ساي چي موڭعۇليا حالىق پارتياسىنىڭ ۋاكىلدەر ۇيىرمەسىندەگىلەرمەن كەزدەستى

شينحۋا اگەنتتىگى، 5 - ايدىڭ 14 - كۇنى، بەيجيڭ. 5 - ايدىڭ 14 - كۇنى جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي بەيجيڭدە موڭعۇليا حالىق پارتياسىنىڭ باس شۋجيى سودباتىر باستاعان ۋاكىلدەر ۇيىرمەسىندەگىلەرمەن كەزدەستى.

ساي چي مىنالاردى ءبىلدىردى: ءتوراعا شي جينپيڭ مەن حورەلسۋح زۇڭتۇڭنىڭ ستراتەگيالىق جەتەكشىلىگىندە، جۇڭگو ـ موڭعۇليا قارىم - قاتىناسى تاماشا دامۋ جاعدايىن ساقتاپ، بەيبىت قاتار تۇرۋ، ءوزارا كومەكتەسۋ، سەلبەسىپ تەڭ يگىلىككە كەنەلۋ سىندى تاعدىرلاس ورتاق تۇلعانى بىرگە قۇرۋ بەتالىسىنا قاراي ورنىقتى قادام تاستادى. جۇڭگو جاق موڭعۇليا جاقپەن بيلىك باسىنداعى پارتيالاردىڭ اۋىس ـ كۇيىسىن، تىلدەسۋىن كۇشەيتىپ، ستراتەگيالىق ءوزارا سەنىمدىلىكتى تەرەڭدەتىپ، ءار سالاداعى ناقتى سەلبەستىكتى ىلگەرىلەتىپ، بۇقارانىڭ، اسىرەسە، جاستاردىڭ دوستىق بارىس ـ كەلىسىن كەڭەيتىپ، پارتيا قۇرىلىسىنداعى اۋىس ـ كۇيىستى، ءوزارا ۇلگى الۋدى كۇشەيتىپ، حالىقارالىق ادىلدىك پەن ادىلەتتىلىكتى بىرگە قورعاۋدى قالايدى.

سودباتىر مىنالاردى ءبىلدىردى: موڭعۇليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسى كورشى ەلدەر قارىم - قاتىناسىنىڭ ۇلگىسىنە اينالدى. موڭعۇليا مەن جۇڭگونىڭ ورتا، ۇزاق مەرزىمدىك تاتۋ كورشىلىك دوستىعىن دامىتۋ − موڭعۇليا ديپلوماتياسىنىڭ الدىمەن ەسكەرەتىن بەتالىسى. موڭعۇليا جاق جۇڭگو جاقتىڭ جاقىن، ادال، ءتيىمدى، كەشىرىمشىل توڭىرەكتىك ديپلوماتيا ۇستانىمىن القايدى جانە قولدايدى، ساياسي پارتيانىڭ رولىن ساۋلەلەندىرىپ، موڭعۇليا مەن جۇڭگونىڭ ساياسي ستراتەگيالىق ءوزارا سەنىمدىلىگى مەن دامۋ ستراتەگياسىن ۇشتاستىرۋدى ۇزدىكسىز تەرەڭدەتۋدى قالايدى.