جۇڭگو شينجياڭ ــ 2015 – جىلعى «بۇكىل التاي» حالىقارالىق سپورت – ساياحات فەستيۆالىنىڭ باستالۋ سالتى وتكىزىلدى

2015.08.10 14:55   كەلۋ قاينارى : حالىق تورابى

　　حالىق تورابى، 10 – تامىز، بەيجيڭ. جۇڭگو شينجياڭ ــ 2015 – جىلعى «بۇكىل التاي» حالىقارالىق سپورت – ساياحات فەستيۆالى كوكتوعاي اۋانىندا سالتاناتپەن باستالدى. جۇڭگونىڭ التاي ايماعى، رەسەيدىڭ التاي شەكارالىق رايونى، التاي رەسپۋبليكاسى، قازاقستاننىڭ شىعىس قازاقستان وبلىسى، موڭعۇليانىڭ قوبدا ايماعى، بايانولگەي ايماعى قاتارلى «ءتورت ەلدەگى 6 ورىننان» كەلگەن 330دان استام سپورتشى 14 ءتۇر بويىنشا جارىسقا قاتىناستى.

　　اشىلۋ سالتىندا التاي ايماقتىق پارتكوم شۋجيىنىڭ ورىنباسارى، ايماق ءۋاليى تالعات ۇسەن ۇلى بىلاي دەدى: 2000 كيلومەترگە سوزىلىپ جاتقان التاي تاۋى جۇڭگو، رەسەي، قازاقستان، موڭعۇليا سىندى ءتورت ەل دوستىعىنىڭ ماڭىزدى كوپىرى جانە دانەكەرى . جۇڭگو شينجياڭ التاي ايماعى التاي تاۋى توڭىرەگىندەگى ءوڭىردىڭ ماڭىزدى قۇرامداس بولەگى، «التىن تاۋ، كۇمىس سۋ» دەگەن اتاعى بار، بايلىعى مول، وڭىرلىك ەرەكشەلىككە يە، باسىمدىلىعى ايقىن. جۋىرداعى جىلداردان بەرى، التاي ايماعىنىڭ التاي تاۋى توڭىرەگىندەگى ءارقايسى جاقتارمەن دوستىق بارىس – كەلىسى بارعان سايىن جيىلەپ، قارىم – قاتىناسى بارعان سايىن مىعىمدانىپ كەلەدى.

　　جۇڭگو شينجياڭ ــ 2015 – جىلعى «بۇكىل التاي» حالىقارالىق سپورت – ساياحات فەستيۆالىنىڭ التاي ايماعىندا ءساتتى وتكىزىلۋى التاي تاۋى توڭىرەگىندەگى وڭىرلەردىڭ دوستىعىن تەرەڭدەتۋگە، قارىم – قاتىناستارىن نىعايتۋعا، اناعۇرلىم كەڭ ءورىس اشۋعا پايدالى ءارى وسى رەتكى حالىقارالى سپورت – ساياحات فەستيۆالىن باستاما ەتە وتىرىپ، التاي تاۋى توڭىرەگىندەگى وڭىرلەرمەن تىعىز قارىم قاتىناستا بولىپ، ەكونوميكا، مادەنيەت، گۋمانيتارلىق، شەكارا اتتاعان ساياحات قاتارلى سالالاردا اناعۇرلىم ناقتى دا تىعىز سەلبەستىك ورىستەتۋدى ءۇمىت ەتەمىز.

　　كەلۋ قاينارى: حالىق تورابى