لي چياڭ امەريكانىڭ ساۋدا مينيسترى رەموندومەن، دۇنيە جۇزىلىك ۆاكسينا يممۋنيتەت وداعى القالار كەڭەسىنىڭ ءتوراعاسى باروزومەن جەكە - جەكە كەزدەستى
2023.08.30 16:51 كەلۋ قاينارى : حالىق تورابى
شينحۋا اگەنتتىگى، 8 - ايدىڭ 29 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 8 - ايدىڭ 29 - كۇنى تۇستەن كەيىن حالىق سارايىندا امەريكانىڭ ساۋدا مينيسترى رەموندومەن كەزدەستى.
لي چياڭ مىنالاردى ءبىلدىردى: اقاۋسىز، ورنىقتى جۇڭگو - امەريكا قارىم - قاتىناسى ەكى ەلگە دە، دۇنيە جۇزىنە دە ءتيىمدى. بىلتىر ءتوراعا شي جينپيڭ زۇڭتۇڭ بايدەنمەن يندونەزيانىڭ بالي ارالىندا ءساتتى كەڭەس وتكىزىپ، ءبىرقىدىرۋ ماڭىزدى ورتاق تانىمعا كەلىپ، جۇڭگو - امەريكا قارىم - قاتىناسىنا ايقىن باعدار كورسەتتى. تاياۋدا امەريكا جاق ەكى ەلدىڭ مەملەكەت باسشىسى بالي ارالىنداعى كەزدەسۋدە بەلگىلەگەن كۇن تارتىپكە قايتا ورالۋعا كۇش سالاتىنىن تالاي رەت ءبىلدىردى، جۇڭگو جاق مۇنى قارسى الادى. ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ − جۇڭگو مەن امەريكانىڭ تاتۋ - ءتاتتى ءوتۋىنىڭ دۇرىس جولى. امەريكا جاقتىڭ جۇڭگو جاقپەن بىرگە قۇلشىنىپ، ءتىپتى دە كوپ ناقتى، پايدالى ارەكەتتەر جاساپ، جۇڭگو - امەريكا قارىم - قاتىناسىن ويداعىداي قورعاۋىن، دامىتۋىن ءۇمىت ەتەمىن.
لي چياڭ بىلاي دەپ اتاپ كورسەتتى: جۇڭگو مەن امەريكانىڭ ەكونوميكا - ساۋدا قارىم - قاتىناسىنىڭ ءمانى ءوزارا پايدا جەتكىزىپ، تەڭ يگىلىككە كەنەلۋدە. ەكونوميكا - ساۋدا ماسەلەسىن جاپپاي ساياسيلاندىرۋ، جاپپاي حاۋىپسىزدىككە سايدىرۋ ەكى ەلدىڭ قارىم - قارىم - قاتىناسى مەن ءوزارا سەنىمدىلىگىنە اۋىر ىقپال جاساپ قانا قويماي، ەكى ەل كاسىپورىندارى مەن حالىقتارىنىڭ مۇددەسىنە دە زيان جەتكىزىپ، دۇنيە ءجۇزى ەكونوميكاسىنا اپات سيپاتتى ىقپال جاسايدى. جۇڭگو − ەڭ ءىرى وركەندەپ كەلە جاتقان ەل، امەريكا − ەڭ ءىرى دامىعان ەل. ەكى جاق ءوزارا مۇددە جەتكىزۋ سەلبەستىگىن كۇشەيتىپ، قاقتىعىس جانە قارسىلاسۋدى ازايتىپ، دۇنيە ءجۇزى ەكونوميكانىڭ قالپىنا كەلۋىن بىرگە ىلگەرىلەتىپ، دۇنيە جۇزىلىك باسەكەگە توتەپ بەرۋى كەرەك. جۇڭگو جاق امەريكا جاقپەن ەكونوميكا - ساۋدا سالاسىنداعى تىلدەسۋدى، سەلبەستىكتى كۇشەيتىپ، ەكى ەلدىڭ ەكونوميكا - ساۋدا قارىم - قاتىناسىنىڭ اقاۋسىز دامۋىن ىلگەرىلەتۋدى قالايدى، امەريكا جاقتىڭ جۇڭگو جاقپەن ءبىر باعىتتا ءجۇرۋىن ءۇمىت ەتەدى. جۇڭگو جوعارى دەڭگەيدە سىرتقا ەسىك اشۋدى بەلسەنە ىلگەرىلەتىپ، بازارلانعان، زاڭمەن باسقارىلاتىن، حالىقارالانعان ماڭداي الدى ساۋدا ورتاسىن قۇلشىنا قالىپتاستىرىپ، بازارعا كىرۋ رۇقساتىن ونان ارى كەڭەيتىپ، شەتەل كاپيتالىمەن قۇرىلعان كاسىپورىنداردىڭ ازاماتتىق مامىلەسىن ويداعىداي تياناقتاندىرىپ، ءادىل باسەكەنى قورعايدى جانە جەبەيدى، سىرتقا اشىق ۇستالعان ەسىگىن بارعان سايىن ايقارا اشادى.
رەموندو مىنانى ءبىلدىردى: بايدەن ۇكىمەتى جۇڭگونىڭ ەكونوميكانى دامىتۋىن، حالىق تۇرمىسىن جاقسارتۋىن قولدايدى، جۇڭگونىڭ دامۋىن تەجەۋدى قالامايدى، جۇڭگودان قول ۇزۋگە ۇرىنبايدى، جۇڭگو جاقپەن بايلانىستى ساقتاپ، امەريكا مەن جۇڭگونىڭ قالىپتى ەكونوميكا - ساۋدا قارىم - قاتىناسىن قورعاپ، ەكى ەل قارىم - قاتىناسىنىڭ ورنىقتى دامۋىن ىلگەرىلەتۋدى قالايدى. امەريكا جاق تا جۇڭگو جاقپەن جاساندى زەردە، كليمات وزگەرىسى، فەنتانيلعا سوققى بەرۋ سياقتى سالالارداعى سەلبەستىكتى كۇشەيتۋدى قالايدى.
شينحۋا اگەنتتىگى، 8 - ايدىڭ 29 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 8 - ايدىڭ 29 - كۇنى تۇستەن كەيىن حالىق سارايىندا دۇنيە جۇزىلىك ۆاكسينا يممۋنيتەت وداعى القالار كەڭەسىنىڭ ءتوراعاسى باروزومەن كەزدەستى.
لي چياڭ مىنالاردى ءبىلدىردى: دۇنيە ءجۇزىن شارپىعان وسى جولعى جاڭا تيپتى ايدارشا ۆيرۋس وكپە قابىنۋ ىندەتى بۇكىل دۇنيە ءجۇزىنىڭ دەنساۋلىق ساقتاۋدى جونگە سالۋىن كۇشەيتۋدىڭ توتەنشە ماڭىزدى ەكەنىن تاعى ءبىر رەت دالەلدەدى. ءبىز ادامنىڭ ءومىر ءسۇرۋ ۇقىعىن، سالاماتتىق ۇقىعىن كورنەكتى ورىنعا قويىپ، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسى ۇستانىمىن ۇستانىپ، ءبىر نيەتپەن ىنتىماقتاسىپ، ادامزاتتىڭ سالاماتتىق ىرىس – قۇتىن بىرگە قورعاۋىمىز كەرەك. ادىلدىكتە، جالپىعا ءتيىمدى بولۋدا تاباندى بولىپ، الەۋمەتتىك دەنساۋلىق ساقتاۋ بايلىعىن ءبولۋ ونىمدىلىگىن جوعارىلاتىپ، وركەندەپ كەلە جاتقان ەلدەرگە ۆاكسيناعا تەڭ يە بولۋ ورايىن بەرۋ كەرەك. ناعىز كوپ جاقتىلىقتى امالياتتا ايگىلەپ، ءار ەلدىڭ ۇقىق تەڭدىگىن، وراي تەڭدىگىن، ەرەجە تەڭدىگىن دارىپتەپ، عىلىم - تەحنيكادا جاڭالىق اشۋدىڭ رولىن تولىق ساۋلەلەندىرىپ، دۇنيە جۇزىلىك دەنساۋلىق ساقتاۋدى جونگە سالۋدىڭ وسىزاماندانۋىن ىلگەرىلەتۋ كەرەك. وبيەكتيۆ، ادىلدىك جانە كاسىپتىك پرينسيپ ۇستانىپ، ىندەتتەن ساقتانۋ - تىزگىندەۋ مەن تەگىن تەكتەۋ ماسەلەسىن ساياسيلاندىرۋعا، اتقا داق سالۋعا قارسى تۇرۋ كەرەك.
لي چياڭ دۇنيە جۇزىلىك ۆاكسينا يممۋنيتەت وداعىنىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ، دۇنيە جۇزىلىك دەنساۋلىق ساقتاۋدى جونگە سالۋدى كۇشەيتۋ جاقتارىندا اتقارعان ماڭىزدى رولى مەن ەكى جاقتىڭ سەلبەستىك جەتىستىكتەرىنە بەلسەندى باعا بەرىپ، جۇڭگو جاقتىڭ وداقتىڭ قىزمەتىن بۇرىنعىداي قولدايتىنىن ءبىلدىردى.
باروزو مىنانى ءبىلدىردى: دۇنيە جۇزىلىك ۆاكسينا يممۋنيتەت وداعى جۇڭگو جاقپەن سەرىكتەستىك قارىم - قاتىناسقا ايرىقشا ءمان بەرەدى، جۇڭگو جاقتىڭ جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ ءۇشىن قوسقان ماڭىزدى ۇلەسىن القايدى، جۇڭگو جاقپەن سەلبەستىكتى تەرەڭدەتىپ، دۇنيە جۇزىلىك الەۋمەتتىك دەنساۋلىق ساقتاۋ ىستەرىن بىرگە جەبەپ، وركەندەپ كەلە جاتقان ەلدەردىڭ يممۋنيتەت نىساناسىن اناعۇرلىم ويداعىداي جۇزەگە اسىرۋىنا كومەكتەسۋدى قالايدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
