جۇڭگو مۇناي - تابيعي گاز توبى شەكتى سەرىكتەستىگى پارتگرۋپپاسىنىڭ بۇرىنعى شۋجيى، باس جوراسى ۋاڭ يليننىڭ پارا الۋ دەلوسىنا ءبىرىنشى سوتتا ۇكىم جاريالادى

شينحۋا اگەنتتىگىنىڭ 5 – ايدىڭ 13 - كۇنى كوكحوتتان بەرگەن حابارى. 2025 ـ جىلى 5 – ايدىڭ 13 – كۇنى ىشكى موڭعۇل اۆتونوميالى رايونى وردوس قالالىق ورتا دارەجەلى حالىق سوت مەكەمەسى 1 ـ سوتتا جۇڭگو مۇناي - تابيعي گاز توبى شەكتى سەرىكتەستىگى پارتگرۋپپاسىنىڭ بۇرىنعى شۋجيى، باس جوراسى ۋاڭ يليننىڭ پارا الۋ دەلوسىنا اشىق ۇكىم شىعارىپ، ايىپكەر ۋاڭ يليندى پارا الۋ قىلمىسى بويىنشا 13 جىلدىق مەرزىمدى قاماۋ جازاسىنا ۇكىم ەتتى، وعان قوسا 3 ميلليون يۋان اقشالاي ايىپ سالدى؛ ۋاڭ يليننىڭ قىلمىس وتكىزىپ تاپقان مال - مۇلكى مەن ءوسىمىن زاڭ بويىنشا قۋزاپ قايتارىپ الىپ، مەملەكەت قازىناسىنا تاپسىرادى.

تەكسەرۋ ارقىلى مىنالار انىقتالدى: 1996 - جىلدان 2020 - جىلعا دەيىن ايىپكەر ۋاڭ يلين شينجياڭ مۇناي باسقارۋ مەكەمەسى بارلاۋ - اشۋدى زەرتتەۋ ورنى پارتكومىنىڭ ورىنباسار شۋجيى، مەكەمە باستىعى، شينجياڭ مۇناي باسقارۋ مەكەمەسى پارتكومىنىڭ تۇراقتى مۇشەسى، ورىنباسار مەكەمە باستىعى، جۇڭگو مۇناي - تابيعي گاز شەكتى جارنا سەرىكتەستىگى شينجياڭ مۇناي الابى بولىمشە سەرىكتەستىگى پارتكومىنىڭ شۋجيى، باس مەڭگەرۋشىسى، جۇڭگو مۇناي - تابيعي گاز توبى سەرىكتەستىگى پارتگرۋپپاسىنىڭ مۇشەسى، ورىنباسار باس مەڭگەرۋشىسى، جۇڭگو تەڭىز ـ مۇحيت مۇنايى باس سەرىكتەستىگى پارتگرۋپپاسىنىڭ شۋجيى، باس جوراسى، جۇڭگو مۇناي ـ تابيعي گاز توبى شەكتى سەرىكتەستىگى پارتگرۋپپاسىنىڭ شۋجيى، باس جوراسى قاتارلى قىزمەت قولايلىلىعىنان پايدالانىپ، قاتىستى جەكەلەردىڭ قىزمەت مىندەتىن رەتتەۋ، نىسانداردى كوتەرمەگە الۋ، كاسىپورىن تيجاراتى قاتارلى ىستەرىنە كومەك كورسەتىپ، زاڭسىز العان مال ـ مۇلكى حالىق اقشاسىنا سىندىرعاندا 35 ميلليون 10 مىڭ يۋاننان اسقان.

وردوس قالالىق ورتا دارەجەلى حالىق سوت مەكەمەسى بىلاي دەپ قارايدى: ايىپكەر ۋاڭ يليننىڭ ارەكەتى پارا الۋ قىلمىسىنا جاتادى، العان پاراسى ەرەكشە كوپ، ونى زاڭ بويىنشا جازالاۋ كەرەك. ونىڭ دەلوعا الىنعاننان كەيىن قىلمىسىن قاز - قالپىندا مويىنداعانىن، دەلونى ءبىر جاقتى ەتۋ ورگانى ءالى يگەرمەگەن ءبىر ءبولىم پارا الۋ فاكتتەرىن ىرىقتىلىقپەن تاپسىرعانىن، قىلمىسىن تانىپ، رايىنان قايتىپ، زاڭسىز ولجانى بەلسەنە قايتارعانىن، دەلوعا قاتىستى زاڭسىز اقشا، زاڭسىز زات تۇگەلدەي قايتارىپ الىنعانىن، زاڭ بويىنشا جەڭىل جازالاۋعا بولاتىندىعىن ەسكەرە وتىرىپ، سوت جوعارىداعى ۇكىمدى شىعاردى.

كەلۋ قاينارى: حالىق تورابى