شي جينپيڭ پالەستينانىڭ زۇڭتۇڭى ابباسپەن كەڭەس وتكىزدى

2023.06.15 16:33 كەلۋ قاينارى : حالىق تورابى

6 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پالەستينانىڭ زۇڭتۇڭى ابباسپەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا ابباسقا ارناپ قارسى الۋ سالتىن وتكىزۋدە. سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

　　شينحۋا اگەنتتىگى، 6 - ايدىڭ 14 - كۇنى، بەيجيڭ (ءتىلشى جىڭ ميڭدا). 6 - ايدىڭ 14 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن پالەستينانىڭ زۇڭتۇڭى ابباسپەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن پالەستينانىڭ ستراتەگيالىق ارىپتەستىك قارى - قاتىناسىن ورناتقاندارىن جاريالادى.

　　شي جينپيڭ بىلاي دەپ اتاپ كورسەتتى: جۇڭگو مەن پالەستينا ءوزارا سەنىم ارتاتىن، ءبىرىن - ءبىرى قولدايتىن جاقسى دوس، جاقسى سەرىك. جۇڭگو − پالەستين ازاتتىق ۇيىمى مەن پالەستينا مەملەكەتىن ەڭ ەرتە مويىنداعان ەلدەردىڭ ءبىرى، پالەستينا حالقىنىڭ ۇلتتىڭ زاڭدى ۇقىق - مۇددەسىن قالپىنا كەلتىرۋ سىندى ادىلەتتى ءىسىن باستان - اياق باتىل قولداپ، پالەستين ماسەلەسىنىڭ ەرتەرەك جاپپاي، ءادىل، باياندى شەشىلۋىن ىلگەرىلەتتى. جۇڭگو جاق پالەستينانىڭ بىرلەسكەن مەملەكەتتەر ۇيىمىنىڭ رەسمي مۇشە ەلى بولۋىن قولدايدى، كوپ جاقتى ورىنداردا پالەستينا جاق ءۇشىن ۇزدىكسىز ادىلدىكتى جاقتايدى، پالەستينا جاققا قولىنان كەلگەنىنشە ۇزدىكسىز كومەك بەرىپ، پالەستينانىڭ ادامگەرشىلىك قيىنشىلىعىن شەشۋىنە، قايتا قۇرۋىنا كومەكتەسۋدى قالايدى. جۇڭگو جاق پالەستينا جاقپەن ستراتەگيالىق سەرىكتەستىك قارىم - قاتىناس ورناتۋدى وراي ەتىپ، ءبىر - ءبىرىنىڭ ءجىتى قاداعالاپ وتىرعان وزەكتى ماسەلەلەرىندە ۇزدىكسىز ءبىرىن - ءبىرى تاباندىلىقپەن قولداپ، ءار سالاداعى دوستىق سەلبەستىكتى جاپپاي ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىن تەرەڭدەتىپ، جۇڭگو - پالەستينا ەركىن ساۋدا كەلىسىمى كەلىسسوزىن جەدەلدەتىپ، ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ءداستۇرلى دوستىقتى جالعاستىرۋدى قالايدى.

　　شي جينپيڭ بىلاي دەپ دارىپتەدى: پالەستين ماسەلەسى جارتى عاسىردان استام ۋاقىتقا سوزىلىپ، پالەستينا حالقىنا اۋىر ازاپ اكەلدى، ءسوز جوق، پالەستيناعا تەز ارادا ادىلەت قايتارۋ كەرەك. شي جينپيڭ 3 قۋاتتامانى العا قويدى. ءبىرىنشى، پالەستين ماسەلەسىن شەشۋدىڭ ءتۇبىرلى شىعار جولى − 1967 - جىلعى شەكارانى نەگىز، شىعىس يەرۋساليمدى استانا ەتكەن، تولىق يەلىك ۇقىقتان يگىلىكتەنەتىن دەربەس پالەستينا مەملەكەتىن قۇرۋ. ەكىنشى، پالەستينانىڭ ەكونوميكا، حالىق تۇرمىسى سۇرانىسى قامتاماسىز ەتىلۋى كەرەك، حالىقارالىق قوعام پالەستينانىڭ دامۋىنا كومەك بەرۋدى جانە ادامگەرشىلىك جاقتان كومەكتەسۋدى كۇشەيتۋى كەرەك. ءۇشىنشى، بەيبىتشىلىك كەلىسسوزىنىڭ دۇرىس بەتالىسىندا تاباندى بولۋ كەرەك. يەرۋساليم ءدىنىنىڭ قاسيەتتى جەرى بولىپ تاريحتا قالىپتاسقان قازىرگى جاعدايعا قۇرمەت ەتىپ، ۇشقارى جانە سوقتىعۋ ءسوز - ارەكەتتەرىن تاستاپ، اناعۇرلىم كەڭ كولەمدى، اناعۇرلىم بەدەلدى، اناعۇرلىم ىقپالدى حالىقارالىق بەيبىتشىلىك ءماجىلىسىن اشۋدى ىلگەرىلەتىپ، بەيبىتشىلىك كەلىسسوزىن قايتا باستاۋعا شارت - جاعداي جاراتۋ، پالەستينا مەن يزرايلدىڭ بەيبىت قاتار تۇرۋىنا كومەكتەسۋ ءۇشىن شىنايى قۇلشىنىس جاساۋ كەرەك. جۇڭگو جاق پالەستينا جاقتىڭ ىشكى جاراسۋىن جۇزەگە اسىرۋدا، بەيبىتشىلىك كەلىسسوزىن ىلگەرىلەتۋدە بەلسەندى رول اتقارۋدى قالايدى.

