14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى مەملەكەتتىڭ جاڭا كەزەكتى باسشىلارىن سايلاپ شىقتى
شي جينپيڭ مەملەكەتتىڭ ءتوراعالىعىنا، ورتالىق اسكەري ىستەر كوميتەتىنىڭ ءتوراعالىعىنا تولىق داۋىسپەن سايلاندى
جاۋ لىجي مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا سايلاندى، حان جىڭ مەملەكەتتىڭ ورىنباسار ءتوراعالىعىنا سايلاندى، جاڭادان سايلانعان مەملەكەت باسشىلارى نەگىزگى زاڭ الدىندا سەرت بەردى، ءماجىلىس مەملەكەتتىك كەڭەس قۇرىلىمدارىنا رەفورما جاساۋ جوباسىن بەكىتتى
2023.03.11 15:17 كەلۋ قاينارى : حالىق تورابى
 |
جۇڭحۋا حالىق رەسپۋبليكاسىنىڭ ءتوراعاسى
جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى
شي جينپيڭ
|
شينحۋا اگەنتتىگى، 3 - ايدىڭ 10 - كۇنى، بەيجيڭ. 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى 3 - ايدىڭ 10 - كۇنى تۇستەن بۇرىن شي جينپيڭدى جۇڭحۋا حالىق رەسپۋبليكاسىنىڭ ءتوراعالىعىنا، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلادى.
وسى سايلاۋ ناتيجەسى جاريالانعان كەزدە بۇكىل زالدى ۇزاققا دەيىن شاتىرلاعان شاپالاق ءۇنى كەرنەدى.
جيىن سونىمەن بىرگە جاۋ لىجيدى 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا، حان جىڭدى جۇڭحۋا حالىق رەسپۋبليكاسىنىڭ ورىنباسار ءتوراعالىعىنا سايلادى.
تۇستەن بۇرىن ساعات 9 دا 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ ءۇشىنشى جالپى جيىنى حالىق سارايىندا وتكىزىلدى.
شي جينپيڭ، لي چياڭ، جاۋ لىجي، ۋاڭ حۋنيڭ، حان جىڭ، ساي چي، ديڭ شۋەشياڭ، لي شي قاتارلىلار جيىنعا قاتىناستى.
جيىنعا قاتىناسۋعا ءتيىستى ۋاكىل 2977 ادام، قاتىناسقان ۋاكىل 2952 ادام، 25 ادام قاتىناسا المادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
جيىندى ءماجىلىستىڭ اتقارۋشى ءتوراعاسى، ءتوراعالار القاسىنىڭ تۇراقتى ءتوراعاسى لي گانجيە باسقاردى. ءماجىلىستىڭ اتقارۋشى ءتوراعالارى ۋاڭ جۇنجىڭ، ۋاڭ مىڭحۇي، شۇي چين، شىن شياۋميڭ، جوۋ زۋ - ي، جىڭ جيانمين، لياڭ يانشۇن، يۇي يۇنلين، لان فۋ - ان ءتوراعالار مىنبەسىنىڭ اتقارۋشى ءتوراعالار ورنىنا جايعاستى.
جيىن الدىمەن 14 - كەزەكتى مەملەكەتتىك حالىق قۇرىلتايى 1 – ءماجىلىسىنىڭ مەملەكەتتىك كەڭەس قۇرىلىمدارىنا رەفورما جاساۋ جوباسى جونىندەگى قاۋلىسىن داۋىسقا سالىپ ماقۇلداپ، وسى جوبانى بەكىتتى. جيىن مىنانى تالاپ ەتتى: مەملەكەتتىك كەڭەس پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىندا تاباندى بولىپ، ەگجەي - تەگجەيلى ورنالاستىرىپ، دەن قويا ۇيىمداستىرىپ، مەملەكەتتىك كەڭەس قۇرىلىمدارىنا رەفورما جاساۋ مىندەتىن ورىنداۋعا كەپىلدىك ەتۋى كەرەك.
