مەملەكەتتىك حالىق قۇرىلتايى تۇراقتى كوميتەتى عىلىم - تەحنيكا العاباسارلىعى زاڭىنىڭ اتقارىلۋىن تەكسەرۋدى باستادى
2023.06.05 15:20 كەلۋ قاينارى : حالىق تورابى
مەملەكەتتىك حالىق قۇرىلتايى تۇراقتى كوميتەتىنىڭ عىلىم ـ تەحنيكا العاباسارلىعى زاڭىنىڭ اتقارىلۋىن تەكسەرۋ گرۋپپاسى 6 ـ ايدىڭ 2 ـ كۇنى بەيجيڭدە 1 ـ رەتكى جالپى جيىنىن اشىپ، عىلىم ـ تەحنيكا العاباسارلىعى زاڭىنىڭ اتقارىلۋىن تەكسەرۋدى باستادى. مەملەكەتتىك حالىق قۇرىلتايى تۇراقتى كوميتەتىنىڭ ورىنباسار باستىقتارى حاۋ ميڭجين، ساي دافىڭ، حى ۋي، تيە نيڭ ماجىلىسكە قاتىناستى.
عىلىم - تەحنيكا العاباسارلىعى زاڭى 1993 - جىلى جاريالانىپ اتقارىلعان، سونداي - اق 2007 - جىلى، 2021 - جىلى ەكى رەت جان - جاقتىلى، جۇيەلى وزگەرىس ەنگىزىلىپ كەمەلدەندىرىلگەن، بۇل ‐ ەلىمىزدىڭ عىلىم - تەحنيكا سالاسىنداعى جالپىلىق، نەگىزدىك زاڭ.
زاڭ اتقارۋدى باسقارۋشى تاراۋلاردىڭ مالىمەتىن تىڭداعاننان كەيىن، ساي دافىڭ بىلاي دەپ اتاپ كورسەتتى: وسى رەتكى زاڭ اتقارۋدى تەكسەرۋ ارقىلى جوعارى دەڭگەيدەگى عىلىم ـ تەحنيكادا ءوز كۇشىنە سۇيەنىپ ءوزىن الۋەتتەندىرۋدى جەدەل جۇزەگە اسىرۋعا، عىلىم ـ تەحنيكا جاعىندا قۇدىرەتتى ەل قۇرۋعا اناعۇرلىم كەمەلدى زاڭمەن جونگە سالۋ كەپىلدىگىن ازىرلەۋ كەرەك. زاڭنىڭ اتقارىلۋىن تەكسەرۋدى نەگىزگى تاقىرىپتىق تاربيەمەن تىعىز ۇشتاستىرىپ، باس شۋجي شي جينپيڭنىڭ عىلىم ـ تەحنيكادا جاڭالىق اشۋ جونىندەگى ماڭىزدى بايىمداۋلارىن ىشكەرىلەي ۇيرەنۋ، دايەكتىلەندىرۋ كەرەك. نازاردى ءتۇيىندى ماسەلەلەرگە شوعىرلاندىرىپ، بۇكىل مەملەكەت بويىنشا جۇمىلاتىن جاڭاشا ءتۇزىلىستىڭ باسىمدىعىن ساۋلەلەندىرىپ، مەملەكەتتىڭ ستراتەگيالىق عىلىم ـ تەحنيكا كۇشىن نىعايتىپ، نەگىزدىك زەرتتەۋدە ءتۇل جاسامپازدىقتى كۇشەيتىپ، عىلىم ـ تەحنيكا ءتۇزىلىسى، مەحانيزمى رەفورماسىن تەرەڭدەتىپ، سايكەسە جاڭالىق اشۋدىڭ جالپى تۇلعالىق ونىمدىلىگىن جوعارىلاتىپ، زاڭنىڭ جاپپاي، ءونىمدى اتقارىلۋىن ىلگەرىلەتۋ كەرەك. باقىلاۋدىڭ ناقتى ونىمدىلىگىن كورنەكتىلەندىرىپ، ماسەلەنى نىشان ەتۋدەن جازباي، زاڭ ۇگىتىن، زاڭ جالپىلاستىرۋدى كۇشەيتۋ كەرەك.
