نۇرشيلا كامال:
قۇرتتىڭ ءتىپتى الىسقا ”جەتۋىنە“ جول اشامىز
□ انار بۇلت \ شينجياڭ گازەتىنىڭ ءتىلشىسى جاڭ تيڭ، ەرىكتى ءتىلشى حان ليڭ
2023.08.29 16:22 كەلۋ قاينارى : شينجياڭ گازەتى
8 - ايدىڭ 7 - كۇنى التاي قالاسى سارعۋسىن اۋىلى قۇرعاقتوعان قىستاعىنىڭ تۇرعىنى نۇرشيلا كامالدىڭ ۇيىنە بارعانىمىزدا، ءسۇتتىڭ جاعىمدى ءيىسى اڭقىپ تۇر ەكەن، نۇرشيلا كۇيەۋى سۇلتانبەك جارقىنمەن بىرگە شاعىن ءسۇت ساۋۋ اسپابىن جاتىق قولدانىپ سيىر ساۋىپ جاتىر ەكەن. كوپ وتپەي، ساقتاۋ قۇمىراسىنا جاڭا ساۋىلعان ءسۇت تولىپ شىعا كەلدى.
تاياۋ كۇندەرى نۇرشيلا بەيجيڭنەن 500 كيلوگرام قۇرت پەن سارى ماي زاكازىن تاپسىرىپ الدى، ول كۇيەۋى ەكەۋى ۇستەمە جۇمىس ىستەپ، زاكازدى ۋاعىندا تاپسىرۋعا شىنايى كەپىلدىك ەتتى.
”بيىل جىل باسىنان بەرى ينتەرنەت جەلىسىندە + ينتەرنەت جەلىسىنەن تىس ساتۋ ۇلگىسى ارقىلى ءبىز 7000 كيلوگرامعا جۋىق قۇرت پەن 3000 كيلوگرام سارى ماي زاكازىن ورىندادىق، ساتۋ سوماسى 220 نەشە مىڭ يۋانعا جەتتى“، - دەدى نۇرشيلا.
بۇرىن نۇرشيلا وتباسى 4 ساۋىن سيىر باعىپ، سونىڭ ءسۇتىن ساتىپ كۇنەلتەتىن. مەملەكەتتىڭ حالىققا تيىمدىلىك جاساۋ ساياساتىنىڭ قولداۋىنا ساي، ەرلى - زايىپتى ەكەۋى باعىمشىلىق كولەمىن بىرتىندەپ كەڭەيتتى ءارى سيىر تۇقىمىن اسىلداندىردى، ەت ونىمدەرىن ساتۋ نەمەسە ءسۇت ساتۋ ارقىلى كىرىسىن ارتتىردى، وتباسىنىڭ تۇرمىسى دا بارعان سايىن جاقساردى، ولار موتوتسيكلمەن ءسۇت جەتكىزۋدەن اۆتوكولىكپەن ءسۇت جەتكىزۋگە اۋىسىپ، ساتۋ ۋاقىتىن بارىنشا ۇنەمدەدى.
وتباسىندا ساۋىن سيىر سانى ارتىپ، ۋاقىت تا ۇنەمدەلگەن سوڭ، ەرلى - زايىپتى ەكەۋى ءسۇت ونىمدەرىن جاساپ، كىرىستى ارتتىرۋ ويىنا كەلدى.
2019 - جىلى وتباسى شاعىن شەبەرحاناسى فورماسىمەن نۇرشيلا شارۋاشىلىق قۇرۋ جولىن رەسمي باستادى. ول ءداستۇرلى قولمەن ءسۇت ونىمدەرىن جاساۋعا تاباندى بولىپ، ءار بۋىنداعى جۇمىستى قاتاڭ دا ىجداعاتتى ىستەپ وتىردى. وسى تاباندىلىقتىڭ ارقاسىندا، ونىڭ بابىمەن جاسالعان، ءدامى دە ءتىل ۇيىرەتىن قۇرتى تۇتىنۋشىلاردىڭ القاۋىنا بولەندى.
نۇرشيلانىڭ قابىلداعان زاكازى بىرتىندەپ كوبەيە بەردى، تۇرلىشە تۇتىنۋشىلاردىڭ ءدام قاجەتىن قاناعاتتاندىرۋ ءۇشىن، ول ءتاتتى ءدامدى، قىشقىل ءدامدى، تابيعي ءدامدى قۇرت جاسادى.
قازىر نۇرشيلا وتباسىنىڭ ايلىق كىرىسى 30 مىڭ يۋاننان اسىپ، تۇرمىسى بارعان سايىن شالقي ءتۇستى. ”ءسۇت ونىمدەرىن جاساۋ − ءبىزدىڭ كىشكەنتايىمىزدان ۇيرەنگەن شەبەرلىگىمىز، مۇنىڭ شارۋاشىلىق قۇرىپ، كىرىستى ارتتىراتىن ’كەرپىش‘ بولارىن ويلاماعان ەكەنبىز. بۇدان بىلاي بوس ۋاقىتتان پايدالانىپ وسى تەحنيكانى باسقالارعا ۇيرەتىپ، كوپشىلىكتىڭ شارۋاشىلىق قۇرۋ ءادىسىن يگەرۋىنە مۇمكىندىك جاساپ، كورشى - قولاڭداردىڭ كىرىسىن بىرگە ارتتىرۋعا باستايمىن“، - دەدى نۇرشيلا.
”قازىر ينتەرنەتتەن زات ساتىپ الۋ، تىكە تاراتۋ سياقتى ساتۋ تاسىلدەرى ءبىز سياقتى شارۋاشىلىق قۇرۋشىلار ءۇشىن تەرەزە اشىپ، ءبىزدىڭ اناعۇرلىم كوپ ورايعا يە بولىپ، اناعۇرلىم كەڭ بازارعا ارالاسۋىمىزعا مۇمكىندىك جاسادى، مەن جاساعان قۇرت بەيجيڭگە، شاڭحايعا... دەيىن ساتىلدى“، - دەدى نۇرشيلا قۇرتتى ونان دا الىس جەرلەرگە ساتۋ كامىل سەنىمىمەن.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