جيىن 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ سايلاۋ جانە مىندەتكە تاعايىنداۋدى ۇيعارۋ ءادىسىن داۋىسقا سالىپ ماقۇلدادى.
جيىنعا قاتىناسقان ۋاكىلدەر داۋىسقا سالۋ ارقىلى 35 ۋاكىلدەن قۇرالعان باس بەلەت باقىلاۋشىلاردىڭ، بەلەت باقىلاۋشىلاردىڭ ەسىمدىگىن ماقۇلدادى. شى شياۋلين، لين حۇڭ باس بەلەت باقىلاۋشىلار بولدى.
ساعات 9 دان 27 مينۋت وتكەندە سايلاۋ رەسمي باستالدى. بەلەت باقىلاۋشىلار الدىمەن جيىن زالىنا قويىلعان 28 ەلەكتروندىق بەلەت ساندىعىنا، ەلەكتروندىق سايلاۋ جۇيەسىنە تەكسەرۋ جۇرگىزدى. ىلە - شالا قىزمەتكەرلەر سايلاۋ بەلەتىن تاراتا باستادى. 4 ءتۇرلى رەڭدەگى سايلاۋ بەلەتى ءاربىر ۋاكىلگە تاراتىلدى. سايلاۋ بەلەتى مەملەكەتتە ءبىر تۇتاس قولدانىلاتىن جازۋمەن جانە 7 ءتۇرلى از ۇلت جازۋىمەن باسىلدى.
وسىدان سوڭ ۋاكىلدەر بەلەت تولتىرا باستادى. جيىن زالىنىڭ ارتقى جاعىنا قۇپيا بەلەت تولتىرۋ ورنى ورنالاستىرىلدى.
سايلاۋ جانە مىندەتكە تاعايىنداۋدى ۇيعارۋ ءادىسى بويىنشا، جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى، 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى، باستىعىنىڭ ورىنباسارلارى، باس حاتشىسى، جۇڭحۋا حالىق رەسپۋبليكاسى ءتوراعاسىنىڭ ورىنباسارى تەڭ سانمەن سايلانادى.
ساعات 9 دان 51 مينۋت وتكەندە باس بەلەت باقىلاۋشىلار، بەلەت باقىلاۋشىلار الدىمەن بەلەت تاستادى. ونان سوڭ ۋاكىلدەر بەلەت تاستاي باستادى. بەلەت تاستاۋ اياقتاعان سوڭ باس بەلەت باقىلاۋشىلار سايلاۋ بەلەتىنىڭ تاراتىلۋ جانە جينالۋ جاعدايىن ايتىپ، سايلاۋدىڭ كۇشكە يە بولعانىن مالىمدەدى.
قىزمەتكەرلەر بەلەت ساناۋ ناتيجەسىن وقىدى.
بەلەت ساناۋ ناتيجەسى مەملەكەت ءتوراعاسىن، ورتالىق اسكەري ىستەر كوميتەتىنىڭ ءتوراعاسىن سايلاۋدا شي جينپيڭنىڭ بارلىق 2952 قۇپتاۋ بەلەتىنە يە بولعانىن كورسەتتى. بۇكىل زالداعىلار ورىندارىنان تۇرىپ، قىزۋ شاپالاق سوقتى.
باسقارۋشى بىلاي دەپ جاريالادى:
شي جينپيڭ جولداس جۇڭحۋا حالىق رەسپۋبليكاسىنىڭ ءتوراعالىعىنا سايلاندى.
شي جينپيڭ ۋاكىلدەرگە ءيىلىپ ىززەت ءبىلدىردى، بارلىق ۋاكىل ۇزاق ۋاقىت قىزۋ شاپالاق سوعىپ، شي جينپيڭگە قۇرمەت ءبىلدىردى. قاسىندا تۇرعان لي جانشۋ، لي چياڭ شي جينپيڭمەن جەكە - جەكە قول الىسىپ، قۇتتىقتادى.
باسقارۋشى شي جينپيڭ جولداستىڭ جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعالىعىنا سايلانعانىن جاريالاعان كەزدە زالدى تاعى ءبىر رەت شاتىرلاعان شاپالاق ءۇنى كەرنەدى، شي جينپيڭ تاعى ءبىر رەت ۋاكىلدەرگە ءيىلىپ ىززەت ءبىلدىردى.
وسىدان سوڭ، باسقارۋشى مىنالاردى كەزەكپەن جاريالادى:
جاۋ لىجي جولداس 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىقتىعىنا سايلاندى.
حان جىڭ جولداس جۇڭحۋا حالىق رەسپۋبليكاسى ءتوراعاسىنىڭ ورىنباسارلىعىنا سايلاندى.
لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭۋەي، لوساڭ جياڭسۇن، شوكىرات زاكىر جولداستار 14 - كەزەكتى مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارلىعىنا سايلاندى.
ليۋ چي جولداس 14 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باس حاتشىلىعىنا سايلاندى.
ءار سايلاۋدىڭ ناتيجەسى جاريالانعان سايىن زالدان شاتىرلاعان شاپالاق ءۇنى كوتەرىلدى.
شاپالاق ءۇنى ىشىندە مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى جاۋ لىجي ورنىنان تۇرىپ، ۋاكىلدەرگە ءيىلىپ قۇرمەت ءبىلدىردى. وسىدان سوڭ ول شي جينپيڭنىڭ قاسىنا بارىپ، ەكەۋى ىقىلاسپەن قول الىستى، شي جينپيڭ ونى قۇتتىقتادى. جاۋ لىجي تاعى 13 - كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى لي جانشۋمەن قول الىسىپ، ءوزارا قۇرمەت ءبىلدىردى.
شاپالاق ءۇنى ىشىندە جاڭادان سايلانعان مەملەكەت ءتوراعاسىنىڭ ورىنباسارى حان جىڭ ورنىنان تۇرىپ، ۋاكىلدەرگە ءيىلىپ قۇرمەت ءبىلدىردى. وسىدان سوڭ ول شي جينپيڭنىڭ قاسىنا بارىپ، ەكەۋى ىقىلاسپەن قول الىستى، شي جينپيڭ ونى قۇتتىقتادى. حان جىڭ تاعى ۋاڭ چيشان جولداسپەن قول الىسىپ، ءوزارا قۇرمەت ءبىلدىردى.
14 - كەزەكتى مەملەكەتتىك حالىق قۇرىلتايى 1 - ءماجىلىسى ءتوراعالار القاسىنىڭ نەگىزگى زاڭ الدىندا سەرت بەرۋ جونىندەگى ۇيىمدىق ءادىسى بويىنشا، جالپى جيىننىڭ كەڭەستىك تارتىپتەرى اياقتاعان سوڭ جۇڭحۋا حالىق رەسپۋبليكاسى 14 - كەزەكتى مەملەكەتتىك حالىق قۇرىلتايى 1 - ءماجىلىسىنىڭ نەگىزگى زاڭ الدىندا سەرت بەرۋ سالتى وتكىزىلدى.
ساعات 11دەن 7 مينۋت وتكەندە جۇڭگو حالىق ازاتتىق ارمياسىنىڭ اسكەري وركەسترى زالدا سەرت بەرۋ دابىلىن قاقتى.
جۇڭگو حالىق ازاتتىق ارمياسى قۇرمەت قاراۋىلى قوسىنىنىڭ 12 قۇرمەت قاراۋىلى ەكى قاتارعا ءبولىنىپ، جيىن زالىنىڭ ارتقى جاعىنان ساپتىق قاداممەن ءجۇرىپ، ءتوراعالار مىنبەسىنىڭ الدىنا كەلىپ تۇردى.
بارلىق ادام ورنىنان تۇردى. ءتوراعالار مىنبەسىندە 3 قۇرمەت قاراۋىلى ساپتىق قاداممەن «جۇڭحۋا حالىق رەسپۋبليكاسىنىڭ نەگىزگى زاڭىن» قاراۋىلداپ الىپ كەلىپ، نەگىزگى زاڭدى سەرت بەرۋ مىنبەرىنىڭ ۇستىنە قويدى.
اسكەري وركەستردىڭ سۇيەمەلدەۋىندە بۇكىل زالداعىلار جۇڭحۋا حالىق رەسپۋبليكاسىنىڭ مەملەكەت گيمنىن اسقاقتاتا شىرقادى.
وسىدان سوڭ قىزمەتكەر بىلاي دەپ جاريالادى: ەندى جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى شي جينپيڭدى سەرت بەرۋگە ۇسىنىس ەتەمىز.
ءتوراعانىڭ ورتاعا شىعۋ دابىلى شالىنىپ، جاڭادان سايلانعان مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءتوراعالار مىنبەسىندەگى ورنىنان تۇرىپ، نىق قاداممەن سەرت بەرۋ مىنبەسىنىڭ الدىنا كەلىپ تۇردى.
ءتوراعالار مىنبەسىنىڭ تورىنە ىلىنگەن مەملەكەت گەربى شۇعىلا شاشىپ تۇردى. زالداعى مەملەكەتتىك حالىق قۇرىلتايىنىڭ 3000 عا جۋىق ۋاكىلى وسىناۋ قاسيەتتى ساتكە بىرگە كۋا بولدى.
شي جينپيڭ سول قولىن نەگىزگى زاڭنىڭ ۇستىنە قويىپ، وڭ قولىن كوتەرىپ جۇدىرىعىن ءتۇيىپ، ايبىندى سەرت بەردى.
”مەن مىنانى سەرت ەتەمىن: جۇڭحۋا حالىق رەسپۋبليكاسىنىڭ نەگىزگى زاڭىنا ادال بولامىن، نەگىزگى زاڭنىڭ بەدەلىن قورعايمىن، زاڭدا بەلگىلەنگەن قىزمەت مىندەتىمدى اتقارامىن، وتانعا ادال بولامىن، حالىققا ادال بولامىن، ءوز قىزمەتىمدى بايىپتى، مۇقيات، جاقسى ىستەپ، پاك ءارى كوپشىل بولىپ، حالىقتىڭ باقىلاۋىن قابىلدايمىن، باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان قۇدىرەتتى مەملەكەت قۇرۋ ءۇشىن قۇلشىنا كۇرەسەمىن! “
سەرتتىڭ ءور داۋىسى حالىق سارايىن جاڭعىرتتى.
سەرت بەرۋ اقىرلاسقان سوڭ شي جينپيڭ زالداعىلارعا ءيىلىپ ىززەت ءبىلدىردى. زالدى ۇزاققا دەيىن شاتىرلاعان شاپالاق ءۇنى كەرنەدى.
وسىدان سوڭ مەملەكەتتىك حالىق قۇرىلتايى تۇراقتى كوميتەتىنىڭ جاڭادان سايلانعان باستىعى جاۋ لىجي، جاڭادان سايلانعان مەملەكەت ءتوراعاسىنىڭ ورىنباسارى حان جىڭ نەگىزگى زاڭ الدىندا جەكە - جەكە سەرت بەردى، جاڭادان سايلانعان مەملەكەتتىك حالىق قۇرىلتايى تۇراقتى كوميتەتىنىڭ باستىعىنىڭ ورىنباسارلارى، باس حاتشىسى نەگىزگى زاڭ الدىندا توپتىق سەرت بەردى.
 |
3 - ايدىڭ 10 - كۇنى 14 - كەزەكتى مەملەكەتتىك حالىق قۇرىلتايىنىڭ 1 - ءماجىلىسى بەيجيڭدەگى حالىق سارايىندا ءۇشىنشى جالپى جيىنىن وتكىزدى. شي جينپيڭ تولىق داۋىسپەن جۇڭحۋا حالىق رەسپۋبليكاسىنىڭ ءتوراعاسى، جۇڭحۋا حالىق رەسپۋبليكاسى ورتالىق اسكەري ىستەر كوميتەتىنىڭ ءتوراعاسى بولىپ سايلاندى. سۋرەتتە: شي جينپيڭ نەگىزگى زاڭعا سەرت بەرۋدە. سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
|
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