　　شي جينپيڭ بىلاي دەپ دارىپتەدى: دۇنيە جۇزىندەگى 100 جىلدىق وزگەرىس جاعدايىنا جانە ورتا شىعىس ءوڭىرى جاعدايىنداعى جاڭا وزگەرىسكە قاراتا، جۇڭگو جاق پالەستينا سياقتى وركەندەپ كەلە جاتقان ەلدەرمەن ىنتىماقتى، سەلبەستىكتى كۇشەيتۋدى، حالىقارالىق جانە وڭىرلىك ىستەردە سايكەسۋدى كۇشەيتۋدى، جۇڭگو مەن اراب ەلدەرىنىڭ توپتىق سەلبەستىگىن ىلگەرىلەتۋدى، وركەندەپ كەلە جاتقان ەلدەردىڭ ورتاق مۇددەسىن جانە حالىقارالىق ادىلدىك پەن تۋراشىلدىقتى قورعاۋدى قالايدى.

　　ابباس مىنالاردى ءبىلدىردى: مەن پالەستينا حالقى اتىنان جۇڭگو جاقتىڭ ۇزاق ۋاقىتتان بەرى پالەستينا حالقىنىڭ ۇلتتىڭ زاڭدى ۇقىق - مۇددەسىن قالپىنا كەلتىرۋ ادىلەتتى ىسىنە بار كۇشپەن قولداۋ كورسەتكەنىنە جانە قالتقىسىز كومەك بەرگەنىنە شىن جۇرەكتەن العىس ايتامىن. جۇڭگو − پالەستينا جاقتىڭ سەنىمدى دوسى جانە سەرىگى. پالەستينا جاق جۇڭگو جاقتىڭ وزەكتى مۇددە ماسەلەسىندەگى تۇرعىسىن باتىل قولدايدى، ءبىر جۇڭگو پرينسيبىنەن بۇلجىمايدى. پالەستينا جاق جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، ءار سالاداعى سەلبەستىكتى كۇشەيتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، پالەستينا مەن جۇڭگونىڭ ستراتەگيالىق سەرىكتەستىك قارىم - قاتىناسىن ۇزدىكسىز تەرەڭدەتۋدى قالايدى. پالەستينا جاق ءتوراعا شي جينپيڭ العا قويعان دۇنيە جۇزىلىك حاۋىپسىزدىك باستاماسىن، دۇنيە جۇزىلىك دامۋ باستاماسىن، دۇنيە جۇزىلىك وركەنيەت باستاماسىن قولدايدى، جۇڭگو جاقتىڭ ساۋد ارابياسى مەن يراندى ءساتتى جاراستىرعانىن بارىنشا القايدى، جۇڭگو جاقتىڭ پالەستينا ماسەلەسىن ەرتەرەك ءادىل شەشۋ جونىندە كوپ ءتۇرلى باستامانى العا قويعانىنا العىس ايتادى، پالەستينا جاق جۇڭگو جاقتىڭ اقىل - پاراساتى مەن ءادىل تۇرعىسىنا سەنەدى، جۇڭگو جاقتىڭ پالەستينانىڭ ىشكى تاتۋلاسۋىن ىلگەرىلەتۋدە، سونداي - اق ورتا شىعىس ءوڭىرىنىڭ بەيبىتشىلىگىن جۇزەگە اسىرۋدا اناعۇرلىم زور رول اتقارۋىن ءۇمىت ەتەدى.

　　كەڭەستەن كەيىن ەكى ەلدىڭ مەملەكەت باسشىلارى جۇڭگو مەن پالەستينانىڭ ديپلوماتيالىق قارىم - قاتىناس ورناتقانىنىڭ 35 جىلدىعىن ەسكە ءتۇسىرۋ كۇنىنىڭ العاشقى كانۆەرتىنە بىرگە قول قويدى ءارى ەكونوميكالىق، تەحنيكالىق سەلبەستىك كەلىسىمى سياقتى كوپتەگەن ەكى جاقتى سەلبەستىك قۇجاتتارىنا قول قويۋعا كۋا بولدى.

　　ەكى جاق «جۇڭحۋا حالىق رەسپۋبليكاسى مەن پالەستينا مەملەكەتىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.

　　كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا ابباسقا ارناپ قارسى الۋ سالتىن وتكىزدى.

　　ابباس كەلگەندە تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن پالەستينانىڭ مەملەكەت اندەرىن ورىندادى. ابباس شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

　　سول كۇنى كەشتە شي جينپيڭ حالىق سارايىنىڭ التىن ءتۇستى زالىندا ابباسقا ارناپ قارسى الۋ قوناعاسىن بەردى.

　　ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved