- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
العاشقى قار
داۋرەن عالىمجان ۇلى (ستۋدەنت)
2014.12.24 15:04 كەلۋ قاينارى : شينجياڭ گازەتى
ءبىزدىڭ اۋىلدا العاشقى قار قاشاندا توسىننان جاۋادى. 8 - كلاستا وقىپ جۇرگەن كەزىم. وتىن اكەلە جاتقانبىز. اينالا اپپاق بولدى دا كەتتى. ءاليحان: «ا - ا - ال، قىس كەلدى» دەگەن ماعان جىميا قاراپ. مەندە جىمياتىن شاما جوق. قازىر مىنا اعاشتىڭ ءبارىن قالاي تۇسىرەمىز دەپ ويلاپ وتىرمىن. وتىندى ءاليحان جالعىز ءوزى سالدى دەۋگە بولادى. مەنىڭ ىلميگەن ارىق كەزىم، وتىننىڭ استىندا قالىپ قويا جازداپ، اياققا وراتىلىپ جۇرگەم دە قويعام. سول كەزدە دوستارىم، اكەم قايدا ءجۇر ەكەن؟ ەسىمدە جوق. ەسىمدە قالعانى، كەلە جاتقاندا اينالانى اپپاق قىلىپ العاشقى قار جاۋىپ كەتكەنى عانا ...
بىلتىر العاشقى قار جاۋعاندا اۋىلدا بولعان جوقپىن. قار قالىڭداپ، قىس ابدەن ورنىققان كەزدە باردىم. ەل سوعىم سويعان، ءبىرىن - ءبىرى شەكەگە شاقىرىسىپ جاتقان شاق ەكەن. كورشى - كولەمنىڭ بارلىعى دەرلىك بۇل سالتتى اتقارىپ تاستاپتى. تەك ءبىر ءۇي عانا... تۇمەنبەكتىڭ ءۇيى. جىلدا سولاي. ول ءۇي شاقىرادى دەپ ەشكىم كۇتپەيدى دە. ويتكەنى تۇمەنبەكتىڭ ءوزى كەمتار ادام. كوزى كورمەيدى، جاسى ءبىرازعا كەلىپ قالعان. ازداپ اراق ىشەتىنى بار... ايەلى ەشكىممەن ارالاسپايتىن، توماعا - تۇيىق ادام. تەك ءۇيىنىڭ جانىنان ءوتىپ بارا جاتقاندا عانا بالالارىنا ۇرسىپ جاتقان اششى ايقايىن ەستيتىن ەدىك. ال بالالارى... ۇلكەن قىزى كۇيەۋگە شىققان دەسەدى. اقىلى كەمدەۋ بولاتىن. ودان كەيىنگى ۇلى −− ءديدار. 7 - كلاستان كەيىن وقۋدان شىعىپ كەتكەن. ءۇيىنىڭ شارۋاسىن ىستەپ، وزىنەن الدەقايدا كىشى بالالارمەن ويناپ جۇرەدى. ودان كەيىنگى بالاسىنىڭ اتىن بىلمەيمىن. جاسىن دا شامالاماپپىن. ايتەۋىر، جازدا كۇننىڭ كوزىنە شىعارىپ قويعاندا عانا كورەتىنبىز. مۇگەدەكتەر ارباسىندا وتىرادى. ەندى ويلاپ وتىرسام، سول بالا ۇل ما ەدى، قىز با ەدى؟ مەن ونى دا بىلمەيدى ەكەنمىن...
اۋىلعا بارعانداعى ادەتىم بويىنشا ءتۇس الەتىندە ويانىپ، سۇيرەتىلىپ دالاعا شىققام. اپپاق قار كوزدى قارىقتىرىپ، اشتىرار ەمەس. كورشى ءۇيدىڭ قوراسىنىڭ ارتىنان بىرەۋ اتپەن شىعىپ كەلە جاتتى.
− قالايسىڭ، ارمان؟ «بۇل كىم، - دەپ ويلادىم تاني الماي، - وسىلاردى كەلگەن سايىن تانىماي قالامىن». 3 − 4 ايدىڭ ىشىندە وسىنشاما ءوسىپ كەتكەن قايسىسى ەكەن ...
− ا - ا، ءديدار، جاعداي قالاي؟ مەن بۇل ءسوزدى ايتقانشا، ءديدار تىزگىنىن تارتپاستان جانىمنان وتە شىققان. شاناعا ارقان جالعاپ، سانىنا وراي، تاقىمىنا باسىپ الىپتى. شانادا تايلانعان ءشوپ. «ە - ە - ە، قىس باستالماي جاتىپ، شوپتەرى بىتكەن ەكەن عوي» دەپ ويلاپ ەدىم ىشىمنەن.
مويىنتالدىڭ كۇزى بيىل سوزىلىپ كەتتى. كۇز بولعاندا، جاۋىن - شاشىنسىز، قوڭىر كۇز. جاپىراقتار سۋدىراپ جەردە ءالى جاتىر قۇپ - قۇرعاق بولىپ. كۇن بارعان سايىن سۋىتىپ كەلەدى. تاۋدىڭ باسىنداعى اق تا بىرتە - بىرتە كولەم الىپ كەلە جاتقانداي.
ءبىزدىڭ ءۇي كومىر - اعاشتى ءالى تۇسىرمەپ ەدى. ەندى ەرتەرەك قامدانسا ەكەن... مەنەن كەلەر پايدا جوق، مىنا جاقتا قالالىق جىلۋ جۇيەسىنىڭ قوسىلۋىن كۇتىپ، ءوز بەتىممەن جاتقان اداممىن. «اكەي بار عوي، رەتتەيدى عوي» دەپ ءوزىمدى جۇباتىپ قويامىن.
كورشىلەردىڭ ءبارى دە قىسقا دايىن شىعار. ولار وندايعا ەرتە قامدانۋشى ەدى عوي. تەك ءبىر ءۇي ... تۇمەنبەكتىڭ ءۇيى. ءبىراق ول ۇيدە بيىل وت جاعىلماۋى دا مۇمكىن. ويتكەنى بىلتىر كوكتەمدە تۇمەنبەك ماس بولىپ وتىرىپ وت جاققان ەكەن، تۇندە ءتۇتىن ىشكە سوعىپ، ىس ءتيىپ قالىپتى. ايەلى قالاداعى قىزىنا كەتكەن ەكەن. 2 كۇننەن كەيىن كەلسە، كۇيەۋى مەن 2 بالاسى تۇنگى ۇيقىعا باس قويعان كۇيلەرىندە جاتقان كورىنەدى. و دۇنيەگە قالاي اتتانعاندارىن دا بىلمەي قالعان.
اكەم حابارلاستى. اۋىلدا العاشقى قار جاۋىپتى. ىلعي وسىلاي كۇتپەگەن ۋاقىتتا جاۋادى...
جاۋاپتى رەداكتورى : مۇحيت امانتاي ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
