- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
«اقپارات كوزقاراسى − اقپاراتتىق قوعامدىق پىكىر قىزمەتىنىڭ جانى»
2016.02.24 13:56 كەلۋ قاينارى : ءتاڭىرتاۋ تورابى
ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 19 - اقپان كۇنى بەيجيڭدە «پارتيانىڭ اقپاراتتىق قوعامدىق پىكىر قىزمەتى جونىندەگى اڭگىمە ءماجىلىسىن» باسقارىپ اشىپ، پارتيانىڭ اقپاراتتىق قوعامدىق پىكىر قىزمەتى جونىندە ماڭىزدى ءسوز سويلەدى.
باس شۋجي سوزىندە پارتيا مەن مەملەكەت ىستەرىنىڭ دامۋىن جانە باياندى تىنىشتىقتى، پارتيا قىزمەتىنىڭ جالپى جاعدايىن كوزدەپ، پارتيانىڭ اقپاراتتىق قوعامدىق پىكىر قىزمەتىنىڭ بورىشى مەن مىندەتىن العا قويدى. بۇل ساياسي يدەيالىق جانە جەتەكشىلىك سيپاتى اسا كۇشتى، ماركستىك پروگراممالىق حۇجات بولدى. جاڭا جاعدايدا پارتيانىڭ اقپاراتتىق قوعامدىق پىكىر قىزمەتىن ويداعىداي ىستەۋىمىزدى پارمەندى يدەيالىق قارۋمەن جانە ءتۇپ نەگىزبەن قامدادى. باس شۋجيدىڭ ماڭىزدى ءسوزى جاريالانعاننان كەيىن، رايونىمىزداعى اقپارات قىزمەتكەرلەرى اراسىندا تاماشا اڭىس قوزعادى. وسى بايلانىسپەن ءبىز ءۇرىمجى قالاسىندا تۇراتىن ءبىر ءبولىم اقپارات قىزمەتكەرلەرىمەن سۇحباتتا بولدىق.
«ۇنامدى جاقتاعى ۇگىتتىڭ باۋراۋ قۋاتى مەن اسەرلەندىرۋ قۋاتىن ارتتىرۋعا دەن قويامىز»
اۆتونوميالى رايوندىق پارتكومنىڭ ورگان گازەتى − «شينجياڭ گازەتى» مەكەمەسى پارتكومىنىڭ مۇشەسى، ورىنباسار باس رەداكتورى تەگىس زايبەك ۇلى بىلاي دەدى: باس شۋجي شي جينپيڭ 19 - اقپان كۇنى «پارتيانىڭ اقپاراتتىق قوعامدىق پىكىر قىزمەتى جونىندەگى اڭگىمە ماجىلىسىندە» پارتيانىڭ اقپاراتتىق قوعامدىق پىكىر قىزمەتىنىڭ مىندەتى مەن بورىشتارىن ايقىن ورتاعا قويدى. باس شۋجيدىڭ ءسوزىنىڭ ساياسي سيپاتى، يدەيالىق سيپاتى، جەتەكشىلىك سيپاتى اسا كۇشتى بولدى. ءبىز اۆتونوميالى رايوندىق پارتكومنىڭ ورگان گازەتى «شينجياڭ گازەتىن» شىعارۋ جۇمىسىندا بۇل ءسوزدى جان - جاقتى دايەكتىلەندىرۋگە، تياناقتاندىرۋعا كۇش سالامىز.
ءبىز ۇنامدى جاقتاعى ۇگىتتى نەگىز ەتۋدى پارتيانىڭ اقپاراتتىق قوعامدىق پىكىر قىزمەتىنىڭ، ءسوز جوق، بويسۇنۋعا ءتيىستى نەگىزگى باعىتى ەتىپ، قىزمەتىمىزدە ساقتالىپ وتىرعان، ۇنامدى جاقتاعى ۇگىتتىڭ باۋراۋ قۋاتى مەن اسەرلەندىرۋ قۋاتى ءالسىز، تاقىرىپ ءبىر سىدىرعى، جازۋ ستيلى ءبىر سارىندى، حابار - ماقالالار ۇزىن - سونار بولۋ سياقتى كىناراتتاردى باتىل تۇزەتىپ، ۇنامدى جاقتاعى ۇگىتتىڭ باۋراۋ قۋاتى مەن شابىتتاندىرۋ قۋاتىن ارتتىرۋعا ءتىپتى دە دەن قويامىز. باس شۋجي سوزىندە «قوعامدىق پىكىردىڭ باقىلاۋى مەن ۇنامدى جاقتان ۇگىتتەۋ بىرلىككە يە» دەپ اتاپ كورسەتتى. سوندىقتان ءبىز قىزمەتتە ورىن تەۋىپ وتىرعان ماسەلەلەردى، قوعامداعى جيىركەنىشتى قۇبىلىستاردى فاكتتى ءدال كورسەتىپ بەرۋ، وبيەكتيۆ تالداۋ جاساۋ شارتى استىندا بەزبەندەگەن، سىن ايتقان حابار - ماقالالاردى جاريالاۋعا دەن قويىپ، اقپاراتتىق قوعامدىق پىكىردىڭ باقىلاۋ رولىن كۇشەيتۋگە كۇش سالامىز. كۇندەلىكتى قىزمەتىمىزگە نازار سالساق، تىلشىلەرىمىز سىن سيپاتتى حابار - ماقالالاردى جازا المايتىن، رەداكتورلارىمىزدا سىن سيپاتتى حابار - ماقالالاردى گازەت بەتىنە كوتەرۋگە قۇلىقسىزدىق تانىتاتىن جايتتەر جوق ەمەس. مۇنان كەيىنگى قىزمەتىمىزدە فاكتتىڭ دۇرىستىعىنا، شىندىعىنا كەپىلدىك ەتەتىن، وبيەكتيۆ تالداۋ جاساي الاتىن قوعامدىق پىكىردىڭ باقىلاۋى مەن ۇنامدى جاقتاعى ۇگىتتىڭ بىرلىگىن ساقتاي وتىرىپ، گازەتىمىزدىڭ وقىرمانداردى باۋراۋ قۋاتى مەن شابىتتاندىرۋ قۋاتىن ارتتىرۋعا كۇش سالامىز.
باس شۋجي سوزىندە «اقپارات قۇرالدارى ارا باسەكەنىڭ تەتىگى − دارىندىلار باسەكەسى، اقپارات قۇرالدارىنىڭ باسىمدىلىعىنىڭ وزەگى − دارىندىلار باسىمدىعى. ساياسيدا تاباندى، كاسىپكە جەتىك، ستيلى تاماشا، پارتيا مەن حالىق الاڭدامايتىن اقپاراتتىق قوعامدىق پىكىر قىزمەت قوسىنىن جەدەل تاربيەلەۋ، جەتىلدىرۋ كەرەك» دەپ باسا دارىپتەدى. بۇل وتە جاقسى دارىپتەمە دەپ ەسەپتەيمىن. بارلىق مەديالاردىڭ ۇددەسىنەن شىعا الاتىن، ماماندانعان دارىندى بولۋ پارتيانىڭ جاڭا داۋىردە اقپارات قوسىنى قۇرىلىسىنا قويعان باستى تالابى. گازەت قىزمەتكەرلەرى ءار جاقتان حابارلى بولۋى، ءارى ءتىلشى، ءارى رەداكتور، ءارى اۋدارماشى بولۋى كەرەك. جالپى اقپارات قىزمەتكەرلەرى ءارى ساياساتشى، ءارى جازۋشى، ءارى زاڭگەر، ءارى ەكونوميست، ءارى جاراتىلىستىق عىلىمداردان حاباردار بولۋى ءتيىس. سونىمەن بىرگە، ءداستۇرلى اقپارات قۇرالدارى مەن جاڭا مەديالاردا ينفورماتسيا جاريالاۋدىڭ تەتىگىن يگەرۋى، بۇل جاعىندا دا ماماندانعان بولۋى كەرەك. شينجياڭ گازەتى الداعى جەردە جوعارىداعىداي شارتتارعا ساي كەلەتىن اقپارات دارىندىلارىن تاربيەلەۋگە دەن قويادى.
