مەملەكەتتىك عىلىم - تەحنيكا جينالىسى، مەملەكەتتىك عىلىم - تەحنيكا سيلىعى جينالىسى، ەكى اكادەميا اكادەميكتەرىنىڭ جينالىسى بەيجيڭدە اشىلدى

لي چياڭ باسقاردى، ديڭ شۋەشياڭ سيلاۋ قارارىن جاريالادى، جاۋ لىجي، ۋاڭ حۋنيڭ، ساي چي، لي شي قاتىناستى

6 - ايدىڭ 24 - كۇنى مەملەكەتتىك عىلىم - تەحنيكا جينالىسى، مەملەكەتتىك عىلىم - تەحنيكا سيلىعى جينالىسى جانە جۇڭگو عىلىم اكادەمياسىنىڭ 21 - رەتكى اكادەميكتەر جينالىسى، جۇڭگو ينجەنەريالىق عىلىمدار اكادەمياسىنىڭ 17 - رەتكى اكادەميكتەر جينالىسى بەيجيڭدەگى حالىق سارايىندا سالتاناتپەن اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىسقا قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

6 - ايدىڭ 24 - كۇنى مەملەكەتتىك عىلىم - تەحنيكا جينالىسى، مەملەكەتتىك عىلىم - تەحنيكا سيلىعى جينالىسى جانە جۇڭگو عىلىم اكادەمياسىنىڭ 21 - رەتكى اكادەميكتەر جينالىسى، جۇڭگو ينجەنەريالىق عىلىمدار اكادەمياسىنىڭ 17 - رەتكى اكادەميكتەر جينالىسى بەيجيڭدەگى حالىق سارايىندا سالتاناتپەن اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 2023 - جىلعى مەملەكەتتىك ەڭ جوعارى عىلىم - تەحنيكا سيلىعىنا يە بولعان ۋحان داشۋەسىندەگى لي دىرىن اكادەميككە (وڭدا) جانە چيڭحۋا داشۋەسىندەگى شۋە چيكۇن اكادەميككە (سولدا) سيلىق تاراتتى.

سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن

6 - ايدىڭ 24 - كۇنى مەملەكەتتىك عىلىم - تەحنيكا جينالىسى، مەملەكەتتىك عىلىم - تەحنيكا سيلىعى جينالىسى جانە جۇڭگو عىلىم اكادەمياسىنىڭ 21 - رەتكى اكادەميكتەر جينالىسى، جۇڭگو ينجەنەريالىق عىلىمدار اكادەمياسىنىڭ 17 - رەتكى اكادەميكتەر جينالىسى بەيجيڭدەگى حالىق سارايىندا سالتاناتپەن اشىلدى. شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتارلىلار جينالىسقا قاتىناستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 6 - ايدىڭ 24 - كۇنى، بەيجيڭ. مەملەكەتتىك عىلىم - تەحنيكا جينالىسى، مەملەكەتتىك عىلىم - تەحنيكا سيلىعى جينالىسى جانە جۇڭگو عىلىم اكادەمياسىنىڭ 21 - رەتكى اكادەميكتەر جينالىسى، جۇڭگو ينجەنەريالىق عىلىمدار اكادەمياسىنىڭ 17 - رەتكى اكادەميكتەر جينالىسى 6 - ايدىڭ 24 - كۇنى تۇستەن بۇرىن حالىق سارايىندا سالتاناتپەن اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جينالىسقا قاتىناسىپ، مەملەكەتتىك ەڭ جوعارى عىلىم - تەحنيكا سيلىعىنىڭ يەگەرلەرىنە سيلىق تاراتتى ءارى ماڭىزدى ءسوز سويلەدى (ءسوزدىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار(. ول مىنالاردى باسا دارىپتەدى: عىلىم - تەحنيكا گۇلدەنسە، ۇلت گۇلدەنەدى، عىلىم - تەحنيكا قۇدىرەتتەنسە، مەملەكەت قۇدىرەتتەنەدى. جۇڭگو ۇلگىسىندەگى وسىزامانداندىرۋدى عىلىم - تەحنيكانى وسىزامانداندىرۋعا تىرەك ەتىپ، جوعارى ساپالى دامۋدى جۇزەگە اسىرۋدا عىلىم - تەحنيكادا جاڭالىق اشۋعا سۇيەنىپ جاڭا قوزعاۋشى كۇش جەتىلدىرۋ كەرەك. عىلىم - تەحنيكانىڭ ستراتەگيالىق جەتەكشىلىك ورنى مەن ءتۇبىرلى تىرەكتىك رولىن، ءسوز جوق، جەتە تانىپ، 2035 - جىلى عىلىم - تەحنيكادا قۇدىرەتتى ەل قۇرۋ ستراتەگيالىق نىساناسىن كوزدەپ، جوعارى دەڭگەيدە جوبالاۋ مەن ءبىر تۇتاس جوسپارلاۋدى كۇشەيتىپ، جوعارى دەڭگەيدەگى عىلىم - تەحنيكادا ءوز كۇشىنە سۇيەنىپ ءوزىن الۋەتتەندىرۋدى جەدەل جۇزەگە اسىرۋ كەرەك.

لي چياڭ جينالىستى باسقاردى، ديڭ شۋەشياڭ سيلاۋ قارارىن وقىدى، جاۋ لىجي، ۋاڭ حۋنيڭ، ساي چي، لي شي قاتىناستى.

تۇستەن بۇرىن ساعات 10 دا جينالىس باستالدى. ازاتتىق ارميانىڭ اسكەري وركەسترى «ەرىكتىلەر مارشىن» ورىندادى، بۇكىل زالداعىلار ورىندارىنان تۇرىپ، مەملەكەت گيمنىن اسقاقتاتا شىرقادى.

ديڭ شۋەشياڭ «جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ 2023 - جىلعى مەملەكەتتىك عىلىم - تەحنيكا سيلىعى جونىندەگى قارارىن» وقىدى (قاراردىڭ تولىق مازمۇنىن «حالىق گازەتىنىڭ» 2 – بەتىنەن وقي الاسىزدار(.

سالت كەرنايى كوتەرىلدى، شي جينپيڭ الدىمەن 2023 - جىلعى مەملەكەتتىك ەڭ جوعارى عىلىم - تەحنيكا سيلىعىنا يە بولعان ۋحان داشۋەسىندەگى لي دىرىن اكادەميك پەن چيڭحۋا داشۋەسىندەگى شۋە چيكۇن اكادەميككە مەدال، كۋالىك تاراتىپ، ولارمەن ىستىق ىقىلاسپەن قول الىسىپ، قۇتتىقتايتىنىن ءبىلدىردى. وسىدان كەيىن شي جينپيڭ قاتارلى پارتيا مەن مەملەكەت باسشىلارى ەكى ەڭ جوعارى سيلىقتىڭ يەگەرىمەن بىرگە مەملەكەتتىك جاراتىلىستىق عىلىم سيلىعىنا، مەملەكەتتىك تەحنيكالىق تاپقىرلىق سيلىعىنا، مەملەكەتتىك عىلىم - تەحنيكا العاباسارلىعى سيلىعىنا جانە جۇڭحۋا حالىق رەسپۋبليكاسىنىڭ حالىقارالىق عىلىم - تەحنيكا سەلبەستىك سيلىعىنا يە بولعانداردىڭ ۋاكىلدەرىنە كۋالىك تاراتتى.

قىزۋ قول شاپالاق ءۇنى ىشىندە شي جينپيڭ ماڭىزدى ءسوز سويلەدى. ول بىلاي دەپ اتاپ كورسەتتى: پارتيا 18 - قۇرىلتايىنان بەرى پارتيا ورتالىق كوميتەتى دامۋعا جاڭالىق اشۋ ارقىلى دەم بەرۋ ستراتەگياسىن اتقارۋدى ىشكەرىلەي ىلگەرىلەتىپ، جاڭاشىل مەملەكەت قۇرۋدى جەدەلدەتۋ ستراتەگيالىق مىندەتىن العا قويىپ، عىلىم - تەحنيكا ءتۇزىلىسى رەفورماسىن ۇزدىكسىز تەرەڭدەتىپ، عىلىم - تەحنيكادا ءوز كۇشىنە سۇيەنىپ ءوزىن الۋەتتەندىرۋدى پارمەندى ىلگەرىلەتىپ، ەلىمىزدىڭ نەگىزدىك الدىڭعى لەكتىك زەرتتەۋىندە تىڭ ناتيجە جاراتىپ، ستراتەگيالىق جوعارى تەحنيكا سالاسىندا تىڭ سەكىرىستى قارسى الدى، جاڭالىق اشۋ ارقىلى دەم بەرۋ، جوعارى ساپالى دامۋعا جەتەكشىلىك ەتۋدە تىڭ ناتيجەگە قول جەتكىزدى، عىلىم - تەحنيكا ءتۇزىلىسى رەفورماسىندا جاڭا جاعداي جاراتىلدى، حالىقارالىق ەسىك اشۋ سەلبەستىگىندە تىڭ ىلگەرىلەۋشىلىككە قول جەتتى، عىلىم - تەحنيكا ىستەرىندە تاريحي تابىسقا قول جەتتى، تاريحي وزگەرىس تۋىلدى.

شي جينپيڭ مىنالاردى باسا دارىپتەدى: جاڭا داۋىردەگى عىلىم - تەحنيكا ىستەرىنىڭ دامۋ امالياتىندا ءبىز زاڭدىلىق تانىمىن ۇزدىكسىز تەرەڭدەتىپ، كوپتەگەن ماڭىزدى تاجىريبەلەر توپتادىق، باستىلارى: پارتيانىڭ جاپپاي باسشىلىعىندا تاباندى بولۋ، جۇڭگوشا دەربەس جاڭالىق اشۋ جولىمەن جۇرۋدە تاباندى بولۋ، جاڭالىق اشۋ ارقىلى دامۋعا جەتەكشىلىك ەتۋدە تاباندى بولۋ، ”ءتورتتى بەتكە الۋ“ ستراتەگيالىق بەتالىسىندا تاباندى بولۋ، رەفورمانى تەرەڭدەتۋ ارقىلى جاڭالىق اشۋ ومىرشەڭدىك كۇشىن قاۋلاتۋدا تاباندى بولۋ، وقۋ - اعارتۋ، عىلىم - تەحنيكا دارىندىلارىنىڭ تاماشا اينالىمىن ىلگەرىلەتۋدە، جاڭالىق اشۋ مادەنيەتىن جەتىلدىرۋدە، عىلىم - تەحنيكانى اشىق ۇستاۋدا، سەلبەسۋدە تاباندى بولۋ. بۇل تاجىريبەلەردە، ءسوز جوق، ۇزاق ۋاقىت تاباندى بولۋ ءارى اماليات بارىسىندا ۇزدىكسىز بايىتۋ، دامىتۋ كەرەك.

شي جينپيڭ بىلاي دەپ اتاپ كورسەتتى: دۇنيە جۇزىندە 100 جىلدا بولماعان زور وزگەرىس جەدەل قۇبىلىپ، جاڭا كەزەكتى عىلىم - تەحنيكا توڭكەرىسى مەن كاسىپ وزگەرىسى ىشكەرىلەي دامىپ، دۇنيە جۇزىلىك ءتارتىپ پەن دامۋ ارناسىن ىشكەرىلەي قايتا سومدادى. ەلىمىزدىڭ عىلىم - تەحنيكا ىستەرىنىڭ دامۋىندا ءالى دە كەيبىر ولقىلىقتار مەن ءالسىز بۋىندار ءومىر ءسۇرىپ وتىر، ءسوز جوق، كوكەي تەستىلىك سەزىمدى ونان ارى كۇشەيتىپ، عىلىم - تەحنيكادا جاڭالىق اشۋ تەبىنىن ونان ارى ارتتىرىپ، عىلىم - تەحنيكا باسەكەسى مەن بولاشاق دامۋدىڭ بيىك تۇرعىسىن يەلەۋ كەرەك.

شي جينپيڭ بىلاي دەپ باسا دارىپتەدى: جاڭاشا بۇكىل ەلدىك ءتۇزىلىس باسىمدىعىن تولىق ساۋلەلەندىرىپ، پارتيا ورتالىق كوميتەتىنىڭ عىلىم - تەحنيكا قىزمەتىنە ورتالىقتانعان ءبىر تۇتاس باسشىلىق ءتۇزىلىسىن كەمەلدەندىرىپ، سايكەستى، جوعارى ءونىمدى شەشىم جاساۋعا قولباسشىلىق ەتۋ جۇيەسىن جانە ۇيىمداستىرىپ اتقارۋ جۇيەسىن ورناتۋ كەرەك. بازاردىڭ عىلىم - تەحنيكا بايلىعىن ورنالاستىرۋداعى شەشۋشى رولىن تولىق ساۋلەلەندىرىپ، ۇكىمەتتىڭ رولىن اناعۇرلىم ويداعىداي ساۋلەلەندىرىپ، ءوندىرۋ، وقىتۋ، زەرتتەۋ بۋىندارىنىڭ بەلسەندىلىگىن جۇمىلدىرىپ، شەشۋشى قامال الۋدى بىرگە جەبەيتىن قىزمەت جاعدايىن قالىپتاستىرۋ كەرەك. مەملەكەتتىڭ ستراتەگيالىق عىلىم - تەحنيكا قۋاتى قۇرىلىسىن كۇشەيتىپ، نەگىزدىك زەرتتەۋدىڭ ۇيىمداسۋ دەڭگەيىن جوعارىلاتىپ، ەركىن ىزدەنىس جاساۋعا دەم بەرىپ، عىلىم - تەحنيكادا جاڭالىق اشۋدىڭ نەگىزى مەن ارقاۋىن بەكەمدەۋ كەرەك.

شي جينپيڭ بىلاي دەپ اتاپ كورسەتتى: عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭدەي توعىسۋىن ىلگەرىلەتىپ، جاڭاشا وندىرگىش كۇشتەردى دامىتۋعا دەم بەرۋ كەرەك. وسىزاماندانعان شارۋاشىلىق جۇيەسى قۇرىلىسىنىڭ ءتۇيىندى سالالارى مەن ءالسىز بۋىندارىنا نازار اۋدارىپ، جوعارى ساپالى عىلىم - تەحنيكامەن قامداۋدى ارتتىرىپ، جاڭادان گۇلدەنگەن شارۋاشىلىقتار مەن بولاشاقتاعى شارۋاشىلىقتاردى جەتىلدىرىپ جانە دامىتىپ، جاڭا تەحنيكالاردان بەلسەنە پايدالانىپ ءداستۇرلى شارۋاشىلىقتاردى قايتا قۇرىپ، دارەجەسىن جوعارىلاتۋ كەرەك. كاسىپورىنداردىڭ عىلىم - تەحنيكادا جاڭالىق اشۋداعى نەگىزگى تۇلعالىق ورنىن كۇشەيتىپ، عىلىم - تەحنيكا جەتىستىكتەرىن وندىرگىش كۇشكە اينالدىرۋ، قولدانۋدى جەبەۋ كەرەك. عىلىم - تەحنيكا فينانسى سىندى وسى ءىستى ويداعىداي ىستەۋ كەرەك.

شي جينپيڭ بىلاي دەپ باسا دارىپتەدى: عىلىم - تەحنيكا ءتۇزىلىس، مەحانيزمى رەفورماسىن جاپپاي تەرەڭدەتىپ، ءتۇرلى جاڭالىق اشۋ تۇعىرى قۇرىلىسىن ءبىر تۇتاس جوسپارلاپ، جاڭالىق اشۋ بايلىعىن ساپالى جايعاستىرۋدى كۇشەيتۋ كەرەك. وڭىرلىك عىلىم - تەحنيكادا جاڭالىق اشۋ ورنالاستىرۋىن كەمەلدەندىرىپ، عىلىم - تەحنيكا جوسپارىن باسقارۋدى جاقسارتىپ، عىلىم - تەحنيكادا جاڭالىق اشۋعا قوسىلىم قوسۋ ونىمدىلىگىن جوعارىلاتۋ كەرەك. عىلمي زەرتتەۋ قيمىلدارىنىڭ زاڭدىلىعىنا ۇيلەسەتىن تۇرلەر بويىنشا باعالاۋ جۇيەسى مەن باعالاۋ مەحانيزمىن جەدەل اقاۋسىزداندىرىپ، ىنتالاندىرۋ ءتۇزىمىن كەمەلدەندىرىپ، جاڭالىق اشۋدىڭ ومىرشەڭدىگىن قاۋلاتۋ كەرەك.

شي جينپيڭ بىلاي دەپ اتاپ كورسەتتى: وقۋ – اعارتۋ، عىلىم - تەحنيكا دارىندىلارى ءتۇزىلىس، مەحانيزمىن ءبىر تۇلعالاندىرىپ رەفورمالاۋدى تەرەڭدەتىپ، عىلىم - تەحنيكا مەن وقۋ - اعارتۋدى سايكەستىرىپ ادام تاربيەلەۋ مەحانيزمىن كەمەلدەندىرىپ، كولەمى زور، قۇرىلىمى ۇيلەسىمدى، ساپاسى تاماشا جاسامپاز دارىندىلار قوسىنىن جەدەل باۋلۋ، جەتىلدىرۋ كەرەك. جوعارى مەكتەپتەردىڭ ءپان قۇرىلىمىن ساپالىلاندىرىپ، دارىندىلاردى تاربيەلەۋ ۇلگىسىندە جاڭالىق جاراتىپ، دارىندىلاردى دەربەس تاربيەلەۋ ورەسى مەن ساپاسىن جوعارىلاتۋ كەرەك. مەملەكەتتىڭ ستراتەگيالىق دارىندىلار قۋاتىن قۇرۋدى جەدەلدەتىپ، ۇزدىك ينجەنەرلەردى، ءىرى ەل شەبەرلەرىن، جوعارى ونەرلى دارىندىلاردى كۇش سالا جەتىلدىرۋ كەرەك. جاس عىلىم - تەحنيكا دارىندىلارىن تاربيەلەۋدى كۇشەيتىپ، عالىمداردىڭ رۋحىن بارىنشا ساۋلەلەندىرىپ، قالىڭ عىلىم - تەحنيكا قىزمەتكەرلەرىن اسقاق مۇرات ورناتۋعا، وتاندى ءسۇيىپ، ۇلەس قوسۋعا، جاڭالىق جاراتۋعا بەل بايلاۋعا شابىتتاندىرۋ كەرەك.

شي جينپيڭ بىلاي دەپ باسا دارىپتەدى: ادامزاتتىڭ تاعدىرلاس ورتاق تۇلعاسىن قۇرۋ ۇستانىمىن ىشكەرىلەي امالياتتا ايگىلەپ، اشىق سەلبەستىك بارىسىندا ءوز كۇشىنە سۇيەنىپ ءوزىن الۋەتتەندىرۋدى جۇزەگە اسىرۋ كەرەك. حالىقارالىق عىلىم - تەحنيكا سەلبەستىگى باستاماسىن ىشكەرىلەي امالياتتا ايگىلەپ، ۇكىمەت پەن حالىقتىق اۋىس - كۇيىس، سەلبەستىك ارنالارىن ونان ارى كەڭەيتىپ، ”ءبىر بەلدەۋ، ءبىر جولدى“ بىرگە قۇرۋ سياقتى تۇعىرلاردىڭ رولىن ساۋلەلەندىرىپ، ءار ەلدىڭ عىلمي زەرتتەۋ قىزمەتكەرلەرىنىڭ بىرلەسىپ قامال الۋىنا قولداۋ كورسەتۋ كەرەك. دۇنيە جۇزىلىك جاڭالىق اشۋ تورىمەن بەلسەنە توعىسىپ، دۇنيە جۇزىلىك عىلىم - تەحنيكانى جونگە سالۋعا ىشكەرىلەي ات سالىسىپ، دۇنيە جۇزىلىك سايىستارعا بىرگە توتەپ بەرىپ، عىلىم - تەحنيكانىڭ ادامزاتقا اناعۇرلىم زور باقىت جاراتۋىنا مۇمكىندىك جاساۋ كەرەك.

شي جينپيڭ مىنانى ءبىلدىردى: ەكى اكادەمياداعى اكادەميكتەردىڭ عىلىم - تەحنيكا الدىڭعى لەگىنىڭ ءورىس اشۋشىلارى، كەلەلى مىندەتتەردىڭ ارقالاۋشىسى، جاس دارىندىلار جەتىلۋىنىڭ جەتەكشىسى، عالىمدار رۋحىنىڭ ۇلگىسى بولىپ، ەلىمىزدىڭ عىلىم - تەحنيكا ىستەرىنىڭ دامۋىنا تاعى دا تىڭ ۇلەس قوسۋىن ءۇمىت ەتەمىن. قالىڭ عىلىم - تەحنيكا قىزمەتكەرلەرى عىلىم تالپىنىسىن عىلىم - تەحنيكادا قۇدىرەتتى ەل قۇرۋ ۇلى ىسىمەن سانالى تۇردە توعىستىرىپ، داۋىرگە لايىق، حالىقتىڭ ءۇمىتىن اقتايتىن جاڭا ناتيجە جاراتۋى كەرەك. ءار دارەجەلى پارتكومدار مەن ۇكىمەتتەر عىلىم - تەحنيكا قىزمەتىنە ۇيىمدىق باسشىلىقتى شىن مانىندە كۇشەيتىپ، قىزمەت وتەۋدى قامتاماسىزداندىرۋدى بار كۇشپەن ويداعىداي ىستەۋى كەرەك.

لي چياڭ جينالىستى باسقارعاندا بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى سوزىندە تاياۋ جىلداردان بەرى ەلىمىزدىڭ عىلىم - تەحنيكادا جاڭالىق اشا دامۋدا قول جەتكىزگەن تاريحي تابىستارى تولىق تۇراقتاندىرىلىپ، جاڭا داۋىردەگى عىلىم - تەحنيكا ىستەرىن دامىتۋدىڭ ماڭىزدى تاجىريبەلەرى تەرەڭ قورىتىندىلانىپ، عىلىم - تەحنيكادا جاڭالىق اشۋدىڭ جۇڭگو ۇلگىسىندەگى وسىزامانداندىرۋدى ىلگەرىلەتۋ، ەكىنشى 100 جىلدىق كۇرەس نىساناسىن جۇزەگە اسىرۋ ۇلى ۇردىسىندەگى ماڭىزدى رولى ەگجەي - تەگجەيلى بايىمدالىپ، جاڭا جاعدايدا عىلىم - تەحنيكادا قۇدىرەتتى ەل قۇرۋدى جەدەلدەتۋدىڭ نەگىزگى ءمانى مەن باستى مىندەتى جاڭا داۋىردەگى عىلىم - تەحنيكا قىزمەتىن ويداعىداي ىستەۋگە العا باسۋ بەتالىسىن ايقىن كورسەتىپ بەردى، ىشكەرىلەي ۇيرەنىپ، ءتۇسىنىپ، مۇقيات دايەكتى تياناقتاندىرۋ كەرەك. جاڭا جورىقتا جوعارى دەڭگەيلى عىلىم - تەحنيكادا ءوز كۇشىنە سۇيەنۋدى جۇزەگە اسىرۋ، عىلىم - تەحنيكادا قۇدىرەتتى ەل قۇرۋ − داڭقتى بورىش، كەلەلى جاۋاپكەرشىلىك، شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، عىلىم - تەحنيكا قىزمەتىن ويداعىداي ىستەۋ سانالىلىعى مەن تاباندىلىعىن اناعۇرلىم كۇشەيتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋ كەرەك.

جينالىستا لي دىرىن مەن شۋە چيكۇن بارلىق سيلىق يەگەرلەرى اتىنان ءسوز سويلەدى.

جينالىستان ىلگەرى شي جينپيڭ قاتارلى باسشى جولداستار مەملەكەتتىك عىلىم - تەحنيكا سيلىعى يەگەرلەرىنىڭ ۋاكىلدەرىمەن ىقىلاسپەن كەزدەستى ءارى كوپشىلىكپەن بىرگە سۋرەتكە ءتۇسىپ ەستەلىك قالدىردى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى قاتىستى باسشى جولداستار، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستەگى قاتىستى باسشى جولداستار جينالىسقا قاتىناستى.

ولكەلەردىڭ، اۆتونوميالى رايونداردىڭ، قالالاردىڭ جانە جوسپارى بولەك جاسالاتىن قالالاردىڭ، شينجياڭ ءوندىرىس - قۇرىلىس بيڭتۋانىنىڭ، ورتالىق پەن مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ، ارميانىڭ قاتىستى ورىندارىنىڭ نەگىزگى جاۋاپتى جولداستارى، ەكى اكادەميانىڭ اكادەميكتەرى، ءبىر ءبولىم شەتەلدىك اكادەميكتەر، مەملەكەتتىك عىلىم - تەحنيكا سيلىعى يەگەرلەرىنىڭ ۋاكىلدەرى قاتارلىلاردان 3 مىڭداي ادام جينالىسقا قاتىناستى.

2023 - جىلعى مەملەكەتتىك عىلىم - تەحنيكا سيلىعى بويىنشا 250 نىسان جانە 12 عىلىم - تەحنيكا مامانى باعالاندى. مۇنىڭ ىشىندە مەملەكەتتىك ەڭ جوعارى عىلىم - تەحنيكا سيلىعىنىڭ يەگەرىنەن 2 ادام بار؛ مەملەكەتتىك جاراتىلىستىق عىلىم سيلىعى 49 ءتۇر، مۇنىڭ ىشىندە 1 - دارەجەلى سيلىق ءبىر ءتۇر، 2 - دارەجەلى سيلىق 48 ءتۇر؛ مەملەكەتتىك تەحنيكالىق تاپقىرلىق سيلىعى 62 ءتۇر، مۇنىڭ ىشىندە 1 - دارەجەلى سيلىق 8 ءتۇر، 2 - دارەجەلى سيلىق 54 ءتۇر؛ مەملەكەتتىك عىلىم - تەحنيكا العاباسارلىعى سيلىعى 139، مۇنىڭ ىشىندە ەرەكشە دارەجەلى سيلىق ۇشەۋ، 1- دارەجەلى سيلىق 16، 2-دارەجەلى سيلىق 120؛ شەتەلدىك 10 مامانعا جۇڭحۋا حالىق رەسپۋبليكاسىنىڭ حالىقارالىق عىلىم - تەحنيكا سەلبەستىك سيلىعى بەرىلدى.

كەلۋ قاينارى: حالىق تورابى