شي جينپيڭ ۆەنەسۋەلانىڭ زۇڭتۇڭى مادۋرومەن كەزدەستى

سول جەر ۋاقىتى 5 - ايدىڭ 9 - كۇنى كەشتە مەملەكەت ءتوراعاسى شي جينپيڭ ماسكەۋدە سوۆەت وداعى ۇلى وتان سوعىسى جەڭىسكە جەتكەندىگىنىڭ 80 جىلدىعىن قۇتتىقتاۋ سالتىنا قاتىناسقان كەزدە ۆەنەسۋەلانىڭ زۇڭتۇڭى مادۋرومەن كەزدەستى.

سۋرەتتى شينحۋا اگەنتتىگىنىڭ ءتىلشىسى جاڭ ليڭ تۇسىرگەن

«حالىق گازەتى»، 5 - ايدىڭ 9 - كۇنى، ماسكەۋ (تىلشىلەر ۋاڭ رۇڭ، جۋ شياۋشي). سول جەر ۋاقىتى 5 - ايدىڭ 9 - كۇنى كەشتە مەملەكەت ءتوراعاسى شي جينپيڭ ماسكەۋدە سوۆەت وداعى ۇلى وتان سوعىسى جەڭىسكە جەتكەندىگىنىڭ 80 جىلدىعىن ەسكە ءتۇسىرۋ سالتىنا قاتىناسقان كەزدە ۆەنەسۋەلانىڭ زۇڭتۇڭى مادۋرومەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن ۆەنەسۋەلا − ءوزارا سەنەتىن، بىرگە داميتىن جاقسى سەرىكتەر، ەكى جاق حالىقارالىق جاعدايدىڭ وزگەرىسى بارىسىندا مىزعىماس دوستىق ورناتتى. 2023 - جىلى ءبىز جۇڭگو مەن ۆەنەسۋەلانىڭ بارلىق جاعدايدا بىردەي ستراتەگيالىق سەرىكتەستىك قارىم - قاتىناسىن ورناتۋدى بىرگە جاريالاعاننان بەرى ەكى جاقتىڭ ءار سالاداعى، ءار جىكتەگى بارىس - كەلىسى جيىلەپ، ەكى جاقتى ساۋدا سوماسى ۇزدىكسىز ارتىپ، قارجى قوسۋ سەلبەستىگىندە، گۋمانيتارلىق اۋىس - كۇيىستە تىڭ ىلگەرىلەۋشىلىككە قول جەتكىزىلىپ، جۇڭگو مەن ۆەنەسۋەلانىڭ دوستىعى جۇرت جۇرەگىنە تەرەڭ ۇيالادى. جۇڭگو جاق ۆەنەسۋەلامەن قارىم - قاتىناسىنا باستان - اياق ستراتەگيالىق دەڭگەيدەن جانە ۇزاق بولاشاقتىق تۇرعىدان قارايدى جانە ونى دامىتادى، ۆەنەسۋەلا جاقتىڭ مەملەكەتتىڭ يەلىك ۇقىعىن، ۇلتتىڭ ار - نامىسىن، قوعام ورنىقتىلىعىن قورعاۋىن بۇرىنعىداي باتىل قولدايدى، ۆەنەسۋەلا جاقپەن ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ءار سالاداعى ناقتى سەلبەستىكتى ۇزدىكسىز تەرەڭدەتىپ، جۇڭگو - ۆەنەسۋەلا قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، ەكى ەل حالقىنا ءتىپتى دە جاقسى باقىت جاراتۋدى قالايدى. جۇڭگو جاق ۆەنەسۋەلا قاتارلى لاتىن امەريكاسى ەلدەرىمەن بىرگە بىرلەسكەن مەملەكەتتەر ۇيىمىن وزەك ەتكەن حالىقارالىق جۇيەنى جانە حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، جۇڭگو - لاتىن امەريكاسى تاعدىرلاس ورتاق تۇلعاسى قۇرىلىسىنىڭ ورنىقتى، باياندى دامۋىن ىلگەرىلەتۋدى قالايدى.

مادۋرو مىنالاردى ءبىلدىردى: جۇڭگو − ۆەنەسۋەلانىڭ ۇلى دوسى، جۇڭگو جاقتىڭ ەجەلدەن بەرى ۆەنەسۋەلانىڭ مەملەكەتتىڭ يەلىك ۇقىعىن قورعاۋىنا، ەكونوميكانىڭ، قوعامنىڭ دامۋىن جۇزەگە اسىرۋىنا قالتقىسىز قولداۋ كورسەتىپ، كومەكتەسىپ كەلگەندىگىنە العىس ايتامىن. ۆەنەسۋەلا جاق جۇڭگو جاقپەن بارلىق جاعدايدا بىردەي ستراتەگيالىق سەرىكتەستىك قارىم - قاتىناستى كۇشەيتىپ، ساۋدا، ەنەرگيا، اۋىل شارۋاشىلىعى، عىلىم - تەحنيكا، وقۋ - اعارتۋ سياقتى سالالارداعى سەلبەستىكتى جيىلەتىپ، اناعۇرلىم كوپ ناقتى جەتىستىكتەرگە قول جەتكىزىپ، ەكى ەل حالقىن اناعۇرلىم ويداعىداي يگىلىككە كەنەلتۋدى كۇتەدى. ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋ ۇستانىمى دۇنيە ءجۇزىنىڭ بەيبىت دامۋىنا نۇرلى بولاشاق اشتى.

ۆەنەسۋەلا جاق جۇڭگو جاقپەن سايكەسۋدى، سەلبەسۋدى كۇشەيتىپ، كوپ جاقتىلىققا تاباندى بولىپ، حالىقارالىق ادىلدىكتى، تۋراشىلدىقتى قورعاپ، حالىقارالىق قوعامنىڭ ورتاق مۇددەسىن قورعاۋدى قالايدى.

ساي چي، ۋاڭ ي قاتارلىلار قاتىناستى.