شي جينپيڭ فرانسيانىڭ زۇڭتۇڭى ماكرونمەن كەڭەس وتكىزدى

2023.04.07 16:45 كەلۋ قاينارى : حالىق تورابى

　　شينحۋا اگەنتتىگى، 4 - ايدىڭ 6 - كۇنى، بەيجيڭ (ءتىلشى ليۋ حۋا). 4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن فرانسيانىڭ زۇڭتۇڭى ماكرونمەن كەڭەس وتكىزدى.

　　شي جينپيڭ ماكروننىڭ جۇڭگوعا تاعى دا ساپارلاي كەلگەنىن قارسى الدى. شي جينپيڭ بىلاي دەپ اتاپ كورسەتتى: قازىر دۇنيە ءجۇزى تەرەڭ تاريحي وزگەرىستى باستان كەشىرۋدە، جۇڭگو مەن فرانسيا بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلدەرى جانە دەربەس، ءوز - وزىنە قوجا بولۋ داستۇرىنە يە ءىرى ەلدەر رەتىندە، دۇنيە ءجۇزىنىڭ كوپ ۇيەكتەنۋىن، حالىقارالىق قارىم - قاتىناستىڭ دەموكراتيالانۋىن باتىل ىلگەرىلەتۋشى رەتىندە، الاۋىزدىقتار مەن بۇعاۋلاردان اسىپ ءتۇسىپ، جۇڭگو مەن فرانسيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ زور بەتالىسىندا تاباندى بولىپ، ناعىز كوپ جاقتىلىقتى امالياتتا ايگىلەپ، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن قورعاۋعا قابىلەتتى، جاۋاپكەرلىگى بار.

　　شي جينپيڭ جۇڭگو - فرانسيا قارىم - قاتىناسىنىڭ بەلسەندى، ورنىقتى دامۋ ارىنىن جالعاستىرعانىنا بەلسەندى باعا بەرىپ، بىلاي دەپ دارىپتەپ اتاپ كورسەتتى: ورنىقتىلىق − جۇڭگو - فرانسيا قارىم - قاتىناسىنىڭ كورنەكتى ەرەكشەلىگى جانە باعالى بايلىعى، ەكى جاقتىڭ دەن قويا قورعاۋىنا تاتيدى. ەكى جاق ەكى ەلدىڭ جان - جاقتى، جوعارى دەڭگەيدەگى قارىم - قاتىناس ارناسىنان ويداعىداي پايدالانىپ، ەكى ەل باسشىلارىنىڭ ءجيى بارىس - كەلىسىن جالعاستىرۋى كەرەك، بيىل جىل ىشىندە جۇڭگو - فرانسيا ستراتەگياسى، ەكونوميكا - قازىناسى، گۋمانيتارلىق اۋىس - كۇيىسى سىندى 3 ءىرى جوعارى دارەجەلى كەڭەس مەحانيزمىنىڭ جاڭا كەزەكتى ءماجىلىسى وتكىزىلەدى. ەكى جاق ءبىر - ءبىرىنىڭ يەلىك ۇقىعى مەن تەرريتوريا تۇتاستىعىنا، ءبىر - ءبىرىنىڭ وزەكتى مۇددەسىنە قۇرمەت ەتىپ، الاۋىزدىقتاردى ۇيلەسىمدى ءبىر جاقتى ەتۋى كەرەك. ءوزارا پايدا جەتكىزۋدە، بىرگە دامۋدا تاباندى بولۋ كەرەك. جۇڭگو ساپالى دامۋ مەن جوعارى دەڭگەيدە ەسىك اشۋدى زور كۇشپەن ىلگەرىلەتۋدە، بۇل فرانسيا جاققا اناعۇرلىم كەڭ بازار ورايىن ازىرلەيدى. جۇڭگو فرانسيامەن اۋىل شارۋاشىلىعى، ازىق - تۇلىك، اۆياتسيا، عارىش، حالىقتىق يادرو ەنەرگياسى سياقتى سالالارداعى سەلبەستىكتى تەرەڭدەتىپ، قىزمەت وتەۋ ساۋداسى، جاسىل دامۋ، عىلىم - تەحنيكادا جاڭالىق اشۋ سياقتى جاڭا سەلبەستىكتىڭ ارتۋ تۇيىندەرىن جەتىلدىرىپ، ەكى جاقتىڭ كومىر قىشقىل گازىن بەيتاراپتاندىرۋ ورتالىعىن بىرگە قۇرۋىنا، دارىندىلاردى بىرلەسىپ باۋلۋدى كۇشەيتۋىنە قولداۋ كورسەتۋدى قالايدى. فرانسيانىڭ 2024 - جىلعى جۇڭگو حالىقارالىق قىزمەت وتەۋ ساۋدا جارمەڭكەسى جانە 7 - كەزەكتى جۇڭگو حالىقارالىق يمپورت كورمەسىنىڭ نەگىزگى قوناق ەلى بولۋىن قارسى الامىز. فرانسيانىڭ جۇڭگو كاسىپورىندارىنا ءادىل، ادىلەتتى، كەمسىتپەيتىن تيجارات - ساۋدا ورتاسىن ازىرلەۋىن ءۇمىت ەتەمىن. جۇڭگو جاق فرانسيا جاقپەن كەلەر جىلى جۇڭگو مەن فرانسيانىڭ ديپلوماتيالىق قارىم - قاتىناس ورناتقانىنىڭ 60 جىلدىعىن جانە جۇڭگو - فرانسيا مادەنيەت، ساياحات جىلىن، پاريج وليمپيادا سپورت جارىسىن وراي ەتىپ، قاتىستى سالالارداعى سەلبەستىكتى كۇشەيتۋدى قالايدى.

