لي چياڭ، جاۋ لىجي ميكرونەزيا فەدەراتسياسىنىڭ زۇڭتۇڭى سيمينامەن جەكە - جەكە كەزدەستى
2024.04.11 16:57 كەلۋ قاينارى : حالىق تورابى
شينحۋا اگەنتتىگى، 4 - ايدىڭ 10 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 4 - ايدىڭ 10 - كۇنى تۇستەن بۇرىن بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ميكرونەزيا فەدەراتسياسىنىڭ زۇڭتۇڭى سيمينامەن كەزدەستى.
لي چياڭ مىنانى ءبىلدىردى: جۇڭگو ميكرونەزيا فەدەراتسياسىمەن ديپلوماتيالىق قارىم - قاتىناس ورناتقان 35 جىلدان بەرى ەكى ەل قارىم - قاتىناسى باياندى دامىدى، جۇڭگو مەن ميكرونەزيانىڭ دوستىعى ۇزاق ۋاقىتتان بەرى بەكەمدەلىپ، سەلبەستىكتە سۇبەلى تابىستارعا قول جەتكىزدى. كەشە ءتوراعا شي جينپيڭ زۇڭتۇڭ مىرزامەن كەڭەس وتكىزىپ، ەكى ەل قارىم - قاتىناسى دامۋىنىڭ جاڭا جوباسىن بىرگە جاسادى. جۇڭگو جاق ميكرونەزيا جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن ستراتەگيالىق جەتەكشى ەتىپ، ءداستۇرلى دوستىقتى ساۋلەلەندىرىپ، ساياسي سەنىمدىلىكتى تەرەڭدەتىپ، ءوزارا ءتيىمدى سەلبەستىكتى كەڭەيتىپ، جۇڭگو مەن ميكرونەزيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتىپ، ەكى ەل حالىقتارىن اناعۇرلىم ويداعىداي يگىلىككە كەنەلتۋدى قالايدى.
لي چياڭ بىلاي دەپ اتاپ كورسەتتى: جۇڭگو جاق ميكرونەزيا جاقتىڭ يەلىگىن ۇقىعىن، تاۋەلسىزدىگىن، مەملەكەتتىڭ ىنتىماعىن، تەرريتوريا تۇتاستىعىن قورعاۋىن، ءوز مەملەكەتىنىڭ جاعدايىنا ۇيلەسەتىن دامۋ جولى ۇستىندە ىزدەنۋىن دايەكتى قولدايدى، ميكرونەزيامەن دامۋ ستىراتەگياسىن ۇشتاستىرۋدى كۇشەيتىپ، سەلبەسىپ ”ءبىر بەلدەۋ، ءبىر جولدى“ ساپالى قۇرۋ جۇلگەسىندە نەگىزدىك قۇرىلعى قۇرىلىسى، ەگىنشىلىك، بالىقشىلىق، ەمدەۋ – دەنساۋلىق ساقتاۋ سياقتى سالالارداعى سەلبەستىكتى تىڭعىلىقتى ىلگەرىلەتىپ، وقۋ - اعارتۋ، تاربيەلەۋ، مادەنيەت، ساياحات سياقتى گۋمانيتارلىق اۋىس - كۇيىستى تەرەڭدەتىپ، سەلبەسىپ تەڭ يگىلىككە كەنەلۋدى اناعۇرلىم ويداعىداي جۇزەگە اسىرۋدى قالايدى. جۇڭگو جاق ميكرونەزيا جاقپەن بىرگە كليمات وزگەرىسى سياقتى دۇنيە جۇزىلىك سايىستارعا قول ۇستاسا توتەپ بەرىپ، حالىقارالىق جانە وڭىرلىك ىستەردەگى سايكەسۋدى، سەلبەسۋدى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
سيمينا مىنانى ءبىلدىردى: ميكرونەزيا مەن جۇڭگو − شىنايى دوستار. ميكرونەزيا جاق جۇڭگو جاقتىڭ ميكرونەزيانىڭ ەكونوميكالىق، قوعامدىق دامۋىن زور كۇشپەن قولداعانىنا العىس ايتادى، جۇڭگو جاقتىڭ ۇلكەندى - كىشىلى ەلدەردىڭ تۇگەلدەي تەرەزەسى تەڭ بولۋدا تاباندى بولىپ، بەيبىت دامۋ جولىمەن بۇلجىماي جۇرگەنىن جوعارى باعالايدى، جۇڭگونىڭ دامۋى ءوزىن دە، دۇنيە ءجۇزىن دە يگىلىككە كەنەلتەدى. ميكرونەزيا جاق ءبىر جۇڭگو پرينسيبىندە تاباندى بولادى، جۇڭگو جاقتىڭ ءوزىنىڭ وزەكتى مۇددەسىن قورعاۋىن باتىل قولدايدى. ميكرونەزيا جاق ادامزاتتىڭ تاعدىرلاس ورتاق تۇلعاسىن قۇرۋدى قۇپتايدى، جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋ جۇلگەسىندە اۋىل شارۋاشىلىعى، بالىقشىلىق، ساۋدا، قارجى قوسۋ، ەمدەۋ، دەنە تاربيە سياقتى سالالارداعى سەلبەستىكتى كۇشەيتىپ، كليمات وزگەرىسىنە قول ۇستاسا توتەپ بەرىپ، ەكى ەل حالىقتارىن باقىتقا كەنەلتىپ، دۇنيە ءجۇزىنىڭ بەيبىتشىلىگى مەن دامۋ ىستەرىنە بەلسەندى ۇلەس قوسۋدى قالايدى.
ۋ جىڭلۇڭ كەزدەسۋدە بىرگە بولدى.
شينحۋا اگەنتتىگى، 4 - ايدىڭ 10 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 4 - ايدىڭ 10 - كۇنى بەيجيڭدە ميكرونەزيا فەدەراتسياسىنىڭ زۇڭتۇڭى سيمينامەن كەزدەستى.
جاۋ لىجي مىنانى ءبىلدىردى: ءتوراعا شي جينپيڭ كەشە زۇڭتۇڭ مىرزامەن ماڭىزدى كەڭەس وتكىزىپ، ەكى ەل قارىم - قاتىناسىنىڭ دامۋىنا جوبا جاسادى. جۇڭگو جاق ميكرونەزيا جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، جۇڭگو مەن ميكرونەزيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز تولىقتاۋدى قالايدى. جۇڭگو مەملەكەتتىك حالىق قۇرىلتايى ميكرونەزيا فەدەراتسيالىق پارلامەنتىمەن دوستىق بارىس - كەلىستى كۇشەيتىپ، ەكى ەلدىڭ ناقتى سەلبەستىگىن زاڭدىق كەپىلمەن قامداۋدى قالايدى. جۇڭگو مەن ميكرونەزيا − ”دۇنيە ءجۇزىنىڭ وڭتۇستىگىندەگى“ ەلدەر، جۇڭگو ميكرونەزيانى قامتىعان تىنىق مۇحيتتاعى ارال ەلدەرىمەن ادالدىقپەن ءوزارا ءتۇسىنىسىپ، ءوزارا قۇرمەت ەتىپ، جۇرەكتەس بولىپ، اناعۇرلىم تىعىز جۇڭگو مەن تىنىق مۇحيتتاعى ارال ەلدەرىنىڭ تاعدىرلاس ورتاق تۇلعاسىن بىرگە قۇرۋدى قالايدى.
سيمينا مىنانى ءبىلدىردى: ميكرونەزيا جاق ءبىر جۇڭگو پرينسيبىندە تاباندى بولىپ، ءتوراعا شي جينپيڭ العا قويعان جەلىلەس دۇنيە جۇزىلىك باستامالاردى جوعارى باعالايدى، جۇڭگو جاقپەن زاڭ شىعارۋ قۇرىلىمدارىنىڭ بارىس - كەلىسىن تەرەڭدەتىپ، ءار سالاداعى ناقتى سەلبەستىكتى كۇشەيتىپ، ەكى ەلدىڭ ءوزارا قۇرمەت ەتەتىن، بىرگە داميتىن جالپى بەتتىك ستراتەگيالىق سەرىكتەستىك قارىم - قاتىناسىنىڭ دامۋىنا تىڭ قوزعاۋشى كۇش قوسۋدى قالايدى.
لوساڭ جياڭسۇن كەزدەسۋدە بىرگە بولدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
