ۋاڭ حۋنيڭ كولۋمبيانىڭ زۇڭتۇڭى پەترومەن، زيمبابۆە قاۋىم پالاتاسىنىڭ باستىعى مۋدەندامەن جەكە ـ جەكە كەزدەستى

شينحۋا اگەنتتىگى، 5 ـ ايدىڭ 14 ـ كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ 5 ـ ايدىڭ 14 ـ كۇنى بەيجيڭدە جۇڭگو ـ لاتىن امەريكاسى تالقى مىنبەرىنىڭ 4 ـ كەزەكتى مينيستر دارەجەلىلەر ماجىلىسىنە قاتىناسۋ ءۇشىن جۇڭگوعا كەلگەن كولۋمبيانىڭ زۇڭتۇڭى پەترومەن كەزدەستى. ۋاڭ حۋنيڭ مىنالاردى ءبىلدىردى: ءتوراعا شي جينپيڭ سىزبەن ناتيجەلى كەڭەس وتكىزىپ، كولۋمبيانىڭ ”ءبىر بەلدەۋ، ءبىر جول“ باستاماسىنا قاتىناسۋى سياقتى ماڭىزدى سەلبەستىك قۇجاتتارىنا قول قويۋعا بىرگە كۋا بولدى. بيىل − جۇڭگو مەن كولۋمبيانىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعى. جۇڭگو جاق كولۋمبيا جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن كۇش سالا تياناقتاندىرىپ، جۇڭگو مەن كولۋمبيانىڭ ستراتەگيالىق سەرىكتەستىك قارىم - قاتىناسىنىڭ تەرەڭدەۋىن، ناقتىلانۋىن ىلگەرىلەتىپ، ەكى ەل حالقىن باقىتقا كەنەلتۋدى قالايدى. جۇڭگو مەملەكەتتىك ساياسي كەڭەسى وسى ءۇشىن بەلسەندى رول اتقارۋدى قالايدى.

پەترو مىنالاردى ءبىلدىردى: بۇگىنگى دۇنيە ءجۇزى اۋمالى ـ توكپەلى بولىپ وتىر، ءار ەل قول ۇستاسا وتىرىپ بەيبىتشىلىكتى قورعاپ، ادامزاتتىڭ بىرگە دامۋىن جەبەۋى كەرەك. لاتىن امەريكاسى مەن جۇڭگونىڭ تابيعي جاقىندىعى بار، ءتىپتى دە بىرگە بولۋى كەرەك. كولۋمبيا جاق جۇڭگو جاقپەن ءار سالاداعى سەلبەستىكتى كۇشەيتىپ، كولۋمبيا ـ جۇڭگو جانە لاتىن امەريكاسى ـ جۇڭگو قارىم ـ قاتىناسىنىڭ ۇزدىكسىز العا دامۋىن ىلگەرىلەتۋدى قالايدى.

سول كۇنى ۋاڭ حۋنيڭ بەيجيڭدە زيمبابۆە قاۋىم پالاتاسىنىڭ باستىعى مۋدەندامەن كەزدەستى.

ۋاڭ حۋنيڭ مىنالاردى ءبىلدىردى: بىلتىر ءتوراعا شي جينپيڭ جۇڭگو - افريكا سەلبەستىك تالقى مىنبەرىنىڭ بەيجيڭدەگى باسشىلار ماجىلىسىنە قاتىناسۋ ءارى مەملەكەتتىك ساپاردا بولۋ ءۇشىن جۇڭگوعا كەلگەن منانگاگۋا زۇڭتۇڭمەن ىشكەرىلەي دوستىق اۋىس - كۇيىس جاساپ، جۇڭگو - زيمبابۆە قارىم - قاتىناسىنىڭ دامۋىنا جاڭا ستراتەگيالىق جەتەكشىلىك جاسادى. جۇڭگو جاق زيمبابۆە جاقپەن بىرگە ەكى ەل مەملەكەت باسشىلارىنىڭ ماڭىزدى ورتاق تانىمىن جەتەكشى، باسشىلار باس قوسۋىنىڭ جەتىستىكتەرىن تياناقتاندىرۋدى وراي ەتىپ، ساياسي سەنىمدىلىكتى كۇشەيتىپ، ناقتى سەلبەستىكتى كەڭەيتىپ، جوعارى دەڭگەيدەگى جۇڭگو ـ زيمبابۆە تاعدىرلاس ورتاق تۇلعاسىن قول ۇستاسا قۇرۋدى قالايدى. جۇڭگو مەملەكەتتىك ساياسي كەڭەسى ەكى ەل قارىم - قاتىناسىنىڭ دامۋىن جەبەۋگە ۇلەس قوسۋدى قالايدى.

مۋدەندا مىنالاردى ءبىلدىردى: زيمبابۆە ءبىر جۇڭگو پرينسيبىنە تاباندى بولادى، جۇڭگونىڭ قاستەرلى قولداۋىنا شىن جۇرەكتەن العىس ايتادى، ەكى جاقتىڭ ۇكىمەت پەن حالىق اراسىنداعى ءار جىكتەگى اۋىس ـ كۇيىستى ۇزدىكسىز كۇشەيتىپ، ەنەرگيا، گۋمانيتارلىق، سيفرلى ەكونوميكا سياقتى سالالارداعى سەلبەستىكتى تەرەڭدەتۋىن ءۇمىت ەتەمىن. زيمبابۆە قاۋىم پالاتاسى جۇڭگو مەملەكەتتىك ساياسي كەڭەسىمەن دوستىق بارىس ـ كەلىستى كۇشەيتىپ، ەكى ەلدىڭ ەكونوميكالىق، قوعامدىق دامۋىن جەبەۋگە بىرگە ۇلەس قوسۋدى قالايدى.

حۋ چۇنحۋا، ۋاڭ دۇڭفىڭ قاتارلىلار جوعارىداعى كەزدەسۋدە بىرگە بولدى.