شي جينپيڭ كولۋمبيانىڭ زۇڭتۇڭى پەترومەن كەزدەستى

5 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگو ـ لاتىن امەريكاسى تالقى مىنبەرىنىڭ 4 ـ كەزەكتى مينيستر دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن كولۋمبيانىڭ زۇڭتۇڭى پەترومەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

«حالىق گازەتى»، 5 - ايدىڭ 14 - كۇنى، بەيجيڭ (ءتىلشى چىن شاڭۋىن). مەملەكەت ءتوراعاسى شي جينپيڭ 5 - ايدىڭ 14 - كۇنى تۇستەن بۇرىن بەيجيڭدەگى حالىق سارايىندا جۇڭگو - لاتىن امەريكاسى تالقى مىنبەرىنىڭ 4 - كەزەكتى مينيستر دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن كولۋمبيانىڭ زۇڭتۇڭى پەترومەن كەزدەستى.

شي جينپيڭ بىلاي دەپ اتاپ كورسەتتى: كولۋمبيا − لاتىن امەريكاسىنداعى ماڭىزدى مەملەكەت، جۇڭگو جاق ەكى ەل قارىم - قاتىناسىن دامىتۋعا اۋەلدەن ستراتەگيالىق جانە ۇزاق بولاشاقتىق تۇرعىدان مامىلە جاساپ كەلەدى. بيىل − جۇڭگو مەن كولۋمبيانىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعى. جاڭا تاريحي باستالۋ تۇيىنىندە جۇڭگو جاق كولۋمبيا جاقپەن بىرگە قۇلشىنىپ ، ەكى ەلدىڭ ستراتەگيالىق سەرىكتەستىك قارىم - قاتىناسىنىڭ اناعۇرلىم ويداعىداي دامۋىن ىلگەرىلەتىپ، ەكى ەل حالقىنا ءتىپتى دە زور باقىت جاراتۋدى قالايدى. ەكى جاق ساياسي سەنىمدىلىكتى بەكەمدەپ، ستراتەگيالىق تىلدەسۋدى كۇشەيتىپ، ەكى جاقتى قارىم - قاتىناستىڭ دامۋ بەتالىسىن مىقتى يگەرۋى كەرەك. كولۋمبيانىڭ ”ءبىر بەلدەۋ، ءبىر جولدى“ جوعارى ساپامەن بىرگە قۇرۋ ۇلى شاڭىراعىنا رەسمي كىرۋىن وراي ەتىپ، ەكى ەل سەلبەستىگىنىڭ ساپاسىن، دارەجەسىن جوعارىلاتۋدى ىلگەرىلەتۋ كەرەك. جۇڭگو جاق كولۋمبيانىڭ اناعۇرلىم كوپ ساپالى ونىمدەرىن يمپورت ەتۋدى قالايدى، جۇڭگو كاسىپورىندارىنىڭ كولۋمبياعا بارىپ قارجى قوسىپ، شارۋاشىلىقتى گۇلدەندىرۋىن، نەگىزدىك قۇرىلعى قۇرىلىسىنا ات سالىسۋىن قولدايدى. ەكى جاقتىڭ جەل ەنەرگياسى، جاڭا ەنەرگيالى اۆتوموبيل، سيفرلى ەكونوميكا، جاساندى زەردە سياقتى جاڭادان گۇلدەنگەن سالالارداعى سەلبەستىكتى ونان ارى كەڭەيتىپ، جاسىل، تومەن كومىرتەكتى تيپكە بۇرىلىس جاساۋدى بىرگە جۇزەگە اسىرۋىنا بولادى. ديپلوماتيالىق قارىم - قاتىناس ورناتۋدىڭ 45 جىلدىعىن قۇتتىقتاۋ قيمىلىن ويداعىداي وتكىزىپ، وقۋ ـ اعارتۋ، مادەنيەت، ساياحات سياقتى سالالارداعى سەلبەستىكتى كۇشەيتىپ، گۋمانيتارلىق اۋىس ـ كۇيىستى جيىلەتىپ، ەكى ەل دوستىعىنىڭ حالىق رايى نەگىزىن بەكەمدەۋ كەرەك.

شي جينپيڭ بىلاي دەپ باسا دارىپتەدى: جۇڭگو - لاتىن امەريكاسى سەلبەستىگى − وڭتۇستىك ـ وڭتۇستىك سەلبەستىگىنىڭ ماڭىزدى قۇرامداس بولىگى، دۇنيە ءجۇزىنىڭ دامۋ اۋقىمى مەن تاريح اعىمىنا ۇيلەسەدى، جۇڭگو مەن لاتىن امەريكاسىنداعى ەلدەردىڭ ورتاق مۇددەسىنە ۇيلەسەدى. جۇڭگو ـ لاتىن امەريكاسى تالقى مىنبەرىنىڭ 4 ـ كەزەكتى مينيستر دارەجەلىلەر ءماجىلىسى ءساتتى وتكىزىلىپ، دۇنيە جۇزىنە دامۋدى، گۇلدەنۋدى بىرگە جوسپارلاۋدىڭ بەلسەندى سيگنالىن تاراتتى. كولۋمبيا لاتىن امەريكاسى ورتاق تۇلعاسىنىڭ كەزەكتى ءتوراعا ەلى رەتىندە ءماجىلىستىڭ ءساتتى وتكىزىلۋىنە ماڭىزدى ۇلەس قوستى. جۇڭگو جاق كولۋمبيانى قامتىعان لاتىن امەريكاسىنداعى ەلدەرمەن بىرگە جۇڭگو ـ لاتىن امەريكاسى تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتىپ، جۇڭگو ـ لاتىن امەريكاسى حالقىنا ءتىپتى دە زور باقىت جاراتۋدى قالايدى.

پەترو مىنالاردى ءبىلدىردى: كولۋمبيا مەن جۇڭگونىڭ دوستىق قارىم - قاتىناسى ارىدان باستاۋ الادى، كولۋمبيا جاق جۇڭگومەن قارىم - قاتىناسىن ىشكەرىلەي دامىتۋدى ءۇمىت ەتەدى. ەكى جاق ساياسي سەنىمدىلىكتى تەرەڭدەتىپ، ءوزارا قولداۋدى كۇشەيتۋى كەرەك. ”ءبىر بەلدەۋ، ءبىر جولدى“ بىرگە قۇرىپ، ساۋدا، نەگىزدىك قۇرىلعى، جاڭا ەنەرگيا، جاساندى زەردە سياقتى سالالارداعى سەلبەستىكتى كەڭەيتىپ، حالىق تۇرمىسىن جاقسارتۋ كەرەك. قازىر حالىقارالىق جاعداي كۇردەلى دە قۇبىلمالى، ءىشىنارا ەلدەردىڭ پايدانى عانا كوزدەيتىن ءادىسى دۇنيە جۇزىنە ءتيىمسىز بولىپ وتىر، ءار ەل ىنتىماقتاسا وتىرىپ توتەپ بەرۋى كەرەك. كولۋمبيا جاق جۇڭگو جاقپەن تىعىز سايكەسىپ، حالىقارالىق ادىلدىكتى، تۋراشىلدىقتى قورعاۋدى، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.

كەزدەسۋدەن كەيىن ەكى ەل مەملەكەت باسشىلارى «جۇڭحۋا حالىق رەسپۋبليكاسى ۇكىمەتى مەن كولۋمبيا رەسپۋبليكاسى ۇكىمەتىنىڭ جىبەك جولى ەكونوميكالىق بەلدەۋى مەن 21 ـ عاسىرداعى تەڭىز جىبەك جولى قۇرىلىسىن بىرگە ىلگەرىلەتۋ جونىندەگى سەلبەستىك جوباسىنا» قول قويۋعا بىرگە كۋا بولدى.

ۋاڭ ي جوعارىداعى قيمىلدارعا قاتىناستى.