　　شي جينپيڭ بىلاي دەپ دارىپتەدى: جۇڭگو جاق ۇزدىكسىز ەسىك اشۋ پوزيتسياسىمەن فرانسيا جاقپەن بىرلەسكەن مەملەكەتتەر ۇيىمى، 20 ەل توبى، دۇنيە جۇزىلىك ساۋدا ۇيىمى سياقتى كوپ جاقتى مەحانيزمدە تىعىز بايلانىستى جانە سايكەسۋدى جالعاستىرىپ، ناعىز كوپ جاقتىلىقتى بىرگە امالياتتا ايگىلەپ، كليمات وزگەرىسى، ەنەرگيا ماسەلەسى سياقتى دۇنيە جۇزىلىك سىن - سايىسقا قول ۇستاسا توتەپ بەرۋدى قالايدى. جۇڭگو جاق فرانسيا جاقتىڭ 2025 - جىلعى بىرلەسكەن مەملەكەتتەر ۇيىمىنىڭ تەڭىز - مۇحيت جينالىسىن ويداعىداي وتكىزۋىن قولدايدى، فرانسيا جاقتىڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلى باسشىلار تالقى مىنبەرىنە قاتىناسۋىن قارسى الادى.

　　شي جينپيڭ بىلاي دەپ دارىپتەدى: دۇنيە جۇزىندەگى ەكى ۇلكەن كۇش، ەكى ۇلكەن بازار، ەكى ۇلكەن وركەنيەت رەتىندە، جۇڭگو - ەۆروپا قارىم - قاتىناسى ەكى جاقتىڭ ىرىس - قۇتىنا، بۇكىل دۇنيە ءجۇزىنىڭ ورنىقتىلىعىنا جانە گۇلدەنۋىنە سايادى. جۇڭگو ەۆروپاعا قاراتىلعان ساياساتىن ۇزاق ۋاقىت ورنىقتى جالعاستىرىپ، ەۆروپانى باستان - اياق كوپ ۇيەكتەنگەن دۇنيە جۇزىندەگى دەربەس ءبىر ۇيەك دەپ قارايدى، جۇڭگو - ەۆروپا قارىم - قاتىناسىنىڭ ءۇشىنشى جاققا باعىتتالماۋىندا، يەك سۇيەمەۋىندە، شەكتەمەسىنە ۇشىراماۋىندا تاباندى بولادى. جۇڭگو جاق ەۆروپا وداعى جاقپەن بيىل جۇڭگونىڭ ەۆروپا وداعىمەن جالپى بەتتىك ستراتەگيالىق سەرىكتەستىك قارىم - قاتىناس ورناتقانىنىڭ 20 جىلدىعىن وراي ەتىپ، اۋىس - كۇيىستى، كەڭەسۋدى جالپى بەتتىك قايتا باستاپ، جۇڭگو مەن ەۆروپا وداعىنىڭ دوستىق سەلبەستىك نەگىزگى ارناسىن بەكەمدەپ، ورنىقتى، ءوزارا سەنىم ارتاتىن قامداۋ تىزبەگى سەرىكتەستىك قارىم - قاتىناسىن ورناتۋدى اقىلداسىپ، ءوزارا تيىمدىلىك جەتكىزىپ، تەڭ يگىلىككە كەنەلۋدى جۇزەگە اسىرۋدى قالايدى. فرانسيا جاقتىڭ بەلسەندى جەتەكشىلىك رولىن ساۋلەلەندىرۋىن ءۇمىت ەتەمىن.

　　ماكرون مىنالاردى ءبىلدىردى: 3 جىلدان استام ۋاقىتتىڭ الدىنداعى جۇڭگوعا ساپارلاي كەلگەن كەزىم ءالى ەسىمدە، جۇڭگوعا تاعى دا ساپارلاي كەلگەنىمە ايرىقشا قۋانىشتامىن، ءتوراعا شي جينپيڭمەن بىرگە فرانسيا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن ونان ارى جوعارىلاتۋ جونىندە اقىلداسامىن. مەن ءتوراعا شي جينپيڭنىڭ فرانسيا - جۇڭگو قارىم - قاتىناسى جونىندەگى بەلسەندى باعاسىن جانە ەكى جاقتى قارىم - قاتىناستى دامىتۋ جونىندە العا قويعان ماڭىزدى ۇسىنىستارىن بۇكىلدەي قۇپتايمىن. كەلەر جىلى فرانسيا مەن جۇڭگو ديپلوماتيالىق قارىم - قاتىناس ورناتۋدىڭ 60 جىلدىعىن بىرگە قۇتتىقتايدى. 60 جىلدان بەرى فرانسيا مەن جۇڭگونىڭ قارىم - قاتىناسى ورنىقتى، اقاۋسىز دامىدى. فرانسيا مەن جۇڭگونىڭ دامۋ ۇلگىسى ۇقساماعانىمەن، ەكى جاق ءوزارا قۇرمەت ەتىپ، بۇكپەسىز اۋىس - كۇيىس جاساپ، ءار سالاداعى سەلبەستىكتە ءوزارا پايدا جەتكىزىپ، ءوزارا تيىمدىلىك جاساۋدى جۇزەگە اسىردى، سونىمەن بىرگە، بۇگىنگى دۇنيە ءجۇزى ءدوپ كەلىپ وتىرعان دۇنيە جۇزىلىك سىن - سايىسقا سەلبەسە توتەپ بەرۋ جاعىندا ماڭىزدى ىلگەرىلەۋشىلىككە قول جەتكىزدى. فرانسيا جاق ءبىر جۇڭگو ساياساتىنا قۇرمەت ەتەدى ءارى ونى اتقارادى. وسى رەت كولەمدى ۋاكىلدەر ۇيىرمەسىن باستاپ جۇڭگوعا ساپارلاي كەلۋدەگى ماقساتىم − جۇڭگو جاقپەن سەلبەستىكتى كۇشەيتىپ، گۋمانيتارلىق اۋىس - كۇيىستى جەبەۋ. فرانسيا جاق جۇڭگو جاقتىڭ كۇنميڭ - مونترەال «ورگانيزمدەردىڭ الۋان تۇرلىلىگى شارتىن» جاساسۋشى جاقتاردىڭ 15 - رەتكى جينالىسىن ءساتتى وتكىزگەنىن قۇتتىقتايدى، كليمات وزگەرىسى، استىق حاۋىپسىزدىگى سياقتى ماسەلەلەردە جۇڭگو جاقپەن ۇزدىكسىز تىعىز بايلانىس جاساۋدى، سەلبەسۋدى ءۇمىت ەتەدى. جۇڭگو جاق 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن وتكىزەدى، فرانسيا جاق جۇڭگو جاقپەن وسى جونىندە سەلبەستىك ورىستەتۋدى قالايدى. فرانسيا جاق جۇڭگو جاقتىڭ باستان - اياق بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتىنا بويسۇنىپ، حالىقارالىق، وڭىرلىك قولامتالى ماسەلەلەردى شەشۋدە بەلسەندى رول اتقارعانىن القايدى، جۇڭگو جاقپەن تىعىز بايلانىس جاساپ، سەلبەسىپ، دۇنيە ءجۇزىنىڭ باياندى بەيبىتشىلىگى مەن ورنىقتىلىعىن قۇلشىنا جۇزەگە اسىرۋدى كۇتەدى.

　　ماكرون مىنانى ءبىلدىردى: فرانسيا دەربەس، ءوز - وزىنە قوجا بولۋ ديپلوماتياسىندا تاباندى بولىپ، ەۆروپانىڭ ستراتەگيالىق دەربەستىگىن دارىپتەيدى، قاراما - قارسىلىققا، بولشەكتەنۋگە، توپ قۇرىپ قارسىلاسۋعا قارسى تۇرادى. فرانسيا سىبايلاستىق قاتارعا تۇرمايدى، قايتا ىنتىماقتاسۋدى، سەلبەسۋدى دارىپتەيدى، ءىرى ەلدەرمەن قارىم - قاتىناستا تۇراقتىلىقتى ساقتايدى. فرانسيا جاق جۇڭگو جاقپەن بۇكپەسىز، ىشكەرىلەي قارىم - قاتىناستى جالعاستىرىپ، ءوزارا سەنىمدىلىكتى ارتتىرىپ، پارىقتاردى ساقتاپ، ورتاقتىققا ۇمتىلىپ، اشىق سەلبەستىك ورناتۋدى قالايدى. فرانسيا جاق ەۆروپا - جۇڭگو قارىم - قاتىناسىنىڭ دامۋىن بەلسەنە ىلگەرىلەتۋگە پەيىل.

　　ەكى ەل باسشىلارى ۋكراينا داعدارىسى جونىندە پىكىر الماستىردى. شي جينپيڭ بىلاي دەپ دارىپتەدى: جۇڭگو جاقتىڭ ۋكراينا ماسەلەسىندەگى تۇرعىسى باستان - اياق بەكەم، ايقىن بولىپ كەلەدى، مۇنىڭ وزەگى − تاتۋلاستىرۋدى، كەڭەسۋدى جەبەۋ، ساياسي جولمەن شەشۋ. داعدارىستى شەشۋدىڭ وڭاي جولى جوق، ءار جاقتىڭ وزىنەن باستاپ ىسكە كىرىسىپ، ءوزارا سەنىمدىلىكتى ارتتىرۋ ارقىلى سوعىستى توقتاتۋعا جانە كەڭەسۋگە شارت - جاعداي جاراتۋىن قاجەت ەتەدى. جۇڭگو جاق ەۆروپا جاقتىڭ داعدارىستى ساياسي جولمەن شەشۋدە رولىن ساۋلەلەندىرۋىن قولدايدى، فرانسيا جاقپەن بىرگە حالىقارالىق قوعامدى ۇستامدىلىقتى ساقتاۋعا، داعدارىستى ونان ارى ۋشىقتىراتىن، ءتىپتى، مەڭگەرۋسىز كەتىرەتىن ارەكەت قولدانۋدان ساقتانۋعا، حالىقارالىق ادامگەرشىلىك قاعيداسىنا قاتاڭ بويسۇنىپ، جاي حالىق پەن حالىقتىق قۇرىلعىلارعا تۇتقيىل شابۋىل جاساۋدان ساقتانۋعا، ايەلدەر، بالالار سياقتى قاقتىعىستىڭ زيانكەستىگىنە ۇشىراۋشىلاردى قورعاۋعا ۇندەيدى؛ يادرولىق قارۋلاردى ىستەتۋگە بولمايدى، يادرولىق سوعىستاردى جۇرگىزۋگە بولمايدى دەگەن ۋادەنى شىنايى اتقارىپ، ءارقانداي جاعدايدا بيوحيميالىق قارۋلاردى ىستەتۋگە قارسى تۇرۋ، يادرولىق ەلەكتر ستانسياسى سياقتى حالىقتىق يادرو قۇرىلعىلارىنا قارۋلى كۇشپەن شابۋىل جاساۋعا قارسى تۇرۋ؛ بەيبىتشىلىك كەلىسسوزىن تەز ارادا قايتا باستاپ، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىنە ساي، ءار جاقتىڭ ۇيلەسىمدى حاۋىپسىزدىك ماسەلەسىنە تەڭ ءمان بەرىپ، ساياسي جولمەن شەشۋدى قاراستىرىپ، ەۆروپانىڭ بىركەلكى، ءونىمدى، باياندى حاۋىپسىزدىك جۇلگەسىن ورناتۋ؛ ۋكراينا داعدارىسىنىڭ استىق، ەنەرگيا، فينانس، قاتىناس سياقتى سالالارداعى سىرتقى اسەرىنە سەلبەسىپ توتەپ بەرىپ، ۋكراينا داعدارىسىنىڭ دۇنيە جۇزىنە، اسىرەسە، قالىڭ وركەندەپ كەلە جاتقان ەلدەرگە جاسايتىن كەرى ىقپالىن ازايتۋ كەرەك. جۇڭگو جاق فرانسيا جاقپەن وسى جونىندە بايلانىستى ساقتاپ، داعدارىستى ساياسي جولمەن شەشۋدە سىندارلى رول اتقارۋدى قالايدى.

　　ماكرون فرانسيا جاقتىڭ كوزقاراسىن تانىستىرىپ، جۇڭگو جاقتىڭ ۋكراينا داعدارىسىن ساياسي جولمەن شەشۋدە اتقارعان ماڭىزدى رولىن القادى، فرانسيا جاقتىڭ ساياسي كەلىسسوزدى قايتا باستاۋدى دارىپتەپ، داعدارىستى ديپلوماتيالىق تاسىلمەن شەشىپ، ەۆروپانىڭ باياندى بەيبىتشىلىگىن جۇزەگە اسىرۋدى دارىپتەيتىنىن، جۇڭگو جاقپەن بايلانىستى كۇشەيتىپ، بەيبىتشىلىك ءۇشىن ورتاق قۇلشىنۋدى ءۇمىت ەتەتىنىن ءبىلدىردى.

　　كەڭەستەن كەيىن ەكى ەلدىڭ مەملەكەت باسشىلارى اۋىل شارۋاشىلىعى، ازىق - تۇلىك، عىلىم - تەحنيكا، اۆياتسيا، حالىقتىق يادرو ەنەرگياسى، باياندى دامۋ، مادەنيەت سياقتى سالالارداعى كوپتەگەن ەكى جاقتى سەلبەستىك قۇجاتىنا قول قويۋعا بىرگە كۋا بولدى.

　　ەكى ەلدىڭ مەملەكەت باسشىلارى تاعى جۇڭگولىق، شەتەلدىك تىلشىلەرمەن كەزدەستى.

　　كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ماكروندى قارسى الۋ سالتىن وتكىزدى.

　　ماكرون كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو - فرانسيا ەكى ەلدىڭ مەملەكەت گيمنىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. ماكرون شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

　　ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.

　　كەلۋ قاينارى: حالىق تورابى

4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن فرانسيانىڭ زۇڭتۇڭى ماكرونمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا ماكروندى قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved