لي شي كۋبادا رەسمي دوستىق ساپاردا بولدى
2023.09.19 16:22 كەلۋ قاينارى : حالىق تورابى
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق ءتارتىپ تەكسەرۋ كوميتەتىنىڭ شۋجيى لي شي كۋبا كوممۋنيستىك پارتياسىنىڭ ۇسىنىسى بوينشا 9 - ايدىڭ 16 – كۇنىنەن 18 – كۇنىنە دەيىن كۋبادا رەسمي دوستىق ساپاردا بولدى. سۋرەتتە: سول جەر ۋاقىتى 9 - ايدىڭ 16 - كۇنى لي شي حاۆانادا كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى، كۋبانىڭ مەملەكەت ءتوراعاسى دياس - كانەلمەن كەزدەسۋدە. سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن
شينحۋا اگەنتتىگى، 9 - ايدىڭ 18 – كۇنى، حاۆانا (تىلشىلەر سۇن ي، لين چاۋحۇي)، كۋبا كوممۋنيستىك پارتياسىنىڭ ۇسىنىسىمەن ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق ءتارتىپ تەكسەرۋ كوميتەتىنىڭ شۋجيى لي شي 9 - ايدىڭ 16 - كۇنىنەن 18 - كۇنىنە دەيىن كۋبادا رەسمي دوستىق ساپاردا بولىپ، حاۆانادا كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى، مەملەكەت ءتوراعاسى دياس - كانەلمەن كەزدەستى، كۋبا كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەتتىڭ ۇيىمداستىرۋ شۋجيى مورالەسپەن كەڭەس وتكىزىپ، كۋبا توڭكەرىسىنىڭ باسشىسى راۋل كاسترو گەنەرالعا امانداسا باردى.
دياس - كانەلمەن كەزدەسكەندە لي شي باس شۋجي شي جينپيڭنىڭ ىقىلاستى سالەمىن جەتكىزىپ، كۋبانىڭ ”77 ەل توبى جانە جۇڭگو“ حاۆانا باسشىلار باس قوسۋىن وتكىزۋىنىڭ تولىق تابىستى بولعانىن قۇتتىقتادى. لي شي مىنالاردى ءبىلدىردى: ج ك پ 20 - قۇرىلتايىنان كەيىن باس شۋجي شي جينپيڭ سىزبەن ەكى رەت كەزدەسىپ، جۇڭگو مەن كۋبا پارتيالارىنىڭ، ەلدەرىنىڭ قارىم - قاتىناسىنىڭ دامۋىنا ايقىن باعدار كورسەتتى. جۇڭگو جاق كۋبا جاقپەن ەكى پارتيا، ەكى ەل ەڭ جوعارى باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، پارتيانى، مەملەكەتتى جونگە سالۋ تاجىريبەلەرى جونىندە اۋىس - كۇيىس جاساۋدى جانە ءار سالاداعى ناقتى ىستەر سەلبەستىگىن ىشكەرىلەي ورىستەتىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ۇزدىكسىز ءوزارا قولداۋ كورسەتىپ، ءوز پارتيالارىنىڭ قۇرىلىسى مەن سوتسياليزم ىستەرىنىڭ دامۋىن ىلگەرىلەتۋدى قالايدى. جۇڭگو جاق كۋبا جاقپەن دۇنيە جۇزىلىك دامۋدى ىلگەرىلەتۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن ناقتاپ تياناقتاندىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
دياس - كانەل لي شيگە باس شۋجي شي جينپيڭگە دەگەن ىقىلاستى سالەمىن جەتكىزۋدى تاپسىرىپ، لي شيدىڭ ءتوراعا شي جينپيڭنىڭ ەرەكشە ۋاكىلى رەتىندە باسشىلار باس قوسۋىنا قاتىناسقانىن ءارى جۇڭگو ۋاكىلدەر ۇيىرمەسىن باستاپ كۋباعا ساپارلاي كەلگەنىن قىزۋ قارسى الىپ، مىنالاردى ءبىلدىردى: جۇڭگو باتىلدىقپەن ”دۇنيە جۇزىلىك وڭتۇستىك“ ەلدەرىمەن بىرگە تۇرىپ، وركەندەپ كەلە جاتقان ەلدەردىڭ ورتاق مۇددەسىن پارمەندى قورعادى. كۋبا جاق جۇڭگو جاقتىڭ كۋبانىڭ ەكونوميكالىق، قوعامدىق دامۋىنا كومەك كورسەتكەنىنە العىس ايتادى، جۇڭگو كوممۋنيستىك پارتياسىمەن دوستىق بارىس - كەلىستى جيىلەتىپ، ناقتى ىستەر سەلبەستىگىن ىلگەرىلەتۋدى قالايدى. كۋبا جاق جۇڭگو جاقتىڭ كۋبا حالقىنىڭ سىڭار جاقتى قۇرساۋلاۋعا، جازالاۋعا قارسى ادىلەتتى كۇرەسىن باتىل قولداعانىنا العىس ايتادى، باس شۋجي شي جينپيڭ العا قويعان كەلەلى دۇنيە جۇزىلىك باستامالاردى باتىل قولدايدى. 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنىڭ تابىستى بولۋىن تىلەيمىن.
