مەملەكەتتىك ساياسي كەڭەس 14 - كەزەكتى كوميتەتى تۇراقتى كوميتەتىنىڭ 5 - ءماجىلىسى جابىلدى
ۋاڭ حۋنيڭ ءماجىلىستى باسقاردى ءارى ءسوز سويلەدى
2024.03.03 16:57 كەلۋ قاينارى : حالىق تورابى
شينحۋا اگەنتتىگى، 3 ـ ايدىڭ 2 ـ كۇنى، بەيجيڭ. مەملەكەتتىك ساياسي كەڭەس 14 - كەزەكتى كوميتەتى تۇراقتى كوميتەتىنىڭ 5 ـ ءماجىلىسى 3 ـ ايدىڭ 2 ـ كۇنى تۇستەن كەيىن بەيجيڭدە جابىلدى. ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ جابىلۋ جيىنىن باسقاردى ءارى ءسوز سويلەدى.
ۋاڭ حۋنيڭ مىنالاردى ءبىلدىردى: ءبىر جىلدان بەرى مەملەكەتتىك ساياسي كەڭەس باس شۋجي شي جينپيڭنىڭ ماڭىزدى نۇسقاۋىنىڭ رۋحىن جانە ج ك پ ورتالىق كوميتەتىنىڭ شەشىمدەرىن، ورنالاستىرۋلارىن باتىل دايەكتىلەندىرىپ، تياناقتاندىرىپ، ىنتىماق جانە دەموكراتيا سىندى ەكى ۇلكەن تاقىرىپتان جازباي، حالىق ساياسي كەڭەسىنىڭ سيپاتى مەن ورنىندا تاباندى بولىپ، حالىق ساياسي كەڭەسىنىڭ حالىق ءۇشىن قىزمەت ىستەۋ ۇستانىمىندا تاباندى بولىپ، شي جينپيڭ جاڭا ءداۋىر جۇڭگوشا سوتسياليزم يدەياسىن ۇيرەنۋ، دايەكتىلەندىرۋ نەگىزگى تاقىرىپتىق تاربيەسىن تىڭعىلىقتى ورىستەتىپ، ج ك پ 20 - قۇرىلتايىنىڭ كەلەلى شەشىمدەرى مەن ورنالاستىرۋلارىن تىعىز ارقاۋ ەتىپ، ۇكىمەت ءىسىن كەڭەسىپ، تەكسەرۋ - زەرتتەۋدى قاۋىرت ورىستەتىپ، ىنتىماق پەن دوستىقتىڭ كەڭدىگىن، تەرەڭدىگىن كەڭەيتىپ، تۇزىمدەنۋ، جۇيەلىلەنۋ، تارتىپتەنۋ سياقتى يقۋات قۇرىلىسىن كۇشەيتىپ، ءار كەزەكتى مەملەكەتتىك ساياسي كەڭەس قالاعان تاماشا نەگىزدە جاڭا كەزەكتى مەملەكەتتىك ساياسي كەڭەستىڭ تاماشا باستاماسىن جۇزەگە اسىردى.
ۋاڭ حۋنيڭ مىنانى ءبىلدىردى: بيىل — جاڭا جۇڭگو قۇرىلعانىنىڭ 75 جىلدىعى، سونداي ـ اق حالىق ساياسي كەڭەسى قۇرىلعانىنىڭ 75 جىلدىعى، ساياسي كەڭەس قىزمەتىن ويداعىداي ىستەۋ توتەنشە ماڭىزدى. ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، ورنىقتىلىق بارىسىندا ىلگەرىلەۋ قىزمەت جالپى ارناسىندا تاباندى بولىپ، پارتيانىڭ باسشىلىعىن، بىرلىكساپتى، كەڭەستىك دەموكراتيانى ورگانيكالى ۇشتاستىرۋدا تاباندى بولىپ، تاڭداۋلى ءداستۇردى ساۋلەلەندىرىپ، ساياسي جاۋاپكەرلىكتى ەستە بەرىك ساقتاپ، جۇڭگو ۇلگىسىندەگى وسىزامانداندىرۋدى ىلگەرىلەتۋدى ارقاۋ ەتىپ، يدەيالىق ـ ساياسي جەتەكشىلىكتى كۇشەيتىپ، بەلسەنە اقىل ـ كەڭەس بەرىپ، كەڭ كولەمدە ورتاق تانىم ۇيىستىرىپ، وزىندىك قۇرىلىستى كۇشەيتىپ، تۇتاس جىلداعى ەكونوميكالىق، قوعامدىق دامۋدىڭ نىسانا ـ مىندەتتەرىن جۇزەگە اسىرۋعا اقىل ـ پاراسات پەن كۇش ـ قۋات توپتاۋ كەرەك. باسشىلىقتى كۇشەيتىپ، جاۋاپكەرلىكتى تياناقتاندىرىپ، مەملەكەتتىك ساياسي كەڭەس 14 ـ كەزەكتى كوميتەتى 2 ـ ءماجىلىسىنىڭ ءتۇرلى قىزمەتتەرىن وسكەلەڭ ساياسي سانالىلىقپەن جانە تاسقىنداعان رۋحاني كۇيمەن ويداعىداي ىستەپ، ءماجىلىستىڭ تولىق تابىستى بولۋىنا كەپىلدىك ەتۋ كەرەك.
جابىلۋ جيىنى ساياسي كەڭەس 14 - كەزەكتى مەملەكەتتىك كوميتەتى 2 - ءماجىلىسىنىڭ كەڭەستىك ءتارتىبى (جوبا) مەن كۇن ءتارتىبىن، مەملەكەتتىك ساياسي كەڭەس كوميتەتى تۇراقتى كوميتەتىنىڭ قىزمەت بايانداماسىن جانە ساياسي كەڭەس 14 - كەزەكتى كوميتەتىنىڭ 1 - ماجىلىسىنەن بەرگى ۇسىنىس جوبا قىزمەتىنىڭ جاعدايى جونىندەگى باياندامانى قاراپ ماقۇلدادى، قاتىستى جوبالار مەن باياندامالار ءتارتىپ بويىنشا مەملەكەتتىك ساياسي كەڭەس 14 - كەزەكتى كوميتەتى 2 - ءماجىلىسىنىڭ قاراۋىنا ۇسىنىلادى.
داۋىسقا سالۋ ارقىلى ءماجىلىس مەملەكەتتىك ساياسي كەڭەس 14 - كەزەكتى كوميتەتى 2 ـ ءماجىلىسىنىڭ باس حاتشىسىنىڭ، باس حاتشىنىڭ ورىنباسارلارىنىڭ ەسىمدىگىن ماقۇلدادى. ءماجىلىس حۋاڭ ليشين جولداستىڭ 14 ـ كەزەكتى مەملەكەتتىك ساياسي كەڭەستىڭ مۇشەلىگىنەن شەگىنۋىن قابىلداۋ جونىندەگى قاۋلىنى، جاڭ شياۋميڭ جولداستى 14 ـ كەزەكتى مەملەكەتتىك ساياسي كەڭەس باس حاتشىسىنىڭ ورىنباسارلىعىنان قالدىرۋ جونىندەگى قاۋلىنى ماقۇلدادى. ءماجىلىس ۋ يانشىڭ، ليۋ شىچۋان، ۋاڭ چاڭچيڭ، ۋاڭ شياۋجۇندەردىڭ 14 ـ كەزەكتى مەملەكەتتىك ساياسي كەڭەس مۇشەسىندىك تولىمدىلىعىن كۇشىنەن قالدىرۋ جونىندەگى قاراردى تۇراقتاندىردى.
جابىلۋ جيىنىنان كەيىن سىرتقى ىستەر مينيسترلىگى مينيسترىنىڭ ورىنباسارى ما چاۋشۇي ۇسىنىس بويىنشا ”ءجۇز جىلدا بولماعان زور وزگەرىس جانە دۇنيە جۇزىلىك جونگە سالۋ جۇيەسىنىڭ وزگەرىسى“ دەگەن تاقىرىپتا ۇيرەنۋ لەكسياسىن جاسادى.
ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك ساياسي كەڭەس ءتوراعاسىنىڭ ورىنباسارى شى تايفىڭ، مەملەكەتتىك ساياسي كەڭەس ءتوراعاسىنىڭ ورىنباسارلارى حۋ چۇنحۋا، شىن يۋەيۋە، ۋاڭ يۇڭ، جوۋ چياڭ، پابالا گىلەلاڭجيە، حى حوۋحۋا، لياڭ جىنيىڭ، باتىر، سۋ حۇي، شاۋ حۇڭ، گاۋ يۇنلۇڭ، چىن ۋ، مۋ حۇڭ، شيان حۇي، ۋاڭ دۇڭفىڭ، جياڭ شينجى، جياڭ زوجۇن، حى باۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن ماجىلىسكە قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
