5 - رەتكى مەملەكەت بويىنشا ەكونوميكانى جاپپاي تەكسەرۋ ناتيجەسى جاريالاندى 

«حالىق گازەتى»، 12 - ايدىڭ 26 - كۇنى بەيجيڭ (تىلشىلەر لي شينپيڭ، ۋاڭ يۇنشان). 5 - رەتكى مەملەكەت بويىنشا ەكونوميكانى جاپپاي تەكسەرۋ ناتيجەسى 12 - ايدىڭ 26 - كۇنى جاريالاندى. جاپپاي تەكسەرۋ ەلىمىز ەكونوميكاسىنىڭ نەگىزىن جاپپاي انىقتاپ، ەلىمىز ەكونوميكاسىنىڭ جوعارى ساپالى دامۋىندا قول جەتكەن ىلگەرىلەۋشىلىكتەردى وبيەكتيۆ بەينەلەپ، ەكونوميكانىڭ جالپى مولشەرى، قۇرىلىم، ونىمدىلىك سياقتى شەشۋشى كورسەتكىشتەر ينفورماتسياسىنا يە بولدى.

جاپپاي تەكسەرۋ ناتيجەسىندە كورسەتىلۋىنشە، 2 - كاسىپ سالاسى مەن 3 - كاسىپ سالاسى ورىندارىنىڭ سانى زور مولشەردە ارتىپ، اناعۇرلىم كوپ كاسىپپەن شۇعىلدانۋشىلاردى قابىلداعان؛ كاسىپورىنداردىڭ مال - مۇلىك كولەمى ۇزدىكسىز كەڭەيىپ، شارۋاشىلىق كىرىسى ءبىرشاما تەز ارتىپ، عىلىم - تەحنيكادا جاڭالىق جاراتۋ قۋاتى ۇزدىكسىز جوعارىلاپ، ەڭبەك ءوندىرىس ونىمدىلىگى جوعارىلاعان؛ كاسىپ قۇرىلىمى ساپالىلانىپ، دارەجەسى جوعارىلاپ، سيفرلى ەكونوميكانىڭ دامۋى زورايىپ، وڭىرلىك دامۋدىڭ سايكەسىمدىلىگى، تەپە - تەڭدىگى ۇزدىكسىز كۇشەيىپ، 5 جىلدان بەرى ەلىمىزدىڭ جوعارى ساپالى دامۋىندا كورنەكتى ونىمدىلىككە قول جەتكەن.

2023 - جىلدىڭ سوڭىندا بۇكىل ەل بويىنشا 2 - كاسىپ جانە 3 - كاسىپ قيمىلىمەن شۇعىلداناتىن زاڭدىق تۇلعا ورنى 33 ميلليون 270 مىڭ بولىپ، 2018 - جىلدىڭ سوڭىنداعىدان ( 2018 - جىل − 4 - رەتكى مەملەكەت بويىنشا ەكونوميكانى جاپپاي تەكسەرۋ جىلى، تومەندە دە وسىلاي) 11 ميلليون 481 مىڭ كوبەيىپ، % 52.7 ارتقان؛ مەملەكەت بويىنشا 2 - كاسىپ سالاسى مەن 3 - كاسىپ سالاسىنداعى زاڭدىق تۇلعا ورىندارىندا كاسىپپەن شۇعىلدانۋشىلار 428 ميلليون 984 مىڭ ادام بولىپ، 2018 - جىلدىڭ سوڭىنداعىدان %11.9 ارتقان.

زەرتتەۋ - اشۋ تەبىنى ۇزدىكسىز ارتقان، 2023 - جىلى ەلىمىزدىڭ زەرتتەۋ جانە تاجىريبە جاساۋ، دامۋ قاراجاتى شىعىسى مەن شارۋاشىلىق كىرىسىنىڭ سالىستىرماسى %1.54 كە جەتىپ، 2018 - جىلداعىدان 0.31 پايىز جوعارىلاعان؛ 2023 - جىلى كولەم قالىپتاستىرعان ونەركاسىپ كاسىپورىندارىنىڭ زاڭدىق تۇلعا ورىندارىنىڭ پاتەنت ءوتىنىش ەتۋ مولشەرى ءبىر ميلليون 566 مىڭ بولىپ، 2018 - جىلداعىدان %63.6 ارتقان. جاڭادان گۇلدەنگەن شارۋاشىلىقتار قارىشتاپ دامىعان، 2023 - جىلدىڭ سوڭىندا بۇكىل ەل بويىنشا ستراتەگيالىق جاڭادان گۇلدەنگەن شارۋاشىلىق قيمىلدارىمەن شۇعىلداناتىن كولەمنەن جوعارى كاسىپورىندار 158 مىڭعا جەتىپ، جالپى كولەمدەنگەن ونەركاسىپ پەن قىزمەت وتەۋ كاسىبىندەگى سالىستىرماسى 5/1 دەن اسقان. جاسىل دامۋدىڭ قوزعاۋشى كۇشى نىعايىپ، 2023 - جىلى ەلىمىزدىڭ كۇن ەنەرگيالى باتەرياسى (فوتوۆولتتىق باتەريا)، جەل گەنەراتور اگراگاتتارىنىڭ ءونىم مولشەرى 2018 - جىلداعىدان جەكە - جەكە 4.9 ەسە، 7.4 ەسە ارتقان.

بۇدان سىرت، وسى رەتكى مەملەكەت بويىنشا ەكونوميكانى جاپپاي تەكسەرۋ تۇڭعىش رەت سيفرلى ەكونوميكانى تەكسەرۋ ناتيجەسىن قوستى. 2023 - جىلدىڭ سوڭىندا بۇكىل ەل بويىنشا سيفرلى ەكونوميكاداعى وزەكتى كاسىپورىن زاڭدىق ۋاكىلى 2 ميلليون 916 مىڭ بولىپ، كاسىپپەن شۇعىلدانۋشىلار 36 ميلليون 159 مىڭ ادام بولعان. تۇتاس جىلدا ورىندالعان شارۋاشىلىق كىرىسى 48 تريلليون 400 ميلليارد يۋان بولعان.

كەلۋ قاينارى: حالىق تورابى