دەلوعا ساياتىن قاراجات سوماسى 530 ميلليون يۋان! ساقشى جاق 160 مىڭ بوتەلكە جالعان اراقتى تەكسەرىپ انىقتادى
2023.06.15 13:52 كەلۋ قاينارى : حالىق تورابى
جۋىردا يۇننان ولكەلىك قوعام حاۋىپسىزدىگى مەڭگەرمەسى اقپارات كەڭسەسىنىڭ حابارلاۋىنشا، يۇننان ولكەسى لينساڭ قالاسى شۋاڭجياڭ قالالىق قوعام حاۋىپسىزدىگى مەكەمەسى جالعان ماركا بويىنشا تىزىمگە الدىرىلعان تاۋارلاردى ساتۋعا ساياتىن ءىرى دەلونى ءساتتى انىقتاپ، 160 مىڭ بوتەلكە جالعان اراقتى تەكسەرىپ قولعا ءتۇسىردى، دەلوعا قاتىستى قاراجات سوماسى 530 ميلليون يۋان بولىپ، يۇننان ولكەلىك قوعام حاۋىپسىزدىگى ورگاندارى جۋىرداعى جىلداردان بەرى انىقتاعان ءبىلىم مەنشىك ۇقىعىنا قول سۇققان، اراققا ساياتىن دەلولاردىڭ ىشىندەگى انىقتاپ قولعا تۇسىرگەن سانى ەڭ كوپ، دەلوعا قاتىستى قاراجات سوماسى ەڭ زور بولعان ءبىر رەتكى دەلوعا اينالدى. دەلونىڭ ءساتتى انىقتالۋى بارشا تۇتىنۋشىلار مەن كاسىپورىنداردىڭ زاڭدى ۇقىق - مۇددەسىنە پارمەندى كەپىلدىك ەتتى.
وسى رەتكى دەلونى انىقتاۋ 2021 - جىلى 12 - ايدىڭ 29 - كۇنىنەن باستالدى، شۋاڭجياڭ اۋداندىق قوعام حاۋىپسىزدىگى مەكەمەسى باسقارۋىنداعى وڭىردەگى بەلگىلى زات اينالىمى تەكشەسىنەن جالعان ماركا بويىنشا تىركەۋگە الىنعان ىقتيمالدىعى بار 555 جاشىكتەگى 6660 بوتەلكە اق اراقتى قولعا تۇسىرەدى، جالعان ماركا بويىنشا تىركەۋگە الىنعان بۇل اق اراققا ساياتىن دەلوداعى قاراجات سوماسى 10 ميلليون يۋاننان اسادى. اتالعان قىلمىستىق توپتى انىقتاۋ جولى وسىدان باستالدى.
قالالىق، اۋداندىق ەكى دارەجەلى قوعام حاۋىپسىزدىگى ورگاندارى دەرەۋ زەرتتەپ، الىمدى ساقشى كۇشتەرىنەن ۇيىمداسقان ارناۋلى دەلو تەكسەرۋ گرۋپپاسىن دەرەكتەردى ىشكەرىلەي تەكسەرۋگە جىبەرەدى. ”جالپى بۋىندار، جالپى فاكتورلار، جالپى تىزبەكتەر“ بويىنشا سوققى بەرۋ نىساناسىن توڭىرەكتەي وتىرىپ، ”قاينارىنان باستاپ سوققى بەرۋ، اپانىن تالقانداۋ، تورىن قيراتۋ، تىزبەگىن ءۇزۋ، اعىلۋ بەتالىسىن انىقتاۋ“ سىندى قىزمەت تالابىنا ساي، دەلونىڭ كۇردەلى بولۋى، دەلوعا قاتىستى ادامنىڭ كوپ بولۋى، دەلوعا قاتىستى ءوڭىردىڭ كەڭ بولۋى، ساراپتاپ تۇراقتاندىرۋدىڭ قيىن بولۋى، بۇلتارتپاس فاكتتەردى جيناۋ شايقاس شەبىنىڭ ۇزاق بولۋى قاتارلى قيىنشىلىقتاردى جەڭىپ، ولكە اتتاپ تەكسەرىپ، ۇزدىكسىز شايقاس جاساپ، ەڭ سوڭىندا قىلمىس كۇماندىلارىنان 5 ادامدى قولعا ءتۇسىرىپ، دەلونى ءساتتى انىقتاعان.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
