جاۋ لىجي تۇركىمەنستاننىڭ پارلامەنت باستىعى گۋرمانوۆامەن كەڭەس وتكىزدى

شينحۋا اگەنتتىگى، 5 - ايدىڭ 22 - كۇنى، بەيجيڭ. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي 5 - ايدىڭ 22 - كۇنى حالىق سارايىندا تۇركىمەنستاننىڭ پارلامەنت باستىعى گۋرمانوۆامەن كەڭەس وتكىزدى.

جاۋ لىجي بىلاي دەدى: 2023 - جىلى 1 - ايدا ءتوراعا شي جينپيڭ سەردار بەردىمۇحامەتوۆ زۇڭتۇڭمەن بىرگە جۇڭگو - تۇركىمەنستان قارىم - قاتىناسىن جالپى بەتتىك ستراتەگيالىق سەرىكتەستىك قارىم - قاتىناسقا كوتەرىپ، ەكى جاقتى دەڭگەيدە تاعدىرلاس ورتاق تۇلعانى امالياتتا ايگىلەۋدى جاريالادى. سول جىلى 10 - ايدا ءتوراعا شي جينپيڭ 3 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىنە قاتىناسۋ ءۇشىن جۇڭگوعا كەلگەن ءتوراعا گۋربانگۋلى بەردىمۇحامەتوۆپەن دوستىق اۋىس - كۇيىس وتكىزىپ، ەكى ەلدىڭ ءار سالاداعى سەلبەستىگىنە جاڭا جوبا كەسكىندەدى. جۇڭگو جاق تۇركىمەنستان جاقپەن بىرگە ەكى ەل باسشىلارىنىڭ ماڭىزدى ورتاق تانىمىن ويداعىداي تياناقتاندىرىپ، ءار سالاداعى سەلبەستىكتى كۇشەيتىپ، جۇڭگو مەن تۇركىمەنستاننىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ مازمۇنىن ۇزدىكسىز بايىتىپ، جۇڭگو مەن تۇركىمەنستاننىڭ تاعدىرلاس ورتاق تۇلعاسى قۇرىلىسىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتۋدى قالايدى.

جاۋ لىجي مىنالاردى ءبىلدىردى: جۇڭگو جاق تۇركىمەنستاننىڭ تايۋانعا، شينجياڭعا ساياتىن ىستەر، ادامدىق ۇقىق سياقتى ماسەلەلەردە جۇڭگو جاقتىڭ تۇرعىسىن باتىل قولداعاندىعىن ايرىقشا القايدى، تۇركىمەنستاننىڭ مەملەكەتتىڭ تاۋەلسىزدىگىن، يەلىك ۇقىعىن جانە حاۋىپسىزدىگىن قورعاۋىن بۇرىنعىداي باتىل قولدايدى، تۇركىمەنستاننىڭ ماڭگىلىك بەيتاراپ ساياسات اتقارۋىن قولدايدى، تۇركىمەنستان جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى. جۇڭگو جاق تۇركىمەنستانمەن بىرگە ”ءبىر بەلدەۋ، ءبىر جولدى“ بىرگە قۇرۋ باستاماسىن ”جىبەك جولىن گۇلدەندىرۋ“ ستراتەگياسىمەن ۇشتاستىرۋدى جەدەلدەتىپ، ەكى جاقتى ساۋدانىڭ ورنىقتى دامۋىن ىلگەرىلەتىپ، ۇلاستىرۋ - تۇتاستىرۋ، اۋىل شارۋاشىلىعى سياقتى سالالارداعى سەلبەستىكتىڭ جاڭا شارالارىن تەرەڭدەتۋ جونىندە ىزدەنىس جاساپ، مادەنيەت، ساياحات، وقۋ - اعارتۋ سياقتى سالالارداعى سەلبەستىكتى كەڭەيتۋدى قالايدى؛ كوپ جاقتى سەلبەستىكتى كۇشەيتىپ، ءتوراعا شي جينپيڭ العا قويعان 3 ۇلكەن دۇنيە جۇزىلىك باستامانى تياناقتاندىرۋدى بىرگە ىلگەرىلەتىپ، دۇنيە جۇزىلىك ساۋدا ۇيىمىن وزەك ەتكەن كوپ جاقتى ساۋدا ءتۇزىلىسىن قورعاپ، ناعىز كوپ جاقتىلىقتى امالياتتا ايگىلەۋ كەرەك.

جاۋ لىجي بىلاي دەپ باسا دارىپتەدى: جۇڭگو مەن تۇركىمەنستاننىڭ زاڭ شىعارۋ قۇرىلىمدارى دوستىق بارىس - كەلىستى ساقتاپ كەلەدى. جۇڭگو مەملەكەتتىك حالىق قۇرىلتايى تۇركمەنستان پارلامەنتىمەن قول ۇستاسا قۇلشىنىپ، ءوزىنىڭ فۋنكتسيالىق رولىن ساۋلەلەندىرىپ، زاڭ شىعارۋ ورگاندارىنىڭ كوپ ساتىلى دوستق قارىم - قاتىناسىن كۇشەيتىپ، ءارقايسى ەل پارلامەنتتەرى وداعى قاتارلى كوپ جاقتى مەحانيزمدەگى سايكەسۋدى جيىلەتىپ، زاڭ شىعارۋ، باقىلاۋ جانە مەملەكەت باسقارۋ تاجىريبەلەرىن الماستىرۋدى تەرەڭدەتىپ، ەكى ەلدىڭ ناقتى سەلبەستىگىنە تاماشا زاڭمەن باسقارۋ ورتاسىن جاراتۋدى قالايدى.

جاۋ لىجي جۇڭگونىڭ زاڭ جۇيەسى قۇرىلىسى مەن حالىق قۇرىلتايىنىڭ زاڭ شىعارۋ قىزمەتىنە قاتىستى جاعدايلاردى تانىستىردى. ول مىنالاردى ءبىلدىردى: زاڭ شىعارۋ قىزمەتىن كۇشەيتۋ، زاڭ جۇيەسىن كەمەلدەندىرۋ سياقتى جاقتاردا ەكى ەلدىڭ زاڭ شىعارۋ قۇرىلىمدارىنىڭ ءوزارا ۇيرەنىپ، ءوزارا ۇلگى الىپ، ءوز ەلدەرىنىڭ زاڭمەن جونگە سالۋ قۇرىلىسى مەن رەفورما، دامۋ ىستەرىنە اناعۇرلىم ويداعىداي قىزمەت ەتۋىنە بولادى.

گۋرمانوۆا مىنالاردى ءبىلدىردى: ەكى ەل باسشىلارىنىڭ ستراتەگيالىق جەتەكشىلىگىندە، ءوزارا قۇرمەت ەتۋ، ءوزارا سەنۋ، ءوزارا تيىمدىلىك جاساۋ پرينسيبىن نەگىز ەتكەن تۇركىمەنستان مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناسى ساياسي، ەكونوميكا، ديپلوماتيا، گۋمانيتارلىق سياقتى سالالاردا قارىشتاپ دامىدى. تۇركىمەنستان پارلامەنتى جۇڭگو مەملەكەتتىك حالىق قۇرىلتايىمەن دوستىق بارىس - كەلىستى تەرەڭدەتىپ، ارناۋلى كوميتەتتەر، جاستار، ايەل پارلامەنت مۇشەلەرى جانە ۋاكىلدەر اراسىنداعى اۋىس - كۇيىستى جيىلەتىپ، تۇركىمەنستان - جۇڭگو قارىم - قاتىناسىن جەبەۋگە زاڭ شىعارۋ قۇرىلىمدارىنىڭ ۇلەسىن قوسۋدى قالايدى.

حاۋ ميڭجين كەڭەسكە قاتىناستى.

كەلۋ قاينارى: حالىق تورابى