شي جينپيڭ فرانسيانىڭ زۇڭتۇڭى ماكرونمەن، ەۆروپا وداعى كوميتەتىنىڭ ءتوراعاسى فون دەر لايەنمەن جۇڭگو - فرانسيا - ەۆروپا ءۇش جاقتىڭ ديدارلاسۋىن وتكىزدى
2023.04.07 16:49 كەلۋ قاينارى : حالىق تورابى
4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا فرانسيا زۇڭتۇڭى ماكرونمەن، ەۆروپا وداعى كوميتەتىنىڭ ءتوراعاسى فون دەر لايەنمەن جۇڭگو - فرانسيا - ەۆروپا ءۇش جاقتىڭ ديدارلاسۋىن وتكىزدى. سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن
شينحۋا اگەنتتىگى، 4 - ايدىڭ 6 - كۇنى، بەيجيڭ (ءتىلشى ليۋ حۋا). 4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا فرانسيانىڭ زۇڭتۇڭى ماكرونمەن، ەۆروپا وداعى كوميتەتىنىڭ ءتوراعاسى فون دەر لايەنمەن جۇڭگو - فرانسيا - ەۆروپا ءۇش جاقتىڭ ديدارلاسۋىن وتكىزدى.
شي جينپيڭ مىنالاردى اتاپ كورسەتتى: جۇڭگو مەن ەۆروپا كەڭ كولەمدى ورتاق مۇددەگە يە، سەلبەستىك باسەكەدەن ۇستەم، ورتاق تانىم الاۋىزدىقتان كوپ. قازىر حالىقارالىق جاعداي كۇردەلى دە قۇبىلمالى بولىپ وتىر، جۇڭگو مەن ەۆروپا ءوزارا قۇرمەت ەتۋدە تاباندى بولىپ، ساياسي سەنىمدىلىكتى ارتتىرىپ، پىكىرلەسۋدى، سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاپ، بىرگە دامۋدى، گۇلدەنۋدى جەبەپ، دۇنيە جۇزىلىك سايىستارعا قول ۇستاسا توتەپ بەرۋى كەرەك. بيىل − جۇڭگونىڭ ەۆروپا وداعىمەن جاپپاي ستراتەگيالىق سەرىكتەستىك قاتىناس ورناتقانىنىڭ 20 جىلدىعى. جۇڭگو جاق ەۆروپا جاقپەن بىرگە جۇڭگو - ەۆروپا قارىم - قاتىناسى دامۋىنىڭ ۇلكەن بەتالىسىن جانە نەگىزگى اۋەنىن ويداعىداي يگەرىپ، ءار دارەجەلى بارىس - كەلىستى جاپپاي قايتا باستاپ، ءار سالاداعى ءوزارا ءتيىمدى سەلبەستىكتى جانداندىرىپ، جۇڭگو - ەۆروپا قارىم - قاتىناسىنىڭ دامۋىنا جانە دۇنيە ءجۇزىنىڭ بەيبىتشىلىگىنە، ورنىقتىلىعىنا، گۇلدەنۋىنە جاڭا قوزعاۋشى كۇش ۇستەۋگە پەيىل.
شي جينپيڭ بىلاي دەپ دارىپتەدى: جۇڭگو - ەۆروپا قارىم - قاتىناسىنىڭ ورنىقتىلىعىن كۇشەيتۋ كەرەك. جۇڭگو - ەۆروپا قارىم - قاتىناسى ءۇشىنشى جاققا باعىتتالمايدى، يەك سۇيەمەيدى، ءۇشىنشى جاقتىڭ شەكتەمەسىنە ۇشىرامايدى. جۇڭگو جاق جۇڭگو - ەۆروپا قارىم - قاتىناسىنا باستان - اياق ستراتەگيالىق بيىكتەن جانە ۇزاق بولاشاقتىق تۇرعىدان قارايدى، ەۆروپاعا قاراتىلعان ساياساتىندا تۇراقتىلىقتى جانە ۇلاسپالىلىقتى ساقتايدى. ەۆروپا جاقتىڭ جۇڭگو جونىندە اناعۇرلىم دەربەس، وبيەكتيۆ تانىم قالىپتاستىرىپ، جۇڭگوعا ناقتى، بەلسەندى ساياسات اتقارۋىن ءۇمىت ەتەمىن. ەكى جاق ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ماسەلەلەرىنە قۇرمەت ەتىپ، تىلدەسۋ، كەڭەسۋ ارقىلى پارىقتاردى ۇيىستىرىپ، ورتاقتىققا ۇمتىلۋى كەرەك. ءبىر - ءبىرىنىڭ دامۋ جولىنا قۇرمەت ەتۋ كەرەك. جۇڭگو ۇلگىسىندەگى وسىزامانداندىرۋ مەن ەۆروپانىڭ ءبىر تۇلعالانۋى − ەكى جاقتىڭ بولاشاقتى كوزدە ۇستاي وتىرىپ جاساعان ستراتەگيالىق تالعامى، ەكى جاق ءبىر - ءبىرىنىڭ دامۋ جولىندا سەنىمدى، ارقا سۇيەيتىن سەلبەستىك سەرىكتەرى بولۋى كەرەك. جۇڭگو حالقى ءوز ەلىنىڭ جاعدايىنا ۇيلەسەتىن دۇرىس دامۋ جولىن تاپقانىنا ماقتانادى. ەكى جاق پارىقتاردى ساقتاپ، ورتاقتىققا ۇمتىلىپ، ءوزارا سيىسىمدى بولىپ، ءوزارا ءلاززات الىپ، ءوزارا ۇلگى الىپ، ءبىرىن - ءبىرى جەبەۋى كەرەك. ايتىلمىس ”دەموكراتيالىق قارسىلاسۋ ۇقىعى“ دەگەندى ۋاعىزداپ، ”جاڭا قىرعي قاباقتىق سوعىس“ قوزعاۋ دۇنيە جۇزىنە بولشەكتەنۋ جانە قارسىلاسۋ اكەلەدى. اشىق ۇستالاتىن، ءوزارا سەنىمدى سەلبەستىك ورتاسىن قورعاۋ كەرەك. جۇڭگو مەن ەۆروپا قوس باعىتتا ەسىك اشۋدى ساقتاپ، قارسى جاقتاعى كاسىپورىندارعا ءادىل، كەمسىتپەيتىن تيجارات - ساۋدا ورتاسىن ازىرلەپ، ەكونوميكا - ساۋدا ماسەلەسىن ساياسيلاندىرۋدان، حاۋىپسىزدەندىرۋدەن ساقتانۋى كەرەك. ەكى جاق ورنىقتى، ءوزارا سەنىمدى قامداۋ تىزبەگىن ورناتىپ، ”ءبىر بەلدەۋ، ءبىر جول“ باستاماسىن ەۆروپا وداعىنىڭ ”دۇنيە جۇزىلىك قاقپا“ ستراتەگياسىمەن ۇشتاستىرىپ، ەكى جاق ەكونوميكاسىنىڭ ۇزاق ۋاقىت ورنىقتى ارتۋىنا دەم بەرۋى كەرەك.
شي جينپيڭ بىلاي دەپ دارىپتەدى: جۇڭگو باستان - اياق ناعىز كوپ جاقتىلىقتا تاباندى بولادى، بىرگە اقىلداسۋ، بىرگە قۇرۋ، بىرگە يگىلىكتەنۋ سىندى دۇنيە جۇزىلىك جونگە سالۋ كوزقاراسىندا تاباندى بولادى، ەۆروپا جاقپەن كوپ جاقتى ىستەردەگى سايكەستىكتى، سەلبەستىكتى كۇشەيتىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن بىرگە قورعاۋعا پەيىل. جۇڭگو مەن ەۆروپا دۇنيە ءجۇزىنىڭ ورنىقتىلىعى مەن گۇلدەنۋىن بىرگە قورعاۋى، زورەكەرلىككە، سىڭار جاقتىلىققا قارسى تۇرۋى، ”قول ۇزۋگە، تىزبەكتى ۇزۋگە“ قارسى تۇرۋى كەرەك. ەكى جاق ماكرولىق ەكونوميكا جانە فينانس ساياساتى جاعىنداعى تىلدەسۋدى، سايكەسۋدى كۇشەيتىپ، جاسىل سەرىكتەستىك قاتىناستى تەرەڭدەتىپ، جاسىل فينانس، قورشاعان ورتا تەحنيكاسى، تازا ەنەرگيا سياقتى سالالارداعى تىلدەسۋ مەن سەلبەستىكتى كۇشەيتۋى كەرەك. ەكى جاق وركەندەپ كەلە جاتقان ەلدەردىڭ بىرگە دامۋىنا كومەكتەسىپ، كوپ جاقتى قۇرىلىم مەن فينانس كاپيتالىنىڭ 20 ەل توبىنىڭ قارىز قايتارۋدى كەشەۋىلدەتۋ باستاماسىنا اناعۇرلىم كوپ ات سالىسۋىن ىلگەرىلەتىپ، افريكا سياقتى جەرلەردە ءۇش جاقتىڭ، كوپ جاقتىڭ سەلبەستىگىن ورىستەتۋدى تالقىلاۋى كەرەك.
فون دەر لايەن مىنالاردى ءبىلدىردى: ەۆروپا جاق جۇڭگونىڭ تاريحى مەن مادەنيەتىنە قۇرمەت ەتەدى. ەۆروپا مەن جۇڭگونىڭ بۇكپەسىز جانە سىندارلى پىكىرلەسىپ، ەۆروپا - جۇڭگو قارىم قاتىناسىنىڭ باياندى دامۋىن ساقتاۋى ەۆروپانىڭ بەيبىتشىلىگى مەن ورنىقتىلىعى جونىنەن توتەنشە ماڭىزدى. ەۆروپا مەن جۇڭگو − ءبىر - ءبىرىنىڭ ماڭىزدى ساۋدا سەرىكتەرى، ءبىر - ءبىرىنىڭ ەكونوميكاسى وسكەلەڭ بايلانىستى، جۇڭگودان ”قول ءۇزۋ“ ەۆروپا جاقتىڭ مۇددەسىنە ۇيلەسپەيدى، ەۆروپا وداعىنىڭ ستراتەگيالىق تالعامى ەمەس، ەۆروپا وداعى جۇڭگوعا قاراتىلعان ساياساتىن دەربەس، ءوز - وزىنە قوجا بولا وتىرىپ بەلگىلەدى. ەۆروپا جاق جۇڭگو جاقپەن ەۆروپا مەن جۇڭگونىڭ ەكونوميكا - ساۋدا جوعارى جىكتەگىلەرىنىڭ تىلدەسۋىن قايتا باستاپ، ەۆروپا مەن جۇڭگونىڭ ەكونوميكا - ساۋدا قارىم - قاتىناسىنىڭ ورنىقتى، بارابار دامۋىن ىلگەرىلەتىپ، ءوزارا پايدا جەتكىزىپ، تەڭ يگىلىككە كەنەلۋدى جۇزەگە اسىرۋعا پەيىل. ەۆروپا جاق جۇڭگو جاقتىڭ «ورگانيزمدەردىڭ الۋان تۇرلىلىگى كەلىسىمىنىڭ» 15 - رەتكى شارت جاساسۋشى جاقتار جينالىسىن ءساتتى وتكىزگەنىن قۇتتىقتايدى، جۇڭگو جاقتىڭ كومىر قىشقىل گازىنىڭ شىعارىلۋىن ازايتۋ ءۇشىن جاساعان قۇلشىنىستارىن القايدى، جۇڭگو جاقپەن بايلانىستى، سايكەستىكتى كۇشەيتىپ، دۇنيە جۇزىلىك سىن - سايىسقا سەلبەسە توتەپ بەرىپ، دۇنيە ءجۇزىنىڭ بەيبىتشىلىگىن، ورنىقتىلىعىن جانە دامۋىن جەبەۋ ءۇشىن ءتيىستى رولىن ساۋلەلەندىرۋدى ءۇمىت ەتەدى.
ماكرون مىنانى ءبىلدىردى: بۇگىنگى دۇنيە ءجۇزى تۇراقسىزدىققا تولى، بۇل ەۆروپا مەن جۇڭگونىڭ ءوزارا قۇرمەت ەتۋ جانە كىشپەيىل بولۋ پوزيتسياسىمەن پىكىرلەسۋدى، اۋىس - كۇيىستى كۇشەيتۋىن قاجەت ەتەدى. ەكى جاق بىرگە قۇلشىنىپ، ”قول ءۇزۋدىڭ، تىزبەكتى ءۇزۋدىڭ“ شىرعاسىنا تۇسپەي، بارابار، ءوزارا ءتيىمدى سەلبەستىك ورىستەتىپ، كليمات وزگەرىسى سياقتى كوكەي تەستى دۇنيە جۇزىلىك سىن - سايىسقا بىرگە توتەپ بەرىپ، ەۆروپا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن ۇزدىكسىز تەرەڭدەتۋى كەرەك.
ءۇش باسشى ۋكراينا داعدارىسى جونىندە پىكىر الماستىردى. فون دەر لايەن مەن ماكرون ەۆروپا جاقتىڭ كوزقاراسىن تانىستىرىپ مىنانى ءبىلدىردى: جۇڭگو جاق ۋكراينا داعدارىسىن تۋدىرۋشى ەمەس، ەۆروپا جاق جۇڭگو جاقتىڭ ۋكراينا داعدارىسىن ساياسي جولمەن شەشۋدى ىلگەرىلەتۋ جولىندا كورسەتكەن قۇلشىنىستارىن القايدى، جۇڭگو جاقتىڭ اناعۇرلىم ماڭىزدى رول اتقارۋىن ءۇمىت ەتەدى، جۇڭگو جاقپەن سەلبەسىپ، تاتۋلاستىرۋدى، كەلىسسوزدى جەبەۋ ءادىسىن تابۋعا پەيىلمىز.
شي جينپيڭ بىلاي دەپ دارىپتەدى: جۇڭگو باستان - اياق ءىستىڭ وزىندەگى دۇرىس – بۇرىستىققا قاراپ دەربەس ءوز - وزىنە قوجا بولا وتىرىپ ۇيعارىم جاساۋ تۇرعىسىن ۇستانىپ كەلەدى. ۋكىراينا ماسەلەسىندەگى جۇڭگو جاقتىڭ باعىتىن ءبىر اۋىز سوزگە، اتاپ ايتقاندا، تاتۋلاستىرۋ، كەلىسسوزدى جەبەۋ دەگەنگە جيناقتاۋعا بولادى. جۇڭگو جاق ءار جاقتى بايسالدى دا پاراساتتى بولىپ، بەيبىتشىلىك كەلىسسوزىنە بىرگە شارت - جاعداي ازىرلەۋگە قۋزايدى. قازىرگى شۇعىل مىندەت ـــ سوعىستى توقتاتۋدى ىلگەرىلەتۋ، وتقا ماي قۇيۋعا، ماسەلەنى كۇردەلىلەندىرۋگە قارسى تۇرۋ. ۋكراينا داعدارىسى جۇڭگو مەن ەۆروپا اراسىنداعى ماسەلە ەمەس. جۇڭگو جاق جاراستىرۋدى، كەلىسسوز وتكىزۋدى جەبەۋ جاعىندا ۇزدىكسىز بەلسەندى رول اتقارىپ، ەۆروپا جاقتىڭ ءوزىنىڭ ءتۇبىرلى جانە ۇزاق بولاشاقتىق مۇددەسىن شىعار ءتۇيىن ەتىپ، ۋكراينا داعدارىسىن ساياسي جولمەن شەشۋدىڭ وي جەلىسى مەن جوباسىن العا قويۋىن قولداپ، ەۆروپانىڭ بىركەلكى، ءونىمدى، باياندى حاۋىپسىزدىك جۇلگەسىن ورناتۋدى ىلگەرىلەتەدى.
ۋاڭ ي، چين گاڭ قاتارلىلار ديدارلاسۋدا بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
