شي جينپيڭ جاڭا داۋىردە ورتا بولەك رايونداردى كوركەيتۋدى ىلگەرىلەتۋ اڭگىمە ءماجىلىسىن باسقارىپ اشىپ بىلاي دەپ دارىپتەدى
ورتا بولەك رايونداردى كوركەيتۋدى اناعۇرلىم جوعارى باستامادا تىڭعىلىقتى ىلگەرىلەتۋ كەرەك
لي چياڭ، ساي چي، ديڭ شۋەشياڭ قاتىناستى
2024.03.21 16:06 كەلۋ قاينارى : حالىق تورابى
 |
3 - ايدىڭ 20 - كۇنى تۇستەن كەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري كوميتەتىنىڭ ءتوراعاسى شي جينپيڭ حۋنان ولكەسىنىڭ چاڭشا قالاسىندا جاڭا داۋىردە ورتا بولەك رايونداردى كوركەيتۋدى ىلگەرىلەتۋ ءماجىلىسىن باسقارىپ اشتى ءارى ماڭىزدى ءسوز سويلەدى.
سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن
|
«حالىق گازەتى»، 3 – ايدىڭ 20 – كۇنى، چاڭشا. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري كوميتەتىنىڭ ءتوراعاسى شي جينپيڭ 3 - ايدىڭ 20 - كۇنى تۇستەن كەيىن حۋنان ولكەسىنىڭ چاڭشا قالاسىندا جاڭا داۋىردە ورتا بولەك رايونداردى كوركەيتۋدى ىلگەرىلەتۋ ءماجىلىسىن باسقارىپ اشتى ءارى ماڭىزدى ءسوز سويلەدى. ول بىلاي دەپ دارىپتەدى: ورتا بولەك رايوندار − ەلىمىزدىڭ ماڭىزدى استىق ءوندىرىس بازاسى، ەنەرگيا، شيكىزات، ماتەريال بازاسى، وسى زامانعى جابدىق جاساۋ جانە جوعارى تەحنيكا كاسىپ بازاسى، سونداي - اق، ۋنيۆەرسال قاتىناس - تاسىمال تورابى، مەملەكەت كولەمىندە ماڭىزدى ورىندا تۇرادى. پارتيا ورتالىق كوميتەتىنىڭ ورتا بولەك رايونداردى كوركەيتۋدى ىلگەرىلەتۋ جونىندەگى ءبىرقىدىرۋ ساياسات - شارالارىن دايەكتى تياناقتاندىرۋدى باستان - اياق ويداعىداي يگەرىپ، ساپالى دامۋدى ىلگەرىلەتۋگە كۇش بىرىكتىرىپ، جۇڭگو ۇلگىسىندەگى وسىزامانداندىرۋ قۇرىلىسىندا ورتا بولەك رايونداردى كوركەيتۋدىڭ تىڭ داستانىن جازۋعا قۇلشىنۋ كەرەك.
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ اڭگىمە ماجىلىسىنە قاتىناستى.
اڭگىمە ماجىلىسىندە مەملەكەتتىك دامۋ جانە رەفورما كوميتەتىنىڭ مەڭگەرۋشىسى جىڭ شانجيە، سانشي ولكەلىك پارتكومنىڭ شۋجيى تاڭ دىڭجيە، انحۇي ولكەلىك پارتكومنىڭ شۋجيى حان جۇن، جياڭشي ولكەلىك پارتكومنىڭ شۋجيى يىن حۇڭ، حىنان ولكەلىك پارتكومنىڭ شۋجيى لوۋ ياڭشىڭ، حۋبەي ولكەلىك پارتكومنىڭ شۋجيى ۋاڭ مىڭحۇي، حۋنان ولكەلىك پارتكومنىڭ شۋجيى شىن شياۋميڭ ىلگەرىندى - كەيىندى ءسوز سويلەپ، ورتا بولەك رايونداردى كوركەيتۋدى ىلگەرىلەتۋ قىزمەت جاعدايىنان مالىمەت بەرىپ، ۇسىنىس – پىكىرلەرىن ورتاعا قويدى.
كوپشىلىكتىڭ ءسوزىن تىڭداعاننان كەيىن شي جينپيڭ ماڭىزدى ءسوز سويلەدى. ول بىلاي دەپ اتاپ كورسەتتى: الدىڭعى رەتكى ورتا بولەك رايونداردى كوركەيتۋدى ىلگەرىلەتۋ اڭگىمە ءماجىلىسى اشىلعان 5 جىلدان بەرى ورتا بولەك رايوندار ەكونوميكاسى جالپى جاقتان ورنىقتى بولدى، جاڭالىق جاراتا دامۋ قوزعاۋشى كۇشى ۇزدىكسىز كۇشەيدى، كاسىپ سالاسى نەگىزى كورنەكتى جاقساردى، رەفورما جاساپ، ەسىك اشۋدا تىڭ قادام تاستالدى، قوعامدىق ىستەر جاپپاي دامىدى، حالىقتىڭ تۇرمىس دەڭگەيى ۇزدىكسىز جوعارىلادى. جاسىل، تومەن كومىرتەكتى دامۋ تاسىلىنە بۇرىلىس جاساۋ اياق الىسى تەزدەپ، ورتا بولەك رايونداردىڭ دامۋى اناعۇرلىم جوعارى باستاماعا كوتەرىلدى. سونىمەن بىرگە، ورتا بولەك رايونداردى كوركەيتۋدى ىلگەرىلەتۋ ءالى دە كوپتەگەن قيىنشىلىقتار مەن سىن - سايىستارعا ءدوپ كەلىپ وتىرعانىن، ونى شىن مانىندە زەرتتەپ شەشۋ كەرەكتىگىن كورە ءبىلۋ كەرەك.
شي جينپيڭ بىلاي دەپ دارىپتەدى: عىلىم - تەحنيكادا جاڭالىق جاراتۋ ارقىلى كاسىپ سالاسىندا جاڭالىق جاراتۋعا جەتەكشىلىك ەتىپ، جاڭا ساپالى وندىرگىش كۇشتەردى بەلسەنە جەتىلدىرۋ جانە دامىتۋ كەرەك. ناقتى ەكونوميكا سىندى وسى نەگىزدى تياناق ەتىپ، وزىق جاساۋ كاسىبىن ۇلعايتىپ جانە كۇشەيتىپ، جاڭاشا ونەركاسىپتەندىرۋدى بەلسەنە ىلگەرىلەتىپ، ءداستۇرلى كاسىپ سالالارىن جاڭالاپ، ساپالىلاندىرىپ، جاڭادان گۇلدەنگەن كاسىپ سالالارىن جەتىلدىرىپ جانە زورايتىپ، بولاشاق كاسىپ سالالارىن الدىن الا ورنالاستىرىپ جانە قۇرىپ، وزىق جاساۋ كاسىبىن تىرەك ەتكەن وسىزاماندانعان كاسىپ سالاسى جۇيەسىن جەدەل ورناتۋ كەرەك. عىلىم - تەحنيكادا جاڭالىق جاراتۋ مەن كاسىپ سالاسىندا جاڭالىق جاراتۋدى تەرەڭ توعىستىرۋعا اناعۇرلىم ءمان بەرىپ، كەلەلى عىلىم - تەحنيكادا قامال الۋدى كۇشەيتىپ، كاسىپ سالاسىندا جاڭالىق جاراتا دامۋدىڭ تەحنيكالىق تىرەكتىك قابىلەتىن ارتتىرۋ كەرەك. كاسىپورىنداردىڭ جاڭالىق جاراتۋداعى نەگىزگى تۇلعالىق ورنىن كۇشەيتىپ، جوعارى - تومەن جەلىدەگى تىعىز سەلبەسكەن جاڭالىق جاراتۋ بىرلەسكەن تۇلعاسىن قۇرىپ، ءوندىرۋ، وقىتۋ، زەرتتەۋ توعىسقان جاڭالىق جاراتۋدى جەبەپ، عىلىم - تەحنيكا جەتىستىكتەرىن رەال وندىرگىش كۇشكە اينالدىرۋدى جەدەلدەتۋ كەرەك. جاساۋ كاسىبىندەگى كەلەلى تەحنيكا جاڭالاۋ، ساپالىلاندىرۋ جانە جابدىقتاردى جاڭالاۋ ينجەنەرياسىن ىشكەرىلەي اتقارىپ، جاساۋ كاسىبىندە جوعارى دەڭگەيلى، زەيىندەنگەن، جاسىل دامۋ اياق الىسىن ىلگەرىلەتىپ، ءداستۇرلى كاسىپ سالالارىندا تىڭ ومىرشەڭدىك كۇشتى تاسقىنداتۋ كەرەك.
