رەسەيدەگى مەملەكەتتىك ساپارىن تابىسپەن اياقتاتىپ، سوۆەت وداعىنىڭ ۇلى وتان سوعىسىنىڭ جەڭىسكە جەتكەندىگىنىڭ 80 جىلدىعىن اتاپ وتۋگە ارنالعان قۇتتىقتاۋ سالتىنا قاتىناسقان سوڭ شي جينپيڭ بەيجيڭگە قايتىپ كەلدى

«حالىق گازەتى»، 5 - ايدىڭ 10 - كۇنى، بەيجيڭ. 5 - ايدىڭ 10 - كۇنى كەشتە مەملەكەت ءتوراعاسى شي جينپيڭ رەسەيدەگى مەملەكەتتىك ساپارىن تابىسپەن اياقتاتىپ، سوۆەت وداعى ۇلى وتان سوعىسى جەڭىسكە جەتكەندىگىنىڭ 80 جىلدىعىن اتاپ ءوتۋ سالتىنا قاتىناسقاننان كەيىن بەيجيڭگە قايتىپ كەلدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترى ۋاڭ ي قاتارلى ساپارلاستارى سول ۇشاقپەن بىرگە قايتىپ كەلدى.

«حالىق گازەتى»، 5 - ايدىڭ 10 - كۇنى، ماسكەۋ (تىلشىلەر ليۋ شاۋحۋا، لي جيانگۋاڭ). سول جەر ۋاقىتى 5 - ايدىڭ 10 - كۇنى تۇستەن بۇرىن مەملەكەت ءتوراعاسى شي جينپيڭ رەسەيدەگى مەملەكەتتىك ساپارىن اياقتاتىپ، سوۆەت وداعى ۇلى وتان سوعىسى جەڭىسكە جەتكەندىگىنىڭ 80 جىلدىعىن اتاپ وتۋگە ارنالعان قۇتتىقتاۋ سالتىنا قاتىناسقان سوڭ بەيجيڭگە قايتتى.

ماسكەۋدەن اتتاناردا رەسەي زۇڭليىنىڭ ورىنباسارى چەرنەشەنكو قاتارلى ۇكىمەتتىڭ جوعارى دارەجەلى ءمانساپتىلارى اۋەجايعا بارىپ اتتاندىرىپ سالدى.

رەسەي جاق اۋەجايدا شي جينپيڭگە ارناپ اتتاندىرۋ سالتىن وتكىزدى. اسكەري وركەستر جۇڭگو مەن رەسەيدىڭ مەملەكەت ءانىن ورىندادى. شي جينپيڭ قۇرمەت قاراۋىلىن كوزدەن كەشىردى.

شي جينپيڭ وتىرعان ارناۋلى ۇشاق ۇشقاننان كەيىن رەسەي اۋە ارمياسىنىڭ سوعىس ۇشاعى اۋەگە كوتەرىلىپ قورعادى.

اۋەجايعا بارا جاتقان جولدا سول جەردەگى جۇرتشىلىق، سونداي - اق جۇڭگو قارجىلاندىرعان كاسىپورىندار مەن سوندا وقىپ جاتقان جۇڭگولىق وقۋشىلاردىڭ ۋاكىلدەرى جولدىڭ ەكى جاعىندا جۇڭگو مەن رەسەيدىڭ مەملەكەت تۋىن بۇلعاپ، شي جينپيڭنىڭ رەسەيدەگى ساپارىنىڭ تولىق تابىستى بولعاندىعىن قىزۋ قۇتتىقتادى.