شي جينپيڭ بريكس ەلدەرى ونەركاسىپ - ساۋدا تالقى مىنبەرىنىڭ جابىلۋ سالتىنا ارناۋ ءسوز سويلەدى
2023.08.23 15:49 كەلۋ قاينارى : حالىق تورابى
شينحۋا اگەنتتىگى، 8 - ايدىڭ 22 - كۇنى، يوحاننەسبۋرگ (تىلشىلەر حاۋ ۋەيۋەي، تيان حۇڭ – ي). سول جەر ۋاقىتى 8 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ يوحاننەسبۋرگ بريكس ەلدەرى ونەركاسىپ - ساۋدا تالقى مىنبەرىنىڭ جابىلۋ سالتىنا «ىنتىماقتى، سەلبەستىكتى تەرەڭدەتىپ، حاۋىپ - قاتەر، سىن - سايىسقا توتەپ بەرىپ، اناعۇرلىم تاماشا دۇنيە ءجۇزىن بىرگە قۇرايىق» دەگەن تاقىرىپتا ارناۋ ءسوز سويلەدى.
شي جينپيڭ بىلاي دەپ اتاپ كورسەتتى: قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى بۇرىن بولماعان تاسىلمەن ورىستەۋدە، ادامزات قوعامى شەشۋشى كەزەڭگە ءوتتى. سەلبەستىك پەن توعىسۋدا تاباندى بولۋ كەرەك پە، الدە بولشەكتەۋشىلىك پەن قارسىلاسۋعا بەت الۋ كەرەك پە؟ قول ۇستاسا وتىرىپ بەيبىتشىلىك پەن ورنىقتىلىقتى قورعاۋ كەرەك پە، الدە ”جاڭا قىرعي قاباقتىق سوعىستىڭ“ شىڭىراۋىنا قۇلاۋ كەرەك پە؟ اشىق، سيىسىمدى بولۋ بارىسىندا گۇلدەنۋگە بەت الۋ كەرەك پە، الدە زورەكەرلىك بارىسىندا قۇلدىراۋعا تاپ بولۋ كەرەك پە؟ اۋىس - كۇيىس پەن ءوزارا ۇلگى الۋ بارىسىندا ءوزارا سەنىمدىلىكتى كۇشەيتۋ كەرەك پە، الدە تاكاپپارلىق پەن سىڭار جاقتىلىق ارقىلى ار - ۇجداندى كولەگەيلەۋ كەرەك پە؟ تاريح قوڭىراۋىنىڭ قالاي سوعىلۋى ءبىزدىڭ تالعامىمىزعا بايلانىستى.
شي جينپيڭ بىلاي دەپ دارىپتەدى: قازىرگى دۇنيە ءجۇزى _ بىرەۋى گۇلدەنسە بارلىعى گۇلدەنەتىن، بىرەۋى بۇلىنسە بارلىعى بۇلىنەتىن تاعدىرلاس ورتاق تۇلعا. ءار ەل حالقى ”جاڭا قىرعي قاباقتىق سوعىستى“ ەمەس، ”شاعىن شەڭبەردى“ ەمەس، قايتا باياندى بەيبىتشىلىك ورناعان، جاپپاي حاۋىپسىز بولعان، بىرگە گۇلدەنىپ - كوركەيگەن، اشىق، سيىسىمدى، تازا، كورىكتى دۇنيە ءجۇزىن بىرگە قۇرۋدى كوكسەيدى. بۇل _ تاريحتىڭ العا باسۋىنىڭ لوگيكاسى، ءداۋىردىڭ دامۋ اعىمى. ءار ەل دۇنيەگە، تاريحقا، جالپى جاعدايعا دۇرىس كوزقاراس ۇستانىپ، ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن ارەكەتكە، ارمانىن رەالدىققا اينالدىرۋى كەرەك.
ءبىز بىرگە دامۋدى، بىرگە گۇلدەنۋدى جەبەۋىمىز كەرەك. بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەر جاپا - ماشاقاتتى باستان كەشىرىپ، ۇلت تاۋەلسىزدىگىنە قول جەتكىزدى، ىستەگەن ىستەرىنىڭ بارلىعى حالىقتى باقىتتى تۇرمىسقا كەنەلتۋ بولىپ تابىلادى. ءار ەلدىڭ دامۋ ۇقىعى بار، ءار ەل حالقىنىڭ باقىتتى تۇرمىسقا تالپىنۋ ەركىندىگى بار. جۇڭگو جاق ءار ەلمەن بىرگە دۇنيە جۇزىلىك دامۋ باستاماسىن جانە سەلبەستىگىن جەدەل ىلگەرىلەتىپ، ورتاق سىن - سايىسقا توتەپ بەرىپ، ءار ەل حالقىنىڭ ىرىس - قۇتىن مولايتۋدى قالايدى.
ءبىز جاپپاي حاۋىپسىزدىكتى قۇلشىنا جۇزەگە اسىرۋىمىز كەرەك. ورتاق، جالپىلىق، سەلبەستىك جاسالعان، باياندى جاڭا جاعدايدا تاباندى بولعاندا عانا، جاپپاي حاۋىپسىزدىك جولىمەن جۇرۋگە بولادى. جۇڭگو جاق ءار جاقپەن بىرگە دۇنيە جۇزىلىك حاۋىپسىزدىك باستاماسىنىڭ تياناقتانىپ تامىر تارتۋىن ىلگەرىلەتىپ، قارسىلاسۋ ەمەس، قايتا پىكىرلەسۋدە، وداقتاسۋ ەمەس، قايتا سەرىكتەسۋدە، نولدىك جيىنتىق ەمەس، قايتا تەڭ يگىلىككە كەنەلۋدە تاباندى بولىپ، حاۋىپسىزدىك ورتاق تۇلعاسىن قول ۇستاسا قۇرۋدى قالايدى.
ءبىز وركەنيەت اۋىس - كۇيىسىندە، ءوزارا ۇلگى الۋدا تاباندى بولۋىمىز كەرەك. باي مازمۇندى بولۋ _ ادامزات وركەنيەتىنىڭ قاسيەتى. اتالمىش ”دەموكراتيا مەن ايباتتى“، ”ەركىندىك پەن دارا بيلەۋدى“ قاساقانا ۋاعىزداۋ قاراما - قارسىلىعى تەك قانا دۇنيە ءجۇزىن ءبولىپ تاستاۋدى، وركەنيەت قاقتىعىسىن تۋدىرادى. جۇڭگو جاق ءار ەلدىڭ دۇنيە جۇزىلىك وركەنيەت باستاماسىنا بەلسەنە ات سالىسىپ، بۇكىل ادامزاتتىڭ ورتاق قۇنىن ساۋلەلەندىرىپ، تۇرلىشە وركەنيەتتىڭ جالپى جارىسا ءۇن قاتۋىن، بارلىق گۇل شەشەك اتۋىن جەبەپ، ادامزات وركەنيەتىنىڭ الاۋىن جالعاستىرۋىن قارسى الادى.
شي جينپيڭ بىلاي دەپ دارىپتەدى: بريكس ەلدەرى ۋاكىلدىك ەتكەن بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ توپتىق ەڭسە كوتەرۋى دۇنيە ءجۇزىنىڭ كارتاسىن تۇبىرىنەن وزگەرتۋدە. مەيلى قانشالىق كەدەرگى بولسا دا، بريكس ەلدەرى سىندى بەلسەندى، ورنىقتى، ىزگىلىككە تالپىناتىن كۇش قارىشتاپ داميدى. ءبىز بريكس ەلدەرىنىڭ ستراتەگيالىق سەرىكتەستىك قارىم - قاتىناسىن ۇزدىكسىز تەرەڭدەتىپ، ”بريكس+“ ۇلگىسىن كەڭەيتىپ، قىزمەتكەرلەردى كوبەيتۋ اياق الىسىن بەلسەنە ىلگەرىلەتىپ، باسقا دا بازارى جاڭادان گۇلدەنگەن ەلدەرمەن جانە وركەندەپ كەلە جاتقان ەلدەرمەن ىنتىماقتى، سەلبەستىكتى تەرەڭدەتىپ، دۇنيە ءجۇزىنىڭ كوپ ۇيەكتەنۋى مەن حالىقارالىق قاتىناستىڭ دەموكراتيالانۋىن ىلگەرىلەتىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتەمىز. 20 نەشە مەملەكەت بريكستىڭ قاقپاسىن قاقتى، جۇڭگو جاق كوپشىلىكتىڭ بريكس ەلدەرىنىڭ سەلبەستىك مەحانيزمىنە كىرۋىن شىن جۇرەكتەن قارسى الادى!
شي جينپيڭ بىلاي دەپ دارىپتەدى: جۇڭگو دەربەس، ءوز - وزىنە قوجا بولۋ سىندى بەيبىت ديپلوماتيالىق ساياساتتى باتىل اتقارىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە كۇش سالادى. وركەندەپ كەلە جاتقان ەلدەردىڭ، ”دۇنيە جۇزىلىك وڭتۇستىكتىڭ“ ءبىر مۇشەسى رەتىندە، جۇڭگو باستان - اياق باسقا وركەندەپ كەلە جاتقان ەلدەرمەن تىنىستاس، تاعدىرلاس بولىپ، وركەندەپ كەلە جاتقان ەلدەردىڭ ورتاق مۇددەسىن باتىل قورعاپ، بازارى جاڭادان گۇلدەنگەن ەلدەر مەن وركەندەپ كەلە جاتقان ەلدەردىڭ دۇنيە جۇزىلىك ىستەردەگى ۋاكىلدىك سيپاتىن جانە سويلەۋ ۇقىعىن ارتتىرۋدى ىلگەرىلەتتى. جۇڭگونىڭ زورەكەر بولۋ گەنى جوق، ءىرى ەلدىك قىزبالىعى دا جوق، تاريحتىڭ دۇرىس جاعىندا مىزعىماي تۇرىپ، ”اقيقات جولىمەن ءجۇرۋ، الەم اياسى _ ءبىر شاڭىراق“ دەيتىن يدەيانى بەرىك ۇستانادى.
شي جينپيڭ بىلاي دەپ اتاپ كورسەتتى: قازىر جۇڭگو حالقى جۇڭگو كوممۋنيستىك پارتياسىنىڭ باسشىلىعىندا جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدە. جۇڭگو سوتسياليستىك بازار شارۋاشىلىعىنىڭ ءتۇزىلىس ابزالدىعىنا، ەرەن كولەمدى بازاردىڭ قاجەتسىنۋ ابزالدىعىنا، كاسىپ جۇيەسىنىڭ جۇيەلى، كەمەلدى قامداۋ ابزالدىعىنا، قىرۋار ساپالى ەڭبەكشىلەر مەن كاسىپورىنشىلار سىندى دارىندىلار ابزالدىعىنا يە. جۇڭگو ەكونوميكاسىنىڭ سەرپىمدىلىگى كۇشتى، كومەسكى كۇشى زور، ومىرشەڭدىك كۇشى جەتكىلىكتى، ۇزاق ۋاقىت جاقسارۋ نەگىزگى جاعدايى وزگەرمەيدى. جۇڭگو باستان - اياق دۇنيە ءجۇزى دامۋىنىڭ ماڭىزدى ورايى بولىپ، جوعارى دەڭگەيدە ەسىك اشۋدى باتىل ىلگەرىلەتىپ، بازارلانعان، زاڭمەن باسقارىلاتىن، حالىقارالانعان ماڭداي الدى ساۋدا ورتاسىن قالىپتاستىرىپ، دۇنيە جۇزىنە بەت العان جوعارى ولشەمدى ەركىن ساۋدا رايونى تورابىن قۇرادى. جۇڭگونىڭ ءبىر ميلليارد 400 ميلليوننان استام حالقىنىڭ وسىزاماندانۋعا قادام تاستاۋىنا بايلانىستى، جۇڭگو، ءسوز جوق، دۇنيە ءجۇزى ەكونوميكاسىنا اناعۇرلىم زور ۇلەس قوسىپ، ءار ەلگە اناعۇرلىم زور كەڭىستىك ازىرلەيدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
