ىنتىماقتاسۋ، كۇش ۇيىستىرۋ، كۇرەس جۇرگىزۋ ارقىلى ۇلى ءىس تىندىرايىق (باسماقالا)
− مەملەكەتتىك ساياسي كەڭەس 14 - كەزەكتى كوميتەتى 2 - ءماجىلىسىنىڭ اشىلعانىن قىزۋ قۇتتىقتايمىز
2024.03.04 15:48 كەلۋ قاينارى : حالىق تورابى
تاعى ءبىر كوكتەم كەلدى، بارشا الەم شىت جاڭا بەينەگە ەندى. مەملەكەتتىك ساياسي كەڭەس 14 - كەزەكتى كوميتەتىنىڭ 2 – ءماجىلىسى 3 - ايدىڭ 4 – كۇنى بەيجيڭدە اشىلادى. كوكتەم سامالى ەسىپ، مەملەكەتتىك ساياسي كەڭەستىڭ 34 سالادان كەلگەن 2 مىڭ 100 دەن استام مۇشەسى ءبىر اراعا باس قوسىپ، مەملەكەت ءىسىن بىرگە اقىلداسىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە اقىل - كەڭەس بەرەدى. ءبىز ءماجىلىستىڭ اشىلعانىن قىزۋ قۇتتىقتايمىز!
تاريحي كوورديناتالار كۇرەس ىزدەرىن ويىپ، جاپپاي سوتسياليستىك وسىزاماندانعان مەملەكەت قۇرۋدا نىق قادام تاستاۋعا كۋا بولدى. 2023 - جىل − پارتيا 20 - قۇرىلتايىنىڭ رۋحىن جاپپاي دايەكتىلەندىرۋدىڭ باستاما جىلى. توتەنشە كۇردەلى حالىقارالىق ورتا مەن جاپالى دا اۋىر رەفورما، دامۋ، ورنىقتىلىق مىندەتى الدىندا، شي جينپيڭ جولداستى ۇيىتقى ەتكەن پارتيا ورتالىق كوميتەتى بۇكىل پارتيانى، بۇكىل ەلدەگى ءار ۇلت حالقىن ىنتىماقتاستىرىپ جانە باستاپ، سىرتقى قىسىمعا توتەپ بەرىپ، ىشكى قيىنشىلىقتاردى جەڭىپ، ورنىقتىلىق بارىسىندا ىلگەرىلەۋ سىندى قىزمەت نەگىزگى ارناسىنان جازباي، رەفورما جاساپ، ەسىك اشۋدى جاپپاي تەرەڭدەتىپ، ەكونوميكانىڭ قالپىنا كەلۋىن، دامۋىن بار كۇشپەن ىلگەرىلەتىپ، تۇتاس جىلداعى ەكونوميكالىق، قوعامدىق دامۋدىڭ باستى نىسانالىق مىندەتتەرىن تابىسپەن ورىندادى، وڭاي - وسپاق قولعا كەلمەگەن، ادامدى جەلپىندىرەتىن تابىستارعا قول جەتكىزدى. ءبىر جىلدان بەرى حالىق ساياسي كەڭەسى ج ك پ ورتالىق كوميتەتىنىڭ شەشىمدەرى مەن ورنالاستىرۋلارىن مۇقيات دايەكتىلەندىرىپ، تياناقتاندىرىپ، ارناۋلى كەڭەس قۇرىلىمى بولۋ رولىن تولىق ساۋلەلەندىرىپ، نازاردى وزەكتى قىزمەتكە شوعىرلاندىرىپ، تەكسەرۋ - زەرتتەۋدى، ۇكىمەت ءىسىن كەڭەسۋدى، دەموكراتيالىق باقىلاۋدى ىشكەرىلەي ورىستەتىپ، پارتيا مەن مەملەكەت ىستەرىنىڭ دامۋىنا تىڭ ۇلەس قوستى.
