتىڭ اق تۋى تىگىلمەسە، قالايدا ارام شوپتەر ءونىپ شىعارى داۋسىز. بايگە الاڭى سولتۇستىك الەۋمەتتىك اۋماعىنىڭ باسقارۋ مەن قىزمەت ەتۋگە قاتار ءمان بەرۋ ۇستانىمىنان جازباي، بىرتە - بىرتە حالىقتىڭ قالاۋلىسىنا اينالىپ، بۇرىنعى لاس، شىم - شىتىرىق، ناشار ورتادان جاراسىمدى، ورنىقتى، وركەنيەتتى، تازا، جۇرەكتەرگە تەك ىزگىلىك ۇيالاعان جاعداي جاساۋى ادامدى، راسىندا، ءتانتى ەتەدى.
كەلۋ قاينارى: شينجياڭ گازەتى
جاۋاپتى رەداكتورى : مانەپ ەربول ۇلى (پراكتيكانت)
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
