شي جينپيڭ لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى

سول جەر ۋاقىتى 10 - ايدىڭ 22 - كۇنى كەشتە مەملەكەت ءتوراعاسى شي جينپيڭ قازاندا لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى.

سۋرەتتى شينحۋا اگەنتتىگىنىڭ ءتىلشىسى ياۋ داۋەي تۇسىرگەن

«حالىق گازەتى»، 10 - ايدىڭ 22 – كۇنى، رەسەي قازان (تىلشىلەر حان شياۋميڭ، چۇي سۇڭ). سول جەر ۋاقىتى 10 - ايدىڭ 22 - كۇنى كەشتە مەملەكەت ءتوراعاسى شي جينپيڭ قازاندا لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى.

شي جينپيڭ بىلاي دەپ اتاپ كورسەتتى: بىلتىر 10 - ايدا ءبىز جۇڭگو مەن لاوستىڭ جان - جاقتى ستراتەگيالىق سەلبەستىگىن تەرەڭدەتۋ جونىندە ماڭىزدى ورتاق تانىمعا كەلدىك. ءبىر جىلدان بەرى ەكى پارتيا، ەكى ەلدىڭ تاراۋلارى، جەر - جەرى بەلسەنە تياناقتاندىرىپ، ۇلاستىرۋ – تۇتاستىرۋدى ىلگەرىلەتۋ، ەكونوميكا - ساۋدا، قارجى قوسۋ، گۋمانيتارلىق اۋىس - كۇيىس سياقتى سالالارداعى سەلبەستىكتە سۇبەلى تابىستارعا قول جەتكىزدى. سوتسياليستىك جولداس ۇستىنە باۋىرلاس جۇڭگو – لاوس قارىم - قاتىناسى جۇڭگونىڭ توڭىرەكتىك ديپلوماتياسىندا ەرەكشە ماڭىزدى ورىنعا يە بولىپ، باستان - اياق تاعدىرلاس ورتاق تۇلعا قۇرۋدىڭ الدىڭعى لەگىندە ءجۇردى. حالىقارالىق جاعداي قالاي وزگەرسە دە، جۇڭگو − ماڭگى لاوستىڭ سەنىمدى دوسى جانە سەرىگى. جۇڭگو جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، لاوس تا مەملەكەتتىڭ دامۋىنىڭ، گۇلدەنۋىنىڭ جاڭا كەزەڭىندە تۇر. جۇڭگو جاق لاوس جاقپەن ستراتەگيالىق ءوزارا سەنىمدىلىكتى بەكەمدەپ، ناقتى سەلبەستىكتى تەرەڭدەتىپ، جۇڭگو - لاوس تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتۋدى قالايدى.

شي جينپيڭ بىلاي دەپ اتاپ كورسەتتى: جۇڭگو جاق لاوس جاقپەن اۋىس - كۇيىستى، ءوزارا ۇلگى الۋدى كۇشەيتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى ۇزدىكسىز باتىل قولداۋدى قالايدى. ەكى جاق جۇڭگو - لاوس تەمىر جولىن ۇزدىكسىز الۋەتتەندىرىپ، جۇڭگو - لاوس ەكونوميكالىق ءدالىزى قۇرىلىسىن ىلگەرىلەتىپ، ”ءبىر بەلدەۋ، ءبىر جولدى“ بىرگە قۇرۋ سەلبەستىگىنىڭ ۇلگىسىن قالىپتاستىرۋى كەرەك. جۇڭگو جاق لاوستىڭ اناعۇرلىم كوپ ساپالى اۋىل شارۋاشىلىق ونىمدەرىن يمپورت ەتىپ، وقۋ - اعارتۋ، مادەنيەت، جاستار سياقتى سالالارداعى اۋىس - كۇيىستى، سەلبەستىكتى جيىلەتۋدى قالايدى. لاوستىڭ شىعىس ازيا سەلبەستىگى باسشىلارىنىڭ جەلىلەس ءماجىلىسىن ءساتتى وتكىزگەندىگىن قۇتتىقتايمىن، لاوستىڭ بريكس ەلدەرى سەلبەستىگىنە بەلسەنە ات سالىسۋىن قارسى الامىن. ەكى جاق كوپ جاقتى سايكەسۋدى، سەلبەسۋدى كۇشەيتىپ، حالىقارالىق ادىلدىكتى، تۋراشىلدىقتى جانە قالىڭ وركەندەپ كەلە جاتقان ەلدەردىڭ مۇددەسىن بىرگە قورعاۋى كەرەك.

تۇڭلۇن مىنالاردى ءبىلدىردى: بىلتىر جۇڭگوعا بارىپ، 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسىپ، باس شۋجي شي جينپيڭمەن بىرگە لاوس - جۇڭگو تاعدىرلاس ورتاق تۇلعاسىن قۇرۋدىڭ جاڭا ۇلگىدەگى ارەكەت جوسپارىنا قول قويدىق. قازىر قاتىستى تياناقتاندىرۋ ارەكەتى پارمەندى، ءونىمدى بولۋدا. لاوس – جۇڭگو قارىم - قاتىناسى تاريحتاعى ەڭ جاقسى مەزگىلدە تۇر، ەكى جاقتى سەلبەستىكتىڭ تەرەڭدىگى، كەڭدىگى كۇن سايىن ارتۋدا. جۇڭگو جاق ۇزاق ۋاقىتتان بەرى لاوسقا قاستەرلى قولداۋ كورسەتىپ، لاوستىڭ ەكونوميكالىق، قوعامدىق دامۋىن بارىنشا جەبەدى، جۇڭگو جاقپەن لاوس - جۇڭگو تەمىر جولى جانە لاوس - جۇڭگو ەكونوميكالىق ءدالىزى قۇرىلىسىن ۇزدىكسىز ىلگەرىلەتىپ، لاوس - جۇڭگو تاعدىرلاس ورتاق تۇلعاسىن قۇرۋدى ءۇمىت ەتەمىن. مەن لاوس پارتياسى مەن ۇكىمەتىنىڭ ءبىر جۇڭگو ساياساتىن بۇلجىماي اتقاراتىندىعىن، جۇڭگو ۇكىمەتىنىڭ مەملەكەتتىڭ وزەكتى مۇددەسىن قورعاۋىن بۇلجىماي قولدايتىندىعىن، جۇڭگو جاقتىڭ تايۋانعا، شياڭگاڭعا، شينجياڭعا ساياتىن، ت. ب. ماسەلەلەردەگى ورىندى تۇرعىسىن قولدايتىندىعىن قايتالاي دارىپتەيمىن. جۇڭگو جاقتىڭ لاوستىڭ شىعىس ازيا سەلبەستىگى باسشىلار ءماجىلىسىن وتكىزۋىنە پارمەندى قولداۋ كورسەتكەندىگىنە العىس ايتامىن، لاوس جاق جۇڭگو جاقپەن شىعىس وڭتۇستىك ازيا ەلدەرى وداعى سياقتى كوپ جاقتى تۇعىرلاردا سەلبەستىكتى ۇزدىكسىز جيىلەتۋدى قالايدى.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى