شي جينپيڭ وڭتۇستىك افريكانىڭ زۇڭتۇڭى راماپوسامەن كەڭەس وتكىزدى

2023.08.23 15:52 كەلۋ قاينارى : حالىق تورابى

سول جەر ۋاقىتى 8 - ايدىڭ 22 - كۇنى تۇستەن بۇرىن مەملەكەت ءتوراعاسى شي جينپيڭ پرەتوريا زۇڭتۇڭ سارايىندا وڭتۇستىك افريكانىڭ زۇڭتۇڭى راماپوسامەن كەڭەس وتكىزدى. سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن

　　شينحۋا اگەنتتىگى، 8 - ايدىڭ 22 – كۇنى، پرەتوريا (تىلشىلەر ني سى – ي، لۋ شياڭميڭ). سول جەر ۋاقىتى 8 - ايدىڭ 22 - كۇنى تۇستەن بۇرىن وڭتۇستىك افريكادا مەملەكەت ىستەرى ساپارىندا جۇرگەن مەملەكەت ءتوراعاسى شي جينپيڭ پرەتوريا زۇڭتۇڭ سارايىندا وڭتۇستىك افريكانىڭ زۇڭتۇڭى راماپوسامەن كەڭەستى. ەكى ەلدىڭ مەملەكەت باسشىلارى جاڭا داۋىردەگى جۇڭگو - وڭتۇستىك افريكا قارىم - قاتىناسىنىڭ دامۋى، سونداي - اق ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرىپ، ماڭىزدى ورتاق تانىمعا كەلىپ، جۇڭگو مەن وڭتۇستىك افريكانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن قول ۇستاسا ىلگەرىلەتىپ، جوعارى دەڭگەيدەگى جۇڭگو - وڭتۇستىك افريكا تاعدىرلاس ورتاق تۇلعاسىن قول ۇستاسا قۇرۋدى ءبىر اۋىزدان قۇپتادى.

　　8 - ايداعى پرەتوريانىڭ اسپانى اشىق، قوڭىر سامال باياۋ ەسەدى. زۇڭتۇڭ سارايى الاڭىنداعى گۇلدەر قۇلپىرىپ، جۇڭگو مەن وڭتۇستىك افريكانىڭ مەملەكەت تۋلارى جەلبىرەپ تۇر. زۇڭتۇڭ موتوتسيكل اترەتىنىڭ قورعاۋىندا شي جينپيڭ اۆتوكولىكپەن زۇڭتۇڭ سارايىنا باردى، راماپوسا اۆتوكولىكتەن تۇسەتىن جەردە ىستىق ىقىلاسپەن قارسى الدى. ەكى ەلدىڭ مەملەكەت باسشىلارى قۇرمەت قاراۋىلى مىنبەسىنە شىقتى. قۇرمەت قاراۋىلى مىلتىقتارىن سەرت ۇستاپ، قۇرمەت ءبىلدىردى، اسكەري وركەستر جۇڭگو مەن وڭتۇستىك افريكانىڭ مەملەكەت اندەرىن ورىندادى، الاڭدا 21 رەت قۇرمەت ساليۋتى اتىلدى. شي جينپيڭ وڭتۇستىك افريكانىڭ قۇرمەت قاراۋىلىن كوزدەن كەشىردى. ەكى ەلدىڭ مەملەكەت باسشىلارى ەكى جاقتاعى ساپارلاستارمەن ءبىر - بىرلەپ قول الىستى.

　　قارسى الۋ سالتىنان كەيىن ەكى ەلدىڭ مەملەكەت باسشىلارى كەڭەس وتكىزدى.

