- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
بىردە-ءبىر وقىرماندى كەزدەستىرە الماعانىما، راسىندا قىنجىلدىم
2014.02.21 13:40 كەلۋ قاينارى : شينجياڭ حالىق راديو ستانسياسى تورابى
مىناۋ باسەكەلى زامانداعى ءار كىمنىڭ بيىكتىگى مەن بىلىكتىلىگىنىڭ بەلگىسىندەي بولعان «مادەنيەت» اتاۋى تۋرالى توقتالعانىمىزدا، ءبارىمىزدىڭ ويىمىزعا ورالار دۇنيەنىڭ ءبىرى ــــ كىتاپ دەسەك اعات ايتقان بولماسپىز. عۇلامالاردىڭ قايسىءبىرىنىڭ سۋسىندار بۇلاعى، وي قورىتار ورتاسى، تىڭ تابىسقا جەتكىزگەن داڭعىل جولى كىتاپ بولمادى دەرسىز. حالىقتىق قازىنانى قاينار ەتىپ، عاسىردىڭ قۇپياسىن قوينىنا جيعان كىتاپتىڭ قادىر-قاسيەتىن باعامداي بىلەتىندەر قانشاما!
مەن كىتاپتى شاكىرت تالعامايتىن، اقى دامەتپەيتىن، تەك ءوزىن پاراقتاعان ءار قانداي ادامنىڭ ساناسىنا ساۋلە شاشىپ، كوڭىل كوزىن اشاتىن ەڭ ادىلەتتى ۇستاز دەپ بىلەتىن كىتاپقا دەگەن قۇرمەتى مەن سۇيىسپەنشىلىگى شەكسىز ادال وقىرمانداردىڭ ءبىرى ەدىم. سوندىقتان بولار جولىم بولىپ ورتالىق ـــ قالا ۇرىمجىگە كەلە قالعان كەزدەرىمدە مادەنيەتتىڭ وشاعى بولعان وسى قالانىڭ يان-ءان كوشەسىندەگى «شينحۋا كىتاپ دۇكەنىنە» باس سۇقپاي كەتپەيتىنمىن.
بۇگىن دە سول داعدىم بويىنشا قولىمداعى سومكامدى كىتاپ دۇكەننىڭ كىرە بەرىسىندەگى ساقتاۋ شكابىنا سالىپ قويۋ ءۇشىن كەزەك كۇتىپ تۇرمىن. قىستىق دەمالىس كەزى ءارى كۇنگە جەكسەنبى بولعاندىقتان بولار، كىتاپحاناعا كەلىپ-كەتىپ جاتقان ۇلكەندى-كىشىلى وقىرماندار از ەمەس ەكەن. سول كوپتىڭ قاتارىندا مەن دە ىشكە كىرىپ، ەكىنشى قاباتتاعى وزىمە تانىس بۇرىشقا بەتتەدىم. شىعا بەرىستەگى ۇيعۇرشا كىتاپتار تىزىلگەن بىرنەشە قاتار سورەنىڭ الدى تۇگەلدەي تىكەسىنەن تىك تۇرىپ، ءوزى قالاعان كىتابىنا ۇڭىلگەن وقىرماندارعا تولىپتى. ولاردىڭ اراسىنان ءوتىپ ءبىرىڭعاي قازاق تىلىندەگى كتاپتار ءتىزىلىپ، ەكى قاتار ەتىپ قويىلعان ون نەشە بولىك كىتاپ سورەسىنە جاقىنداعان سايىن كوڭىلىم قۇلازىپ، وي الەمىم استاڭ-كەستەڭ بولدى. وسى رەت ۇرىمجىگە كەلگەندەگى ويعا العان جۇمىسىمنىڭ كەزەگىن كۇتىپ ۇزاعىراق تۇرىپ قالعان ورايىمدا جاقىننان بەرى كىتاپحاناعا بىرنەشە رەت باس سۇققان ەدىم. كەلگەن سايىن قاڭىراپ بوس تۇرعان ورىندار مەن شاڭ باسىپ قوزعالماي تۇرعان كىتاپتارعا قاراپ؛ «قالاداعى ادامداردىڭ ءبارى ساعاتقا قاراپ جۇمىس ىستەيدى-عوي، بالكىم كىتاپحاناعا تەك سەنبى-جەكسەنبى كۇندەرى عانا كەلەتىن شىعار دەپ»،-دەپ ءوزىمدى-ءوزىم جۇباتقان ەدىم. ءبىراق الداعى ەكى كۇننەن پارىقسىز بولعان جەكسەنبى كۇنگى مىنا جاعداي دا مەنى قالىڭ ويعا سالدى.
وركەنيەتتىڭ وشاعىنا اينالعان وسىناۋ ءنان قالانىڭ قايناعان بازارلارى مەن ساۋدا سارايلارىنان، سايران سارايلارى مەن كلوپتاردان ەكىنىڭ بىرىندە ۇشىراسا قالاتىن اعايىندارىمىزدىڭ بىردە-ءبىرىنىڭ وسى قاستەرلى ورتاعا ات باسىن بۇرماعانىنا ءسىرا قانداي سەبەپ ايتارمىز.
جاڭا عانا كەلىپ، مەن تۇرعان سورەنىڭ قارسىسىنداعى كىتاپتارعا ۇڭىلە قالعان ايەلدىڭ قول تەلەفوندا سويلەگەن جاعىمسىز داۋىسى مەنى ەرىكسىز وزىنە قاراتتى.
-ەي، الگى اعاڭنىڭ تاپسىرعان كىتابى جيىرما نەشە يۋان ەكەن، المايمىن. جاڭا ۇعىستىم، سول اۋداننىڭ كىتاپ دۇكەنىندە دە بار ەكەن، ءوزى ساتىپ السىن. تۇسكى تاماقتارىڭدى وزدەرىڭ ىشە بەرىڭدەر، مەن تۇستە ءبىر شايعا باراتىن بولىپ قالدىم.
تومەنگە تۇسەر باسپالداققا بۇرىلعان ايەلدىڭ قاراسى كوزدەن عايىپ بولسا دا، تاق-تاق باسقان اياق دىبىسى، بۇيرىق بەرە ايتىلعان ءزىلدى داۋىسى ءالى انىق ەستىلىپ بارادى. مەن قولىمداعى كىتاپقا قايتا نازار اۋداردىم. قاڭتاردىڭ قىسقا كۇنى تۇسكە تاقاپ قالعانىن وقىرمانداردىڭ سيرەي باستاعانى انىق اڭعارتىپ تۇر.
-مىنا جەرگە كىتاپ وقىعاندار وتىراتىن ورىندىق قويسا بولادى ەكەن،-دەگەن داۋىسقا باسىمدى كوتەرسەم، دەمبەلشە كەلگەن ەر ادام قولىن ارتىنا ۇستاعان بەتى كىتاپ سورەلەرىنە ناراۋ كوز جۇگىرتىپ تۇر ەكەن. ول مەنىڭ وزىنە نازار اۋدارعانىمدى ءبىلدى دە:
-كىتاپ دۇكەنىندە بىلايعا كىتاپ وقۋدا اڭگىمە عوي،-دەدى. مەن ودان:
-قايسى كىتاپتى وقىماقشى ەدىڭىز؟-دەدىم ادەيى.
-كىتاپ وقيتىنداي مۇرسات بولماي تۇر عوي. وسى ماڭدا قىزمەت ىستەيتىن ءبىزدىڭ اۋىلدان كەلگەن ءبىر ازامات بار ەدى، سونىمەن ءبىر جەردە كەزىگۋگە ۋادەلەسىپ قويىپ ەدىك. «قولىمداعى جۇمىسىمدى ءبىتىرىپ الايىن، جارىم ساعات توسا تۇرىڭىز»،-دەگەن سوڭ وسىندا باس سۇققانىم عوي.
مەن قايتا كىتاپقا ءۇڭىلدىم. شاي قايناتىمنان كەيىن كىتاپحانادا ەمەس، قابىرعا سۋرەت كورمەسىن تاماشالاعانداي ەكى قولىن ارتىنا ۇستاعان بەتى جاعالاي كوز قىدىرتىپ تۇرعان الگى ادام سايراي جونەلگەن قولتەلەفونىن الدى دا اسىعىس شىعىپ كەتتى. ءار كىمنىڭ ءار قالاي سەبەبى بار شىعار. دەسەدە، رايونىمىز ورتالىعىنداعى ايتۋلى شينحۋا كىتاپحاناسىنا ون كۇننىڭ ىشىندە ءۇش رەت كەلگەنىمدە دە شىن پەيىلمەن باس سۇققان بىردە-ءبىر قانداس وقىرماندى كەزدەستىرە الماعانىما، راسىندا قىنجىلدىم.
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
نازار سالا كەتەرسىز
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