مورالەسپەن كەڭەس وتكىزگەندە، ەكى جاق ساياسي سەنىمدىلىك پەن ستراتەگيالىق سەلبەستىكتى كۇشەيتىپ، ءار سالاداعى ناقتى سەلبەستىكتى تەرەڭدەتىپ، ەل باسقارۋ اۋىس - كۇيىسى جانە پارتيانى باسقارۋ، پارتيانى جونگە سالۋ، شىرىكتەسۋگە قارسى تۇرۋ جاقتارىندا تاجىريبە الماستىرىپ، سەلبەستىكتى كۇشەيتۋگە ماقۇل بولدى. ەكى جاق تاعى جۇڭگونىڭ مەملەكەتتىك باقىلاۋ - تەكسەرۋ كوميتەتى مەن كۋبانىڭ باس قازىنالىق باقىلاۋ مەكەمەسىنىڭ سەلبەستىك ەسكەرتپە حاتىنا قول قويۋعا بىرگە كۋا بولدى.
راۋل كاستروعا امانداسا بارعاندا لي شي باس شۋجي شي جينپيڭنىڭ ىقىلاستى سالەمى مەن تاماشا تىلەگىن جەتكىزىپ، مىنالاردى ءبىلدىردى: جۇڭگو مەن كۋبانىڭ ءداستۇرلى دوستىعىن ەكى ەلدىڭ اعا بۋىن باسشىلارى ءوز قولدارىمەن ورناتقان ءارى دەن قويا جەتىلدىرگەن. راۋل جولداس − جۇڭگو پارتياسى مەن حالقىنىڭ جاقىن دوسى، ەكى پارتيانىڭ، ەكى ەلدىڭ قارىم - قاتىناسىنىڭ دامۋىنا تاريحي ۇلەس قوستى. كۇردەلى دە الماعايىپ حالىقارالىق جاعداي الدىندا جۇڭگو جاق كۋبا جاقپەن قول ۇستاسا وتىرىپ جۇڭگو - كۋبا تاعدىرلاس ورتاق تۇلعاسىن بىرگە قۇرۋدى قالايدى. راۋل لي شيگە باس شۋجي شي جينپيڭگە دەگەن ىقىلاستى سالەمىن جەتكىزۋدى تاپسىرىپ، جۇڭگولىق جولداستارمەن بارىس - كەلىس جاساعان كەشىرمەلەرىن تەرەڭ سۇيىسپەنشىلىكپەن ەسكە الدى. راۋل مىنانى ءبىلدىردى: كۋبا جۇڭگوشا سوتسياليزم ىستەرىنىڭ وراسان زور تابىستارعا قول جەتكىزگەنىنە قۋانادى جانە ونان شابىت الادى، جۇڭگونىڭ دامۋ تاجىريبەلەرىنەن ۇلگى الۋدى قالايدى. راۋل لي شيمەن بىرگە فيدەل كاسترو ورتالىعىن ەكسكۋرسيالادى.
كۋبادا ساپاردا بولۋ كەزىندە لي شي باس شۋجي شي جينپيڭ مەن پارتيا ورتالىق كوميتەتىنىڭ پارمەندى باسشىلىعىندا، جۇڭگو كوممۋنيستىك پارتياسىنىڭ پارتيانى جاپپاي قاتاڭ جونگە سالۋ جانە شىرىكتەسۋگە قارسى تۇرۋ قىزمەتىنىڭ جاعدايىن تانىستىرىپ، مىنالاردى اتاپ كورسەتتى: جاڭا داۋىردە پارتيانى جاپپاي قاتاڭ جونگە سالۋدىڭ توڭكەرىستىك شىڭدالۋى ارقىلى جۇڭگو ءتۇزىم ابزالدىعىنا، زاڭمەن جونگە سالۋ ابزالدىعىنا سۇيەنىپ شىرىكتەسۋگە قارسى تۇرۋ جولىمەن ءساتتى ءجۇردى، جۇڭگو كوممۋنيستىك پارتياسى اناعۇرلىم قۋاتتى، پارمەندى بولىپ، حالىق بۇقاراسىنىڭ شىن جۇرەكتەن قولداۋىنا يە بولدى. كۋبا جاق جۇڭگو كوممۋنيستىك پارتياسىنىڭ پارتيا قۇرىلىسى، شىرىكتەسۋگە قارسى تۇرۋ سياقتى جاقتاردا كورنەكتى ناتيجەگە قول جەتكىزگەنىن جوعارى باعالاپ، جۇڭگو جاقپەن پارتيانى باسقارۋ، پارتيانى جونگە سالۋ، ءتارتىپ تەكسەرۋ، باقىلاۋ - تەكسەرۋ سالالارىندا تاجىريبە اۋىس - كۇيىسىن تەرەڭدەتۋدى قالايتىنىن ءبىلدىردى.
لي شي تاعى حوسە مارتي ەسكەرتكىشىنە گۇل شەڭبەر قويىپ، حوسە مارتي ەسكەرتكىش سارايى مەن فرانك پايس اۋىل شارۋاشىلىق امانات - قارىز كووپەراتيۆىن ەكسكۋرسيالادى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
