شي جينپيڭ ەۆروپا وداعى كوميتەتىنىڭ ءتوراعاسى فون دەر لايەنمەن كەزدەستى
2023.04.07 16:51 كەلۋ قاينارى : حالىق تورابى
4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا ەۆروپا وداعى كوميتەتىنىڭ ءتوراعاسى فون دەر لايەنمەن كەزدەستى. سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن
شينحۋا اگەنتتىگى، 4 - ايدىڭ 6 - كۇنى، بەيجيڭ (ءتىلشى ليۋ حۋا). 4 - ايدىڭ 6 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا ەۆروپا وداعى كوميتەتىنىڭ ءتوراعاسى فون دەر لايەنمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو ەۆروپا وداعىن حالىقارالىق جۇيەدەگى ستراتەگيالىق كۇش دەپ قاراپ، جۇڭگو - ەۆروپا قارىم - قاتىناسىن دامىتۋدى باستان - اياق جۇڭگو ديپلوماتياسىنىڭ باسىم باعىتى ەتىپ كەلەدى، ەۆروپا جاقپەن تاماشا ءداستۇردى جالعاستىرىپ، ءجيى قارىم - قاتىناستى ساقتاپ، ستراتەگيالىق ءوزارا سەنىمدىلىكتى نىعايتىپ، نازاردى ءوزارا پايدا جەتكىزىپ، تەڭ يگىلىككە كەنەلەتىن سەلبەستىككە شوعىرلاندىرىپ، كەدەرگىلەر مەن سىن - سايىستى بىرگە جەڭىپ، جۇڭگو - ەۆروپا قارىم - قاتىناسىنىڭ جوعارى دەڭگەيدە جۇرگىزىلۋىن جۇزەگە اسىرۋعا پەيىلمىز.
شي جينپيڭ بىلاي دەپ دارىپتەدى: جۇڭگو، ەۆروپا ەكى جاق قارىم - قاتىناستى كۇشەيتىپ، ءوزارا دۇرىس تانىم ورناتىپ، جاڭساق ۇعىمنان، اعات تۇجىرىمداۋدان ساقتانۋى كەرەك. جۇڭحۋا ۇلتى 5 مىڭ جىلدان استام وركەنيەت تاريحىنا يە، ەجەلدەن سوعىس قۇمارلىققا، كۇشتىگە ارقالانىپ، ءالسىزدى باسىنۋعا، مەملەكەت قۇدىرەتتەنسە، ءسوز جوق، زورەكەر بولۋعا قارسى تۇرىپ كەلەدى. جۇڭگونىڭ دامۋى جۇڭگو حالقىن يگىلىككە كەنەلتۋ ءۇشىن بولىپ تابىلادى. سونىمەن بىرگە، جۇڭگو جاق ءوزىنىڭ يەلىك ۇقىعىن، حاۋىپسىزدىگىن، دامۋ مۇددەسىن باتىل قورعايدى، ءارقانداي كۇشتىڭ جۇڭگو حالقىن باقىتقا كەنەلۋ ۇقىعىنان ماحرۇم ەتۋىنە استە جول بەرمەيدى. جۇڭگو مەن ەۆروپا نازاردى سەلبەستىككە شوعىرلاندىرىپ، ءوزارا پايدا جەتكىزىپ، تەڭ يگىلىككە كەنەلىپ، ەكونوميكانىڭ جاھاندانۋىن، ساۋدانىڭ ەركىندەنۋىن قولداپ، ەكونوميكا - ساۋدا سەلبەستىگىندەگى ماسەلەلەر جونىندە ىشكەرىلەي پىكىرلەسىپ، كەڭەسۋ ارقىلى ەكى جاق بىردەي قابىلدايتىن ورنالاستىرۋلاردى جاساۋى كەرەك. جۇڭگو جاق ەۆروپانىڭ ەنەرگيا، اقشانىڭ قۇنسىزدانۋى سياقتى سىن - سايىستى شەشىپ، باسەكەلىك قۋاتتى جوعارىلاتۋداعى ماڭىزدى سەرىگى، ەۆروپا جاقتىڭ جۇڭگونىڭ دامۋ پايداسىنان ۇزدىكسىز يگىلىكتەنۋىن قارسى الامىز.
شي جينپيڭ بىلاي دەپ دارىپتەدى: جۇڭگو - ەۆروپا قارىم - قاتىناسىنىڭ تاماشا دامۋى دەربەس، ءوز - وزىنە قوجا بولۋدان، ءوزارا قۇرمەت ەتۋدەن، ءوزارا پايدا جەتكىزىپ سەلبەسۋدەن ايرىلا المايدى. جۇڭگو دەربەس، ءوز - وزىنە قوجا بولۋ سىندى بەيبىت ديپلوماتيالىق ساياساتتى باتىل اتقارادى، ءار ەل حالقىنىڭ دامۋ جولىن ءوزى تاڭداۋ ۇقىعىنا قۇرمەت ەتەدى. جۇڭگو ءارقانداي ەلمەن ەكى جاقتى قاتىناستى دامىتۋدا ءۇشىنشى جاققا باعىتتامايدى، يەك سۇيەمەيدى، ءۇشىنشى جاقتىڭ شەكتەمەسىنە دە ۇشىرامايدى. جۇڭگو - ەۆروپا ەكى جاق پارىقتارعا دۇرىس قاراپ، الاۋىزدىقتاردى تەجەپ، ءوزارا قۇرمەت ەتۋى كەرەك. ەۆروپا وداعى كوميتەتىنىڭ ەۆروپا وداعىنىڭ ءتۇبىرلى جانە بولاشاقتىق مۇددەسىن كوزدە ۇستاي وتىرىپ، جۇڭگو - ەۆروپا قارىم - قاتىناسىنىڭ جالپى جاعدايىن شىعار ءتۇيىن ەتىپ، جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋى ءۇشىن بەلسەندى رول اتقارۋىن ءۇمىت ەتەمىن.
فون دەر لايەن مىنانى ءبىلدىردى: جۇڭگو ۇزاق تاريحقا جانە تەرەڭ مادەنيەتكە يە، ەۆروپا مەن جۇڭگونىڭ وركەنيەت اۋىس - كۇيىسى، ءوزارا ۇلگى الۋى ەكى جاققا جانە دۇنيە جۇزىنە بەلسەندى ىقپال جاسايدى. ەۆروپا مەن جۇڭگو كليمات وزگەرىسى سياقتى دۇنيە جۇزىلىك سىن - سايىسقا توتەپ بەرۋ جانە وڭىرلىك داۋ - شار ماسەلەسىن ساياسي جولمەن شەشۋ جاعىندا كوپتەگەن ورتاق تانىمعا يە، ەكى جاق بىرگە قۇلشىنىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋعا ۇلەس قوسۋى كەرەك. ەۆروپا جاق ”قول ءۇزۋدى، تىزبەكتى ءۇزۋدى“ مۇلدە قۇپتامايدى، جۇڭگو جاقپەن بارىس - كەلىستى، تىلدەسۋدى كۇشەيتىپ، ءۇش تىلدەسۋ مەحانيزمىن ەرتەرەك قايتا باستاپ، اناعۇرلىم كوپ ءوزارا ءتيىمدى سەلبەستىك ورىستەتۋدى ءۇمىت ەتەدى.
تايۋان ماسەلەسى جونىندە شي جينپيڭ مىنالاردى دارىپتەدى: تايۋان ماسەلەسى − جۇڭگونىڭ وزەكتى مۇددەسىنىڭ وزەگى. كىمدە - كىم ءبىر جۇڭگو ماسەلەسىندە پالە شىعارسا، جۇڭگو ۇكىمەتى مەن جۇڭگو حالقى وعان استە جول بەرمەيدى؛ كىمدە - كىم جۇڭگو تايۋان ماسەلەسىندە ىمىرالاسىپ جول بەرەدى دەپ دامەلەنسە، ول قۇر قيالعا سالىنعان بولادى، بىرەۋگە سىلتەگەن شوقپارى ءوز باسىنا تيەدى.
فون دەر لايەن مىنانى قايتالاي دارىپتەدى: ەۆروپا وداعى ۇزاق ۋاقىتتان بەرى اتقارىپ كەلە جاتقان ءبىر جۇڭگو ساياساتىن وزگەرتپەك ەمەس، جۇڭحۋا حالىق رەسپۋبليكاسى ۇكىمەتىنىڭ بۇكىل جۇڭگوعا ۋاكىلدىك ەتەتىن بىردەن - ءبىر زاڭدى ۇكىمەت ەكەنىن مويىندايدى، تايۋان بۇعازى رايونىنىڭ بەيبىت، ورنىقتى بولۋىن ءۇمىت ەتەدى.
ۋاڭ ي، چين گاڭ قاتارلىلار ديدارلاسۋدا بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
