لي چياڭ، جاۋ لىجي ۆەنەسۋەلانىڭ زۇڭتۇڭى مادۋرومەن جەكە - جەكە كەزدەستى
2023.09.15 16:34 كەلۋ قاينارى : حالىق تورابى
شينحۋا اگەنتتىگى، 9 - ايدىڭ 14 - كۇنى، بەيجيڭ. 9 - ايدىڭ 14 - كۇنى تۇستەن بۇرىن مەملەكەتتىك كەڭەستىڭ زۇڭليى لي چياڭ حالىق سارايىندا جۇڭگوعا مەملەكەتتىك ساپارمەن كەلگەن ۆەنەسۋەلانىڭ زۇڭتۇڭى مادۋرومەن كەزدەستى.
لي چياڭ مىنانى ءبىلىردى: ءتوراعا شي جينپيڭ مەن زۇڭتۇڭ مىرزا جۇڭگو مەن ۆەنەسۋەلانىڭ قارىم - قاتىناسىن بارلىق جاعدايدا بىردەي ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى ۇيعاردى، بۇل − ەكى ەل قارىم - قاتىناسى تاريحىنداعى ماڭىزدى بەلەس. اۋمالى - توكپەلى حالىقارالىق جاعداي الدىندا جۇڭگو مەن ۆەنەسۋەلا قول ۇستاسا العا باسىپ، ستراتەگيالىق سەلبەستىكتى ۇزدىكسىز تەرەڭدەتىپ، حاۋىپ - قاتەر مەن سىن - سايىسقا ۇيلەسىمدى توتەپ بەرىپ، تەڭ يگىلىككە كەنەلەتىن دامۋدى اناعۇرلىم ويداعىداي جۇزەگە اسىرۋى كەرەك. كەلەر جىلى جۇڭگو مەن ۆەنەسۋەلانىڭ ديپلوماتيالىق قارىم - قاتىناس ورناتقانىنىڭ 50 جىلدىعىن قارسى الامىز، ەكى ەل مەملەكەت باسشىلارىنىڭ ستراتەگيالىق جەتەكشىلىگىندە جانە ەكى جاقتىڭ بىرگە قۇلشىنۋىندا، جۇڭگو مەن ۆەنەسۋەلانىڭ دوستىعى مەن سەنىمىنىڭ اناعۇرلىم ىلگەرىلەي تۇسەتىنىنە، ءار سالاداعى سەلبەستىكتىڭ تاعى دا تىڭ ساتىعا كوتەرىلەتىنىنە سەنەمىن.
لي چياڭ بىلاي دەپ اتاپ كورسەتتى: جۇڭگو جاق ۆەنەسۋەلا جاقتىڭ مەملەكەتتىڭ يەلىك ۇقىعى مەن ۇلتتىڭ ار - نامىسىن، ءوزىنىڭ ورىندى، زاڭدى ۇقىق - مۇددەسىن قورعاۋىن ۇزدىكسىز باتىل قولدايدى، سىرتقى كۇشتەردىڭ ءارقانداي سىلتاۋمەن ۆەنەسۋەلانىڭ ىشكى ىسىنە كيلىگۋىنە باتىل قارسى تۇرادى. جۇڭگو جاق ۆەنەسۋەلا جاقپەن ”ءبىر بەلدەۋ، ءبىر جول“ باستاماسىن، دۇنيە جۇزىلىك دامۋ باستاماسىن، دۇنيە جۇزىلىك حاۋىپسىزدىك باستاماسىن، دۇنيە جۇزىلىك وركەنيەت باستاماسىن قۇلشىنا تياناقتاندىرىپ، دامۋ تاجىريبەلەرىن اۋىستىرۋدى كۇشەيتىپ، جۇڭگو - ۆەنەسۋەلا جوعارى دارەجەلى بىرىكپەلى كوميتەتى مەحانيزمىنەن ۇزدىكسىز ويداعىداي پايدالانىپ، ءار سالاداعى ناقتى سەلبەستىكتى تەرەڭدەتۋدى قالايدى. ەكى جاق كەلەر جىلى ەكى ەلدىڭ ديپلوماتيالىق قارىم - قاتىناس ورناتقانىنىڭ 50 جىلدىعىن قۇتتىقتاۋ جەلىلەس قيمىلدارىن ويداعىداي وتكىزىپ، گۋمانيتارلىق اۋىس - كۇيىستى ۇزدىكسىز كەڭەيتىپ، ەكى ەل حالىقتارىنىڭ ءبىرىن - ءبىرى ءتۇسىنۋىن، ەتەنە بولۋىن اناعۇرلىم ويداعىداي جەبەۋى كەرەك. جۇڭگو جاق ۆەنەسۋەلا جاقپەن كوپ جاقتى سايكەسۋدى، سەلبەسۋدى جيىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
مادۋرو مىنانى ءبىلدىردى: جۇڭگو بەيبىت دامۋعا كۇش سالىپ، ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرىپ، دۇنيە ءجۇزىن جالت قاراتقان تابىستارعا قول جەتكىزدى. جۇڭگونىڭ دامۋى ءوز ەلىندەگى حالىققا يگىلىك جەتكىزەدى ءارى بۇكىل دۇنيە جۇزىنە باقىت جاراتادى. ۆەنەسۋەلا مەن جۇڭگونىڭ بارلىق جاعدايدا بىردەي ستراتەگيالىق سەرىكتەستىك قارىم - قاتىناس ورناتۋى دۇنيە جۇزىندەگى وڭتۇستىك ەلدەر سەلبەستىگىنىڭ بەلەسى سانالادى. ۆەنەسۋەلا جاق ءتوراعا شي جينپيڭ العا قويعان كەلەلى باستامالاردى قولدايدى، جۇڭگو جاقپەن ەكونوميكا - ساۋدا، عىلىم - تەحنيكا، اۋىل شارۋاشىلىعى، وقۋ - اعارتۋ، مادەنيەت سياقتى سالالارداعى سەلبەستىكتى كۇشەيتىپ، ەكى ەل قارىم - قاتىناسىنىڭ جارقىن بولاشاعىن اشۋدى قالايدى.
