جۇڭگونىڭ ۋاكىلى: سىڭار جاقتىلى ماجبۇرلەۋ شارالارىنا قارسى تۇرامىز، قاتىستى مەملەكەتتەردى مۇنداي شارالاردى ءۇزىلدى - كەسىلدى كۇشىنەن قالدىرۋعا ۇندەيمىز 

جۇڭگونىڭ بىرلەسكەن مەملەكەتتەر ۇيىمىنداعى تۇراقتى ۋاكىلى، باس ەلشىسى فۋ سۇڭ 10 – ايدىڭ 22 – كۇنى كوزقاراسى جۋىق كەلەتىن مەملەكەتتەر اتىنان ب م ۇ ءماجىلىسىنىڭ 3 – رەتكى كوميتەتىنە سىڭار جاقتىلى ماجبۇرلەۋ شارالارىن اتقارۋ جونىندە ورتاق ءسوز سويلەپ، سىڭار جاقتىلى ماجبۇرلەۋ شاراسىن اتقارۋعا قارسى تۇراتىنىن قايتالاي دارىپتەدى ءارى قاتىستى مەملەكەتتەردى مۇنداي شارالاردى ءۇزىلدى – كەسىلدى كۇشىنەن قالدىرۋعا ۇندەدى.

فۋ سۇڭ مىنانى ءبىلدىردى: دۇنيە ءجۇزى ءوزارا شىرما – شاتۋ سىناقتارعا ءدوپ كەلۋدە، دامۋ ۇستىندەگى مەملەكەتتەر ەڭ الدىمەن اۋىر سوققىعا ۇشىراۋدا، حالىقارالىق قوعامنىڭ ىنتىماقتاسا سەلبەسۋدى كۇشەيتۋى، شىنايى، ءونىمدى كوپ جاقتىلىققا تاباندى بولۋى كەرەك. الايدا، دامۋ ۇستىندەگى مەملەكەتتەر مەن ولاردىڭ حالقى ءالى دە سىڭار جاقتىلى شارالاردىڭ كەرى اسەرىنە ۇشىراۋدا. وسىنداي سىڭار جاقتىلى ماجبۇرلەۋ شارالارى يەلىك ۇقىق تەڭدىگى جانە سەلبەسۋ پرينسيبىنە قايشى كەلىپ، باسقا مەملەكەتتەردىڭ ىشكى ىستەرىنە كيلىگۋ بولىپ تابىلادى، «بىرلەسكەن مەملەكەتتەر ۇيىمىنىڭ ۋستاۆىنداعى» باستى ماقسات پەن پرينسيپكە، سونداي – اق، حالىقارالىق زاڭعا قايشى كەلەدى، كوپ جاقتىلىق پەن حالىقارالىق قارىم – قاتىناستىڭ نەگىزگى ولشەمىنە قايشى كەلەدى.

فۋ سۇڭ بىلاي دەدى: سىڭار جاقتىلى ماجبۇرلەۋ شارالارى، سونداي – اق، ەكىنشى دارەجەلى جازالاۋ شارالارى مەن شەكتەن تىس بويسۇنۋ قازىرگى تاڭدا ادامگەرشىلىككە جانە ەكونوميكاعا ساياتىن سىناقتاردى ۋشىقتىرىپ، دۇنيە جۇزىندەگى ءوندىرىس پەن قامداۋ تىزبەگىنىڭ ورنىقتىلىعىنا، سونداي – اق، استىق، ەنەرگيا جانە فينانس حاۋىپسىزدىگىنە اۋىر كەسىرىن تيگىزۋدە، دۇنيە ءجۇزىنىڭ ەكونوميكالىق ءتارتىبى مەن قاتىستى مەملەكەتتەردىڭ باياندى دامۋ نىساناسىن ىسكە اسىرۋ جاعىندا جاساعان قۇلشىنىستارىن اۋىر دارەجەدە بۇلدىرۋدە. سىڭار جاقتىلى ماجبۇرلەۋ شارالارى ءومىر ءسۇرۋ ۇقىعى، دەنساۋلىق ۇقىعى، دامۋ ۇقىعى، تاربيەلەنۋ ۇقىعى قاتارلىلاردى قامتىعان بارلىق ۇقىقتارعا قايشى كەلىپ، نىساناداعى ەلدەردىڭ جوعارىداعى ۇقىقتاردى ىسكە اسىرۋ قۋاتىنا كەدەرگى بولۋدا. سىڭار جاقتىلى ماجبۇرلەۋ شارالارى مەملەكەتتەر مەن رايوندارعا ادامگەرشىلىك جاقتا اۋىر ىقپال جاساۋدا.

فۋ سۇڭ مىنانى ءبىلدىردى: ءبىز سىڭار جاقتىلى ماجبۇرلەۋ شارالارى مەن شەكتەن تىس بويسۇنۋدىڭ ىقپالعا ۇشىراعان مەملەكەتتەردىڭ شەتەل قارجىسى مەن تەحنيكاسىنا قول جەتكىزۋ قۋاتىن تەجەگەنىنە، مادەنيەت، كوركەمونەر، دەنە تاربيە، ساياحات، بارىس – كەلىس جاقتارىنا، سونداي – اق، حالىقتىق اۆياتسيانىڭ قاتىناس – تاسىمال سالاسىندا حالىقارالىق سەلبەستىك ورىستەتۋىنە كەدەرگى بولعانىنا نازار اۋدارىپ وتىرمىز.

فۋ سۇڭ مىنانى ءبىلدىردى: ءبىز سىڭار جاقتىلى ماجبۇرلەۋ شارالارىنا قارسى تۇراتىنىمىزدى قايتالاي دارىپتەيمىز ءارى قاتىستى مەملەكەتتەردى سىڭار جاقتىلى ماجبۇرلەۋ شارالارىن ءۇزىلدى - كەسىلدى كۇشىنەن قالدىرۋعا ۇندەيمىز. ءبىز ب م ۇ - نا مۇشە مەملەكەتتەردى، ب م ۇ جۇيەسىن جانە باسقا حالىقارالىق ۇيىمداردى جازالاۋعا ۇشىراعان مەملەكەتتەرگە قولداۋ كورسەتۋگە، ولاردىڭ قيىنشىلىقتى باسەڭدەتۋىنە كومەكتەسۋگە ۇندەيمىز. ءبىز حالىقارالىق قوعامدى سىڭار جاقتىلى ماجبۇرلەۋ شارالارىنىڭ اۋىر زاردابىنا وسكەلەڭ ءمان بەرۋگە، مۇنداي زاڭسىز ارەكەتتەرگە بىرگە قارسى تۇرۋعا قۋزايمىز. قازىرگى جاعدايدا، ءبىز ىنتىماقتاسا سەلبەسۋدى كۇشەيتۋىمىز، تەكە – تىرەس پەن جىكتەلۋگە قارسى تۇرۋىمىز، دۇنيە جۇزىلىك سىناقتارعا بىرگە توتەپ بەرۋىمىز، بارلىق ادامنىڭ ۇقىعىن ىلگەرىلەتۋىمىز جانە قورعاۋىمىز كەرەك.

كەلۋ قاينارى: حالىق تورابى