ۇعىسۋعا قاراعاندا، زاڭنىڭ اتقارىلۋىن تەكسەرۋ گرۋپپاسى 8 جاقتاعى مازمۇندى ءتۇيىندى تۇردە تەكسەرەدى: جەر - جەردىڭ، تاراۋلاردىڭ عىلىم - تەحنيكا العاباسارلىعى زاڭىن ۇگىتتەۋ، دايەكتىلەندىرۋ جانە اتقارۋ قىزمەتىن ىلگەرىلەتۋ اياق الىسىنىڭ جاعدايى؛ نەگىزدىك زەرتتەۋدى كۇشەيتۋگە قاتىستى جاعدايلار، قولدانىلمالى زەرتتەۋ مەن جەتىستىكتەردى كادەگە جاراتۋدى كۇشەيتۋگە، شەشۋشى وزەكتى تەحنيكالاردىڭ دەربەس، مەڭگەرىمدى بولۋىن ىلگەرىلەتۋگە قاتىستى جاعدايلار؛ كاسىپورىنداردىڭ عىلىم - تەحنيكادا جاڭالىق اشۋداعى نەگىزگى تۇلعالىق ورنىن كۇشەيتۋ احۋالى؛ عىلىمي زەرتتەۋ قۇرىلىمدارىنىڭ ءتۇزىلىس مەحانيزمىن كەمەلدەندىرۋ، عىلىم - تەحنيكا زەرتتەۋ - اشۋ جۇيەسىن قۇرۋ جانە كەمەلدەندىرۋ احۋالى؛ عىلىم - تەحنيكا قىزمەتكەرلەرىن تاربيەلەۋگە، باسقارۋعا، شابىتتاندىرۋعا قاتىستى احۋالدار؛ وڭىرلىك عىلىم - تەحنيكادا جاڭالىق اشۋدىڭ اتقارىلۋ احۋالى؛ عىلىم - تەحنيكا قيمىلدارىن قولداۋ، قامتاماسىزداندىرۋ، باقىلاۋ شارالارىنىڭ تياناقتانۋ احۋالى قاتارلىلار.
6 – ايدان 7 – ايعا دەيىن، زاڭنىڭ اتقارىلۋىن تەكسەرۋ گرۋپپاسى لياۋنيڭ، انحۇي، حۋبەي، حۋنان، گۇيجوۋ، شانشي سياقتى 6 ولكەگە بارىپ ناقتى تەكسەرۋ جۇرگىزەدى، سونىمەن بىرگە جيلين، شاڭحاي، جياڭسۋ، شاندۇڭ، گۋاڭدۇڭ، گانسۋ قاتارلى 6 ولكەنىڭ (قالانىڭ) حالىق قۇرىلتايى تۇراقتى كوميتەتى ءوز اكىمشىلىك وڭىرىندەگى عىلىم - تەحنيكا العاباسارلىعى زاڭىنىڭ اتقارىلۋ احۋالىنا ءبىر ۋاقىتتا تەكسەرۋ جۇرگىزەدى.
9 - ايدىڭ باس شەنىندە زاڭنىڭ اتقارىلۋىن تەكسەرۋ گرۋپپاسى 2 - رەتكى جالپى جيىنىن اشىپ، زاڭنىڭ اتقارىلۋىن تەكسەرۋ قىزمەتىن قورىتىندىلاپ، زاڭنىڭ اتقارىلۋىن تەكسەرۋ بايانداماسىنىڭ نۇسقاسىن جاسايدى ءارى وزگەرىس ەنگىزىپ كەمەلدەندىرەدى. 10 – ايدىڭ اياق شەنىندە مەملەكەتتىك حالىق قۇرىلتايىنىڭ تۇراقتى كوميتەتى عىلىم - تەحنيكا العاباسارلىعى زاڭىنىڭ اتقارىلۋ احۋالىن تەكسەرۋ جونىندەگى باياندامانى تىڭدايدى جانە قارايدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