«بارلىق مەديالاردىڭ ۇددەسىنەن شىعا الاتىن، ماماندانعان دارىندىلارعا» مۇقتاجبىز
«شينجياڭ عىلىم - تەحنيكا گازەتى» مەكەمەسى پارتيا باس ياچەيكاسىنىڭ شۋجيى، ورىنباسار باس رەداكتور باقىتقان ءبىلال ۇلى بىلاي دەدى: «پارتيانىڭ اقپاراتتىق قوعامدىق پىكىر قىزمەتى جونىندەگى اڭگىمە ماجىلىسىندە» باس شۋجي شي جينپيڭ «توعىسپالى دامۋدى ىلگەرىلەتىپ، جاڭا مەديالاردىڭ تاراتۋ جاعىنداعى باسىمدىلىعىنا ارقا سۇيەۋ كەرەك» دەپ باسا دارىپتەدى. سوڭعى بىرنەشە جىلدىق قۇلشىنىستارىمىزدىڭ ناتيجەسىندە گازەتىمىزدىڭ قازاق، ۇيعۇر تىلدەرىندەگى توراپ بەتىن، ءۇنحات تەكشەسىن اشتىق، بۇل بىزگە تاراتۋ ابىزالدىلىعىن سيلادى. جۋىق ارادا ءبىز اۆتونوميالى رايوندىق عىلىم - تەحنيكا مەڭگەرمەسىنىڭ تاپسىرۋىمەن بىلتىرعى جارتى جىلدىق دايىندىعىمىز نەگىزىندە اتالعان مەڭگەرمەنىڭ قازاق تىلىندەگى اقپارات تورابىن اشپاقشىمىز.
مەنشە، بۇل جۇمىستار «بارلىق مەديالاردىڭ ۇددەسىنەن شىعا الاتىن، ماماندانعان دارىندىلارعا» سۇيەنەدى. ءتىپتى، تۇتاس قوعامنىڭ دامۋى، العا باسۋى دارىندىلارعا سۇيەنەدى. «شينجياڭ عىلىم - تەحنيكا گازەتى» مەكەمەسى دارىندىلاردى تاربيەلەۋگە ەرەكشە كوڭىل ءبولىپ كەلەدى. مەكەمەمىز سوڭعى جىلدارى قىزمەتكەلەردى ىشكى ولكەلەردەگى جوعارى وقۋ ورىندارىنا جىبەرىپ، كاسىپتىك جاقتان جەتىلدىرۋگە ءمان بەرىپ وتىر. سوندا دا قازىرگى بار دارىندىلار قوسىنىمىز ءبىزدىڭ بۇل جۇمىستارعا تولىق جەگىلە المادى. مەنشە، ءبىزدىڭ گازەتىمىزدى قامتىعان رايونىمىزداعى قازاق ءتىلدى اقپارات قۇرالدارى دا بەينە باس شۋجي شي جينپيڭ ايتقانداي «بارلىق مەديالاردىڭ ۇددەسىنەن شىعا الاتىن، ماماندانعان دارىندىلارعا» مۇقتاج. سوندىقتان ءبىز قازىرگى بار دارىندىلارىمىزدى ۇزدىكسىز تاربيەلەۋگە، سونىمەن بىرگە، جاڭاعى شارتتارعا تولىمدى دارىندىلاردى اقپارات سالاسىنا بەيىمدەۋگە ءمان بەرگەنىمىز ءجون دەپ ويلايمىن.
«ءداستۇرلى اقپارات قۇرالدارى مەن جاڭا مەديالار توعىسا دامىعاندا عانا ءتىپتى دە كۇشتى اقپاراتتىق قوعامدىق پىكىر قالىپتاستىرۋعا بولادى»
شينجياڭ حالىق راديو ستانسياسى قازاق راديوسىنىڭ باقىلاۋشىسى ىنتىماق رازدان ۇلى بىلاي دەدى: «پارتيانىڭ اقپاراتتىق قوعامدىق پىكىر قىزمەتى جونىندەگى اڭگىمە ماجىلىسىندە» باس شۋجي شي جينپيڭ ءداستۇرلى اقپارات قۇرالدارى مەن جاڭا مەديالاردىڭ توعىسپالى دامۋىن باسا دارىپتەدى. سوڭعى جىلدارى ءداستۇرلى اقپارات قۇرالدارىنىڭ ءبارى جاڭا مەديالاردان پايدالانۋدى كوزدەپ ءبىرتالاي جۇمىس ىستەدى. رايونىمىزداعى قازاق ءتىلدى اقپارات قۇرالدارى جونىنەن العاندا، قازاق راديوسى ءبىر قادام الدا كەلەدى دەسەك ارتىق ەمەس. ءار كۇنگى 19 ساعاتتىق بەرىلىمدەردە جاڭا مەديالاردان دەرلىك پايدالانامىز. ايتالىق، باعدارلامامىز