شي جينپيڭ جۇڭگو - فرانسيا كاسىپورىنشىلار كوميتەتىنىڭ 5 - رەتكى ءماجىلىسىنىڭ جابىلۋ سالتىنا قاتىناستى ءارى ءسوز سويلەدى
2023.04.07 16:47 كەلۋ قاينارى : حالىق تورابى
4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا كاسىپورىنشىلار كوميتەتىنىڭ 5 - رەتكى ءماجىلىسىنىڭ جابىلۋ سالتىنا قاتىناستى ءارى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگى، 4 - ايدىڭ 6 - كۇنى، بەيجيڭ (ءتىلشى ليۋ حۋا). 4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا كاسىپورىنشىلار كوميتەتىنىڭ 5 - رەتكى ءماجىلىسىنىڭ جابىلۋ سالتىنا قاتىناستى ءارى ءسوز سويلەدى.
شي جينپيڭ بىلاي دەپ اتاپ كورسەتتى: دۇنيە جۇزىندە تەرەڭ دە كۇردەلى وزگەرىستەر تۋىلۋدا. قيىنشىلىق پەن سىن - سايىس الدىندا جۇڭگو مەن فرانسيا ناعىز كوپ جاقتىلىقتا تاباندى بولىپ، ەركىن ساۋدا مەن ەكونوميكانىڭ جاھاندانۋىنىڭ دۇرىس بەتالىسىندا تاباندى بولىپ، ەكى جاقتى ەكونوميكا - ساۋدا سەلبەستىگىنىڭ تەبىنى مەن ومىرشەڭدىك كۇشىن بارىنشا كۇشەيتتى. ەكى جاقتى ساۋدا سوماسى مەن ءوزارا تىكەلەي قارجى قوسۋ ورنىقتى ارتىپ، ءىرى نىساندار سەلبەستىگى ىشكەرىلەي ىلگەرىلەپ، جاسىل تۇتىنۋ، جاسىل ەنەرگيا، عىلىم - تەحنيكادا جاڭالىق اشۋ سياقتى جاڭادان گۇلدەنگەن سالالارداعى سەلبەستىك ۇزدىكسىز كەڭەيدى.
جۇڭگو مەن فرانسيانىڭ ەكونوميكا - ساۋدا سەلبەستىگى ەكى ەل ەكونوميكاسىنىڭ دامۋىنا دەم بەرىپ، حالىقتىڭ ىرىس - قۇتىن ارتتىرۋمەن بىرگە، دۇنيە ءجۇزى ەكونوميكاسىنىڭ قالپىنا كەلۋى ءۇشىن سەنىمدى كۇشەيتىپ، مەجەنى ورنىقتىردى. قازىر جۇڭگونىڭ ەكونوميكاسىنىڭ، قوعامىنىڭ ومىرشەڭدىك كۇشى تولىق ايگىلەنىپ، جۇڭگو مەن فرانسيانىڭ، جۇڭگو مەن ەۆروپانىڭ ءار سالاداعى پىكىرلەسىپ، سەلبەستىك جاساۋى جاپپاي جاندانىپ وتىر، ءبىز ورايدى مىقتى يگەرىپ، سەلبەستىكتى كۇشەيتىپ، كوركەم بولاشاقتى بىرگە جاراتۋىمىز كەرەك.
ءبىز اشىق، سيىسىمدى بولۋدان جازباي، ەكى جاقتى ءوزارا ءتيىمدى سەلبەستىكتى تەرەڭدەتۋىمىز كەرەك. جۇڭگو ەل ءىشى بازارىن اشۋدى جەدەلدەتۋمەن بىرگە، جوعارى دەڭگەيدەگى سىرتقا ەسىك اشۋدى زور كۇشپەن ىلگەرىلەتىپ، ەرەجە، بەلگىلەمە، باسقارۋ، ولشەم سياقتى تۇزىمدىك ەسىك اشۋدى ورنىقتى كەڭەيتەدى، فرانسيانى قامتىعان دۇنيە جۇزىندەگى ءار ەلمەن جۇڭگو ۇلگىسىندەگى وسىزامانداندىرۋ الا كەلگەن جاڭا ورايدان بىرگە يگىلىكتەنۋگە پەيىل. جۇڭگو جاق فرانسيا كاسىپورىندارىنىڭ جۇڭگو حالىقارالىق يمپورت كورمەسى، جۇڭگو حالىقارالىق قىزمەت وتەۋ ساۋدا جارمەڭكەسى، جۇڭگو حالىقارالىق تۇتىنۋ بۇيىمدارى كورمەسى سياقتى كەلەلى سىرتقا ەسىك اشۋ تۇعىرلارىنان ۇتىمدى پايدالانىپ، جۇڭگو بازارىندا اناعۇرلىم زور ىسكەرلىك كورسەتۋىن قولدايدى. جاسىل، سيفرلى، جاڭالىق اشۋ سياقتى سالالارداعى ءوزارا ءتيىمدى سەلبەستىكتى تەرەڭدەتۋ كەرەك.
ءبىز دەربەس، ءوز - وزىنە قوجا بولۋدا تاباندى بولىپ، جۇڭگو مەن ەۆروپانىڭ ورتاق مۇددەسىن قورعاۋىمىز كەرەك. جۇڭگو مەن ەۆروپا − دۇنيە ءجۇزىنىڭ كوپ ۇيەكتەنۋىن ىلگەرىلەتەتىن ەكى ۇلكەن كۇش، كەڭ كولەمدى ستراتەگيالىق ورتاق تانىمعا، ورتاق مۇددەگە جانە تەرەڭ سەلبەستىك نەگىزىنە يە، جۇڭگو - ەۆروپا سەلبەستىگى ازيا - ەۆروپا ۇلى قۇرلىعىنىڭ گۇلدەنۋىنە جانە دۇنيە ءجۇزى جاعدايىنىڭ ورنىقتىلىعىنا تىكەلەي سايادى. جۇڭگو جاق جۇڭگو - ەۆروپا قارىم - قاتىناسىنا ۇزدىكسىز ستراتەگيالىق دەڭگەيدەن جانە ۇزاق بولاشاقتىق تۇرعىدان مامىلە جاسايدى جانە ونى دامىتادى، ەۆروپانىڭ ءبىر تۇلعالانۋ قۇرىلىسىن قولدايدى، ەۆروپا وداعىنىڭ ىنتىماقتاسا گۇلدەنىپ - كوركەيۋىن قولدايدى. ەۆروپا جاقتىڭ جۇڭگوعا وبيەكتيۆ، دۇرىس تانىم ۇستانىپ، جۇڭگو مەن ەۆروپانىڭ جالپى بەتتىك ستراتەگيالىق سەرىكتەستىك قاتىناسى ورنىندا تاباندى بولۋىن ءۇمىت ەتەمىن. نولدىك جيىنتىق ويىنىندا جەڭىمپاز بولمايدى. ”قول ءۇزۋ، تىزبەكتى ءۇزۋ“ جۇڭگونىڭ دامۋ اياق الىسىنا بوگەت بولا المايدى. جۇڭگو جاق ەۆروپا جاقپەن ماكرولىق ساياساتتى سايكەستىرۋدى كۇشەيتىپ، ەكونوميكا - ساۋدا، عىلىم - تەحنيكا اۋىس - كۇيىسىن ساياسيلاندىرۋعا، قارۋعا اينالدىرۋعا قارسى تۇرىپ، كاسىپ سالاسى تىزبەگىنىڭ، قامداۋ تىزبەگىنىڭ حاۋىپسىزدىگىن، ورنىقتىلىعىن بىرگە قورعاپ، سەلبەستىككە ءتيىمدى ورتا ازىرلەۋدى قالايدى.
ءبىز ىنتىماقتاسا سەلبەسۋدە تاباندى بولىپ، دۇنيە ءجۇزىنىڭ بىرگە دامۋىن جەبەۋىمىز كەرەك. قازىر ادامزات قوعامى بۇرىن بولىپ كورمەگەن ورتاق سايىسقا ءدوپ كەلىپ وتىر، ىنتىماقتى، سەلبەستىكتى كۇشەيتۋ − بىردەن - ءبىر شىعار جول. مەنىڭ ادامزاتتىڭ تاعدىرلاس ورتاق تۇلعاسىن قۇرۋ باستاماسىن، ”ءبىر بەلدەۋ، ءبىر جولدى“ بىرگە قۇرۋ باستاماسىن، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن العا قويۋداعى تىلەگىم ىنتىماقتى بولشەكتەۋدىڭ ورنىنا قويۋدى، سەلبەسۋدى قارسىلاسۋدىڭ ورنىنا قويۋدى، سيىسىمدىلىقتى باسقالاردى قاقپايلاۋدىڭ ورنىنا قويىپ، باياندى بەيبىتشىلىك ورناعان، جالپى بەتتىك حاۋىپسىز، بىرگە كوركەيىپ - گۇلدەنەتىن، اشىق ۇستالاتىن، كەشىرىمشىل، كىرشىكسىز، كوركەم دۇنيە ءجۇزىن بىرگە قۇرۋ ءۇشىن بولىپ تابىلادى. بيىل جۇڭگو 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن وتكىزەدى. جۇڭگو جاق فرانسيا جاقتى قامتىعان ءار جاقپەن بىرگە بىرگە اقىلداسۋ، بىرگە قۇرۋ، بىرگە يگىلىكتەنۋ پرينسيبىنەن جازباي، ”ءبىر بەلدەۋ، ءبىر جول“ اياسىنداعى ەكى جاقتى جانە ءۇشىنشى جاق بازارى سەلبەستىگىن تەرەڭدەتىپ، دۇنيە ءجۇزىنىڭ بىرگە دامۋىن جەبەۋدى كۇتەدى.
