شي جينپيڭ ءۇندىستاننىڭ زۇڭليى موديمەن كەزدەستى

سول جەر ۋاقىتى 10 - ايدىڭ 23 - كۇنى مەملەكەت ءتوراعاسى شي جينپيڭ قازاندا بريكس ەلدەرى باسشىلارىنىڭ ديدارلاسۋىنا قاتىناسۋ كەزىندە ءۇندىستاننىڭ زۇڭليى موديمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

«حالىق گازەتى»، 10 - ايدىڭ 23 – كۇنى، رەسەي قازان (تىلشىلەر حان بيڭچىن، شياۋ شينشين). سول جەر ۋاقىتى 10 - ايدىڭ 23 - كۇنى مەملەكەت ءتوراعاسى شي جينپيڭ قازاندا بريكس ەلدەرى باسشىلارىنىڭ ديدارلاسۋىنا قاتىناسۋ كەزىندە ءۇندىستاننىڭ زۇڭليى موديمەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن ءۇندىستان ەكەۋى دە − وركەنيەتتى بايىرعى ەل، وركەندەپ كەلە جاتقان ءىرى ەل، دۇنيە ءجۇزىنىڭ وڭتۇستىگىنىڭ ماڭىزدى مۇشەلەرى، ەكەۋى دە ءوز ەلدەرىنىڭ وسىزامانداندىرۋ قۇرىلىسىنىڭ شەشۋشى كەزەڭىندە تۇر. جۇڭگو مەن ءۇندىستاننىڭ تاريح اعىمى مەن ەكى ەل قارىم - قاتىناسىنىڭ دامۋ بەتالىسىن دۇرىس يگەرۋى ەكى ەلدىڭ جانە ەكى ەل حالىقتارىنىڭ ءتۇبىرلى مۇددەسىنە ۇيلەسەدى. ەكى جاق بايلانىستى، سەلبەستىكتى كۇشەيتىپ، ستراتەگيالىق ءوزارا سەنىمدىلىكتى ارتتىرىپ، دامۋ ارمانىن جۇزەگە اسىرۋدا ءبىر - ءبىرىنىڭ تابىسىنان ۇلگى الۋى كەرەك. ەكى جاق تا حالىقارالىق جاۋاپكەرشىلىكتى ارقالاپ، قالىڭ وركەندەپ كەلە جاتقان ەلدەردىڭ بىرلەسىپ ءوزىن الۋەتتەندىرۋىنە ۇلگى كورسەتۋى، دۇنيە ءجۇزىنىڭ كوپ ۇيەكتەنۋىن، حالىقارالىق قارىم - قاتىناستىڭ دەموكراتيالانۋىن ىلگەرىلەتۋگە ۇلەس قوسۋى كەرەك.

شي جينپيڭ بىلاي دەپ باسا دارىپتەدى: جۇڭگو - ءۇندىستان قارىم - قاتىناسى، ءمانى جاعىنان العاندا، ءبىر ميلليارد 400 ميلليوننان استام حالىق سانى بار كورشىلەس، وركەندەپ كەلە جاتقان ەكى ءىرى ەلدىڭ قالاي تاتۋ ءوتۋ ماسەلەسى. دامۋ − جۇڭگو مەن ءۇندىستان ەكى ەلدىڭ قازىرگى ەڭ ۇلكەن ”ورتاق بولگىشى“. ەكى جاق جۇڭگو مەن ءۇندىستاننىڭ ”ءبىرىن - ءبىرى دامۋ ورايى ەتۋ، ءبىر - بىرىنە حاۋىپ توندىرمەۋ“، ”باسەكەدەگى قارسىلاس بولماۋ، قايتا سەلبەستىك سەرىكتەسى بولۋ“ سياقتى ماڭىزدى ورتاق تانىمدارىنا ۇزدىكسىز تاباندى بولىپ، دۇرىس ستراتەگيالىق تانىمعا تاباندى بولىپ، كورشى ءىرى ەلدەردىڭ تاتۋ - ءتاتتى ءوتۋىنىڭ، بىرگە دامۋىنىڭ نۇرلى جولىن بىرگە جوسپارلاۋى كەرەك.

