شي جينپيڭ پولشانىڭ زۇڭتۇڭى دۋدامەن كەڭەس وتكىزدى

6 - ايدىڭ 24 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پولشانىڭ زۇڭتۇڭى دۋدامەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان دۋدا جانە حانىمى اگاتامەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

6 - ايدىڭ 24 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پولشانىڭ زۇڭتۇڭى دۋدامەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا دۋداعا ارناپ قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى جاي جيانلان تۇسىرگەن

شينحۋا اگەنتتىگى، 6 - ايدىڭ 24 - كۇنى، بەيجيڭ (ءتىلشى سۇن ي). 6 - ايدىڭ 24 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن پولشانىڭ زۇڭتۇڭى دۋدامەن كەڭەس وتكىزدى.

شي جينپيڭ بىلاي دەپ اتاپ كورسەتتى: پولشا − جاڭا جۇڭگونى ەڭ ەرتە مويىنداعان مەملەكەتتەردىڭ ءبىرى، بيىل − جۇڭگو مەن پولشانىڭ ديپلوماتيالىق قارىم - قاتىناس ورناتقانىنىڭ 75 جىلدىعى. 75 جىلدان بەرى جۇڭگو مەن پولشانىڭ قارىم - قاتىناسى باستان - اياق ورنىقتى دامىدى. اسىرەسە، 8 جىلدىڭ الدىندا ءبىز جۇڭگو مەن پولشانىڭ قارىم - قاتىناسىن جان - جاقتى ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى بىرگە ۇيعارعاننان بەرى ەكى ەلدىڭ ءار سالاداعى اۋىس - كۇيىسى مەن سەلبەستىگى جاپپاي كەڭەيىپ، تەرەڭدەپ، سەلبەستىك تابىستارى ەكى ەل حالىقتارىن يگىلىككە كەنەلتتى. قازىر دۇنيە ءجۇزىنىڭ وزگەرىسى، ءداۋىردىڭ وزگەرىسى، تاريحتىڭ وزگەرىسى بۇرىن بولىپ كورمەگەن تاسىلمەن ورىستەتىلۋدە. جۇڭگو جاق پولشا جاقپەن بىرگە بەيبىت قاتار تۇرۋدىڭ بەس پرينسيبىندە تاباندى بولىپ، ديپلوماتيالىق قارىم - قاتىناس ورناتۋداعى اۋەلگى ماقساتتى ۇستانىپ، ءداستۇرلى دوستىقتى ۇزبەي جالعاستىرىپ، ەكى ەل قارىم - قاتىناسىنىڭ ۇزدىكسىز اناعۇرلىم جوعارى دەڭگەيگە قاراي دامۋىن ىلگەرىلەتىپ، بىلىقپالىق قاباتتاسقان دۇنيە جۇزىنە اناعۇرلىم كوپ ورنىقتىلىق جانە تۇراقتىلىق ۇستەۋدى قالايدى.

شي جينپيڭ بىلاي دەپ باسا دارىپتەدى: جۇڭگو - پولشا قارىم - قاتىناسىنىڭ بوران – شاشىنعا توتەپ بەرە الۋىنىڭ تەتىگى ەكى جاقتىڭ ءوز ۇلتىنىڭ تاريحي، مادەنيەت داستۇرىنەن اقىل - پاراسات پەن كۇش - قۋات قابىلداپ، دەربەس، ءوز - وزىنە قوجايىن بولا وتىرىپ ەكى جاقتى دوستىق قارىم - قاتىناستى دامىتۋدا تاباندى بولعانىندا. ەكى جاق ءوزارا قۇرمەت ەتەتىن، تەڭ تۇرعىدا مامىلە جاسايتىن، ءوزارا پايدا جەتكىزىپ سەلبەسەتىن، اۋىس - كۇيىس جاساپ، ءوزارا ۇلگى الاتىن جۇڭگو - پولشا دوستىعىنىڭ ىشكى وزەگىندە ۇزدىكسىز تاباندى بولىپ، ءبىر - ءبىرىنىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋدا جاساعان قۇلشىنىستارىن ءتۇسىنىپ جانە قولداپ، قىرعي قاباقتىق ويلاۋعا، شەپتىك قارسىلاسۋعا بىرگە قارسى تۇرىپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى قورعاپ، بارابار، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن قۇرۋدى ىلگەرىلەتۋى كەرەك. ەكى جاق جۇڭگو - پولشا ۇكىمەتتەرى اراسىنداعى سەلبەستىك كوميتەتى سياقتى مەحانيزم تۇعىرلارىنان ويداعىداي پايدالانىپ، ءار سالاداعى سەلبەستىكتىڭ ستراتەگيالىق سايكەسۋى مەن ءبىر تۇتاس جوسپارلانۋىن كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، جۇڭگو - ەۆروپا كەزەكشى پويەزى سياقتى كەلەلى نىساندار سەلبەستىگىن قامتاماسىز ەتىپ جانە ىلگەرىلەتىپ، ساۋدا، اۋىل شارۋاشىلىعى، سيفرلى ەكونوميكا، جاسىل كاسىپ سالاسى، تازا ەنەرگيا سياقتى سالالارداعى سەلبەستىكتى كۇشەيتۋى كەرەك. جۇڭگو جاق اناعۇرلىم كوپ ساپالى پولشا اۋىل شارۋاشىلىق ازىق - تۇلىك ونىمدەرىنىڭ جۇڭگو بازارىنا كىرۋىن قارسى الادى، قوس باعىتتا قارجى قوسۋدى كەڭەيتۋدى قولدايدى، پولشا جاقتىڭ جۇڭگو كاسىپورىندارىنا ءادىل، ادىلەتتى، كەمسىتپەيتىن تيجارات - ساۋدا ورتاسىن ازىرلەۋىن ءۇمىت ەتەدى. جۇڭگو جاق پولشا ازاماتتارىنا 15 كۇندىك ءبىر باعىتتا ۆيزاسىز كىرىپ - شىعۋ ساياساتىن اتقارۋدى ۇيعاردى. ەكى جاق ەكى ەلدىڭ مادەنيەت، جاستار، عىلىم، اقپارات قۇرالدارى سياقتى سالالارداعى اۋىس - كۇيىسىن زور كۇشپەن ىلگەرىلەتۋى كەرەك. جۇڭگو جاق پولشا سياقتى ەلدەرمەن بىرگە جۇڭگو - ورتا، شىعىس ەۆروپا ەلدەرى سەلبەستىك مەحانيزمىنىڭ باياندى دامۋىن جەبەپ، جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدى قالايدى.

دۋدا مىنالاردى ءبىلدىردى: مەنىڭ 2015 - جىلى جۇڭگودا تۇڭعىش رەت مەملەكەتتىك ساپاردا بولعانىم جانە 2022 - جىلدىڭ باسىندا بەيجيڭ قىسقى وليمپيادا سپورت جارىسىنىڭ اشىلۋ سالتىنا قاتىناسقانىم ءالى ەسىمدە، وسى رەتكى جۇڭگوداعى ساپارىمدا جۇڭگو دامۋىنىڭ وراسان زور ومىرشەڭدىك كۇشىنە ىشكەرىلەي كۋا بولدىم. مەن جۇڭگونىڭ ءتوراعا شي جينپيڭنىڭ باسشىلىعىندا حالىقتى وزەك ەتكەن دامۋ ۇستانىمىن دايەكتىلەندىرىپ، دۇنيەنى جالت قاراتقان تابىستارعا قول جەتكىزگەنىنە شىن جۇرەكتەن سۇيىنەمىن. 2016 - جىلى ءتوراعا شي جينپيڭنىڭ پولشادا مەملەكەتتىك ساپاردا بولۋى پولشا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىن دامىتۋدىڭ ماڭىزدى بەلەسىنە اينالدى. ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسى پولشا جونىنەن وراسان زور دامۋ ورايىنان دەرەك بەرەدى، جۇڭگومەن سەلبەسىپ ”ءبىر بەلدەۋ، ءبىر جولدى“ بىرگە قۇرۋ پولشانىڭ نەگىزدىك قۇرىلعى قۇرىلىسى مەن ەكونوميكالىق دامۋىن پارمەندى جەبەدى. پولشا مەن جۇڭگو ديپلوماتيالىق قارىم - قاتىناس ورناتقان 75 جىلدان بەرى ەكى جاق قارىم - قاتىناسىنىڭ دامۋى باستان - اياق تەرەزەسى تەڭ بولۋدى جانە ءوزارا قۇرمەت ەتۋدى نەگىز ەتىپ كەلدى. پولشا جاق جۇڭگونىڭ ۇزاق تاريحى مەن تەرەڭ مادەنيەتىن ايرىقشا القايدى، جۇڭگونىڭ حالىقارالىق ىستەردە ۇستانعان ۇستانىمىن جانە دۇنيە ءجۇزىنىڭ بەيبىتشىلىگى مەن دامۋىنا قوسقان ماڭىزدى ۇلەسىن جوعارى باعالايدى. پولشا جاق ءبىر جۇڭگو پرينسيبىنەن بۇلجىمايدى، جۇڭگو جاقپەن ”ءبىر بەلدەۋ، ءبىر جولدى“ بىرگە قۇرۋ سەلبەستىگىن ۇزدىكسىز ىلگەرىلەتىپ، ەكونوميكا - ساۋدا، اۋىل شارۋاشىلىعى، نەگىزدىك قۇرىلعى، ۇلاستىرۋ - تۇتاستىرۋ، گۋمانيتارلىق سياقتى سالالارداعى اۋىس - كۇيىستى، سەلبەستىكتى تەرەڭدەتىپ، جاڭالىق اشۋ، سيفرلى ەكونوميكا، جاڭا ەنەرگيالى اۆتوكولىك سياقتى جاڭا سالالارداعى سەلبەستىكتى كەڭەيتۋدى قالايدى، اناعۇرلىم كوپ جۇڭگو كاسىپورىندارىنىڭ پولشاعا بارىپ قارجى قوسۋىن قارسى الادى. پولشا جاق جۇڭگومەن كوپ جاقتى قارىم - قاتىناستى، سەلبەستىكتى جيىلەتىپ، پولشا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ونان ارى دامۋىن ىلگەرىلەتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەۋگە بەلسەندى ۇلەس قوسۋدى قالايدى. كەلەر جىلدىڭ العاشقى جارتىسىندا پولشا ەۆروپا وداعىنىڭ كەزەكتى ءتوراعا ەلى مىندەتىن اتقارادى، پولشا ەۆروپا وداعىنىڭ جۇڭگومەن قارىم - قاتىناسىن دامىتۋدا سىندارلى رول اتقارۋدى ءارى ورتا، شىعىس ەۆروپا ەلدەرىنىڭ جۇڭگومەن سەلبەستىگىن ۇزدىكسىز جەبەۋدى قالايدى.