شي جينپيڭ بىلاي دەپ اتاپ كورسەتتى: باسقا دا كەلەلى دامۋ ستراتەگيالارىمەن ۇشتاسۋدى كۇشەيتىپ، جاڭا دامۋ ارناسىمەن اناعۇرلىم ويداعىداي توعىسۋ جانە وعان تىرەك بولۋ كەرەك. بەيجيڭ - تيانجين - حىبەيمەن، چاڭجياڭ اتىراۋىمەن، گۋاڭدۇڭ - شياڭگاڭ - اۋمىن ۇلكەن شىعاناق رايونىمەن ىشكەرىلەي ۇشتاسۋدى كۇشەيتىپ، چاڭجياڭ ەكونوميكالىق بەلدەۋىنىڭ دامۋىمەن، حۋاڭحى وزەنى الابىنىڭ ەكولوگياسىن قورعاۋمەن جانە ساپالى دامۋمەن توعىسۋدى، ىقپالداستىقتى كۇشەيتۋ كەرەك. كاسىپ سالاسىندا ساتىلى اۋىسۋدى تارتىپپەن ۇلاستىرىپ، كاسىپ سالاسىن ورنالاستىرۋدى ساپالىلاندىرۋ كەرەك. وسىزاماندانعان قاتىناس نەگىزدىك قۇرىلعىلار جۇيەسى قۇرىلىسىن كۇشەيتىپ، ورتا بولەك رايونداردىڭ ۇلكەن ارنا جۇيەسىن كۇشەيتۋ كەرەك. وڭىرلەر ىشىندە ولكەلەر ارا سەلبەستىك مەحانيزمىن ورناتىپ جانە كەمەلدەندىرىپ، وڭىرلەردىڭ سايكەستى دامۋ دەڭگەيىن جوعارىلاتۋ كەرەك. چاڭجياڭنىڭ ورتا اعارىنداعى قالالار شوعىرى مەن ورتا جازىق قالا شوعىرىنىڭ دامۋىن كۇش سالا جەبەپ، شەڭبەرلەر اراسىنداعى سايكەستىكتى، ىقپالداستىقتى كۇشەيتىپ، توڭىرەكتەگى وڭىرلەردىڭ دامۋىنا اناعۇرلىم ويداعىداي ىقپال جاساۋ جانە جەتەكشىلىك ەتۋ كەرەك.
شي جينپيڭ بىلاي دەپ دارىپتەدى: تەرەڭ قاتپارلى رەفورما مەن جوعارى دەڭگەيدە ەسىك اشۋدى ءبىر تۇتاس جوسپارلاپ ىلگەرىلەتىپ، اناعۇرلىم مىعىم باسەكەلىك قۋاتقا يە ىشكى - سىرتقى ەسىك اشۋ بيىگىن ۇزدىكسىز قالىپتاستىرۋ كەرەك. ماڭىزدى فاكتورلاردى بازارلاندىرۋ رەفورماسىن اناعۇرلىم ويداعىداي تەرەڭدەتىپ، بازار شارۋاشىلىعىنىڭ نەگىزدىك ءتۇزىمىن كەمەلدەندىرىپ، جەرگىلىكتى قورعانىمپازدىق ارەكەتتەرىن جاپپاي ارىلتۋ جانە تۇزەتىپ، ءتۇرلى وندىرگىش كۇش فاكتورلارىنىڭ ءوڭىر اتتاپ ۇيلەسىمدى اعىلۋىن جانە ساپالى ورنالاسۋىن ىلگەرىلەتىپ، مەملەكەت بويىنشا بىرلىككە كەلگەن ءىرى بازار قۇرىلىسىنا اناعۇرلىم ويداعىداي ات سالىسۋ كەرەك. تۇزىمدىك ەسىك اشۋدى ورنىقتى كەڭەيتىپ، ”ءبىر بەلدەۋ، ءبىر جولدى“ ورتاق قۇرۋمەن ىشكەرىلەي توعىسىپ، جاڭا ازيا - ەۆروپا ۇلكەن كوپىرىمەن، باتىس بولەكتەگى تەڭىز جاڭا ارناسىمەن ىرىقتىلىقپەن ۇشتاسىپ، ەركىن ساۋدا سىناق رايونىن جوعارى ولشەممەن قۇرىپ، اناعۇرلىم كوپ جوعارى دەڭگەيلى سىرتقا ەسىك اشۋ سەلبەستىك تۇعىرىن قالىپتاستىرىپ، ەل ءىشى جانە حالىقارالىق قوس اينالىمدى ۇلاستىرۋ جاعىندا اناعۇرلىم زور رول اتقارۋ كەرەك. بازارلاندىرىلعان، زاڭمەن باسقارىلاتىن، حالىقارالانعان ساۋدا ورتاسى قۇرىلىسىن كۇشەيتىپ، ەل ءىشى - سىرتىنداعى ماڭىزدى فاكتورلار بايلىعىن باۋراۋ قۋاتىن ارتتىرۋ كەرەك. ”ەكىدەن استە اۋىتقىماۋدا“ تاباندى بولىپ، مەملەكەت مەنشىگىندەگى كاسىپورىنداردىڭ الۋەتتەنۋىن، ساپالىلانۋىن، ۇلعايۋىن قولداپ، حالىقتىق كاسىپورىنداردىڭ دامۋ ورتاسىن اناعۇرلىم ساپالىلاندىرۋ كەرەك.
شي جينپيڭ بىلاي دەپ اتاپ كورسەتتى: ەكولوگيالىق ورتانى قورعاۋدى جانە جاسىل، تومەن كومىرتەكتى دامۋدى سايكەستى ىلگەرىلەتىپ، كوركەم ورتا بولەك قۇرۋدى جەدەلدەتۋ كەرەك. لاستانۋدان ساقتانۋ - وڭاۋدان قامال الۋ شايقاسىن ۇزدىكسىز ىشكەرىلەي جۇرگىزىپ، ۇلكەن وزەن - داريالار مەن ماڭىزدى كولدەردىڭ ەكولوگيالىق ورتاسىن جۇيەلى وڭاۋدى، امبەباپ وڭاۋدى، سايكەستى وڭاۋدى كۇشەيتىپ، قالا - قالاشىقتارداعى تۇرمىستىق لاس سۋلاردى جيناۋ جانە ءبىر جاقتى ەتۋ قۇرىلعىلارىنداعى ولقىلىقتاردى جەدەل تولىقتاۋ كەرەك. كاسىپ سالاسىندا، ەنەرگيادا، قاتىناس - تاسىمال قۇرىلىمىندا جاسىل، تومەن كومىرتەكتى بولۋعا بۇرىلىس جاساۋدى ىلگەرىلەتىلىپ، جاسىل، تومەن كومىرتەكتى كاسىپ سالالارىن جەدەل جەتىلدىرىپ جانە ۇلعايتىپ، بايلىقتان ۇنەمدى، شوعىرلى، اينالمالى پايدالانۋدى كۇشەيتۋ كەرەك. اعارلاردا ەندىك ەكولوگيا قورعاۋ تولەم بەرۋ مەحانيزمىن جانە ەكولوگيالىق ونىمدەردىڭ قۇنىن جۇزەگە اسىرۋ مەحانيزمىن كەمەلدەندىرىپ، كاسىپ سالاسىنىڭ ەكولوگياعا بەيىمدەلۋىن جانە ەكولوگيانىڭ كاسىپ سالالانۋىن ىلگەرىلەتۋ كەرەك.