　　شي جينپيڭ بىلاي دەپ اتاپ كورسەتتى: بۇل − مەنىڭ جۇڭگونىڭ مەملەكەت ءتوراعاسى سالاۋاتىمەن وڭتۇستىك افريكاعا 4 - رەت ساپارلاي كەلۋىم. 10 جىلدان بەرى مەن جۇڭگو - وڭتۇستىك افريكا قارىم - قاتىناسىنىڭ قارىشتاپ دامۋىن ءوز باسىمنان كەشىردىم. جۇڭگو مەن وڭتۇستىك افريكا قارىم - قاتىناسىنىڭ جاقسى، دوستىعىنىڭ تەرەڭ بولۋىنىڭ تەتىگى ەكى ەل پارتيالارىنىڭ ءوز - ءوزىنىڭ دامۋ جولىندا بەينەت پەن زەينەتتى بىرگە وتكەرىپ، تەرەڭ دوستىق ورناتۋىندا. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى جۇڭحۋا ۇلتىنىڭ ۇلى گۇلدەنۋىن جاپپاي ىلگەرىلەتۋدە، وڭتۇستىك افريكا ءوز ەلىنىڭ مەملەكەت جاعدايىنا ۇيلەسەتىن وسىزامانداندىرۋ جولىن قاراستىرۋدا. جۇڭگو جاق وڭتۇستىك افريكا جاقپەن بىرگە دوستىقتى جالعاستىرىپ، ىستەستىكتى تەرەڭدەتىپ، سەلبەستىكتى كۇشەيتىپ، جۇڭگو مەن وڭتۇستىك افريكانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، جوعارى دەڭگەيدەگى جۇڭگو – وڭتۇستىك افريكا تاعدىرلاس ورتاق تۇلعاسىن قول ۇستاسا قۇرۋدى قالايدى.

　　شي جينپيڭ بۇل جونىندە مىناداي ۇسىنىستار قويدى.

　　ءبىرىنشى، جۇڭگو مەن وڭتۇستىك افريكا ءبىر - بىرىنە بارىنشا سەنەتىن ستراتەگيالىق سەرىكتەر بولۋى كەرەك. ”جولداس ۇستىنە باۋىرلاس بولۋ“ − جۇڭگو - وڭتۇستىك افريكا قارىم - قاتىناسىنىڭ قاسيەتى. ەكى جاق ەكى ەلدىڭ زاڭ شىعارۋ قۇرىلىمى، ساياسي پارتيا، ارميا، جەرگىلىكتى ورىن سياقتى سالالارىنداعى اۋىس - كۇيىستى، سەلبەستىكتى كۇشەيتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءوزارا قولداۋ كورسەتۋى كەرەك. جۇڭگو جاق وڭتۇستىك افريكامەن پارتيالار ارا اۋىس - كۇيىس پەن تاربيەلەۋ سەلبەستىگىن كۇشەيتىپ، افريكالىقتار حالىقتىق كەڭەسىنىڭ افريكا باسشىلىق كۇشى شۋەيۋانىن قۇرۋىنا شاماسىنىڭ جەتىسىنشە كومەك بەرۋدى قالايدى.

　　ەكىنشى، جۇڭگو مەن وڭتۇستىك افريكا بىرگە العا باساتىن دامۋ سەرىكتەرى بولۋى كەرەك. ءوزارا پايدا جەتكىزىپ، تەڭ يگىلىككە كەنەلۋ − جۇڭگو مەن وڭتۇستىك افريكا سەلبەستىگىنىڭ ايقىن ەرەكشەلىگى. ەكى جاق ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتۋدى، جۇڭگو - افريكا سەلبەستىك تالقى مىنبەرىنىڭ ”9 ءتۇرلى ينجەنەرياسىن“ جانە «جۇڭگو مەن وڭتۇستىك افريكانىڭ 10 جىلدىق سەلبەستىك ستراتەگيالىق جوباسىن» تياناقتاندىرۋدى نەگىزگى جەلى ەتىپ، ابزالدىققا يە سالالارداعى سەلبەستىكتى بەكەمدەپ، سەلبەستىكتىڭ جاڭا ارتۋ تۇيىندەرىن جەتىلدىرۋى كەرەك. جۇڭگو جاق وڭتۇستىك افريكانىڭ ونىمدەرىن يمپورت ەتۋدى كەڭەيتىپ، اناعۇرلىم كوپ جۇڭگو كاسىپورىندارىن وڭتۇستىك افريكاعا بارىپ قارجى قوسىپ، شارۋاشىلىعىن شالقىتۋعا ىنتالاندىرادى. كەدەيلەردى ازايتۋ، شارۋالارعا تيىمدىلىك جاساۋ جانە اۋىل - قىستاقتى گۇلدەندىرۋ − جۇڭگو ۇلگىسىندەگى وسىزامانداندىرۋدىڭ ماڭىزدى مازمۇنى، جۇڭگو جاق وڭتۇستىك افريكامەن تاجىريبە اۋىس - كۇيىسىن كۇشەيتىپ، وڭتۇستىك افريكانىڭ كەدەيلىكتى ازايتۋدان ۇلگى كورسەتۋ قىستاعى نىسانىن اتقارۋىنا كومەكتەسۋدى قالايدى.

