قوعام حاۋىپسىزدىگى مينيسترلىگىنىڭ قاتىناستى باسقارۋ مەكەمەسى جولاۋشى تاسىمالىنىڭ حاۋىپسىزدىگى جونىندە ەسكەرتۋ جاريالادى
2024.03.21 13:40 كەلۋ قاينارى : حالىق تورابى
شينحۋا اگەنتتىگىنىڭ ءتىلشىسى رىن چينچين 3 – ايدىڭ 20 – كۇنى بەيجيڭنەن حابارلايدى. كوكتەم مەزگىلىندە اۋا رايى جىلىنىپ، جولاۋشى تاسىمالى مەن جۇك تاسىمالى، كوكتەمگى ەگىس جۇمىسى، ساياحاتقا شىعىپ، سەيىل قۇرۋ قاتارلى قيمىلدار كوبەيىپ، قاتىناس حاۋىپسىزدىگى جاعىنداعى حاۋىپ – قاتەر ارتا تۇسەدى. قوعام حاۋىپسىزدىگى مينيسترلىگىنىڭ قاتىناستى باسقارۋ مەكەمەسى 3 – ايدىڭ 20 – كۇنى جولاۋشى تاسىمالىنىڭ حاۋىپسىزدىگى جونىندە ەسكەرتۋ جاريالادى.
جولاۋشى تاسىمالىمەن شۇعىلداناتىن اۆتوموبيلدەردىڭ شوفەرلەرى اۆتوموبيلدى تاس جولداعى قارقىندى تەجەۋ تالابى بويىنشا جۇرگىزۋى قاجەت. اۆتوموبيلدى ولشەمنەن تىس قارقىنمەن جۇرگىزگەندە، اۆتوموبيلدى تورموزداۋ ارالىعى ۇزارادى، شوفەر زاتتاردى انىق كورە المايدى، كورۋ اياسى تارايادى، اۆتوموبيل سوعىلىساتىن جاعداي تۋىلسا، كەسىرى دە زور بولادى. جولاۋشىلاردىڭ سانى بەلگىلەنگەن ساننان اسىپ كەتپەۋى قاجەت. جولاۋشى تاسىمالى اۆتوموبيلىنە وتىرعان جولاۋشى سانى ولشەمنەن اسىپ كەتسە، اۆتوموبيلدىڭ حاۋىپسىزدىك دەڭگەيىن تومەندەتەدى، قاتىناس شىرعالاڭىنىڭ تۋىلۋ ىقتيمالدىعىن جوعارىلاتادى، ادامداردىڭ جارالانۋ، قازا بولۋ حاۋپىن ارتتىرادى.
ءتۇن ورتاسىندا، تاڭ سارىدە جانە تۇستەن كەيىن شارشاعان كەزدە اۆتوموبيل جۇرگىزۋدەن اباي بولۋ كەرەك. ساناققا قاراعاندا، ءتۇن ورتاسى (ساعات 0 دەن 2 گە دەيىن)، تاڭ ءسارى (ساعات 4 تەن 6 عا دەيىن) جانە تۇستەن كەيىنگى (ساعات 11 دەن 13 كە دەيىن) ۋاقىت شارشاعان كەزدە اۆتوموبيل جۇرگىزۋ سەبەبىنەن قاتىناس شىرعالاڭى كوپ تۋىلاتىن مەزگىل سانالادى. شارشاعان كەزدە اۆتوموبيل جۇرگىزسە، شوفەردىڭ بايقاۋ قۋاتى السىرەيدى، تۇجىرىمداۋ قابىلەتى تومەندەيدى، مەڭگەرۋ بارىسىندا قاتەلىك جىبەرۋ ىقتيمالدىعى ارتادى، اۋىر بولعان جاعدايدا، اۆتوموبيل مەڭگەرۋسىز كەتۋى مۇمكىن. تۇراقتى قىسقا ارالىقتا قاتىنامايتىن ۇزىن جولدى اۆتوموبيلدەردىڭ شوفەرلەرى 2 ~ 5 ساعاتتا ءبىر رەت توقتاۋى، شوفەرلەر ءتۇن ورتاسىندا اۆتوموبيلدى توقتاتىپ دەمالۋى، بەلگىلەمەگە قايشى تۇردە قاتىناماۋى، ءوزى مەن جولاۋشىلاردىڭ اماندىعىنا كەپىلدىك ەتۋى قاجەت.
جولاۋشى تاسىمالىمەن شۇعىلداناتىن اۆتوموبيلدەردىڭ جۇك قوياتىن ساندىقتارى جولاۋشىلاردىڭ جۇگىن قويۋعا ارنالعان، جۇك قوياتىن ساندىققا بەلگىلەمەگە قايشى تۇردە باسقا زاتتاردى تيەۋگە بولمايدى، جولاۋشىلاردى جۇكپەن ارالاس وتىرعىزۋعا بولمايدى. اۆتوموبيلدى ورنىقتى جۇرگىزۋ ءۇشىن، جولاۋشىلار اۆتوموبيلىنىڭ قۇرىلىمى وتە اۋىر جۇكتەردى تيەۋگە اسا ۇيلەسپەيتىن ەتىپ جوبالانعان، جۇكتى زاڭ – تۇزىمدەرگە قايشى تۇردە تيەيتىن بولسا، دوڭگەلەكتىڭ جارىلۋى، اۆتوموبيلدىڭ توڭكەرىلۋى قاتارلى حاۋىپ – قاتەرلەر تۋىلۋى ىقتيمال، اۆتوموبيلدى جۇرگىزۋدىڭ حاۋىپسىزدىگىنە اۋىر ىقپال جاسايدى.
ءىرى تيپتى جولاۋشىلار اۆتوموبيلىن جۇرگىزەتىن شوفەرلەر جوعارى قارقىندى تاس جولداعى تۋنەلدەن وتكەن كەزدە، تاس جولداعى قاتىناس بەلگىسى مەن سىزىعىنا كوڭىل ءبولۋى، قاتىناس بەلگىسى مەن سىزىعى بويىنشا ءجۇرۋى، قارقىندى تەجەۋگە قاتىستى بەلگىلەمەگە بويسۇنۋى قاجەت، تۋنەل ىشىندە الدىڭعى اۆتوموبيلدەن وزۋعا تيىم سالىنادى. سونىمەن بىرگە، تۋنەلدىڭ كىرەر اۋزىندا تۋىلاتىن ”قارا ۇڭگىر اسەرىنەن“ ساقتانۋى، تۋنەلدەن شىعاتىن كەزدە تۋىلاتىن ”اق ۇڭگىر اسەرىنەن“ ساقتانۋى قاجەت.
جولاۋشىلار دا ”حاۋىپسىزدىك قامالىن“ وزىنەن باستاپ ويداعىداي بەكەمدەۋى، حاۋىپسىزدىك بەلبەۋىن تاعۋى، مولشەردەن تىس جولاۋشى وتىرعىزعان اۆتوموبيلگە وتىرۋدان باس تارتۋى، حاۋىپتى بۇيىمداردى اۆتوموبيلگە الىپ شىقپاۋى، قاتىناس جاعىنداعى زاڭ – تۇزىمدەرگە قايشى ارەكەتتەردى بايقاسا، دەر كەزىندە قوعام حاۋىپسىزدىگى قاتىناستى باسقارۋ تاراۋلارىنا اشكەرەلەۋى قاجەت.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