شي جينپيڭ بىلاي دەپ دارىپتەدى: قالا مەن اۋىلدى توعىسپالى دامىتۋدا تاباندى بولىپ، اۋىل - قىستاقتى جاپپاي كوركەيتۋدى تىڭعىلىقتى ىلگەرىلەتۋ كەرەك. اۋدان ورتالىعىن ماڭىزدى دانەكەر ەتكەن جاڭاشا قالا - قالاشىقتاندىرۋ قۇرىلىسىن ىلگەرىلەتىپ، قالا مەن اۋىل اراسىنداعى الەۋمەتتىك بايلىقتى بىركەلكى ورنالاستىرۋدى جانە ءوندىرىس فاكتورلارىنىڭ ەركىن اۋىسۋىن جەبەپ، قالانىڭ نەگىزدىك قۇرىلعىلارىن جانە الەۋمەتتىك قىزمەت وتەۋدى اۋىل - قىستاققا قاراي كەڭەيتۋدى ىلگەرىلەتۋ كەرەك. اۋىل - قىستاق نەگىزدىك قۇرىلعىلارىن ونان ارى جاقسارتىپ، اۋىل - قىستاق ورتاسىن وڭاۋدى كۇشەيتىپ، اۋىل شارۋاشىلىعىندا ۇيلەسىمدى كولەمدەگى تيجاراتپەن شۇعىلدانۋدى جەبەپ، ءبىرىنشى، ەكىنشى، ءۇشىنشى كاسىپتەردى توعىسپالى دامىتۋدى قولداۋ كەرەك. اۋىل - قىستاق رەفورماسىن ونان ارى تەرەڭدەتىپ، اۋىل شارۋاشىلىعىن كۇشەيتۋ، اۋىل - قىستاققا تيىمدىلىك جاساۋ، حالىقتى اۋقاتتاندىرۋ ارقىلى قولداۋ ءتۇزىمىن كەمەلدەندىرىپ، اۋىل شارۋاشىلىعىنىڭ، اۋىل - قىستاقتىڭ دامۋ ومىرشەڭدىگىن تولىق ساۋلەلەندىرۋ كەرەك. اۋدان ءوڭىرى ەكونوميكاسىن زور كۇشپەن دامىتىپ، جاڭا ارتۋ تۇيىندەرىن قالىپتاستىرۋ كەرەك. بايىرعى توڭكەرىستىك رايوندار مەن دامۋدا ارتتا قالعان اۋدان، قالا، رايونداردى كوركەيتۋگە، دامىتۋعا ايرىقشا ءمان بەرىپ، الەۋمەتتىك قىزمەت وتەۋدەگى ولقىلىقتاردى تولىقتاپ، ەرەكشە كاسىپ سالالارىن دامىتىپ جانە زورايتىپ، ىشكى دامۋدىڭ قوزعاۋشى كۇشىن ارتتىرۋ كەرەك. قايتا كەدەيلەسۋدەن ساقتانۋدى باقىلاۋ - تەكسەرۋ، كومەكتەسۋ - سۇيەمەلدەۋ مەحانيزمىن اقاۋسىزداندىرۋ، كولەمدى قايتا كەدەيلەسۋدەن ساقتانۋ كەرەك. اۋىل - قىستاق مادەنيەتىن كوركەيتۋدى كۇش سالا جەبەۋ، ەسكى سالت - سانانى وزگەرتۋدى ىلگەرىلەتۋ كەرەك. پارتيا ۇيىمى باسشىلىق ەتكەن ءوزىن - ءوزى باسقارۋ، زاڭمەن باسقارۋ، مورالمەن باسقارۋ ءوزارا ۇشتاسقان نەگىزگى ساتى باسقارۋ جۇيەسىن اقاۋسىزداندىرىپ، جاڭا داۋىردەگى ”فىڭچياۋ تاجىريبەسىندە“ تاباندى بولىپ جانە دامىتىپ، قارا كۇشتەردى الاستاۋدى، سۇرقيا كۇشتەردى جويۋدى ۇدايىلاندىرۋدى جۇزەگە اسىرىپ، بەلسەندى، اقاۋسىز قوعامدىق ەكولوگيا قالىپتاستىرۋ كەرەك.