　　ءۇشىنشى، جۇڭگو مەن وڭتۇستىك افريكا ءبىرىن - ءبىرى تۇسىنەتىن، ءبىرىن - ءبىرى جاقىن سانايتىن دوسجار سەرىكتەر بولۋى كەرەك. حالىق تىلەگىنىڭ توعىسۋى − ەكى ەل دوستىعىنىڭ جاندى بەينەلەنۋى. جۇڭگو جاق جۇڭگو - وڭتۇستىك افريكا كاسىپتىك وقۋ - اعارتۋ وداعى، ”بولاشاقتاعى افريكا - جۇڭگو كاسىپتىك وقۋ - اعارتۋ سەلبەستىك جوسپارى“ سياقتى مەحانيزمدەردەن ويداعىداي پايدالانىپ، ەكى ەلدىڭ كاسىپتىك وقۋ - اعارتۋىن كۇشەيتۋ، جاستاردىڭ جۇمىستانۋىن جەبەۋ جاقتارىنداعى اۋىس - كۇيىستى، سەلبەستىكتى كۇشەيتىپ، وڭتۇستىك افريكانىڭ اناعۇرلىم كوپ ەكونوميكالىق، قوعامدىق دامۋعا شۇعىل قاجەتتى ءتۇرلى دارىندىلاردى جەتىلدىرۋىنە دەم بەرۋدى قالايدى. ەكى جاق ساياحات سەلبەستىگىن كۇشەيتىپ، عىلمي زەرتتەۋ قۇرىلىمدارى مەن كاسىپورىنداردىڭ تەحنيكالىق سەلبەستىك پەن بىرلەسىپ زەرتتەۋدى كۇشەيتۋىن قولداپ، سەلبەستىك جەتىستىكتەرىنىڭ ەكى ەل حالىقتارىن اناعۇرلىم كوپ يگىلىككە كەنەلتۋىنە مۇمكىندىك جاساۋى كەرەك.

　　ءتورتىنشى، جۇڭگو مەن وڭتۇستىك افريكا ادىلەتتى قورعايتىن دۇنيە جۇزىلىك سەرىكتەستەر بولۋى كەرەك. دەربەس، ءوز - وزىنە قوجا بولۋ − ءبىزدىڭ ورتاق تاباندى بولاتىن پرينسيپىمىز. جۇڭگو جاق وڭتۇستىك افريكانىڭ حالىقارالىق جانە وڭىرلىك ىستەردە اناعۇرلىم زور رول اتقارۋىن قولدايدى، وڭتۇستىك افريكا سياقتى وركەندەپ كەلە جاتقان ەلدەرمەن بىرگە دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن تياناقتاندىرىپ، ناعىز كوپ جاقتىلىقتى امالياتتا ايگىلەپ، ”دۇنيە جۇزىلىك وڭتۇستىك“ ەلدەرىنىڭ دۇنيە جۇزىلىك جونگە سالۋداعى ۋاكىلدىك سيپاتىن جانە سويلەۋ ۇقىعىن جوعارىلاتۋدى، كليمات وزگەرىسى، استىق حاۋىپسىزدىگى، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كۇن ءتارتىبى سياقتى ماسەلەلەردە سەلبەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسى مەن دامۋ كەڭىستىگىن قورعاۋدى قالايدى.

　　شي جينپيڭ بىلاي دەپ اتاپ كورسەتتى: تاياۋ جىلداردان بەرى بريكس ەلدەرى اشىق، سيىسىمدى بولۋ، سەلبەسىپ تەڭ يگىلىككە كەنەلۋ سىندى بريكس رۋحىن ۇستانىپ، تۇرلىشە تۇزىمدەگى، تۇرلىشە مادەنيەتتەگى، تۇرلىشە وڭىردەگى ەلدەردىڭ قول ۇستاسا دامۋىنىڭ تارتىمدى حيكاياسىن جازىپ، وڭتۇستىك - وڭتۇستىك سەلبەستىگىنىڭ التىن ماڭدايشالىعىنا اينالدى. وڭتۇستىك افريكا بريكس ەلدەرى باسشىلارىنىڭ وسى رەتكى كەزدەسۋىنە دەن قويا دايىندىق جاسادى، مەن مۇنى ايرىقشا القايمىن. مەن بريكس ەلدەرى باسشىلارىمەن بىرگە جاڭا داۋىردەگى بريكس ىنتىماعىنىڭ، دامۋىنىڭ ۇلى جوسپارىن بىرگە اقىلداسىپ، ديدارلاسۋدا سۇبەلى تابىستارعا قول جەتكىزۋدى ىلگەرىلەتىپ، دۇنيە جۇزىلىك جونگە سالۋدىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋدى ءۇمىت ەتەمىن.

　　شي جينپيڭ بىلاي دەپ دارىپتەدى: جۇڭگو مەن افريكا − ەجەلدەن تاعدىرلاس ورتاق تۇلعا. بىلىقپالىق قاباتتاسقان دۇنيە ءجۇزى جاعدايىندا جۇڭگو مەن افريكانىڭ ىنتىماقتى، ىستەستىكتى كۇشەيتۋى بۇرىنعىءارقانداي كەزدەگىدەن دە اناعۇرلىم قاجەتتى بولىپ وتىر. جۇڭگو جاق افريكا ەلدەرىنىڭ بىرلەسىپ ءوزىن الۋەتتەندىرۋىن باتىل قولدايدى، افريكا وداعىنىڭ 20 ەل توبىنا كىرۋىن باتىل قولدايدى، افريكانىڭ ونەركاسىپتەندىرۋ جانە اۋىل شارۋاشىلىعىن وسىزامانداندىرۋ اياق الىسىن ىلگەرىلەتۋىن باتىل قولدايدى. مەن سىزبەن بىرگە جۇڭگو - افريكا باسشىلارىنىڭ كەڭەسىن باسقارىپ، ماجىلىسكە قاتىناسقان باسقا دا افريكا ەلدەرىنىڭ باسشىلارىمەن بىرگە جۇڭگو مەن افريكانىڭ ىنتىماعىنىڭ، سەلبەستىگىنىڭ جاڭا جوباسىن جاساپ، جوعارى دەڭگەيدەگى جۇڭگو - افريكا تاعدىرلاس ورتاق تۇلعاسىن قۇرۋدى ىلگەرىلەتۋدى كۇتەمىن.

　　راماپوسا مىنالاردى ءبىلدىردى: ءتوراعا شي جينپيڭنىڭ وڭتۇستىك افريكادا 4 - رەت مەملەكەت ىستەرى ساپارىندا بولۋىن قارسى العانىمدى ەرەكشە داڭق سەزىنەمىن. جۇڭگو وڭتۇستىك افريكانىڭ ۇلت تاۋەلسىزدىگىنە قول جەتكىزۋى، مەملەكەتتىڭ دامۋىن جۇزەگە اسىرۋى بارىسىندا وڭتۇستىك افريكاعا قۇندى قولداۋ كورسەتىپ، جاڭا تيپتى ايدارشا ۆيرۋس وكپە قابىنۋ ىندەتى سياقتى قيىن - قىستاۋ ساتتەردە وڭتۇستىك افريكانىڭ شىنايى باۋىرلاسى، دوسى جانە سەرىگى بولدى. وڭتۇستىك افريكا مەن جۇڭگو ەكى ەل ءوز ەلدەرىنىڭ دامۋىن، گۇلدەنۋىن كوكسەيدى، كوپتەگەن كەلەلى حالىقارالىق ىستەردەگى تۇرعىسى ۇقساس نەمەسە قارايلاس. ديپلوماتيالىق قارىم - قاتىناس ورناتقان 25 جىلدان بەرى وڭتۇستىك افريكا ءبىر جۇڭگو پرينسيبىنە باتىل بويسۇندى، ەكى جاقتىڭ قارىم - قاتىناسى قارىشتاپ دامىپ، ءار جىكتەگىلەردىڭ بارىس - كەلىسى جيىلەپ، ءار سالاداعى سەلبەستىگى سۇبەلى ناتيجەگە قول جەتكىزدى. جۇڭگونىڭ قارجى قوسۋى مەن سەلبەستىگى وڭتۇستىك افريكانىڭ ەكونوميكالىق، قوعامدىق دامۋىن پارمەندى جەبەدى، افريكا ەلدەرى مەن دۇنيە جۇزىندەگى وڭتۇستىك ەلدەردىڭ دامۋىن، گۇلدەنۋىن جەبەۋدە دە ماڭىزدى رول اتقاردى. وڭتۇستىك افريكا جۇڭگو كوممۋنيستىك پارتياسىنىڭ جۇڭگو حالقىن باستاپ وراسان زور دامۋ جەتىستىكتەرىنە قول جەتكىزگەنىن جوعارى باعالايدى، جۇڭگو جاقپەن پارتيالار ارا بارىس - كەلىستى جيىلەتىپ، پارتيانى جونگە سالۋ، ەل باسقارۋ تاجىريبەلەرى جونىندە اۋىس - كۇيىس جاساۋدى تەرەڭدەتىپ، كەدەيلىكتى ازايتۋدىڭ جۇڭگو ۇلگىسىندەگى سىناق ءتۇيىنى سەلبەستىگىن ورىستەتىپ، ساۋدا، قارجى قوسۋ، ەنەرگيا، نەگىزدىك قۇرىلعى قۇرىلىسى، جاساۋ كاسىبى، عىلىم - تەحنيكا سياقتى سالالارداعى سەلبەستىكتى كەڭەيتۋدى قالايدى، اناعۇرلىم كوپ جۇڭگو كاسىپورىندارىنىڭ وڭتۇستىك افريكاعا كەلىپ قارجى قوسىپ، شارۋاشىلىقتى گۇلدەندىرۋىن قارسى الادى.

