مەملەكەتتىك حالىق قۇرىلتايى تۇراقتى كوميتەتى اۋىل شارۋاشىلىعى زاڭىنىڭ اتقارىلۋى جونىندە تەكسەرۋ جۇرگىزەدى
2024.04.16 14:05 كەلۋ قاينارى : حالىق تورابى
حالىق گازەتىنىڭ 4 – ايدىڭ 15 – كۇنى بەيجيڭنەن بەرگەن حابارى. اۋىل شارۋاشىلىعى زاڭىنىڭ جالپى بەتتىك ءونىمدى اتقارىلۋىن ىلگەرىلەتۋ، اۋىل شارۋاشىلىعىندا قۇدىرەتتى مەملەكەت قۇرۋدى جەدەلدەتۋ، اۋىل شارۋاشىلىعى جانە اۋىل – قىستاقتى وسىزامانداندىرۋدى جەدەلدەتۋ ءۇشىن، مەملەكەتتىك حالىق قۇرىلتايى تۇراقتى كوميتەتى 4 – ايدىڭ 15 – كۇنى اۋىل شارۋاشىلىعى زاڭىنىڭ اتقارىلۋى جونىندە تەكسەرۋ جۇرگىزۋدى رەسمي باستاعان.
اۋىل شارۋاشىلىعى زاڭى — ەلىمىزدەگى اۋىل شارۋاشىلىعى مەن اۋىل – قىستاق ەكونوميكاسى جاعىنداعى نەگىزدىك زاڭ، 1993 – جىلى 7 – ايدا ماقۇلدانعان، 2002 – جىلى 12 – ايدا وزگەرىس ەنگىزىلگەن ءارى 2003 – جىلى 3 – ايدان باستاپ اتقارىلعان، وسىدان سوڭ جەكە – جەكە 2009 – جىلى جانە 2012 – جىلى ەكى رەت وزگەرىس ەنگىزىلگەن. ءتىلشىنىڭ 4 – ايدىڭ 15 – كۇنى مەملەكەتتىك حالىق قۇرىلتايى تۇراقتى كوميتەتىنىڭ اۋىل شارۋاشىلىعى زاڭىنىڭ اتقارىلۋىن تەكسەرۋ گرۋپپاسىنىڭ 1 – رەتكى جالپى ماجىلىسىنەن ۇعىسۋىنشا، وسى رەتكى زاڭ اتقارۋ جونىندە تەكسەرۋ جۇرگىزۋ قىزمەتى بارىسىندا زاڭنىڭ اتقارىلۋى جونىندە تەكسەرۋ جۇرگىزۋ گرۋپپاسى جەرگىلىكتى ورىندارعا بارىپ، سول جەردىڭ وزىندە تەكسەرۋ جۇرگىزۋ مەن ولكە دارەجەلى حالىق قۇرىلتايى تۇراقتى كوميتەتىنە مىندەتتەۋ ارقىلى تەكسەرۋدى ۇشتاستىرۋ ءتاسىلىن قولدانادى. زاڭنىڭ اتقارىلۋىنا تەكسەرۋ جۇرگىزۋ گرۋپپاسى 4 – ايدان 7 – ايعا دەيىن جياڭسۋ، انحۇي، چۇڭچيڭ، سىچۋان، يۇننان، شينجياڭ قاتارلى 6 ولكەگە (اۆتونوميالى رايون، توتە قاراستى قالا) بارىپ، سول جەردە تەكسەرۋ جۇرگىزەدى. تيانجين، سانشي، ىشكى موڭعۇل، شاندۇڭ، حىنان، حۋبەي قاتارلى 6 ولكەدەگى (اۆتونوميالى رايون، توتە قاراستى قالا) حالىق قۇرىلتايى تۇراقتى كوميتەتىنە اۋىل شارۋاشىلىعى زاڭىنىڭ سول اكىمشىلىك وڭىردەگى اتقارىلۋ جاعدايىنا ءبىر ۋاقىتتا تەكسەرۋ جۇرگىزۋدى مىندەتتەيدى.
ۇعىسۋعا قاراعاندا، وسى رەتكى زاڭنىڭ اتقارىلۋىنا تەكسەرۋ جۇرگىزۋ قىزمەتى بارىسىندا ءتۇيىندى تۇردە مىناداي 8 جاقتاعى مازمۇنعا تەكسەرۋ جۇرگىزىلەدى: ەگىستىك جەردى قورعاۋ قۇرىلىسىن كۇشەيتىپ، مەملەكەتتىڭ استىق حاۋىپسىزدىگى مەن ماڭىزدى اۋىل شارۋاشىلىعى ونىمدەرىمەن ورنىقتى دا حاۋىپسىز قامداۋ جاعدايى؛ اۋىل شارۋاشىلىعى ءوندىرىس جانە تيجارات جۇيەسىن كەمەلدەندىرىپ، شاعىن كولەمدى ەگىنشىلىكپەن شۇعىلداناتىن ديقاندار مەن وسىزامانعى اۋىل شارۋاشىلىعىن دامىتۋدى ورگانيكالى ۇشتاستىرۋ جاعدايى؛ تۇقىمشىلىق كاسىبىنىڭ گۇلدەنۋىن ىلگەرىلەتىپ، اۋىل شارۋاشىلىعى سالاسىنداعى عىلىم – تەحنيكالىق جابدىقتاردىڭ تىرەكتىك رول اتقارۋىن كۇشەيتۋ جاعدايى؛ اۋىل شارۋاشىلىعى بايلىق قاينارىن قورعاپ، اۋىل شارۋاشىلىعىن جانە اۋىل – قىستاقتى جاسىل، تومەن كومىرتەكتى دامۋدى ىلگەرىلەتۋ جاعدايى؛ اۋىل شارۋاشىلىعىنا قوسىلىمدى ارتتىرىپ، اۋىل شارۋاشىلىعىنا قولداۋ كورسەتۋ جانە ونى قورعاۋ جاعىنداعى تۇزىمدەردى كەمەلدەندىرۋ جاعدايى؛ ديقانداردىڭ ۇقىق – مۇددەسىن قورعاپ، ديقانداردىڭ كىرىسىنىڭ ورنىقتى ارتۋىن ىلگەرىلەتۋ جاعدايى؛ زاڭدى اتقارۋ بارىسىندا ساقتالعان باستى ماسەلەلەردى توڭىرەكتەي وتىرىپ، اۋىل شارۋاشىلىعى زاڭىن اناعۇرلىم دايەكتى تياناقتاندىرۋعا ۇسىنىس جانە پىكىر بەرۋ؛ اۋىل شارۋاشىلعى زاڭىنا وزگەرىس ەنگىزۋ، كەمەلدەندىرۋ جونىندە پىكىر جانە ۇسىنىس بەرۋ، سونداي – اق، اۋىل شارۋاشىلىعىنا ساياتىن زاڭمەن جونگە سالۋ قۇرىلىسىن كۇشەيتۋ جونىندە پىكىر جانە ۇسىنىس بەرۋ.
زاڭنىڭ اتقارىلۋىنا تەكسەرۋ جۇرگىزۋ گرۋپپاسى 7 – ايدىڭ سوڭىندا، 2 – رەتكى جالپى ءماجىلىسىن اشىپ، زاڭنىڭ اتقارىلۋىنا تەكسەرۋ جۇرگىزۋ قىزمەتى جونىندە قورىتىندى جاساپ، زاڭنىڭ اتقارىلۋىنا تەكسەرۋ جۇرگىزۋ مالىمەتىن زەرتتەيدى جانە تالقىلايدى، تالقىلاۋ بارىسىنداعى پىكىرلەرگە نەگىزدەلە وتىرىپ، زاڭنىڭ اتقارىلۋىنا تەكسەرۋ جۇرگىزۋ مالىمەتىنە وزگەرىس ەنگىزىپ، ونى كەمەلدەندىرەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
