شينجياڭ ”ءنارلى تاعام“ قوسىمشا قاراجاتىنىڭ ولشەمىن جوعارىلاتىپ، ءبىر ميلليون 873 مىڭ 800 وقۋشىعا تيىمدىلىك جەتكىزدى 

انار بۇلت \ شينجياڭ گازەتىنىڭ ءتىلشىسى جاۋ شييا حابارلايدى. ءتىلشىنىڭ 2 - ايدىڭ 24 - كۇنى شينجياڭ ۇيعۇر اۆتونوميالى رايوندىق وقۋ - اعارتۋ مەڭگەرمەسىنەن ۇعىسۋىنشا، بيىل كوكتەمگى وقۋ ماۋسىمىنان باستاپ، شينجياڭدا ”ءنارلى تاعاممەن“ ازىقتاندىرۋ جاعىندا بەرىلەتىن قوسىمشا قاراجاتتىڭ ولشەمى مەملەكەت جاعىنان بەرىلەتىن قوسىمشا قاراجات نەگىزىندە ءار وقۋشىعا كۇنىنە 2 يۋان ارتتىرىلادى، قوسىمشا قاراجات ولشەمى بۇرىنعى 5 يۋاننان 7 يۋانعا جوعارىلاتىلىپ، اۋىل – قىستاقتارداعى ءبىر ميلليون 873 مىڭ 800 وقۋشى يگىلىككە كەنەلەدى.

وسى رەت ولشەمدى 2 يۋان جوعارىلاتۋداعى ماقسات —وقۋشىلاردىڭ ازىقتانۋ قۇرىلىمىن ونان ارى ساپالىلاندىرىپ، وقۋشىلاردىڭ ءتىپتى دە جەتكىلىكتى قورەكتىككە يە بولۋىنا كەپىلدىك ەتۋ. تۇسكى تاماق فورماسىندا ەت، جۇمىرتقا، ءسۇت ونىمدەرى جانە جەمىس - جيدەك، كوكونىس قاتارلىلارمەن قامداۋ جيىلىگى مەن مولشەرى ارتتىرىلىپ، وقۋشىلارعا ءار كۇنى قاجەتتى بەلوك، ۆيتامين، مينەرال زاتتار سياقتى قورەكتىك ەلەمەنتتەردىڭ جەتكىلىكتى بولۋىنا كەپىلدىك ەتىلەدى.

ۇعىسۋعا قاراعاندا، ولشەمدى جوعارىلاتۋعا قاجەتتى قاراجاتتى تياناقتاندىرۋعا كەپىلدىك ەتۋ ءۇشىن، اۆتونوميالى رايوندىق وقۋ – اعارتۋ مەڭگەرمەسى اۆتونوميالى رايوندىق دامۋ – رەفورما كوميتەتى، قازىنا مەڭگەرمەسى قاتارلى قاتىستى تاراۋلارمەن بىرگە قاتىستى ۇقتىرۋلاردى بىرلەسىپ باسىپ تاراتىپ، جەر ـ جەردەن نەگىزگى تۇلعالىق جاۋاپكەرشىلىكتى تياناقتاندىرىپ، جاۋاپكەرشىلىك پەن ۇقىق بىردەي بولۋ سىندى قىزمەت مەحانيزمىن اقاۋسىزداندىرىپ، مەكتەپ اسحاناسى مەن زاتپەن قامدايتىن كاسىپورىنداردى باقىلاۋدى كۇشەيتىپ، ازىق ـ تۇلىك ماتەريالدارىن ساتىپ الۋ، ساقتاۋ، مانەرلەۋ تۇيىندەرىنەن جەتكىزىپ بەرۋگە دەيىنگى تۇتاس بارىستى قاتاڭ مەڭگەرىپ، ازىق ـ تۇلىك حاۋىپسىزدىگى مەن ساپاسىنا كەپىلدىك ەتىپ، اتقارۋ بارىسىندا جولىققان ماسەلەلەر مەن قيىنشىلىقتاردى دەر كەزىندە شەشۋدى، حالىققا تيىمدىلىك جاساۋ ساياساتىنىڭ وقۋشىلارعا شىنايى تيىمدىلىك جەتكىزۋىنە كەپىلدىك ەتۋدى تالاپ ەتكەن.

اۋىل ـ قىستاقتاعى مىندەتتى وقۋ – اعارتۋ كەزەڭىندەگى وقۋشىلاردىڭ قورەكتەنۋىن جاقسارتۋ جوسپارى — پارتيا مەن ۇكىمەتتىڭ اۋىل ـ قىستاقتاعى وقۋشىلاردىڭ دەنە قۋاتىن، دەنساۋلىعىن جوعارىلاتۋ ءۇشىن اتقارعان حالىق تۇرمىسىنا ساياتىن ينجەنەرياسى، بۇل جوسپار 2012 ـ جىلى شينجياڭدا اتقارىلعاننان بەرى، ءار ۇلت وقۋشىلارى پارتيا مەن ۇكىمەتتىڭ مەيىرىن شىنايى سەزىندى. شينجياڭ ۇيعۇر اۆتونوميالى رايونى ”ءنارلى تاعامدى“ جاقسارتۋ جوسپارىنىڭ كولەمىن ۇزدىكسىز كەڭەيتىپ، قازىر 42 اۋدان، قالا مەملەكەتتىڭ، جەرگىلىكتى ورىننىڭ ”ءنارلى تاعام“ جوسپارىنا ەنگىزىلدى.

كەلۋ قاينارى: حالىق تورابى