مودي مىنالاردى ءبىلدىردى: ءۇندىستان – جۇڭگو قارىم - قاتىناسىنىڭ ورنىقتى دامۋىن ساقتاۋ ەكى ەل مەن ەكى ەل حالىقتارى جونىنەن توتەنشە ماڭىزدى، 2 ميلليارد 800 ميلليون حالىقتىڭ باقىتى مەن بولاشاعىنا سايادى، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگى مەن ورنىقتىلىعى جونىنەن دە توتەنشە ماڭىزدى. قازىرگى كۇردەلى حالىقارالىق جاعدايدا ەكى ءىرى بايىرعى وركەنيەت جانە ەكى ءىرى ەكونوميكالىق قوزعالتقىش رەتىندە، ءۇندىستان مەن جۇڭگونىڭ سەلبەستىگى ەكونوميكانىڭ قالپىنا كەلۋى مەن دۇنيە ءجۇزىنىڭ كوپ ۇيەكتەنۋىن جەبەۋگە ءتيىمدى. ءۇندىستان جاق جۇڭگو جاقپەن ستراتەگيالىق بايلانىستى كۇشەيتىپ، ستراتەگيالىق ءوزارا سەنىمدىلىكتى ارتتىرىپ، ءوزارا پايدا جەتكىزۋ سەلبەستىگىن كەڭەيتۋدى قالايدى. ءۇندىستان جاق جۇڭگو جاقتىڭ شاڭحاي سەلبەستىك ۇيىمىنا كەزەكتى ءتوراعا ەل بولۋ قىزمەتىن بار كۇشپەن قولداۋدى ءارى بريكس سياقتى كوپ جاقتى جۇلگەدە بايلانىستى، سەلبەستىكتى كۇشەيتۋدى قالايدى.

ەكى باسشى تاياۋدا ەكى جاقتىڭ ءجيى تىلدەسۋ ارقىلى شەكارا وڭىردەگى قاتىستى ماسەلەلەردى شەشۋدە ماڭىزدى ىلگەرىلەۋشىلىككە قول جەتكىزگەندىگىن بەلسەندى باعالادى. مودي ەكى ەل قارىم - قاتىناسىن جاقسارتۋ جانە دامىتۋ جونىندە ويلارىن ورتاعا سالىپ، ۇسىنىس قويدى، شي جينپيڭ مۇنى پرينسيپتىك جاقتان قۇپتايتىندىعىن ءبىلدىردى.

ەكى جاق ەكى ەلدىڭ شەكارا ماسەلەسى جونىندەگى ەرەكشە ۋاكىلدەر كەزدەسۋ مەحانيزمىنىڭ رولىن ويداعىداي ساۋلەلەندىرىپ، شەكارا ءوڭىردىڭ بەيبىتشىلىگىن، تىنىشتىعىن بىرگە قورعاپ، ءادىل دە ۇيلەسىمدى شەشۋ جوباسىن قاراستىرۋعا ماقۇل بولدى.

ەكى جاق ەكى ەلدىڭ سىرتقى ىستەر مينيسترلەرى مەن ءار دارەجەلى ءمانساپتىلارىنىڭ پىكىرلەسۋىن ورىستەتىپ، ەكى ەل قارىم - قاتىناسىنىڭ ورنىقتىلىق، دامۋ ارناسىنا ەرتەرەك ورالۋىن ىلگەرىلەتۋگە ماقۇل بولدى.

ەكى جاق كوپ جاقتى ورىنداردا قارىم - قاتىناس پەن سەلبەستىكتى كۇشەيتىپ، وركەندەپ كەلە جاتقان ەلدەردىڭ ورتاق مۇددەسىن قورعاۋعا ماقۇل بولدى.

ەكى جاق بىلاي دەپ قارادى: وسى رەتكى كەزدەسۋ سىندارلى جانە كەلەلى مانگە يە، جۇڭگو –ءۇندىستان قارىم - قاتىناسىنا ستراتەگيالىق جانە ۇزاق بولاشاقتىق تۇرعىدان مامىلە جاساپ جانە ونى ءبىر جاقتى ەتىپ، ناقتى الاۋىزدىقتاردىڭ ەكى ەل قارىم - قاتىناسىنىڭ جالپى جاعدايىنا ىقپال جاساۋىنا جول بەرمەي، ءوڭىردىڭ جانە دۇنيە ءجۇزىنىڭ بەيبىتشىلىگى مەن گۇلدەنۋىنە، دۇنيە ءجۇزىنىڭ كوپ ۇيەكتەنۋىن ىلگەرىلەتۋگە بەلسەندى ۇلەس قوسۋعا ماقۇلدىق بەرەمىز.

ساي چي، ۋاڭ ي قاتارلىلار كەزدەسۋدە بىرگە بولدى.

كەلۋ قاينارى: حالىق تورابى