شي جينپيڭ فرانسيانىڭ زۇڭتۇڭى ماكرونمەن تەلەفوندا سويلەستى

شينحۋا اگەنتتىگى، 5 - ايدىڭ 22 - كۇنى، بەيجيڭ. 5 - ايدىڭ 22 - كۇنى تۇستەن كەيىن مەملەكەت ءتوراعاسى شي جينپيڭ ۋادە بويىنشا فرانسيانىڭ زۇڭتۇڭى ماكرونمەن تەلەفوندا سويلەستى.

شي جينپيڭ بىلاي دەپ اتاپ كورسەتتى: بىلتىر 5 - ايدا مەن فرانسيادا ساپاردا بولدىم، ەكى جاق دەربەس، ءوز - وزىنە قوجايىن بولۋ، ءوزارا ءتۇسىنىسۋ، بيىكتە تۇرىپ الىسقا كوز جىبەرۋ، ءوزارا پايدا جەتكىزىپ تەڭ يگىلىككە كەنەلۋ سىندى جۇڭگو - فرانسيا ديپلوماتيالىق قارىم - قاتىناس ورناتۋ رۋحىن ساۋلەلەندىرۋگە ءبىر اۋىزدان ماقۇل بولدى ءارى وعان جاڭا داۋىرلىك ءمان قوستى. وسىدان كەيىن جۇڭگو مەن فرانسيا سەلبەستىگىندە تاعى دا كوپتەگەن تىڭ ىلگەرىلەۋشىلىك بولدى. ەكى جاق ستراتەگيالىق تىلدەسۋدى كۇشەيتىپ، ورتاق تانىم ۇيىستىرۋى كەرەك. ورايدى مىقتى يگەرىپ، قارجى قوسۋ، اۆياتسيا، عارىش، يادرو ەنەرگياسى سياقتى ءداستۇرلى سالالارداعى سەلبەستىكتى تەرەڭدەتىپ، سيفر، جاسىل ءتۇس، بيولوگيالىق ءدارى - دارمەك، قارتتار ەكونوميكاسى سياقتى جاڭادان گۇلدەنگەن سالالارداعى سەلبەستىكتى كەڭەيتۋ كەرەك. گۋمانيتارلىق اۋىس - كۇيىستى كۇشەيتىپ، حالىقتىڭ دوستىعىن جەبەۋ كەرەك.

شي جينپيڭ بىلاي دەپ باسا دارىپتەدى: بيىل − دۇنيە جۇزىلىك فاشيزمگە قارسى سوعىستىڭ جەڭىسكە جەتكەندىگىنىڭ جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. جۇڭگو مەن فرانسيا − بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى جانە دەربەس، ءوز - وزىنە قوجا ءىرى ەل، سوعىستان كەيىنگى حالىقارالىق ءتارتىپتىڭ ورناتۋشىسى، قۇرۋشىسى، ىنتىماقتى، سەلبەستىكتى كۇشەيتىپ، بىرلەسكەن مەملەكەتتەر ۇيىمىنىڭ بەدەلى مەن ورنىن بىرگە قورعاپ، حالىقارالىق ساۋدا ەرەجەسى مەن دۇنيە ءجۇزىنىڭ ەكونوميكالىق ءتارتىبىن قورعاپ، ناعىز كوپ جاقتىلىقتى امالياتتا ايگىلەۋى كەرەك. حالىقارالىق جاعداي نەعۇرلىم كۇردەلى بولعان سايىن، جۇڭگو مەن فرانسيا سولعۇرلىم دۇرىس ستراتەگيالىق تالعام جاساپ، حالىقارالىق ءتارتىپتى قورعايتىن سەنىمدى كۇش، دۇنيە جۇزىلىك ارتۋدى جەبەيتىن اشىق كۇش، كوپ جاقتى سەلبەستىككە جەتەكشىلىك ەتەتىن العاباسار كۇش بولۋى كەرەك.

شي جينپيڭ بىلاي دەپ اتاپ كورسەتتى: جۇڭگو ەۆروپانى باستان - اياق كوپ ۇيەكتى دۇنيە ءجۇزىنىڭ دەربەس ءبىر ۇيەگى دەپ قاراپ، ەۆروپا وداعىنىڭ ستراتەگيالىق دەربەستىكتى كۇشەيتىپ، حالىقارالىق ىستەردە اناعۇرلىم ماڭىزدى رول اتقارۋىن قولدايدى، ەۆروپا جاقپەن قول ۇستاسا وتىرىپ دۇنيە جۇزىلىك سايىستارعا توتەپ بەرىپ، ەكى جاققا دا باقىت جاراتاتىن، دۇنيە جۇزىنە دە ءتيىمدى اناعۇرلىم كوپ تابىسقا قول جەتكىزۋدى قالايدى.

ماكرون مىنالاردى ءبىلدىردى: فرانسيا - جۇڭگو، ەۆروپا - جۇڭگو قارىم - قاتىناسى توتەنشە ماڭىزدى، دۇنيە جۇزىلىك مانگە يە. حالىقارالىق جاعداي قالاي وزگەرسە دە، فرانسيا جاق جۇڭگومەن قارىم - قاتىناسقا ايرىقشا ءمان بەرەدى، ءبىر جۇڭگو پرينسيبىنە تاباندى بولۋ تۇرعىسى ەشقانداي وزگەرمەيدى. جۇڭگومەن ەكونوميكا - ساۋدا، قارجى قوسۋ جانە ءار سالاداعى ناقتى سەلبەستىكتى كۇشەيتىپ، ەكى جاقتى قارىم - قاتىناستىڭ تاماشا دامۋ جاعدايىن ساقتاپ، فرانسيا - جۇڭگو قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايمىز. جەدەل وزگەرىپ جاتقان حالىقارا اۋقىمدا فرانسيا جاق جۇڭگو جاقپەن ماڭىزدى ماسەلەلەردە پىكىرلەسۋ جانە سايكەسۋدى كۇشەيتىپ، بىرلەسكەن مەملەكەتتەر ۇيىمى حاۋىپسىزدىك القالار كەڭەسىنە تۇراقتى مۇشە مەملەكەتتەردىڭ جاۋاپكەرشىلىگىن ارقالاپ، قولامتالى ماسەلەلەردىڭ اسقىنىپ، سىرتقا كەڭەيۋىنەن ساقتانىپ، ءدۇنيە ءجۇزىنىڭ جانە ءوڭىردىڭ تىنىشتىعى مەن ورنىقتىلىعىن بىرگە قورعاۋدى قالايدى. ەۆروپا مەن جۇڭگو پىكىرلەسۋدى، تىلدەسۋدى ونان ارى جيىلەتىپ، ورتاق مۇددەنى قورعاۋى كەرەك.

ەكى ەلدىڭ مەملەكەت باسشىلارى تاعى ۋكراينا داعدارىسى، پالەستين - يزرايل قاقتىعىسى، يران يادرو ماسەلەسى سياقتى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىردى.