بەيزاتتىق مادەنيەت مۇرالارىنا مۇراگەرلىك ەتىپ، مادەنيەت تامىرىن قورعايىق (رەفورمانى ونان ارى تەرەڭدەتىپ، ەكپىندەي ىلگەرىلەۋدىڭ جاڭا ساپارى . ۋاكىلدەر مەن مۇشەلەردىڭ مىندەت وتەۋ حيكاياسى)

”كوكتەم مەرەكەسىن“ بەيزاتتىق مادەنيەت مۇرالارى قاتارىنا ەنگىزۋگە ءوتىنىش بەرگەن كەزدەگى ىستەردى اڭگىمەلەگەندە، مەملەكەتتىك حالىق قۇرىلتايى ۋاكىلى، جۇڭگو قوعامدىق عىلىمدار اكادەمياسى ۇلتتىق ادەبيەتتى زەرتتەۋ بولىمشەسىنىڭ اعا زەرتتەرمەنى باموچۇيبۋمو: ”’كوكتەم مەرەكەسى‘ ادامزاتتىڭ بەيزاتتىق مادەنيەت مۇرالارىنىڭ قاتارىنداعى ۋاكىلدىك تۋىندىلار تىزىمدىگىنە ەنگىزىلگەندىگىن جاريالاعان ساتتە، ۋاكىلدەر ۇيىرمەمىزدىڭ ءاربىر مۇشەسى شەكسىز قۋانىشقا بولەندى“ دەدى.

سىچۋاننىڭ لياڭشان يزۋ اۆتونوميالى وبلىسىنان كەلگەن يزۋ وقىمىستىسى وتكەن ءبىر جىلداعى مىندەت وتەۋ قىزمەتى بارىسىندا ءوزىنىڭ بەيزاتتىق مادەنيەت مۇرالارىن قورعاۋ سالاسىنداعى عىلىمي زەرتتەۋ جاعىنداعى ارتىقشىلىعىن ساۋلەلەندىردى. نەگىزگى ساتىدا سول جەرگە بارىپ تەكسەرۋ ـ زەرتتەۋ جۇرگىزۋدەن بەيزاتتىق مادەنيەت مۇرالارىن قورعاۋعا ات سالىسۋعا، ونان حالىقارالىق سەلبەستىك مەحانيزمىن وكشەلەي زەرتتەۋگە دەيىن، بارلىق جەردەن ونىڭ بەينەسىن كورۋگە بولادى. لياڭشان يزۋ اۆتونوميالى وبلىسى مەيگۋ اۋدانىندا، بەيزاتتىق مادەنيەت مۇرالارىن جۇيەلى قورعاۋ ارقىلى قالا ـ قالاشىق قۇرىلىسى مەن اۋىل ـ قىستاقتى جاپپاي گۇلدەندىرۋگە قالاي دەم بەرۋدى توڭىرەكتەي وتىرىپ، جەرگىلىكتى ۇكىمەت ورنىنىڭ مادەنيەت پەن ساياحاتتى توعىستىرۋدى جوسپارلاۋ نىسانى جونىندە اقىل ـ كەڭەس بەردى؛ حيلۇڭجياڭنىڭ حيحى، ۇلكەن ھىنگان قاتارلى جەرلەرىندە ارناۋلى تەكسەرۋ ـ زەرتتەۋگە قاتىناسىپ، ۇلتتىق بەيزاتتىق مادەنيەت مۇرالارىن قورعاۋدىڭ قازىرگى جاعدايىن باقىلادى...

مىندەت اتقارۋ بارىسىندا تەكسەرۋ ـ زەرتتەۋ جۇرگىزۋ جانە زاڭ اتقارۋ جاعدايىن تەكسەرۋگە قاتىناسۋ ارقىلى باموچۇيبۋمو بەيزاتتىق مادەنيەت مۇرالارىن ءبىر تۇتاس قورعاۋدا قول جەتكىزگەن جەتىستىكتەرگە كۋا بولدى، سونىمەن بىرگە، بەيزاتتىق مادەنيەت مۇرالارىن جالعاستىرۋ، دامىتۋ بارىسىنداعى كەيبىر ماسەلەلەردى دە بايقادى. باموچۇيبۋمو ”كەيبىر جەرلەردە بەيزاتتىق مادەنيەت مۇرالارىن شەكتەن تىس ساۋدالاندىرۋ قۇبىلىسى جارىققا شىعىپ، بەيزاتتىق مادەنيەت مۇرالارىن جەلەۋگە اينالدىرعان؛ كەيبىر توراپتار، اقپارات قۇرالدارى جۇڭگونىڭ بەيزاتتىق مادەنيەت مۇرالارىنىڭ بەلگىسىن بەتالدى پايدالانىپ، بەيزاتتىق مادەنيەت مۇرالارى قاتارىنداعى ۋاكىلدىك نىسانداردىڭ اتىن جامىلعان، باسقا ماقساتتا پايدالانعان، ءتىپتى جارىس وتكىزۋ، كۋالىك تاراتۋ دەگەن اتپەن زاڭسىز ولجاعا يە بولعان، مۇنداي جاعدايدى، ءسوز جوق، قاتاڭ باسقارۋ كەرەك“ دەدى.

بيىلعى ەكى ماجىلىستە، باموچۇيبۋمو سيفرلى ورتادا بەيزاتتىق مادەنيەت مۇرالارىن قورعاۋ مەحانيزمىن كەمەلدەندىرۋگە قاتىستى ۇسىنىسىن تاپسىرماقشى.

باموچۇيبۋمو: ”قورعاۋدى ءبىرىنشى ورىنعا قويۋعا، مۇراگەرلىك ەتۋدى الدىمەن ويلاستىرۋعا تاباندى بولىپ، قورعاۋ مەن پايدالانۋدىڭ، قورعاۋ مەن دامىتۋدىڭ، قورعاۋ مەن اشۋدىڭ قاتىناسىن دۇرىس ءبىر جاقتى ەتىپ، بەيزاتتىق مادەنيەت مۇرالارىن بۇرمالاۋدان جانە بەتالدى پايدالانۋدان ساقتانۋ كەرەك“ دەدى.

كەلۋ قاينارى: حالىق تورابى