شينجياڭ اۋىل شارۋاشىلىعىن، اۋىل – قىستاقتى وسىزامانداندىرۋ اياق الىسىن جەدەلدەتۋگە كۇش سالدى (سەنىمدى بەكەمدەپ، رەفورمانىڭ، دامۋدىڭ تىڭ ءورىسىن اشايىق)

شينجياڭ ۇيعۇر اۆتونوميالى رايونىنىڭ سانجى قالاسىنداعى شينجياڭ كايشى - ۋەي سۋلياۋ كاسىبى شەكتى جاۋاپكەرشىلىك سەرىكتەستىگىنە بارعانىمىزدا، سەحتا ماشينالار گۇرىلدەپ، جۇمىسشىلار سۋلياۋ جارعاق ءوندىرۋدى جەدەلدەتىپ جاتىپتى. ”15 گەنەراتور اگراگاتىنىڭ 24 ساعات بويى ءوندىرىسى تولاستامايدى، كۇندىك ءونىم مولشەرى 50 تونناعا جەتەدى، قازىر 5000 توننا سۋلياۋ جارعاق زاپاسىن دايىنداپ بولدىق“ دەدى ءوندىرىس سەحىنىڭ مەڭگەرۋشىسى لۋ فۋساي.

باس شۋجي شي جينپيڭ بىلاي دەپ اتاپ كورسەتتى: ”اۋىل شارۋاشىلىعىندا قۋاتتى ەل قۇرۋدىڭ نەگىزگى تالابى − اۋىل شارۋاشىلىعىن وسىزامانداندىرۋدى جۇزەگە اسىرۋ“. قازىر تارىم ويپاتىنىڭ ماقتا اتىزىنان التاي تاۋىنىڭ باۋرايىنداعى ءبيداي اتىزىنا دەيىن، تيانشان تاۋىنىڭ سولتۇستىك بوكتەرىندەگى زەردەلىلەنگەن اۋىل شارۋاشىلىق باقشاسىنان كۇنلۇن تاۋىنىڭ ەتەگىندەگى مايسا جەتىلدىرۋ كۇركەسىنە دەيىن، شينجياڭنىڭ جەر - جەرى ەگىس ۋاقىتىن، كوكتەمگى ەگىس دايىندىعىن مىقتى يگەرىپ، ءوندىرىس ونىمدىلىگىن ۇزدىكسىز جوعارىلاتىپ، اۋىل شارۋاشىلىق عىلىم - تەحنيكاسىنىڭ وسىزاماندانۋ دەڭگەيىن ۇزدىكسىز جوعارىلاتتى.

اۋىل شارۋاشىلىق عىلىم - تەحنيكا جابدىقتارىنىڭ تىرەگى كۇشەيتىلدى. 2 - ايدىڭ 11 - كۇنى اقسۋ ايماعى شايار اۋدانى قايلور قالاشىعى اۋىل شارۋاشىلىعى ماشينالارى سەلبەستىك كووپەراتيۆىنىڭ قامباسىندا بەيدوۋ جول نۇسقاۋ جۇيەسى ورناتىلعان شوفەرسىز سەلكا سىناقتان وتكىزىلىپ بولدى. سەلبەستىك كووپەراتيۆىنىڭ تەحنيگى احىمەت تۇرسىن ەكراندى ءتۇرتىپ ەدى، تۇقىم ءسىڭىرۋ تەرەڭدىگى، قاتار ارالىعى پارامەترلەرى لەزدە كورىندى، ”بۇرىن تاجىريبەگە سۇيەنىپ اۋىل شارۋاشىلىق ماشينالارىن مەڭگەرۋدە قاتەلىك پارقى زور بولاتىن، قازىر قولفوننىڭ قولدانىلمالى باعدارلاماسى ارقىلى دالدىكتى جوعارىلاتۋعا بولادى“.

سانجى مەملەكەتتىك اۋىل شارۋاشىلىق جوعارى، جاڭا تەحنيكا كاسىپ سالاسىنان ۇلگى كورسەتۋ رايونىنىڭ ەلەكتروندى ۇلكەن ەكرانىندا داقىلداردىڭ ءوسۋ ورتاسى، اۋىل شارۋاشىلىق اۋا رايىن باقىلاۋ سياقتى قاتىستى ساندى مالىمەتتەر اۋىق - اۋىق كورسەتىلىپ تۇردى. تاياۋ جىلداردان بەرى شينجياڭ وسى زامانعى اۋىل شارۋاشىلىعىندا سۋ ۇنەمدەۋ تەحنيكاسىن، سۋ مەن تىڭايتقىشتى ءبىر تۇلعالاندىرۋ تەحنيكاسىن ۇزدىكسىز جالپىلاستىرىپ، وسىمدىك قورعاۋ ۇشقىشسىز ۇشاعى سياقتى جاڭادان گۇلدەنگەن اۋىل شارۋاشىلىق جابدىقتارىن جالپىلاستىرىپ، تۇقىم جەتىلدىرۋ قابىلەتى مەن ساپا دەڭگەيىن جوعارىلاتىپ، زەردەلى اۋىل شارۋاشىلىعىن دامىتتى.

اۋات اۋدانىنداعى ءبىر جوعارى ولشەمدى ەگىس اتىزى نىسانىنىڭ قۇرىلىس ورنىندا بىرنەشە ءىرى تۇرپاتتى قازۋ ماشيناسى توعان قازىپ جاتىر، ءبىر اۆتوموبيلدەرگە تيەلگەن قۇبىرلار ورناتىلۋ الدىندا تۇر. ”جوعارى ولشەمدى ەگىنجاي قۇرىلىسى ەگىنجايدى كىشكەنەدەن ۇلكەيتىپ، بىتىراندىلىقتان شوعىرلانۋعا وزگەرتىپ، تۇتاس بارىستا ماشينالاسقان جۇمىس جۇرگىزۋدى جۇزەگە اسىرىپ، ەگۋدىڭ وزىندىك قۇنىن زور مولشەردە تومەندەتتى“ دەدى اۋات اۋدانى كاڭزى ماقتا ەگىنشىلىگى شارۋالار كاسىپتىك سەلبەستىك كووپەراتيۆىنىڭ مۇشەسى گو چاۋ.

شينجياڭ جيىنى 59 ميلليون 890 مىڭ مۋ جوعارى ولشەمدى ەگىنجاي سالىپ، ماڭگىلىك نەگىزگى ەگىنجايدى %72.8 كە جەتكىزدى، 2035 - جىلعا بارعاندا شارت - جاعدايى كەلەتىن ماڭگىلىك نەگىزگى ەگىنجايلاردى تۇگەلدەي جوعارى ولشەمدى ەگىنجايلارعا اينالدىرىپ، جوعارى ولشەمدى ەگىس اتىزدارىن جوعارى ونىمدىلىكپەن سۋ ۇنەمدەپ سۋارۋدى جاپپاي قامتۋدى جوسپارلادى.

اۋىل شارۋاشىلىق ونىمدەرىن مانەرلەۋ كاسىبىن كۇش سالا دامىتتى. جۇڭلياڭ تۇنحى توبى سانجى قىزاناق ونىمدەرى شەكتى سەرىكتەستىگىنىڭ ءوندىرىس سەحىندا نارت قىزىل قىزاناق تالداۋ، ۇنتاقتاۋ، الدىن الا قىزدىرۋ، تازا قويمالجىڭ ازىرلەۋ سياقتى بۋىندار ارقىلى قىزاناق قويمالجىڭىنا اينالىپ جاتتى، سەرىكتەستىك وندىرگەن قىزاناق ءدانى مايى، قىزاناق قىزىل پيگمەنتى سياقتى جىنتىكتەي مانەرلەنگەن ۇستەمە قۇنى جوعارى ونىمدەر ەل ءىشى - سىرتىنداعى بازارلاردا ءوتىمدى بولدى.

2 - ايدىڭ 7 - كۇنى اۆتونوميالى رايوندىق پارتكومنىڭ اۋىل - قىستاق قىزمەتى ماجىلىسىندە: 2025 - جىلى شينجياڭنىڭ استىق ءوندىرىس قۋاتىن تاعى دا ءبىر ميلليارد جىڭنان استام ارتتىرىپ، اۋىل شارۋاشىلىعىن، اۋىل - قىستاقتى وسىزامانداندىرۋدى جەدەل ىلگەرىلەتىپ، شينجياڭنىڭ اۋىل شارۋاشىلىق نەگىزىن اناعۇرلىم بەكەمدەپ، اۋىل - قىستاق ءوڭىرىن اناعۇرلىم گۇلدەندىرىپ، شارۋالاردىڭ تۇرمىسىن اناعۇرلىم شالقىتۋدى ىلگەرىلەتۋ كەرەكتىگى ايقىندالدى. اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسى پارتيا باسشىلىق گرۋپپاسىنىڭ شۋجيى، مەڭگەرمە باستىعىنىڭ ورىنباسارى شيە يىڭجوۋ بىلاي دەپ تانىستىردى: شينجياڭ اۋىل شارۋاشىلىعى ونىمدەرىن مانەرلەۋ كاسىبىنىڭ تيبىن وزگەرتىپ، دارەجەسىن جوعارىلاتۋ ارەكەتىن اتقارىپ، ءۇش كاسىپتىڭ ىشكەرىلەي توعىسۋىن جەبەپ، اۋىل - قىستاقتىڭ ەرەكشەلىككە يە كاسىپ سالاسى ءونىم قۇنى ءبىر ميلليارد يۋاننان اساتىن ءبىر توپ قالاشىق پەن 100 ميلليون يۋاننان اساتىن ءبىر توپ قىستاقتى جەتىلدىرەدى، سونىمەن بىرگە، اۋىل شارۋاشىلىعى ونىمدەرى بازارىن اشۋدى جانە ايگىلى ماركا ساۋداسىن تەرەڭدەتىپ، ونىمدەردىڭ ۇلكەن بازاردى يەلەۋىنە، جاقسى باعادا ساتىلۋىنا مۇمكىندىك جاسايدى.

كەلۋ قاينارى: حالىق تورابى