بيىل − جۇڭحۋا حالىق رەسپۋبليكاسى قۇرىلعانىنىڭ 75 جىلدىعى، سونداي - اق حالىق ساياسي كەڭەسى قۇرىلعانىنىڭ 75 جىلدىعى. 75 جىلدىق اماليات حالىق ساياسي كەڭەسى جۇڭگو كوممۋنيستىك پارتياسىنىڭ ماركسيزم - لەنينيزمنىڭ بىرلىكساپ نازارياسىن، ساياسي پارتيا نازارياسىن، دەموكراتيالىق ساياسي نازارياسىن جۇڭگونىڭ ءىس جۇزىندىگىمەن ۇشتاستىرۋىنىڭ ۇلى جەتىستىگى ەكەنىن، جۇڭگو كوممۋنيستىك پارتياسىنىڭ دەموكراتيالىق پارتيا - توپتارعا، پارتيادا، توپتا جوق قايراتكەرلەرگە، حالىقتىق ۇيىمدارعا جانە ءار ۇلت، ءار سالا قايراتكەرلەرىنە باسشىلىق ەتىپ، ساياسي ءتۇزىم جاعىندا جۇرگىزگەن ۇلى جاسامپازدىعى ەكەنىن دالەلدەدى. بىرلىكساپ ۇيىمى، كوپ پارتيا سەلبەستىگىنىڭ جانە ساياسي كەڭەس قۇرىلىمىنىڭ، حالىق دەموكراتياسىنىڭ ماڭىزدى جۇزەگە اسۋ فورماسى رەتىندە، حالىق ساياسي كەڭەسى − مەملەكەتتى جونگە سالۋ جۇيەسىنىڭ ماڭىزدى قۇرامداس بولەگى، جۇڭگوشا تۇزىمدىك ورنالاستىرۋ. جاڭا تاريحي باستامادا حالىق ساياسي كەڭەسى تۇزىمىندە ويداعىداي تاباندى بولىپ، حالىق ساياسي كەڭەسى ىستەرىن ويداعىداي دامىتىپ، پارتيانىڭ باسشىلىعىن، بىرلىكساپتى، كەڭەستىك دەموكراتيانى ورگانيكالى ۇشتاستىرۋدا تاباندى بولعاندا عانا، ءسوز جوق، جاڭا داۋىردەگى ساياسي كەڭەس قىزمەتىندە ۇزدىكسىز جاڭا جاعداي جاراتىپ، جۇڭحۋا ۇلتىنىڭ ۇلى گۇلدەنۋىنىڭ شۇعىلالى داستانىن بىرگە جازۋعا بولادى.
باس شۋجي شي جينپيڭ بىلاي دەپ دارىپتەدى: ”جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ − جاڭا ءداۋىردىڭ جاڭا جورىعىنداعى پارتيا مەن مەملەكەتتىڭ وزەكتى مىندەتى“. جۇڭگو ۇلگىسىندەگى وسىزامانداندىرۋ سىندى داڭعىل جولدى بويلاپ ەرلىكپەن العا باسساق، بولاشاعىمىزدىڭ نۇرلى بولاتىنىن ابدەن بىلەمىز، ءبىراق ءبىز باساتىن جول تەگىس بولمايدى، بولجاۋعا بولاتىن جانە بولجاۋعا بولمايتىن ءتۇرلى حاۋىپ - قاتەر مەن سىن - سايىسقا، ءتىپتى ويلاماعان اساۋ تولقىندارعا تاپ بولۋىمىز مۇمكىن. جۇڭگو كوممۋنيستىك پارتياسى باسشىلىعىنىڭ ساياسي ابزالدىعى مەن جۇڭگوشا سوتسياليزمنىڭ تۇزىمدىك ابزالدىعىن ساۋلەلەندىرىپ، جۇمىلدىرۋعا بولاتىن بارلىق بەلسەندى فاكتورلاردى جۇمىلدىرىپ، ىنتىماقتاسۋعا بولاتىن بارلىق كۇشتەرمەن ىنتىماقتاسىپ، ءبىر جاعادان باس، ءبىر جەڭنەن قول شىعارعاندا عانا، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ سىندى تاريحي ۇلى ءىستى جەڭىسپەن ىلگەرىلەتۋگە بولادى. العا باسۋ جولىندا، ءبىز تەك پارتيا تۋى استىندا ىنتىماقتاسا ”قۇرىش بولات“ قالىپتاستىرىپ، مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ ەڭ ۇلكەن سەنترلەس شەڭبەرىن ويداعىداي سىزىپ، ىنتىماق ارقىلى كۇش ۇيىستىرىپ، كۇرەس ارقىلى ۇلى ءىس تىندىرساق بولعانى، ءارقانداي داۋىل ءبىزدىڭ قۇرىشتاي بەرىك ەركىمىزدى شايقالتا المايدى، ءارقانداي قيىنشىلىق ءبىزدىڭ ەكپىندى قادامىمىزدى بوگەي المايدى، جۇڭحۋا ۇلتىنىڭ ۇلى گۇلدەنۋى اتتى الىپ كەمە، ءسوز جوق، تولقىن جارا العا ىلگەرىلەپ، جەلكەن جايىپ الىسقا ساپار شەگەدى.