　　راماپوسا مىنالاردى ءبىلدىردى: بۇگىنگى دۇنيە ءجۇزى وڭىرلىك ساياسي، ەنەرگيا داعدارىسى سياقتى كوپتەگەن اۋىر، كۇردەلى سىن - سايىسقا ءدوپ كەلدى. مەن ءتوراعا شي جينپيڭ العا قويعان سەلبەسىپ تەڭ يگىلىككە كەنەلۋ دارىپتەمەسىن تولىق قۇپتايمىن. وڭتۇستىك افريكا جانە دۇنيە جۇزىندەگى باسقا دا وڭتۇستىك ەلدەرى جۇڭگومەن ىنتىماقتى، سەلبەستىكتى كۇشەيتىپ، سىن - سايىسقا اناعۇرلىم ويداعىداي بىرگە توتەپ بەرىپ، اناعۇرلىم تەڭ، ءادىل، ۇيلەسىمدى حالىقارالىق ءتارتىپ ورناتۋدى ىلگەرىلەتۋدى ءۇمىت ەتەدى. جۇڭگو جاقتىڭ وڭتۇستىك افريكانىڭ بريكس ەلدەرى باسشىلارىنىڭ ديدارلاسۋىن ءساتتى وتكىزۋىن قولداعانىنا العىس ايتامىن. وڭتۇستىك افريكا بريكس ەلدەرىمەن بىرگە كوپ جاقتىلىقتى باتىل قورعاپ، دۇنيە جۇزىلىك جونگە سالۋ جۇيەسى رەفورماسىن ىلگەرىلەتىپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى. مەن ءتوراعا شي جينپيڭمەن بىرگە جۇڭگو - افريكا ەلدەرى باسشىلارىنىڭ كەڭەسىن باسقارىپ، افريكا - جۇڭگو قارىم - قاتىناسىنىڭ اناعۇرلىم جوعارى دەڭگەيگە قاراي دامۋىن ىلگەرىلەتۋدى كۇتەمىن.

　　ەكى ەلدىڭ مەملەكەت باسشىلارى جۇڭگو مەن وڭتۇستىك افريكانىڭ جالپى بەتتىك ستراتەگيالىق ارىپتەستىك قارىم - قاتىناسىنىڭ جاڭا داۋىردە اناعۇرلىم زور دامۋدى جۇزەگە اسىرۋىن، دۇنيە جۇزىندەگى وڭتۇستىك ەلدەرىنىڭ دۇنيە ءجۇزىن جونگە سالۋداعى ۋاكىلدىك سيپاتى مەن سويلەۋ ۇقىعىن جوعارىلاتۋىن ىلگەرىلەتىپ، تەبىندى ەلدەردىڭ ىنتىماقتاسا سەلبەسۋىن تەرەڭدەتۋگە، جۇڭگو مەن افريكانىڭ جالپى بەتتىك ستراتەگيالىق ارىپتەستىك قارىم - قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتۋگە تىڭ دا پارمەندى قوزعاۋشى كۇش قوسۋعا ءبىر اۋىزدان ماقۇل بولدى.

　　كەڭەستەن كەيىن راماپوسا شي جينپيڭگە ”وڭتۇستىك افريكا وردەنىن“ بەردى، بۇل − وڭتۇستىك افريكانىڭ ماڭىزدى دوس ەلدەردىڭ مەملەكەت باسشىلارىنا سيلايتىن ەڭ جوعارى دارەجەلى وردەنى جانە ەڭ جوعارى داڭقى.

　　ەكى ەلدىڭ مەملەكەت باسشىلارى ەكى ەلدىڭ ”ءبىر بەلدەۋ، ءبىر جولدى“ بىرگە قۇرۋ، جاڭا ەنەرگيا، ەلەكتر قۋاتى، اۋىل شارۋاشىلىق ونىمدەرى، ەكونوميكالىق ەرەكشە رايون جانە ونەركاسىپ باقشا رايونى، كوك ءتۇستى ەكونوميكا، عىلىم - تەحنيكادا جاڭالىق اشۋ، جوعارى دارەجەلى وقۋ - اعارتۋ سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

　　ەكى جاق «جۇڭحۋا حالىق رەسپۋبليكاسى مەن وڭتۇستىك افريكا رەسپۋبليكاسىنىڭ بىرلەسكەن مالىمدەمەسىن» جاريالادى.

　　سول كۇنى تۇستە راماپوسا زۇڭتۇڭ سارايىندا شي جينپيڭگە ارناپ قارسى الۋ قوناعاسىن بەردى.

　　ساي چي، ۋاڭ ي قاتارلىلار جوعارىداعى قيمىلدارعا قاتىناستى.

　　كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

تەلەفون: 65367915-010 ‍حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved