شي جينپيڭ افريكا وقىمىستىلارىنا جاۋاپ حات جازدى

شينحۋا اگەنتتىگى، 8 - ايدىڭ 30 - كۇنى، بەيجيڭ. 8 - ايدىڭ 27 - كۇنى مەملەكەت ءتوراعاسى شي جينپيڭ افريكاداعى 50 ەلدىڭ وقىمىستىلارىنا جاۋاپ حات جازىپ، ولاردى جوعارى دەڭگەيلى جۇڭگو - افريكا تاعدىرلاس ورتاق تۇلعاسىن قۇرۋعا، ”دۇنيە ءجۇزىنىڭ وڭتۇستىگىنىڭ“ ورتاق مۇددەسىن قورعاۋعا ۇزدىكسىز اقىل - پاراساتتىق قولداۋ كورسەتۋگە شابىتتاندىردى.

شي جينپيڭ بىلاي دەپ اتاپ كورسەتتى: تاياۋدا جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى جەڭىسپەن اشىلىپ، رەفورمانى ونان ارى تەرەڭدەتۋدىڭ، جۇڭگو ۇلگىسىندەگى وسىزامانداندىرۋدىڭ كەڭ بولاشاعىن اشۋدىڭ ءداۋىر دابىلى قاعىلدى. بەيبىت دامۋعا تالپىناتىن، رەفورما جاساۋعا، ەسىك اشۋعا بەل بايلاعان جۇڭگونىڭ تىنباي دامىپ، زورايۋى، ءسوز جوق، دۇنيە ءجۇزىنىڭ بەيبىتشىلىگى مەن حالىقارالىق ادىلەت كۇشىن ونان ارى نىعايتىپ، دۇنيە ءجۇزىنىڭ وسىزاماندانۋ اياق الىسىنا، اسىرەسە، ”دۇنيە ءجۇزىنىڭ وڭتۇستىگىنىڭ“ دامۋى مەن گۇلدەنۋىنە سارقىلماس قوزعاۋشى كۇش ۇستەيتىندىگى داۋسىز.

شي جينپيڭ بىلاي دەپ باسا دارىپتەدى: جۇڭگو مەن افريكا − ەجەلدەن تاعدىرلاس ورتاق تۇلعا. وزگەرىس پەن بىلىقپالىق قاباتتاسقان دۇنيە ءجۇزى جاعدايى الدىندا، جۇڭگو مەن افريكا بۇرىنعى ءارقانداي كەزدەگىدەن دە ىنتىماقتى، سەلبەستىكتى اناعۇرلىم كۇشەيتۋگە ءتيىس. جاڭا كەزەكتى جۇڭگو - افريكا سەلبەستىك تالقى مىنبەرى باسشىلار باس قوسۋى اشىلۋ الدىندا تۇر، جۇڭگو - افريكا ەكى جاقتىڭ باسشىلارى تاعى دا ءبىر ارادا باس قوسىپ، جۇڭگو - افريكا سەلبەستىگىنىڭ ۇلى جوسپارىن بىرگە اقىلداسىپ، جۇڭگو - افريكا قارىم - قاتىناسىنىڭ اناعۇرلىم كوركەم بولاشاعىن اشادى. سىزدەردىڭ ”جۇڭگو - افريكا دارەس - سالام ورتاق تانىمى“ نەگىزىندە، ”دۇنيە ءجۇزىنىڭ وڭتۇستىگىندەگى“ ەلدەردىڭ دامۋ جولى، جۇڭگو - افريكا جانە تۇستىك ەلدەر سەلبەستىگى جونىندەگى زەرتتەۋدى، ىزدەنىستى كۇشەيتىپ، جوعارى دەڭگەيلى جۇڭگو - افريكا تاعدىرلاس ورتاق تۇلعاسىن قۇرۋعا، ”دۇنيە ءجۇزىنىڭ وڭتۇستىگىنىڭ“ ورتاق مۇددەسىن قورعاۋعا ۇزدىكسىز ماڭىزدى اقىل - پاراساتتىق قولداۋ كورسەتۋلەرىڭىزدى ءۇمىت ەتەمىن.

بىرنەشە كۇننىڭ الدىندا وڭتۇستىك افريكانىڭ بۇرىنعى ساقا ديپلوماتى، جىجياڭ شىفان داشۋەسى افريكا زەرتتەۋ ورنىنىڭ قۇرمەتتى پروفەسسورى گروبلەر افريكاداعى 50 مەملەكەتتىڭ 63 وقىمىستىسىمەن بىرگە ءتوراعا شي جينپيڭگە حات جولداپ، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ جەڭىسپەن اشىلعاندىعىن قىزۋ قۇتتىقتادى، جۇڭگو - افريكا سەلبەستىك تالقى مىنبەرىنىڭ تاريحي تابىستارىن ايرىقشا القادى، جاڭا كەزەكتى تالقى مىنبەرى باسشىلار باس قوسۋىنىڭ جۇڭگو - افريكا تاعدىرلاس ورتاق تۇلعاسىن قۇرۋدىڭ، ”دۇنيە ءجۇزىنىڭ وڭتۇستىگىن“ بىرگە قۇرۋدىڭ، وسىزامانداندىرۋدىڭ جاڭا تاراۋىن جازۋىن ءۇمىت ەتەتىندىكتەرىن ايتتى.

كەلۋ قاينارى: حالىق تورابى