لي چياڭ فۋجياندا، جياڭشيدە تەكسەرۋ - زەرتتەۋ جۇرگىزگەندە بىلاي دەپ دارىپتەدى
حالىق بۇقاراسىنىڭ ساپالى تۇرمىسقا دەگەن تىڭ تىلەگىنە سايكەسىپ، ساپالى دامۋدى ىلگەرىلەتۋ بارىسىندا حالىق تۇرمىسىنىڭ ىرىس – قۇتىن ۇزدىكسىز ارتتىرۋ كەرەك
2024.03.21 16:09 كەلۋ قاينارى : حالىق تورابى
شينحۋا اگەنتتىگى، 3 - ايدىڭ 20 – كۇنى، نانچاڭ (ءتىلشى زوۋ ۋەي). ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ 3 - ايدىڭ 18 – كۇنىنەن 20 – كۇنىنە دەيىن فۋجيان، جياڭشيدە تەكسەرۋ - زەرتتەۋ جۇرگىزدى. ول مىنالاردى دارىپتەدى: باس شۋجي شي جينپيڭنىڭ حالىق تۇرمىسى قىزمەتى جونىندەگى ماڭىزدى نۇسقاۋىنىڭ رۋحىن ىشكەرىلەي ۇيرەنىپ، دايەكتىلەندىرىپ، مەملەكەتتىك ەكى ماجىلىستە ايقىندالعان قاتىستى مىندەتتەردى مۇقيات تياناقتاندىرىپ، حالىق بۇقاراسىنىڭ ساپالى تۇرمىسقا دەگەن تىڭ تىلەگىنە سايكەسىپ، حالىق تۇرمىسىنداعى ءتۇرلى ناقتى ىستەر مەن حالىق تىلەگى ينجەنەرياسىن كۇش سالا ويداعىداي يگەرىپ، الەۋمەتتىك قىزمەت وتەۋ دەڭگەيىن كۇش سالا جوعارىلاتىپ، حالىقتىڭ كوپ ساتىلى، الۋان ءتۇرلى قاجەتىن اناعۇرلىم ويداعىداي قاناعاتتاندىرىپ، ساپالى دامۋدى ىلگەرىلەتۋ بارىسىندا حالىقتىڭ ىرىس - قۇتىن ۇزدىكسىز ارتتىرۋ كەرەك.
فۋجياندا لي چياڭ الدىمەن فۋجوۋ شيحۋ باقشاسىنا كەلىپ، كول بەتىنىڭ سۋ ساپاسىن كورىپ، شيحۋ كولىنىڭ سۋ جۇيەسىن جونگە سالۋ جاعدايىن ەگجەي - تەگجەيلى ۇعىستى. ول بىلاي دەپ دارىپتەدى: تاماشا ەكولوگيالىق ورتا − حالىق تۇرمىسى ءۇشىن ەڭ كوپ جالپىعا ءتيىمدى قۇت - ىرىس، شيحۋ كولىن جونگە سالۋدىڭ تابىسى وڭاي - وسپاق قولعا كەلمەگەن، ونى بارىنشا قاستەرلەپ، ۇزدىكسىز قۇلشىنىپ، سۋدىڭ اناعۇرلىم تۇنىق، كورىنىستىڭ اناعۇرلىم كوركەم بولۋىنا مۇمكىندىك جاساۋ كەرەك. لي چياڭ داحۋاڭشان الەۋمەتتىك اۋماعىنداعى ۇلكەندەردىڭ ازىق - تۇلىك سارايىنا كەلىپ، وسى ارادا قيمىل جاساپ جاتقان قارتتارمەن جانە اماناتقا بەرىلگەن بالالارمەن پىكىر اۋىستىردى. ول بىلاي دەدى: قارتتاردىڭ سوڭعى ءومىرىن الاڭسىز وتكىزۋى مەن بالالاردىڭ اقاۋسىز، كوڭىلدى ەسەيىپ - ەرجەتۋى ءجۇز ميلليونداعان وتباسىنا ىقپال جاسايدى، جەرگىلىكتى ورىننىڭ ءىس جۇزىندىك جاعدايىن تياناق ەتىپ، باسقارۋدا جاڭالىق اشىپ، ءتىپتى دە ساپالى زەينەتكەرلىك جانە اماناتتاپ تاربيەلەۋ قىزمەت وتەۋىمەن قامداۋ كەرەك. شانلين حۋافۋ شاعىن رايونىندا لي چياڭ فۋجيان ولكەسى مەن فۋجوۋ قالاسىنىڭ تۇرعىن ۇيمەن قامتاماسىزداندىرۋ قىزمەتىنىڭ جاعدايى جونىندەگى مالىمەتىن تىڭداپ، تۇرلىشە قاۋىمنىڭ قاجەتىنە باعىتتاي وتىرىپ، مايعا بەرۋ مەن ساتىپ الۋ قاتار اتقارىلاتىن تۇرعىن ءۇي جۇيەسىن ۇزدىكسىز كەمەلدەندىرىپ، قۇرىلعىلاردى ورنالاستىرۋدى كۇشەيتىپ، تۇرعىن ءۇي ساپاسىن جوعارىلاتۋدى تالاپ ەتتى. فۋجياننىڭ جاڭالىق اشۋ تاجىريبەحاناسىندا لي چياڭ تاجىريبەحانانىڭ عىلمي زەرتتەۋدە قامال الۋ، جەتىستىكتەردى كادەگە جاراتۋ سياقتى جاعدايلارىن ۇعىسىپ، ءوندىرۋ، وقىتۋ، زەرتتەۋدى توعىستىرۋعا قاتىستى ادىستەردى تولىق تۇراقتاندىرىپ، ولاردىڭ مەحانيزمدە جاڭالىق اشۋ ارقىلى عىلىم - تەحنيكادا جاڭالىق اشۋدى جەبەۋ جاعىندا ۇزدىكسىز ىزدەنىس جاساپ، جاڭا جول اشۋىن ءۇمىت ەتتى. فۋجوۋ گاۋ - ي توبىندا لي چياڭ كاسىپورىننىڭ جاعدايى جونىندەگى تانىستىرۋدى تىڭداپ، كاسىپورىننىڭ جۇڭگوعا تامىر تارتىپ، ناتيجەسىنىڭ تەز قارقىنمەن ارتقانىنا قۋانىپ، قاتىستى جاقتارعا ساۋدا ورتاسىن كۇش سالا ساپالىلاندىرىپ، شەتەل كاپيتالىمەن قۇرىلعان كاسىپورىنداردىڭ جۇڭگودا ۇزدىكسىز تەرەڭ تامىر تارتىپ، اناعۇرلىم جاقسى دامۋىنا قولداۋ كورسەتۋدى تاپسىردى.
جياڭشيدە لي چياڭ نانچاڭ قالاسىنىڭ جاڭادان سالىنعان رايونىنداعى جۇمىسقا ورنالاسۋ ۇيىنە كەلىپ، قىزمەتكەرلەرمەن جانە جۇمىس ىزدەۋشىلەرمەن اۋىس - كۇيىس جاساپ، ءتۇيىندى قاۋىمنىڭ جۇمىسقا ورنالاسۋ جاعدايىن ۇعىستى. لي چياڭ بىلاي دەدى: جۇمىسقا ورنالاستىرۋ − حالىق تۇرمىسىنىڭ نەگىزى، اناعۇرلىم دالمە - ءدال، ەتەنە قىزمەت وتەۋ ارقىلى جۇمىسقا ورنالاسۋى قيىن ادامداردىڭ قىزمەت تابۋىنا بار كۇشپەن كومەكتەسۋ كەرەك. جياڭشي وسى زامانعى كاسىپتىك تەحنيكا شۋەيۋانىندا لي چياڭ جياڭشي ولكەسىنىڭ كاسىپتىك وقۋ - اعارتۋ جاعدايى جونىندەگى مالىمەتتى تىڭداپ، وقىتۋشى - وقۋشىلارمەن اڭگىمەلەستى. ول بىلاي دەدى: ءار سالادان ساڭلاقتار شىعادى، كاسىپتىك وقۋ - اعارتۋدى دامىتۋعا ايرىقشا ءمان بەرىپ، ءوندىرىس پەن وقىتۋدىڭ توعىسۋىن تەرەڭدەتىپ، اناعۇرلىم كوپ ساپالى تەحنيكالىق شەبەرلىك دارىندىلارىن جەتىلدىرۋ كەرەك. جيۋلۇڭحۋ الەۋمەتتىك اۋماعى دەنساۋلىق ساقتاۋعا قىزمەت وتەۋ ورتالىعىندا لي چياڭ جياڭشي ولكەسىنىڭ نەگىزگى ساتى الەۋمەتتىك دەنساۋلىق ساقتاۋعا قىزمەت وتەۋ جاعدايى جونىندەگى مالىمەتتى تىڭداپ، ەمدەۋ قىزمەتكەرلەرىنەن، ەمدەلۋگە كەلگەن بۇقارادان ءدارى - دارمەك دايىنداۋ، وتباسى شيپاگەرلەرىنىڭ كەلىسىم جاساسۋى سياقتى جاعدايلاردى ەگجەي - تەگجەيلى ۇعىسىپ، ساپالى ەمدەۋ بايلىعىن نەگىزگى ساتىعا ۇزدىكسىز بەيىمدەپ، بۇقارانىڭ ەسىك الدىندا ءتىپتى دە جاقسى ەمدەۋ قىزمەت وتەۋىنەن يگىلىكتەنۋىنە مۇمكىندىك جاساۋدى تالاپ ەتتى. جياڭشي ولكەسى لۇينىڭ اۋىل شارۋاشىلىعىن دامىتۋ شەكتى سەرىكتەستىگىندە لي چياڭ مايسا جەتىلدىرۋ تەحنيكاسى جونىندەگى مالىمەتتى تىڭداپ، جىلىجايعا، مايسا اتىزىنا بارىپ، مايسانىڭ ءوسۋ جاعدايىن كوردى. ول بىلاي دەپ اتاپ كورسەتتى: قازىر − كوكتەمگى ەگىس دايىندىعىنىڭ شەشۋشى مەزگىلى، ەگىس ۋاقىتى كۇتىپ تۇرمايدى، تەحنيكالىق جەتەكشىلىكتى كۇشەيتىپ، اۋىل شارۋاشىلىق ماتەريالدارىمەن قامداۋدى ويداعىداي يگەرىپ، كوپ ءتۇرلى شارانى قاتار قولدانىپ، جاقسى ءونىم الۋعا شىنايى كەپىلدىك ەتۋ كەرەك.
لي چياڭ فۋجياننىڭ، جياڭشيدىڭ ەكونوميكالىق، قوعامدىق دامۋ جەتىستىكتەرىن تولىق تۇراقتاندىرىپ، ەكى ولكەنىڭ باس شۋجي شي جينپيڭنىڭ ماڭىزدى نۇسقاۋىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، قايراتتانا العا ۇمتىلىپ، قىزمەتتى تىڭعىلىقتى ىستەپ، ساپالى دامۋدى ىلگەرىلەتۋ، ساپالى تۇرمىس جاراتۋ جاعىندا تىڭ دا اناعۇرلىم زور تابىستارعا قول جەتكىزۋىن ءۇمىت ەتتى.
ۋ جىڭلۇڭ تەكسەرۋ - زەرتتەۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
