نورو ۆيرۋسىمەن جۇعىمدالۋىنان ساقتانىڭىز 

جۋىردا ءىشىنارا وڭىرلەردەگى وقۋ – اعارتۋ مەكەمەلەرى مەكتەپ اۋلاسىندا نورو ۆيرۋسىمەن جۇعىمدالۋ وقيعاسىنىڭ تۋىلعانىن جاريالادى. اۋرۋدان ساقتانۋ جانە تىزگىندەۋ تاراۋلارىنىڭ ماماندارى مىنانى ەسكەرتەدى: بالادا قۇسۋ، ءىشى ءوتۋ قاتارلى اۋرۋ بەلگىلەرى بايقالسا، نورو ۆيرۋسىمەن جۇعىمدالۋىنان اباي بولىڭىزدار، اۋىر بولعاندا دەر كەزىندە ەمدەلگەنى ءجون. مەكتەپ پەن بالالار باقشاسى قاتارلى ادام شوعىرلانعان ورىندار جونىنەن ايتقاندا، بولمەلەردى جۇيەلى ديزەنفەكسيالاۋ مەن اۋانى الماستىرۋدى كۇندەلىكتى ويداعىداي ىستەۋ ءارى ادامداردىڭ دەنساۋلىعىن باقىلاپ تەكسەرۋدى كۇشەيتۋ، جۇعىمدالۋشىلاردىڭ اۋىرعان كۇيدە ساباققا كەلمەۋىنە، قىزمەتكە شىقپاۋىنا كەپىلدىك ەتۋ كەرەك.

مەملەكەتتىك اۋرۋدان ساقتانۋ – تىزگىندەۋ مەڭگەرمەسى جاريالاعان مالىمەتكە قاراعاندا، نورو ۆيرۋسى ستاكان فورمالى ۆيرۋسقا جاتادى، جۇعىمدالۋداعى دوزاسىنىڭ مولشەرى تومەن بولۋ، ۋىت ايداۋ ۋاقىتى ۇزاق بولۋ، سىرتقى ورتاعا قارسىلىق قۋاتى كۇشتى بولۋ قاتارلى بەلگىلەرى بار، شۇعىل اسقازان – ىشەك اۋرۋلارىن تۋدىراتىن ۇنەمى كەزدەسەتىن اۋرۋ قوزدىرعىشتاردىڭ ءبىرى. نورو ۆيرۋسىمەن جۇعىمدالعانداردا ۇنەمى بايقالاتىن اۋرۋ بەلگىلەرى: جۇرەگى اينۋ، قىزۋى ورلەۋ، ءىشى اۋرۋ جانە ءىشى ءوتۋ، بالالاردا بۇل اۋرۋدىڭ بەلگىسى قۇسۋدى نەگىز ەتەدى، ەرەسەكتەر اراسىندا ءىشى ءوتۋ بەلگىسى كوبىرەك بولادى، دايراعى سۇيىق نەمەسە سۋ سياقتى بولادى.

ودان قالاي ساقتانۋعا جانە ونى قالاي تەجەۋگە بولادى؟ بەيجيڭ قالالىق اۋرۋدان ساقتانۋ جانە ونى تىزگىندەۋ ورتالىعىنىڭ زەرتتەرمەنى جاڭ دايتاۋ بىلاي دەدى: نورو ۆيرۋسى، باستىسى، لاستانعان ازىق – تۇلىك نەمەسە سۋ قاتارلىلاردى تۇتىنۋ جولىمەن تارالادى. ودان ساقتانۋدا مىناداي بەس ءتۇرلى شاراعا نازار اۋدارۋ كەرەك: قولدىڭ تازالىعىن ساقتاۋ، تاماقتىڭ الدىندا، دارەتتەن كەيىن، ازىقتىقتاردى مانەرلەۋ الدىندا سابىنمەن جانە سۋمەن قولدى جۇيەلى تۇردە تازالاپ جۋۋ كەرەك؛ ازىق – تۇلىكتىڭ تازالىعىنا كوڭىل ءبولۋ، قايناعان سۋ ءىشۋ، پىسقان تاماق جەۋ كەرەك، كوكونىستەر مەن جەمىس – جيدەكتەردى ابدەن تازالاپ جۋۋ كەرەك؛ اۋرۋعا شالدىققان جاعدايدا، ناۋقاستانعان ادام ۇيدە دەمالۋى، كەمىندە اۋرۋ بەلگىسى بۇكىلدەي جويىلعاننان كەيىن دە 3 كۇن دەمالۋى كەرەك، وسى مەزگىلدە وتباسىنداعى باسقا ادامدارمەن مۇمكىندىگىنشە ارالىق ساقتاعانى، وتە – موتە، قارتتارمەن جانە سابيلەرمەن ارالىق ساقتاعانى ءجون؛ وتباسىندا ورتانى تازالاۋدى، ديزەنفەكسيالاۋدى عىلىمي تۇردە ويداعىداي ىستەپ، اۋىق - اۋىق تەرەزەنى اشىپ، اۋا الماستىرىپ تۇرعان ءجون؛ سالاماتتى تۇرمىس ءتاسىلىن ساقتاپ، دەنەنىڭ ۆيرۋسقا قارسىلىق قۋاتىن ارتتىرعان ءجون. (ءتىلشى گۋ تيانچىڭ)

كەلۋ قاينارى: حالىق تورابى