شي جينپيڭ رەسەيدىڭ زۇڭتۇڭى پۋتينمەن ديدارلاستى

سول جەر ۋاقىتى 10 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ قازان قالاسىنىڭ كرەمل سارايىندا رەسەيدىڭ زۇڭتۇڭى پۋتينمەن ديدارلاستى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

«حالىق گازەتى»، 10 - ايدىڭ 22 – كۇنى، رەسەي قازان (تىلشىلەر يۇي حۇڭجيان، حۋ زىشي). سول جەر ۋاقىتى 10 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ قازان قالاسىنىڭ كرەمل سارايىندا رەسەيدىڭ زۇڭتۇڭى پۋتينمەن ديدارلاستى.

شي جينپيڭ بىلاي دەپ اتاپ كورسەتتى: بيىل − جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى. 75 جىلدان بەرى جۇڭگو - رەسەي قارىم - قاتىناسى قيىن - قىستاۋ ساتتە قاتار ءجۇرىپ، ”وداقتاسپاۋ، قارسىلاسپاۋ، ءۇشىنشى جاققا باعىتتاماۋ“ سىندى كورشىلەس ءىرى ەلدەردىڭ دۇرىس تاتۋ - ءتاتتى ءوتۋ جولىن قاراستىردى. ەكى جاق ماڭگىلىك تاتۋ كورشىلىك دوستىق، جان - جاقتى ستراتەگيالىق سەلبەستىك، ءوزارا پايدا جەتكىزىپ سەلبەسىپ تەڭ يگىلىككە كەنەلۋ رۋحىن ۇستانىپ، جالپى بەتتىك ستراتەگيالىق سەلبەستىكتى جانە ءار سالاداعى ناقتى سەلبەستىكتى ۇزدىكسىز تەرەڭدەتىپ جانە كەڭەيتىپ، ەكى ەلدىڭ دامۋىن، گۇلدەنۋىن جانە وسىزامانداندىرۋ قۇرىلىسىن ىلگەرىلەتۋگە پارمەندى قوزعاۋشى كۇش ۇستەپ، جۇڭگو - رەسەي حالىقتارىنىڭ ىرىس - قۇتىن ارتتىرۋعا، حالىقارالىق ادىلدىك پەن ادىلەتتىلىكتى قورعاۋعا ماڭىزدى ۇلەس قوستى. قازىر دۇنيە ءجۇزى 100 جىلدا بولماعان زور وزگەرىس جاعدايىندا تۇر، حالىقارالىق جاعدايدا بىلىقپالىق قاباتتاستى، ءبىراق جۇڭگو مەن رەسەيدىڭ ۇرپاقتان - ۇرپاققا جالعاسقان تەرەڭ دوستىق سۇيىسپەنشىلىگى وزگەرمەيدى، دۇنيە جۇزىنە تيىمدىلىك جەتكىزۋ ءىرى ەلدىك جاۋاپكەرشىلىگى وزگەرمەيدى. كۇردەلى دە قاتاڭ سىرتقى جاعدايعا ءدوپ كەلگەنىمەن، ەكى ەلدىڭ ساۋدا سياقتى ءار سالاداعى سەلبەستىگى بەلسەنە ىلگەرىلەتىلىپ، ءىرى سەلبەستىك نىساندارى ورنىقتى اينالىمعا ءتۇستى. ەكى جاق ”ءبىر بەلدەۋ، ءبىر جولدى“ بىرگە قۇرۋ باستاماسىن جانە ەۆروپا - ازيا ەكونوميكالىق وداعىن ىشكەرىلەي ۇشتاستىرۋدى ۇزدىكسىز ىلگەرىلەتىپ، ءوز ەكونوميكاسىنىڭ جوعارى ساپالى دامۋىن جەبەۋگە قوزعاۋشى كۇش تىرەگىن ازىرلەۋى كەرەك.

شي جينپيڭ بىلاي دەپ باسا دارىپتەدى: كەلەر جىل − بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى ءارى دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعى. بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دۇنيە جۇزىندەگى نەگىزگى ءىرى ەل رەتىندە، جۇڭگو مەن رەسەي جان - جاقتى ستراتەگيالىق سەلبەستىكتى تەرەڭدەتىپ، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى جۇلگەدەگى قارىم - قاتىناستى، سايكەسۋدى جيىلەتىپ، دۇنيە جۇزىلىك 2 - سوعىس تاريحىنا دۇرىس كوزقاراستى ساۋلەلەندىرىپ، بىرلەسكەن مەملەكەتتەر ۇيىمىن ۇيەتقى ەتكەن حالىقارالىق جۇيەنى باتىل قورعاپ، دۇنيە ءجۇزىنىڭ ستراتەگيالىق ورنىقتىلىعىن، حالىقارالىق ادىلدىك پەن ادىلەتتىلىكتى قورعاۋى كەرەك.

شي جينپيڭ بىلاي دەپ اتاپ كورسەتتى: بريكس ەلدەرىنىڭ سەلبەستىك مەحانيزمى − قازىرگى دۇنيە جۇزىندەگى بازارى جاڭادان گۇلدەنگەن ەڭ ماڭىزدى ەلدەر مەن وركەندەپ كەلە جاتقان ەلدەردىڭ ىنتىماقتاسا سەلبەستىك جاساۋ تۇعىرى. جۇڭگو جاق رەسەيدىڭ ءتوراعا ەل رەتىندە بريكس ەلدەرى باسشىلارىنىڭ وسى رەتكى ديدارلاسۋى ءۇشىن ىستەگەن قىزمەتتەرىن جوعارى باعالايدى، بريكس ەلدەرى باسشىلارىمەن بريكس ەلدەرىنىڭ سەلبەستىك مەحانيزمىنىڭ بولاشاق دامۋى جونىندە ىشكەرىلەي تالقى جۇرگىزىپ، ءار جاقتىڭ ورتاق تانىمىن ۇيىستىرۋدى ىلگەرىلەتىپ، ىنتىماقتى، سەلبەستىكتى كۇشەيتۋدىڭ بەلسەندى سيگنالىن تاراتىپ، بريكس ەلدەرىنىڭ ءار سالاداعى ستراتەگيالىق سەلبەستىگىن جانە ناقتى سەلبەستىگىن ىلگەرىلەتىپ، دۇنيە ءجۇزىنىڭ وڭتۇستىگىنە اناعۇرلىم كوپ جاڭا وراي اكەلۋدى ءۇمىت ەتەدى.

پۋتين مىنالاردى ءبىلدىردى: ءبىز تاياۋدا رەسەي مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعىن بىرگە قۇتتىقتادىق. 75 جىلدان بەرى رەسەي مەن جۇڭگو بىرتىندەپ جاڭا داۋىردەگى جالپى بەتتىك ستراتەگيالىق سەلبەستىك سەرىكتەرىنە اينالدى، ەكى ەل قارىم - قاتىناسى جوعارى دەڭگەيدە دامۋدى ساقتاپ، جاڭاشا ءىرى ەلدىك قارىم - قاتىناستىڭ ۇلگىسىن ورناتتى. رەسەي مەن جۇڭگونىڭ سەلبەستىگى تەڭدىكتى، ءوزارا قۇرمەت ەتۋدى جانە ءوزارا پايدا جەتكىزۋدى نەگىز ەتەدى. ەكى جاقتىڭ بىرگە قۇلشىنۋىندا، قازىر ەكى ەلدىڭ ءار سالاداعى ناقتى سەلبەستىگى ۇزدىكسىز ىلگەرىلەپ، رەسەي - جۇڭگو مادەنيەت جىلىنداعى ءتۇرلى قيمىلدار ءساتتى وتكىزىلدى. رەسەي جاق جۇڭگو جاقپەن سەلبەستىكتى اناعۇرلىم تەرەڭدەتىپ، ەكى ەلدىڭ دامۋىنا، گۇلدەنۋىنە دەم بەرۋدى ءۇمىت ەتەدى. كەلەر جىل − دۇنيە جۇزىلىك ەكىنشى سوعىس اياقتاعاندىعىنىڭ 80 جىلدىعى. رەسەي مەن جۇڭگو دۇنيە ءجۇزىنىڭ فاشيزمگە قارسى سوعىسىنىڭ جەڭىسى ءۇشىن وراسان زور قۇرباندىق بەردى، رەسەي جاق جۇڭگو جاقپەن بىرگە وسى ماڭىزدى ءساتتى ەسكە الۋدى قالايدى. رەسەي جاق جۇڭگو جاقپەن جوعارى جىكتەگىلەردىڭ ءجيى بارىس - كەلىسىن جانە حالىقارالىق ىستەردەگى ستراتەگيالىق قارىم - قاتىناستى، سەلبەستىكتى ۇزدىكسىز ساقتاپ، حالىقارالىق ادىلدىك پەن ادىلەتتىلىكتى جانە دۇنيە جۇزىلىك ستراتەگيالىق ورنىقتىلىقتى بىرگە قورعاۋدى قالايدى. جۇڭگو جاقتىڭ رەسەي جاقتىڭ بريكس ەلدەرىنىڭ ءتوراعا ەلى مىندەتىن وتەگەن كەزدە پارمەندى قولداۋ كورسەتكەندىگىنە العىس ايتامىن، رەسەي جاق جۇڭگو جاقپەن تىعىز سايكەسىپ، بريكس ەلدەرى قاتارىن كەڭەيتكەننەن كەيىنگى تۇڭعىش رەتكى باسشىلار ديدارلاسۋىنىڭ تابىستى بولۋىنا شىنايى كەپىلدىك ەتىپ، ”ۇلكەن بريكس سەلبەستىگىنىڭ“ بەلسەندى جەتىستىكتەرگە ۇزدىكسىز قول جەتكىزۋىن ىلگەرىلەتۋدى قالايدى.

ەكى ەل مەملەكەت باسشىلارى ورتاق كوڭىل ءبولىپ وتىرعان كەلەلى حالىقارالىق، وڭىرلىك ماسەلەلەر جونىندە ىشكەرىلەي پىكىر اۋىستىردى.

ساي چي، ۋاڭ ي قاتارلىلار ديدارلاسۋدا بىرگە بولدى.

كەلۋ قاينارى: حالىق تورابى