اۆياتسيا ونەركاسىپ توبى پارتگرۋپپاسىنىڭ بۇرىنعى شۋجيى، باس جوراسى تان رۇيسۇڭ تارتىپكە، زاڭعا اۋىر قايشىلىق جاساعاندىقتان پارتيادان شىعارىلدى

شينحۋا اگەنتتىگىنىڭ 2 – ايدىڭ 24 – كۇنى بەيجيڭنەن بەرگەن حابارى. ج ك پ ورتالىق كوميتەتىنىڭ بەكىتۋىمەن، ورتالىق ءتارتىپ تەكسەرۋ كوميتەتى، مەملەكەتتىك باقىلاۋ - تەكسەرۋ كوميتەتى جۇڭگو اۆياتسيا ونەركاسىپ توبى شەكتى سەرىكتەستىگى پارتگرۋپپاسىنىڭ بۇرىنعى شۋجيى، باس جوراسى تان رۇيسۇڭنىڭ تارتىپكە، زاڭعا اۋىر قايشىلىق جاساۋ ماسەلەسىنە دەلو تۇرعىزىپ، تەكسەرۋ جۇرگىزدى.

تەكسەرۋ ارقىلى مىنالار انىقتالدى: تان رۇيسۇڭ مۇرات - سەنىمنەن جۇرداي بولىپ، اۋەلگى ماقساتتان، بورىشتان بەزىپ، ۇيىمنىڭ تەكسەرۋىنە قارسى شىعىپ، قۇراپاتتىق ارەكەتىمەن شۇعىلدانعان؛ ورتالىقتىڭ سەگىز ءتۇرلى بەلگىلەمەسىنىڭ رۋحىنا قايشىلىق جاساپ، ۇكىمەت قىزمەتىن ءادىل اتقارۋعا ىقپال جاساۋى مۇمكىن بولعان قوناعاسىنى قابىلداعان؛ ۇيىمدىق پرينسيپكە قايشىلىق جاساپ، ۇيىم حات ارقىلى سۇراستىرعاندا ماسەلەنى شىنايى تۇسىندىرمەگەن، قىزمەتكەر قابىلداۋ جۇمىسى قاتارلى جاقتارىندا باسقالارعا پايدا جەتكىزگەن؛ بەلگىلەمەگە قايشى تارتۋ – تارالعى العان، ۇقىعىنا سۇيەنىپ ناپسىقۇمارلىقا باسقان؛ مۇرالدىق جاقتان ازعىنداعان؛ ءتارتىپ پەن زاڭنىڭ تومەنگى شەگىنەن اسىپ، ”اسكەري ونەركاسىپكە سۇيەنىپ اسكەري ونەركاسىپتى تۇرالاتىپ“، قىرۋار الەۋمەتتىك مال - مۇلىكتى قىمقىرعان؛ جالپىلىق ۇقىقتى جەكە باسىنىڭ مۇددەسىن كوزدەيتىن قۇرالعا اينالدىرىپ، ۇقىق - اقشا ساۋداسىمەن بارىنشا شۇعىلدانعان، قىزمەت قولايلىلىعىنان پايدالانىپ، باسقالاردىڭ كاسىپورىننىڭ ءتۇزىلىسىن وزگەرتىپ بىرىكتىرىپ ساتىپ الۋى، نىساندى كوتەرمەگە الۋى، جۇمىسشى - قىزمەتكەرلەردى قابىلداۋ سياقتى جۇمىستارىنا پايدا جەتكىزىپ، ەرەكشە مول زاڭسىز مال – مۇلىك العان.

تان رۇيسۇڭ پارتيانىڭ ساياسي تارتىبىنە، ۇيىمدىق تارتىبىنە، پاكتىك تارتىبىنە جانە تۇرمىستىق تارتىبىنە اۋىر قايشىلىق جاساپ، قىزمەت جاعىندا زاڭعا اۋىر قايشىلىق جاساعان ءارى قيانات جاساۋ، پارا الۋ سياقتى قىلمىستارعا شاتىلعان، ونىڭ ۇستىنە پارتيا 18 - قۇرىلتايىنان كەيىن دە تيىلماعان، قولىن تارتپاعان، سيپاتى اۋىر، ىقپالى ناشار، قاتاڭ ءبىرجاقتى ەتۋ كەرەك. «جۇڭگو كوممۋنيستىك پارتياسىنىڭ ءتارتىپ جازاسى ەرەجەسى»، «جۇڭحۋا حالىق رەسپۋبليكاسىنىڭ باقىلاۋ - تەكسەرۋ زاڭى»، «جۇڭحۋا حالىق رەسپۋبليكاسىنىڭ ۇكىمەت قىزمەتكەرلەرىن مىندەتتىك جاقتان جازالاۋ زاڭى» قاتارلى قاتىستى بەلگىلەمەلەرگە ساي، ورتالىق ءتارتىپ تەكسەرۋ كوميتەتى تۇراقتى كوميتەتى ءماجىلىسىنىڭ اقىلداسۋى ءارى ج ك پ ورتالىق كوميتەتىنىڭ بەكىتۋى ارقىلى تان رۇيسۇڭعا پارتيادان شىعارۋ جازاسىن بەرۋدى ۇيعاردى؛ بەلگىلەمە بويىنشا ونىڭ يگىلىكتەنەتىن مامىلەسىن كۇشىنەن قالدىردى؛ تارتىپكە، زاڭعا قايشىلىق جاساپ تاپقان تابىسىن ءمۇسادىرالادى؛ ونىڭ قىلمىسقا ساياتىن ماسەلەلەرىن پروكۋراتۋرا ورگاندارىنىڭ زاڭ بويىنشا تەكسەرىپ ايىپتاۋىنا وتكىزىپ بەرەدى، وعان ساياتىن مال - مۇلىكتى بىرگە وتكىزىپ بەرەدى.

كەلۋ قاينارى: حالىق تورابى