كەڭەس دەموكراتياسى − پارتيانىڭ حالىققا باسشىلىق ەتىپ، مەملەكەتتى ءونىمدى جونگە سالۋىنىڭ، حالىقتىڭ وزىنە - ءوزى قوجا بولۋىنا كەپىلدىك ەتۋىنىڭ ماڭىزدى تۇزىمدىك جوباسى، حالىق ساياسي كەڭەسى − سوتسياليستىك كەڭەس دەموكراتياسىنىڭ ماڭىزدى ارناسى جانە ارناۋلى كەڭەس قۇرىلىمى. جۇڭگو كوممۋنيستىك پارتياسىنىڭ جاپپاي باسشىلىعىندا بۇلجىماي تاباندى بولىپ، دەموكراتيانى ساۋلەلەندىرۋ مەن ىنتىماقتى نىعايتۋدىڭ ءوزارا توعىسۋىنا، ۇكىمەت ىسىنە اقىل - كەڭەس بەرۋ مەن ورتاق تانىم ۇيىستىرۋعا قوس باعىتتا كۇش سالۋدا تاباندى بولىپ، ۇلى ىنتىماق پەن ۇلى بىرلەسۋدە تاباندى بولىپ، جۇڭگو كوممۋنيستىك پارتياسى ورتالىق كوميتەتىنىڭ شەشىمدەرىن، ورنالاستىرۋلارىن جانە حالىق ساياسي كەڭەسى قىزمەتى جونىندەگى تالاپتارىن تياناقتاندىرىپ، ەل ءىشى - سىرتىنداعى جۇڭحۋا ۇلاندارىنىڭ اقىل - پاراساتى مەن كۇش - قۋاتىن ۇيىستىرعاندا، حالىق ساياسي كەڭەسى، ءسوز جوق، جاڭا داۋىردەگى بورىش پەن مىندەتتى اناعۇرلىم ويداعىداي ارقالاپ، مەملەكەتتى قۇدىرەتتەندىرۋ قۇرىلىسىنا، ۇلتتىڭ گۇلدەنۋىنە ايبىندى كۇش توپتاي الادى.
كوپتىڭ كۇشى بىرىكتىرىلسە، اساۋ تولقىن كوتەرىلەدى، جۇرت تىلەگى توعىسسا، بىتپەيتىن ءىس بولمايدى. ءبىز شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، پارتيانىڭ 20 - قۇرىلتايىنىڭ ستراتەگيالىق ورنالاستىرۋلارىن دايەكتىلەندىرۋدى، تياناقتاندىرۋدى ۇزدىكسىز ويداعىداي يگەرىپ، جۇڭگو ۇلگىسىندەگى وسىزامانداندىرۋدىڭ ۇلى جوباسىن بىرتىندەپ تاماشا رەالدىققا اينالدىرۋىمىز كەرەك.
داڭق پەن ارمانعا تولى جاڭا جورىقتا ۇدەرە العا تارتقان حالىق ساياسي كەڭەسىنىڭ بورىشى داڭقتى، جاۋاپكەرلىگى اۋىر. ساياسي كەڭەس مۇشەلەرىنىڭ ”مەملەكەتتىڭ زور ءىسىن“ ەستە بەرىك ساقتاپ، مىندەتىن مۇقيات اتقارىپ، جاۋاپكەرلىگىن ادا ەتىپ، شىنايى ۇسىنىس قويىپ، تاماشا شارا قاراستىرىپ، ناقتى شارا قولدانىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋگە تىڭ دا اناعۇرلىم زور ۇلەس قوسۋىن ءۇمىت ەتەمىز.
ءماجىلىستىڭ تولىق تابىستى بولۋىن تىلەيمىز!
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