جۇرگىزىلىپ جاتقاندا تىڭدارمانداردىڭ كەز كەلگەن ۋاقىتتا ستۋديامىزعا تەلەفون جالعاپ كەڭەس الۋىنا، كەلتە حات، ءۇنحات ارقىلى وي ورتاقتاستىرۋىنا ابدەي بولادى. مۇنىڭ سىرتىندا قازاق راديوسىنىڭ ارناۋلى تورابى بار، وسى توراپتان تىڭدارماندار دۇنيەنىڭ ءتورت بۇرىشىنان سول ۋاقىتتاعى بەرىلىمدەردى تىكە تىڭداۋىنا دا، ءوتىپ كەتكەن بەرىلىمدەردى قايتالاي تىڭداۋىنا دا بولادى. بۇل تەك اقپارات قۇرالدارى توعىسا دامىعاندا عانا، ءتىپتى دە كۇشتى اقپاراتتىق قوعامدىق پىكىر قالىپتاستىرۋعا، ينفورماتسيا قاينارىن ءتىپتى دە مولىقتىرۋعا، تىڭدارمانداردى ونان ءارى باۋراۋعا بولاتىندىعىن كورسەتتى. قازىرگى جاعدايدان العاندا 40 قانشا ادامدىق قوسىنىمىز 18 ساعاتتىق بەرىلىم مەن جاڭاعىداي توعىسا دامۋدىڭ تالابىنان تولىق شىعىپ كەتە المايدى، بۇعان قىزمەتكەرلەرىمىزدىڭ جانە جاڭا مەديالار جونىندەگى ءبىلىم قورىمىزدىڭ شەكتىلىگى سەبەپ. سوندىقتان قىزمەتكەرلەردى ىستەي ءجۇرىپ ۇيرەنۋگە، ۇيرەنە ءجۇرىپ جەتىلۋگە شابىتتاندىرىپ كەلەمىز.
«باۋراۋ قۋاتى مەن اسەرلەندىرۋ قۋاتىنا يە سارا تۋىندى جاراتۋدىڭ قاينارى حالىقتىڭ قايناعان ومىرىندە»
ورتالىق حالىق راديو ستانسياسىنىڭ ءتىلشىسى سەرىك راقىم ۇلى بىلاي دەدى: «پارتيانىڭ اقپاراتتىق قوعامدىق پىكىر قىزمەتى جونىندەگى اڭگىمە ماجىلىسىندە» باس شۋجي شي جينپيڭ «ۇنامدى جاقتاعى ۇگىتتىڭ باۋراۋ قۋاتى مەن اسەرلەندىرۋ قۋاتىن ارتتىرۋ كەرەكتىگىن» بايىمدادى، بۇل اقپارات ءتىلشىسى بولعان ءبىز ءۇشىن توتەنشە كۇشتى جەتەكشى باعىت بولدى دەپ ەسەپتەيمىن. ەندەشە، باۋراۋ قۋاتى مەن اسەرلەندىرۋ قۋاتىنا يە سارا تۋىندى جاراتۋدىڭ قاينارى حالىقتىڭ قايناعان ومىرىندە، نەگىزگى ساتىدا. سوندىقتان، ءتىلشى بولعان ءبىز نەگىزگى ساتىداعى حالىق ومىرىنە ىشكەرىلەي ارالاسۋدى ەشقاشان ەسىمىزدەن شىعارۋىمىزعا بولمايدى. حالىقتىڭ ءوندىرىسى مەن تۇرمىسىنان فاكتى ءدال ماتەريال جيناي الساق وقىرمانداردى، تىڭدارمانداردى، كورەرمەندەردى باۋراي الاتىن، اسەرلەندىرە الاتىن سارا تۋىندى جازا الامىز.
راديو تىلشىلەرى جازۋ ستيلىندە، بەينەلەۋ تاسىلىندە جاڭالىق جاساۋعا قۇلشىنۋىمىز كەرەك. راديونىڭ ەرەكشەلىگى دىبىس ارقىلى بەينەلەۋدە جاتىر. بۇرىنعى قاساڭ قاعيدامىزدا ۇزىن - سونار ماقالا جازۋشى ەدىك، ال قازىر بۇل تىڭدارماندى جالىقتىرۋعا اپاراتىن بولدى. مەديالار اراسىنداعى باسەكە كورىگى قىزعان، ءداستۇرلى اقپارات قۇرالدارى مەن جاڭا مەديالار توعىسپالى دامىعان داۋىردە راديو تەزدىگىمەن، قىسقا دا نۇسقالىعىمەن، اقپارات الاڭىن ناق بەينەلەۋىمەن تىڭدارمانىن سول الاڭدا جۇرگەندەي سەزىمگە كەلتىرۋمەن ۇتۋعا ۇمتىلادى. سۇحباتتى ۇيىمداستىرعان: مۇرات ىبىراي ۇلى «شينجياڭ گازەتى»
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
