شي جينپيڭ دومينيكانىڭ زۇڭليى يسكەرريتپەن كەزدەستى
2024.03.26 16:16 كەلۋ قاينارى : حالىق تورابى
3 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن دومينيكانىڭ زۇڭليى يسكەرريتپەن كەزدەستى. سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن
شينحۋا اگەنتتىگى، 3 – ايدىڭ 25 – كۇنى، بەيجيڭ (ءتىلشى ليۋ حۋا). 3 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن دومينيكانىڭ زۇڭليى يسكەرريتپەن كەزدەستى.
شي جينپيڭ بىلاي دەپ اتاپ كورسەتتى: دومينيكا − كارايب وڭىرىندەگى ماڭىزدى مەملەكەت ءارى جۇڭگونىڭ وسى وڭىردەگى سەنىمدى جاقسى دوسى، جاقسى سەرىگى. ديپلوماتيالىق قارىم - قاتىناس ورناتقان 20 جىلدان بەرى جۇڭگو مەن دومينيكا باستان - اياق ءوزارا قۇرمەت ەتىپ، تەڭ تۇرعىدا مامىلە جاساپ، ساياسي ءوزارا سەنىمدىلىكتى ۇزدىكسىز كۇشەيتىپ، ءار سالاداعى اۋىس - كۇيىسى مەن سەلبەستىگى قارىشتاپ دامىپ، حالىقتار دوستىعى كۇن سايىن تەرەڭدەپ، ەكى ەل قارىم - قاتىناسى وڭتۇستىك - وڭتۇستىك سەلبەستىگىنىڭ ۇلگىسىنە اينالدى. جۇڭگو جاق دومينيكانىڭ باستان - اياق جۇڭگومەن دوس بولۋدا تاباندى بولعانىن القايدى، دومينيكامەن بىرگە وتكەن 20 جىلداعى ەكى ەل قارىم - قاتىناسى دامۋىنىڭ تابىستى تاجىريبەلەرىن قورىتىندىلاپ، دامۋ ستراتەگياسىن پارمەندى ۇشتاستىرىپ، دوستىق قارىم - قاتىناستى سەلبەسىپ تەڭ يگىلىككە كەنەلۋدىڭ قوزعاۋشى كۇشىنە اينالدىرىپ، جۇڭگو مەن دومينيكا قارىم - قاتىناسىندا اناعۇرلىم مول تابىستارعا قول جەتكىزىپ، ەكى ەل حالىقتارىنا ءتىپتى دە زور باقىت جاراتۋدى قالايدى.
شي جينپيڭ بىلاي دەپ دارىپتەدى: جۇڭگو -دومينيكا قارىم - قاتىناسىنىڭ ءساتتى دامۋىنىڭ تەتىگى ەكى ەلدىڭ جوعارى دەڭگەيدەگى ساياسي ءوزارا سەنىمدىلىگىندە، ءبىر - ءبىرىنىڭ وزەكتى مۇددەسىنە ساياتىن جانە ءجىتى قاداعالاپ وتىرعان كەلەلى ماسەلەلەردە ءوزارا تۇسىنىسۋىندە جانە ءبىرىن - ءبىرى قولداپ - قۋاتتاۋىندا. جۇڭگو جاق دومينيكا حالقىنىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، دومينيكامەن دوستىق بارىس - كەلىستى جيىلەتىپ، ەل باسقارۋ تاجىريبەلەرىندە اۋىس - كۇيىستى كۇشەيتۋدى قالايدى. دومينيكانىڭ جۇڭگو ۇلگىسىندەگى وسىزامانداندىرۋدىڭ دامۋ قارقىنىنا ىلەسىپ، ەكى ەلدىڭ ەكونوميكا - ساۋدا، نەگىزدىك قۇرىلعى قۇرىلىسى، اۋىل شارۋاشىلىعى، ەمدەۋ - دەنساۋلىق ساقتاۋ سياقتى سالالارداعى سەلبەستىگىن كەڭەيتۋىن قارسى الامىز. جۇڭگو جاق دومينيكانىڭ ەكونوميكالىق، قوعامدىق دامۋىنا شاماسىنىڭ جەتىسىنشە ۇزدىكسىز كومەك بەرۋدى قالايدى. جۇڭگو جاق دومينيكامەن گۋمانيتارلىق اۋىس - كۇيىستى كەڭەيتۋدى قالايدى، اناعۇرلىم كوپ دومينيكا وقۋشىلارىنىڭ جۇڭگوعا كەلىپ ءبىلىم الۋىن قارسى الامىز، دومينيكاعا وقۋ سيلىق قاراجاتىن بەرۋ جانە تاربيەلەۋ سياقتى ورايلاردى ۇزدىكسىز جاراتامىز. ەكى جاق دومينيكا مەملەكەتتىك داشۋەسىندە كۇڭزى ساباعىن بىرگە ويداعىداي اشىپ، كاسىپتىك تەحنيكالىق تاربيەلەۋ سەلبەستىگىن كوبىرەك ورىستەتۋ جونىندە ىزدەنىس جاساۋى كەرەك.
شي جينپيڭ بىلاي دەپ دارىپتەدى: جۇڭگو دۇنيە ءجۇزىنىڭ تەڭ، ءتارتىپتى كوپ ۇيەكتەنۋىن جانە جالپىعا ءتيىمدى، سيىسىمدى ەكونوميكانىڭ جاھاندانۋىن دارىپتەيدى، مەملەكەتتەردى ۇلكەن - كىشى، كۇشتى - ءالسىز دەپ بولمەۋدى قۋاتتايدى، بۇنىڭ بارلىعى − حالىقارالىق قوعامنىڭ تەرەزەسى تەڭ مۇشەسى. جۇڭگو جاق شاعىن ارالداعى وركەندەپ كەلە جاتقان ەلدەردىڭ كليمات وزگەرىسى سالاسىنداعى كوڭىل ءبولۋ تۇيىندەرى مەن تالابىنا ءمان بەرەدى، دومينيكانىڭ حالىقارالىق جانە وڭىرلىك ىستەردە بەلسەندى رولىن ساۋلەلەندىرۋىن قولدايدى، دومينيكامەن سايكەسۋدى كۇشەيتىپ، وڭتۇستىك - وڭتۇستىك سەلبەستىگىن تەرەڭدەتىپ، وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. جۇڭگو جاق كارايب ەلدەرىمەن قارىم - قاتىناسىنا ايرىقشا ءمان بەرەدى، دومينيكانىڭ كارايب ورتاق تۇلعاسىنىڭ كەزەكتى ءتوراعاسى مىندەتىن وتەگەن كەزىندە جۇڭگو مەن كارايب ءوڭىرىنىڭ سەلبەستىگىن ىلگەرىلەتۋدە ماڭىزدى رول اتقارعانىن القايدى، كارايب وڭىرىندەگى ەلدەردىڭ مەملەكەتتى گۇلدەندىرۋ، دامۋعا تالپىنۋ، حالىقتىڭ ىرىس – قۇتىن ارتتىرۋ ىستەرىنە ۇزدىكسىز قولداۋ كورسەتۋدى قالايدى.
يسكەرريت مىنالاردى ءبىلدىردى: 20 جىلدىڭ الدىندا جۇڭگومەن ديپلوماتيالىق قارىم - قاتىناس ورناتۋ جونىندە دۇرىس شەشىم جاساعان ەدىم، دومينيكا مەن جۇڭگونىڭ ديپلوماتيالىق قارىم - قاتىناس ورناتقانىنىڭ 20 جىلدىعىن قۇتتىقتاۋ قارساڭىندا جۇڭگوعا تاعى دا ساپارلاي كەلگەنىمە وتە قۋانىشتىمىن. دومينيكا – جۇڭگو- قارىم - قاتىناسى ءوزارا سەنىمدىلىكتى، ءوزارا قۇرمەتتەۋدى، ءوزارا قولداۋدى نەگىز ەتەدى. 20 جىلدان بەرى دومينيكا - جۇڭگو قارىم - قاتىناسىنىڭ مازمۇنى ۇزدىكسىز بايىدى، تابىسى توتەنشە مول بولدى. جۇڭگو ۇلى مەملەكەت رەتىندە كەدەيلەردى سۇيەمەلدەۋ، دامۋ سياقتى سالالاردا دۇنيەنى جالت قاراتقان تابىستارعا قول جەتكىزىپ قانا قويماي، دومينيكا سياقتى لاتىن امەريكاسى ەلدەرى مەن دۇنيە ءجۇزىنىڭ بەيبىتشىلىگى مەن دامۋىنا ماڭىزدى ۇلەس قوستى. جۇڭگو جاقتىڭ دومينيكا حالقىنىڭ جاراتىلىستىق اپات پەن جاڭا تيپتى ايدارشا ۆيرۋس وكپە قابىنۋ ىندەتىنە تاپ بولعان كەزدە باستان - اياق باتىل تۇردە دومينيكا حالقىمەن بىرگە بولىپ، دەر كەزىندە قاستەرلى كومەك بەرىپ، قولداۋ كورسەتكەنىنە العىس ايتامىن. جۇڭگونىڭ قولداۋى مەن سەلبەستىگىن دومينيكا ەلىنىڭ كەز كەلگەن جەرىنەن بايقاۋعا بولادى، بۇل دومينيكانىڭ تاۋەلسىزدىگى مەن دامۋىن قورعاۋىنا بارىنشا دەم بەردى. دومينيكا جاق ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن جەلىلەس دۇنيە جۇزىلىك باستامالارىن ايرىقشا القايدى جانە وعان سۇيىنەدى، بۇل قازىرگى دۇنيە جۇزىندە ىنتىماقتى، سەلبەستىكتى كۇشەيتۋ، دامۋدى، گۇلدەنۋدى بىرگە جەبەۋ جونىنەن توتەنشە ماڭىزدى. دومينيكا جاق ءبىر جۇڭگو پرينسيبىندە تاباندى بولادى، جۇڭگونىڭ بۇكىلدەي بىرلىككە كەلۋ جولىنداعى ادىلەتتى ىستەرىن قولدايدى، جۇڭگونىڭ ىشكى ىسىنە كيلىگەتىن ءارقانداي ارەكەتكە قارسى تۇرادى. دومينيكا جاق جۇڭگو جاقپەن ستراتەگيالىق بايلانىستى كۇشەيتىپ، حالىقتار دوستىعىن تەرەڭدەتىپ، جان - جاقتى سەلبەستىكتى كۇشەيتىپ، جان - جاقتى ستراتەگيالىق سەرىك بولىپ، دومينيكا - جۇڭگو قارىم - قاتىناسىن اناعۇرلىم جوعارى دەڭگەيگە كوتەرۋدى قالايدى. دومينيكا كارايب ەلدەرىنىڭ جۇڭگومەن قاتىناسىن دامىتۋدا ۇزدىكسىز بەلسەندى رول اتقارۋىن قالايدى. دومينيكا جاق جۇڭگو جاقپەن حالىقارالىق ىستەردەگى كەڭەسۋدى، سايكەسۋدى جيىلەتىپ، جەلىلەس دۇنيە جۇزىلىك باستامالاردى بەلسەنە تياناقتاندىرىپ، حالىقارالىق تەڭدىك پەن ادىلدىكتى بىرگە قورعاپ، دۇنيە ءجۇزىنىڭ بەيبىتشىلىگى مەن دامۋىن جەبەۋگە بەلسەندى ۇلەس قوسۋدى ءۇمىت ەتەدى.
ۋاڭ ي كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