شينحۋا اگەنتتىگى، 9 - ايدىڭ 14 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 9 - ايدىڭ 14 - كۇنى بەيجيڭدە ۆەنەسۋەلانىڭ زۇڭتۇڭى مادۋرومەن كەزدەستى.
جاۋ لىجي مىنانى ءبىلدىردى: جۇڭگو مەن ۆەنەسۋەلانىڭ قارىم - قاتىناسى جارتى عاسىرلىق حالىقارالىق اۋمالى - توكپەلى سىناقتاردى باستان كەشىردى، بوران - شاشىننان تايسالمادى، بولاتتاي بەرىك كەلەدى. كەشە ءتوراعا شي جينپيڭ مەن زۇڭتۇڭ مىرزا جۇڭگو مەن ۆەنەسۋەلانىڭ قارىم - قاتىناسىن بارلىق جاعدايدا بىردەي ستراتەگيالىق سەرىكتەستىك قارىم - قاتىناسقا كوتەرەتىندەرىن بىرگە جاريالادى. بۇل − جۇڭگو مەن ۆەنەسۋەلانىڭ ستراتەگيالىق سەلبەستىگىنىڭ جوعارى دەڭگەيىنىڭ ايعاعى، ەكى ەل حالىقتارىنىڭ ورتاق تىلەگىنە ۇيلەسەدى، ءبىزدىڭ قول ۇستاسا وتىرىپ اناعۇرلىم ءادىل، ۇيلەسىمدى حالىقارالىق ءتارتىپ ورناتۋداعى بەرىك بەكىمىمىزدى كورسەتەدى. جاۋ لىجي جۇڭگونىڭ كەدەيلىكتەن ارىلتۋدان قامال الۋ جانە جۇڭگو ۇلگىسىندەگى وسىزامانداندىرۋدى ىلگەرىلەتۋ جاعدايىن تانىستىرىپ، مىنالاردى ءبىلدىردى: جۇڭگو مەملەكەتتىك حالىق قۇرىلتايى تۇراقتى كوميتەتى ۆەنەسۋەلا مەملەكەتتىك قۇرىلتايىمەن ءار دارەجەلى، ءار سالاداعى بارىس - كەلىستى جيىلەتىپ، زاڭ شىعارۋ تاجىريبەلەرى جونىندە اۋىس - كۇيىس ورىستەتىپ، جۇڭگو مەن ۆەنەسۋەلانىڭ ”اينىماس“ دوستىعىن ۇزدىكسىز بەكەمدەپ، ەكى ەلدى جانە ەكى ەل حالىقتارىن اناعۇرلىم ويداعىداي باقىتقا كەنەلتۋدى قالايدى.
مادۋرو مىنانى ءبىلدىردى: وسى رەتكى ساپاردىڭ تابىسى مول، تاريحي ءمانى بار. ۆەنەسۋەلا جاق جۇڭگو جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن تياناقتاندىرىپ، جوعارى جىكتەگىلەردىڭ بارىس - كەلىسىن كۇشەيتىپ، ناقتى سەلبەستىكتى تەرەڭدەتىپ، ۆەنەسۋەلا مەن جۇڭگونىڭ بارلىق جاعدايدا بىردەي ستراتەگيالىق سەرىكتەستىك قارىم - قاتىناسىنىڭ پارمەندى دامۋىن ىلگەرىلەتۋدى قالايدى.
شياۋ جيە كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
