اۋرۋدان ساقتانۋ – تىزگىندەۋ قۇرىلىمدارى كوكتەم، جاز مەزگىلىندە بالالاردا بولاتىن قول - اياققا، اۋىز قۋىسىنا شىعاتىن سۋلى بورتكەن اۋرۋىنان ساقتانۋدى ەسكەرتتى
2023.04.04 15:39 كەلۋ قاينارى : حالىق تورابى
3 – ايدا ەلىمىزدىڭ كوپ ءبولىم وڭىرلەرىندە اۋا تەمپەراتۋراسى جالعاستى جوعارىلادى. جۇڭگو اۋرۋدان ساقتانۋ – تىزگىندەۋ ورتالىعى جۋىردا دەنساۋلىققا ساياتىن ەسكەرتۋ جاريالادى، ءار جىلى 4 – ايدان 6 – ايعا دەيىنگى كوكتەم، جاز مەزگىلى بالالاردا بولاتىن قول - اياققا، اۋىز قۋىسىنا شىعاتىن سۋلى بورتكەن اۋرۋى ءجيى تۋىلاتىن مەزگىلى ەكەنىن، اۋرۋدان ساقتانۋدى ويداعىداي ىستەۋ كەرەك ەكەنىن ەسكەرتتى.
قول - اياققا، اۋىز قۋىسىنا شىعاتىن سۋلى بورتكەن اۋرۋى — كوپ ءتۇرلى ىشەك جولى ۆيرۋسىنان جۇعىمدالۋ سەبەبىنەن تۋىندايتىن، بالالاردا ۇنەمى كەزدەسەتىن جۇقپالى اۋرۋ، بەس جاستاعى جانە ودان تومەنگى جاستاعى سابيلەردە، نارەستەلەردە وڭاي بايقالادى، ءبىر جاستان ەكى جاسقا دەيىنگى بالالاردا اۋرۋعا شالدىعۋ مولشەرى ەڭ جوعارى بولادى. اۋرۋدان ساقتانۋ – تىزگىندەۋ قۇرىلىمدارىنىڭ باقىلاۋىنا قاراعاندا، ادەتتە ءار جىلى 3 – ايدىڭ سوڭعى شەنىنەن باستاپ، اۋرۋدىڭ تارالۋ مولشەرى بىرتىندەپ جوعارىلايدى.
بالالاردا بولاتىن قول - اياققا، اۋىز قۋىسىنا شىعاتىن سۋلى بورتكەن اۋرۋىنىڭ قانداي كلينيكالىق بەلگىلەرى بولاتىنىنا ءبىر بولىم اتا – انالار توتەنشە نازار اۋدارادى. جۇڭگو اۋرۋدان ساقتانۋ – تىزگىندەۋ ورتالىعى جۇقپالى اۋرۋلاردان ساقتانۋ باسقارماسى جاريالاعان مالىمەتكە قاراعاندا، قول - اياققا، اۋىز قۋىسىنا شىعاتىن سۋلى بورتكەن اۋرۋىنىڭ جاسىرىن مەزگىلى 2 دە 10 كۇن بولادى، كوپتەگەن ناۋقاستاردا قىزۋى ورلەۋ، اۋىز قۋىسىنىڭ كىلەگەيلى قابىعىنا بىتىراڭعى ۇشىق شىعۋ، قول، اياق جانە جامباس بولىمىنە بورتكەن شىعۋ قاتارلى باستى اۋرۋ بەلگىلەرى بايقالادى، جوتەلۋ، ماڭقا اعۋ، تاماققا تابەتى تارتپاۋ قاتارلى اۋرۋ بەلگىلەرى دە قوسانجارلايدى. ادەتتە اۋرۋ ءبىرشاما جەڭىل بولادى، 7 دە 10 كۇننەن سوڭ تولىق جازىلادى. الايدا، ەگەر اۋىرعان بالانىڭ قىزۋى ۇزدىكسىز ورلەسە نەمەسە قول – اياعى قالتىراۋ، تارتىسۋ قاتارلى اۋىر اۋرۋ بەلگىلەرى بايقالسا، دەر كەزىندە ەمحاناعا اپارىپ ەمدەتۋ كەرەك.
اۋرۋدان ساقتانۋ – تىزگىندەۋ قۇرىلىمدارىنىڭ ەسكەرتۋىنشە، قول - اياققا، اۋىز قۋىسىنا شىعاتىن سۋلى بورتكەن اۋرۋىنان ساقتانۋدا مىناداي بىرنەشە ءتۇيىندى ويداعىداي ىستەۋ كەرەك: بىرىنشىدەن، قولدىڭ تازالىعىن جاقسى ساقتاۋ قاجەت، بالا الەۋمەتتىك ورىنداعى زاتتاردى قولىمەن ۇستاعان سوڭ، دارەتحاناعا بارعان سوڭ، تاماقتانار الدىندا تازا سۋمەن نەمەسە سابىنمەن قولىن دۇرىستاپ جۋۋ كەرەك؛ ەكىنشىدەن، قول - اياققا، اۋىز قۋىسىنا شىعاتىن سۋلى بورتكەن اۋرۋىنا شالدىققان بالانى وتباسىندا اۋاشالاپ ەمدەپ، ايقاسپالى جۇعىمدالۋدان ساقتانعان ءجون؛ ۇشىنشىدەن، وتباسى ورتاسىنىڭ تازالىعىن ساقتاپ، ۇنەمى اۋا الماستىرىپ، كيىم – كەشەكتى، كورپە – جاستىقتى ۇنەمى كۇنگە جايۋ قاجەت؛ تورتىنشىدەن، سابيلەر، نارەستەلەر جانە بالالار پايدالانعان ەمىزدىكتى قۇمىرا، ىدىس – اياق قاتارلىلاردى پايدالانۋدىڭ الدى – ارتىندا تازالاپ جۋىپ، ديزەنفەكسيالاعان ءجون.
مامانداردىڭ ايتۋىنشا، ىشەك جولى ۆيرۋسىنىڭ جانسىزداندىرىلعان ۆاكسيناسىن ەگۋ ارقىلى ىشەك جولى ۆيرۋسىنان تۋىندايتىن قول - اياققا، اۋىز قۋىسىنا شىعاتىن سۋلى بورتكەن اۋرۋى مەن باسقا دا قاتىستى اۋرۋلاردان ءونىمدى ساقتانۋعا بولادى، 6 ايعا تولعان بالاعا 12 ايعا تولۋدان بۇرىن ۆاكسينانى تولىق ەگىپ بولعان ەڭ دۇرىس. سونىمەن بىرگە، قول - اياققا، اۋىز قۋىسىنا شىعاتىن سۋلى بورتكەن اۋرۋى تارالعان كەزدە بالانى ادامدار توپتالعان جەرلەرگە، اۋا الماسپايتىن الەۋمەتتىك ورىندارعا اپارۋدان مۇمكىندىگىنشە ساقتانعان ءجون. (ءتىلشى گۋ تيانچىڭ)
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