ەكى جاق تاعى ۋكراينا داعدارىسى جونىندە پىكىر الماستىردى. شي جينپيڭ بىلاي دەپ باسا دارىپتەدى: جۇڭگو جاقتىڭ ۋكراينا داعدارىسىنداعى تۇرعىسى − تاتۋلاستىرۋ، كەلىسسوزدى جەبەۋ، ساياسي جولمەن شەشۋ. قازىر قاقتىعىستىڭ اسقىنۋىنان كۇش سالا ساقتانىپ، جاعدايدىڭ باسەڭدەۋىن كۇش سالا ىلگەرىلەتىپ، بەيبىتشىلىك كەلىسسوزىنىڭ شارت - جاعدايىن قۇلشىنا جاراتۋ كەرەك. بۇل ەۆروپانى قامتىعان حالىقارالىق قوعامنىڭ مۇددەسىنە ۇيلەسەدى. جۇڭگو جاق كەيبىرەۋلەردىڭ جۇڭگو مەن رەسەيدىڭ قالىپتى ساۋدا قايشىلىعىن جەلەۋ ەتىپ، جۇڭگونى قارالاۋىنا قارسى تۇرادى. جۇڭگو جاق داعدارىستى بەيبىت جولمەن شەشۋگە ءتيىمدى بارلىق قۇلشىنىستاردى شابىتتاندىرىپ جانە قولداپ، ەۆروپانىڭ بىركەلكى، ءونىمدى، باياندى حاۋىپسىزدىك جۇلگەسىن ورناتۋدى ىلگەرىلەتەدى. جۇڭگو جاق ۋكراينا داعدارىسىن ساياسي جولمەن ۇزدىكسىز شەشۋدە سىندارلى رول اتقارۋدى قالايدى.

كەڭەستەن كەيىن ەكى ەل مەملەكەت باسشىلارى ەكونوميكا - ساۋدا، اۋىل شارۋاشىلىعى سياقتى سالالارداعى كوپتەگەن ەكى جاقتى سەلبەستىك قۇجاتتارىنا قول قويۋعا بىرگە كۋا بولدى.

ەكى جاق «جۇڭحۋا حالىق رەسپۋبليكاسى مەن پولشا رەسپۋبليكاسىنىڭ جان - جاقتى ستراتەگيالىق سەرىكتەستىك قارىم - قاتىناستى كۇشەيتۋ جونىندەگى ارەكەت جوسپارىن (2024 − 2027 - جىل)» جاريالادى.

كەڭەستەن ىلگەرى شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا دۋدا مەن حانىمى اگاتاعا ارناپ قارسى الۋ سالتىن وتكىزدى.

دۋدا كەلگەندە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن پولشا ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. دۋدا شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ مەن پىڭ لييۋان حالىق سارايىنىڭ التىن ءتۇستى زالىندا دۋدا مەن حانىمىنا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.

كەلۋ قاينارى: حالىق تورابى