شي جينپيڭ بىلاي دەپ اتاپ كورسەتتى: ساپالى دامۋ مەن جوعارى دەڭگەيلى حاۋىپسىزدىكتىڭ ءوزارا جەبەۋىندە تاباندى بولىپ، استىق، ەنەرگيا بايلىعىنىڭ حاۋىپسىزدىگىن قامتاماسىز ەتۋ قابىلەتىن قۇلشىنا جوعارىلاتۋ كەرەك. استىق ءوندىرىس فۋنكتسيالىق رايونى، ماڭىزدى اۋىل شارۋاشىلىق ونىمدەرىن وندىرەتىن قورعاۋ رايونى جانە ەرەكشە اۋىل شارۋاشىلىق ونىمدەرى ابزال رايونى قۇرىلىسىن جوعارى ساپامەن ىلگەرىلەتىپ، ءبىر توپ جاسىل اۋىل شارۋاشىلىق ونىمدەرىن ءوندىرۋ، مانەرلەۋ، قامداۋ بازاسىن قۇرىپ، استىق سياقتى ماڭىزدى اۋىل شارۋاشىلىق ونىمدەرىمەن ورنىقتى، حاۋىپسىز قامداۋعا شىنايى كەپىلدىك ەتۋ كەرەك. كومىر، سيرەك كەزدەسەتىن جەر مەتالدارى سياقتى بايلىقتاردى اشۋ - پايدالانۋ دەڭگەيىن اناعۇرلىم جوعارىلاتىپ، كومىر سياقتى قازبا ەنەرگيالارمەن ەڭ تومەنگى شەكتەن تۇسىرمەي قامتاماسىز ەتۋ قابىلەتىن كۇشەيتىپ، جاڭاشا ەنەرگيا جۇيەسىن جەدەل قۇرىپ، ءداستۇرلى ەنەرگيا مەن جاڭا ەنەرگيانىڭ قاتىناسىندا كوپ ەنەرگيا ءوزارا تولىقتاۋعا، ىشكەرىلەي توعىسۋعا ءمان بەرۋ كەرەك.
شي جينپيڭ سوڭىندا بىلاي دەپ دارىپتەدى: ورتالىقتىڭ وڭىرلەردى سايكەستى دامىتۋ باسشىلىق گرۋپپاسى ءبىر تۇتاس جوسپارلاپ سايكەستىرۋدى جانە قۋزاۋ - جەتەكشىلىك ەتۋدى كۇشەيتۋى، ورتالىقتاعى قاتىستى تاراۋلار قولداۋ سەرپىنىن ارتتىرىپ، جاڭا داۋىردە ورتا بولەك رايونداردى كوركەيتۋدى ىلگەرىلەتۋدىڭ ساياسات - شارالارىن زەرتتەپ العا قويۋى كەرەك. جەرگىلىكتى پارتكومدار مەن ۇكىمەتتەر تۇلعالىق جاۋاپكەرلىكتى ارقالاپ، پارتيا ورتالىق كوميتەتىنىڭ شەشىم، ورنالاستىرۋلارىن باتىل دايەكتىلەندىرىپ، ءتۇيىندى قىزمەت مىندەتتەرىنىڭ، كەلەلى رەفورما ىستەرىنىڭ تياناقتانۋىن، ناقتىلانۋىن ىلگەرىلەتۋى كەرەك. نەگىزگى تاقىرىپتىق تاربيە جەتىستىكتەرىن بەكەمدەپ جانە ۇلعايتىپ، ادال، كىرشىكسىز، جاۋاپكەرلىك ارقالايتىن ساپالى، ماماندانعان كادرلار قوسىنىن كۇش سالا سومداپ، باعالاۋ، شابىتتاندىرۋ ءتۇزىمىن ورناتىپ جانە كەمەلدەندىرىپ، كادرلاردى باتىلدىقپەن ءورىس اشۋعا، جاۋاپكەرلىك ارقالاپ، ناتيجە جاراتۋعا ىنتالاندىرۋ كەرەك.
لي چياڭ سوزىندە مىنالاردى ءبىلدىردى: باس شۋجي شي جينپيڭنىڭ ماڭىزدى ءسوزىنىڭ رۋحىن مۇقيات ۇيرەنىپ، ءتۇسىنىپ، ىشكەرىلەي دايەكتى تياناقتاندىرىپ، ورتا بولەك رايونداردى تۇتاس مەملەكەت جاعدايىمەن كىرىكتىرىپ، جاڭا دامۋ ارناسىن قالىپتاستىرۋعا تىرەك بولۋ تۇرعىسىنان دەڭگەيدى تۇراقتاندىرىپ وي جۇگىرتىپ، وڭىرلىك باسىمدىقتى، بايلىق باسىمدىعىن دامۋ باسىمدىعىنا اينالدىرۋعا قۇلشىنۋ كەرەك. ورتا بولەكتەگى رايوندار باسقا وڭىرلەردىڭ دامۋ ستراتەگياسىمەن ىرىقتىلىقپەن ۇشتاستىرىپ، شىعىس بولەكتەگى رايونداردىڭ كاسىپ سالاسىندا جاڭالىق جاراتۋ بايلىعىن بەلسەنە ەنگىزىپ، باتىس بولەكتەگى رايوندارعا ىقپال جاساۋ، جەتەكتەۋ رولىن كۇشەيتىپ، سىرتقا ەسىك اشۋ دەڭگەيىن جوعارىلاتۋى كەرەك. ولقىلىقتاردى تولىقتاۋعا كۇش سالىپ، جاڭاشا قالا - قالاشىقتاندىرۋ، جاسىل، تومەن كومىرتەكتى دامۋ سياقتى جاقتاردا باسىمدىقتى ساۋلەلەندىرىپ، كومەسكى كۇشتەردى اشىپ، وڭىرلىك ىشكى سەلبەستىكتى كۇشەيتىپ، جالپى تۇلعالىق ىقپالداستىقتى ىلگەرىلەتىپ، ورتا بولەك رايونداردىڭ جالپى تۇلعالىق ناقتى قۋاتى مەن باسەكەلىك قۋاتىن جوعارىلاتۋ كەرەك.
ديڭ شۋەشياڭ سوزىندە مىنانى ءبىلدىردى: پارتيا 20 - قۇرىلتايىنىڭ رۋحىن جانە باس شۋجي شي جينپيڭنىڭ ماڭىزدى ءسوزىنىڭ رۋحىن ىشكەرىلەي ۇيرەنىپ، دايەكتەندىرىپ، ساپالى دامۋ تالابىن تىعىز توڭىرەكتەي، ورتا بولەك رايونداردى كوركەيتۋدى ىلگەرىلەتۋدە ۇزدىكسىز تىڭ ناتيجەگە قول جەتكىزۋ كەرەك. عىلىم - تەحنيكادا جاڭالىق جاراتۋ مەن كاسىپ سالاسىندا جاڭالىق جاراتۋدى ىشكەرىلەي توعىستىرۋدى كۇشەيتىپ، جەرگىلىكتى جاعدايعا قاراي جاڭا وندىرگىش كۇشتەردى جەدەل دامىتۋ كەرەك. استىق، ەنەرگيا، بايلىق حاۋىپسىزدىگىن قامتاماسىز ەتۋ قابىلەتىن كۇش سالا جوعارىلاتىپ، ساپالى دامۋ مەن جوعارى دەڭگەيدەگى حاۋىپسىزدىكتىڭ ءتيىمدى ىقپالداستىعىن جۇزەگە اسىرۋ كەرەك. مەملەكەت بويىنشا بىرلىككە كەلگەن ءىرى بازار قۇرىلىسى مەن جوعارى دەڭگەيدەگى ەسىك اشۋ سەلبەستىگىن تەرەڭدەتىپ، دامۋدىڭ ىشكى قوزعاۋشى كۇشى مەن ومىرشەڭدىك كۇشىن ۇزدىكسىز كۇشەيتۋ كەرەك. ەكولوگيالىق ورتانى قورعاۋدى تاباندىلىقپەن مىقتى يگەرىپ، ساپالى دامۋدىڭ جاسىل ءتۇسىن اناعۇرلىم كۇشەيتۋ كەرەك.
لي گانجيە، حى ليفىڭ، ۋ جىڭلۇڭ، مۋ حۇڭ اڭگىمە ماجىلىسىنە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى جەرلەردەگى، قاتىستى كاسىپورىندارداعى جاۋاپتى جولداستار اڭگىمە ماجىلىسىنە قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