شي جينپيڭ مىنالاردى دارىپتەدى: 2014 - جىلى ەكى ەل ديپلوماتيالىق قارىم - قاتىناس ورناتقانىنىڭ 50 جىلدىعى قارساڭىندا، مەن جۇڭگو مەن فرانسيانىڭ ديپلوماتيالىق قارىم - قاتىناس ورناتۋ رۋحىن ”دەربەس، ءوز - وزىنە قوجا بولۋ، ءوزارا ءتۇسىنىسۋ، بيىكتە تۇرىپ الىسقا كوز تاستاۋ، ءوزارا پايدا جەتكىزىپ تەڭ يگىلىككە كەنەلۋ“ دەگەنگە جيناقتادىم. وسى رۋح جۇڭگو - فرانسيا قارىم - قاتىناسىنىڭ باستان - اياق جۇڭگو مەن باتىستاعى ءىرى ەلدەر قارىم - قاتىناسىنىڭ الدىڭعى لەگىندە جۇرۋىنە جەتەكشىلىك ەتتى. كەلەر جىلى ءبىز جۇڭگو مەن فرانسيانىڭ ديپلوماتيالىق قارىم - قاتىناس ورناتقانىنىڭ 60 جىلدىعىن قارسى الامىز. اۋمالى - توكپەلى حالىقارالىق جاعداي الدىندا، ىندەتتەن كەيىنگى مەزگىلدەگى حاۋىپ - قاتەر، سىن - سايىس الدىندا ءبىز جۇڭگو مەن فرانسيانىڭ ديپلوماتيالىق قارىم - قاتىناس ورناتۋ رۋحىندا اناعۇرلىم تاباندى بولىپ جانە ونى ساۋلەلەندىرىپ، جۇڭگو - فرانسيا قارىم - قاتىناسىنىڭ تولقىن جارا العا باسۋىن، ورنىقتى قاداممەن الىسقا جەتۋىن ىلگەرىلەتۋىمىز كەرەك. جۇڭگو مەن فرانسيانىڭ ونەركاسىپ - ساۋدا سالاسىنداعى دوستاردىڭ قول ۇستاسا العا باسىپ، جۇڭگو - فرانسيا ەكونوميكا - ساۋدا سەلبەستىگىنىڭ جاڭا تاراۋىن بىرگە جازىپ، ەكى ەل حالىقتارىن اناعۇرلىم باقىتقا كەنەلتۋىن ءۇمىت ەتەمىن.
ماكرون مىنالاردى ءبىلدىردى: جاڭا عانا ءتوراعا شي جينپيڭ ەكەۋىمىز ەكى جاقتىڭ ءبىرقىدىرۋ ماڭىزدى كەلىسىمگە قول قويۋىنا كۋا بولىپ، فرانسيا مەن جۇڭگونىڭ ءوزارا ءتيىمدى سەلبەستىكتى تەرەڭدەتۋ جاعىنداعى ورتاق مۇراتىن، سونداي ـ اق دۇنيە جۇزىلىك سايىستارعا بىرگە توتەپ بەرۋ جاۋاپكەرلىگىن ايگىلەدىك. سەلبەستىك جەكە دارا ىستەلمەيدى، ءوزارا پايدا جەتكىزىپ، تەڭ يگىلىككە كەنەلۋ كەرەك. سىننان وتە الاتىن دوستىق ناعىز دوستىق سانالادى. فرانسيا جاق ”قول ۇزۋگە، تىزبەكتى ۇزۋگە“ قارسى تۇرادى، اناعۇرلىم ورنىقتى، اشىق قامداۋ تىزبەگىن قالىپتاستىرۋدى ءۇمىت ەتەدى. فرانسيا جاق جۇڭگو جاقپەن ءوزارا قۇرمەت ەتىپ، شىن نيەتپەن كەڭەسىپ، پارىقتارعا كەشىرىمشىل بولىپ، ەسىك اشۋعا، جاڭالىق اشۋعا شابىتتاندىرىپ، فرانسيا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسىن قول ۇستاسا تەرەڭدەتىپ، ەكى جاقتىڭ ءار سالاداعى سەلبەستىگىندە ۇزدىكسىز ماڭىزدى ىلگەرىلەۋشىلىكتەرگە قول جەتكىزۋدى ىلگەرىلەتۋگە پەيىل.
سول كۇنى كەشتە شي جينپيڭ حالىق سارايىنىڭ التىن ءتۇستى زالىندا ماكرونعا ارناپ قارسى الۋ قوناعاسىن بەردى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
