ورتالىقتىڭ قالا قىزمەتى ءماجىلىسى بەيجيڭدە وتكىزىلدى

7 - ايدىڭ 14 - كۇنىنەن 15 - كۇنىنە دەيىن ورتالىقتىڭ قالا قىزمەتى ءماجىلىسى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 7 - ايدىڭ 15 - كۇنى، بەيجيڭ. ورتالىقتىڭ قالا قىزمەتى ءماجىلىسى 7 - ايدىڭ 14 - كۇنىنەن 15 - كۇنىنە دەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي كىچياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي ماجىلىسكە قاتىناستى.

شي جينپيڭ ماڭىزدى سوزىندە جاڭا داۋىردەن بەرگى ەلىمىزدىڭ قالا دامۋىنىڭ جەتىستىكتەرىن قورىتىندىلاپ، قالا قىزمەتى ءدوپ كەلگەن جاعدايعا تالداۋ جاساپ، قالا قىزمەتىن جاقسى ىستەۋدىڭ جالپى تالابىن، ماڭىزدى پرينسيبىن، ءتۇيىندى مىندەتتەرىن ايقىندادى. لي كىچياڭ قورىتىندى ءسوز سويلەپ، باس شۋجي شي جينپيڭنىڭ ماڭىزدى ءسوزىنىڭ رۋحىن دايەكتىلەندىرۋ، تياناقتاندىرۋ، قالا قىزمەتىن اناعۇرلىم جاقسى ىستەۋ جونىندە ناقتى ورنالاستىرۋ جاسادى.

ءماجىلىس بىلاي دەپ اتاپ كورسەتتى: پارتيانىڭ 18 - قۇرىلتايىنان بەرى پارتيا ورتالىق كوميتەتى جاڭا جاعدايداعى ەلىمىز قالالارىنىڭ دامۋ زاڭدىلىعىن ىشكەرىلەي يگەرىپ، پارتيانىڭ قالا قىزمەتىنە جاپپاي باسشىلىعىنا تاباندى بولىپ، حالىق قالاسىن حالىق قۇرۋعا، حالىق قالاسىن حالىق ءۇشىن قۇرۋعا تاباندى بولىپ، قالانى ورگانيكالىق تىرشىلىك تۇلعاسى رەتىندە جۇيەلى جوسپارلاۋعا تاباندى بولىپ، قالا دامۋىنىڭ تاريحي جەتىستىكتەرگە قول جەتكىزۋىن ىلگەرىلەتتى، ەلىمىزدىڭ جاڭاشا قالا - قالاشىقتانۋ ورەسى مەن قالا دامۋىنىڭ قۋات دارەجەسى، جوبا قۇرىلىسىن جونگە سالۋ ورەسى، جۇمىسقا، قونىسقا قولايلى بولۋ ورەسى، تاريحي مادەنيەتتى قورعاۋ، جالعاستىرۋ ورەسى، ەكولوگيالىق ورتا ساپاسى بارىنشا جوعارىلادى.

ءماجىلىس بىلاي دەپ باسا دارىپتەدى: قازىرگى جانە بۇدان بىلايعى ءبىر مەزگىلدەگى قالا قىزمەتىنىڭ جالپى تۇلعالىق تالابى: شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن ىشكەرىلەي دايەكتىلەندىرىپ، باس شۋجي شي جينپيڭنىڭ قالا قىزمەتى جونىندەگى ماڭىزدى بايىمداۋلارىن جاپپاي دايەكتىلەندىرىپ، پارتيانىڭ جاپپاي باسشىلىعىنا تاباندى بولىپ جانە ونى كۇشەيتىپ، حالىق قالاسى ۇستانىمىن مۇقيات امالياتتا ايگىلەپ، ورنىقتىلىق بارىسىندا ىلگەرىلەۋ سىندى قىزمەت نەگىزگى ارناسىنان جازباي، جەرگىلىكتى جاعدايعا قاراي ىستەۋگە، تۇرگە ءبولىپ جەتەكشىلىك ەتۋگە تاباندى بولىپ، جاڭاشىل، جانعا جايلى، كوركەم، يكەمدى، وركەنيەتتى، پاراساتتى وسىزاماندانعان حالىق قالاسىن قۇرۋدى نىسانا، قالانىڭ جوعارى ساپالى دامۋىن ىلگەرىلەتۋدى نەگىزگى تاقىرىپ، قالانىڭ ماندىك دامۋىنا تاباندى بولۋدى نەگىزگى جەلى، قالانىڭ جاڭالانۋىن ىلگەرىلەتۋدى ماڭىزدى تۇتقا ەتىپ، قالا قۇرىلىمىن ساپالىلاندىرۋدى، قوزعاۋشى كۇشتى اۋىستىرۋدى، ساپاسىن جوعارىلاتۋدى، جاسىل تيپكە بۇرىلىس جاساۋدى، مادەنيەت تامىرىن جالعاستىرۋدى، جونگە سالىپ، ونىمدىلىكتى ارتتىرۋدى كۇش سالا ىلگەرىلەتىپ، قالا حاۋىپسىزدىگىنىڭ تومەنگى شەگىن بەرىك ساقتاپ، قالانى وسىزامانداندىرۋدىڭ جۇڭگوشا جاڭا جولىمەن ءجۇرۋ كەرەك.

ءماجىلىس بىلاي دەپ اتاپ كورسەتتى: ەلىمىزدىڭ قالا - قالاشىقتانۋى تەز قارقىنمەن ارتۋ كەزەڭىنەن ورنىقتى دامۋ كەزەڭىنە بۇرىلىس جاساۋدا، قالانىڭ دامۋى كەڭ كولەمدى ارتۋ مولشەرىن كەڭەيتۋ كەزەڭىنەن ىركىندى ساپانى جوعارىلاتىپ، ونىمدىلىكتى ارتتىرۋدى نەگىز ەتۋ كەزەڭىنە بۇرىلىس جاساۋدا. قالا قىزمەتىندە اۋقىم وزگەرىسىن تەرەڭ يگەرىپ، وعان بەلسەندىلىكپەن سايكەسىپ، قالانى دامىتۋ يدەياسىندا بۇرىلىس جاساپ، ادامدى نەگىز ەتۋگە اناعۇرلىم ءمان بەرۋ؛ قالانى دامىتۋ تاسىلىندە بۇرىلىس جاساپ، شوعىرلى، جوعارى ءونىمدى بولۋعا اناعۇرلىم ءمان بەرۋ؛ قالانى دامىتۋ قوزعاۋشى كۇشىندە بۇرىلىس جاساپ، ەرەكشەلىككە يە دامۋعا اناعۇرلىم ءمان بەرۋ؛ قالا قىزمەتىنىڭ وزەگىندە بۇرىلىس جاساپ، جونگە سالۋ ۇسىنىلىمىنا اناعۇرلىم ءمان بەرۋ؛ قالا قىزمەتىنىڭ ادىسىندە بۇرىلىس جاساپ، ءبىر تۇتاس جوسپارلاپ سايكەستىرۋگە اناعۇرلىم ءمان بەرۋ كەرەك.

ءماجىلىس قالا قىزمەتىنىڭ 7 جاقتاعى ءتۇيىندى مىندەتىن ورنالاستىردى. ءبىرىنشى، وسىزاماندانعان قالا جۇيەسىن كۇش سالا ساپالىلاندىرۋ كەرەك. قالانىڭ حالىق سانى مەن ەكونوميكالىق، قوعامدىق دامۋعا بولعان جالپىلىق كوتەرىمدىلىك قۋاتىن جوعارىلاتۋدى كوزدە ۇستاپ، شوعىرلى، توراپتانعان وسىزاماندانعان قالا شوعىرى مەن قالا شەڭبەرىن دامىتىپ، اۋدان ورتالىعىن ماڭىزدى دانەكەر ەتكەن قالا - قالاشىقتانۋ قۇرىلىسىن تۇرگە ءبولىپ ىلگەرىلەتىپ، اۋىل شارۋاشىلىعىنان اۋىسقان حالىقتىڭ قالا تۇرعىنىنا اينالۋىن ۇزدىكسىز ىلگەرىلەتىپ، ءىرى، ورتا، شاعىن قالالار مەن شاعىن قالا - قالاشىقتاردىڭ سايكەستى دامۋىن جەبەپ، قالا مەن اۋىلدىڭ توعىسپالى دامۋىن جەبەۋ كەرەك. ەكىنشى، ومىرشەڭدىك كۇشكە باي جاڭالىق جاراتۋ قالاسىن كۇش سالا قۇرۋ كەرەك. جاڭالىق اشۋ ەكولوگياسىن دەن قويا جەتىلدىرىپ، جاڭاشا وندىرگىش كۇشتەردى دامىتۋدا ۇزدىكسىز تىڭ تابىستارعا قول جەتكىزۋ؛ رەفورما جاساپ، ەسىك اشۋعا سۇيەنىپ قالانىڭ قوزعاۋشى كۇشىن ارتتىرىپ، قالانىڭ جاڭالانۋىن جوعارى ساپامەن ورىستەتىپ، قالانىڭ ەل ءىشى مەن حالىقارا قوس اينالىمداعى توراپتىق رولىن تولىق ساۋلەلەندىرۋ كەرەك. ءۇشىنشى، جانعا جايلى، قونىسقا قولايلى قالا قۇرۋعا كۇش سالۋ كەرەك. حالىق سانى، كاسىپ سالاسى، قالا - قالاشىق، قاتىناستى ءبىر تۇلعالاندىرۋ جوباسىنا تاباندى بولىپ، قالانىڭ كەڭىستىك قۇرىلىمىن ساپالىلاندىرۋ؛ ءۇي - جاي شارۋاشىلىعىن دامىتۋدىڭ جاڭا ۇلگىسىن جەدەل ورناتىپ، قالا ىشىندەگى قىستاقتار مەن قاتەرلى، كونە ۇيلەردى جاڭالاۋدى ورنىقتى ىلگەرىلەتۋ؛ تۇرمىستىق قىزمەت وتەۋ كاسىبىن كۇش سالا دامىتىپ، الەۋمەتتىك قىزمەت وتەۋ دەڭگەيىن جوعارىلاتىپ، حالىق تۇرمىسىنىڭ تومەنگى شەگىن مىقتى يگەرۋ كەرەك. ءتورتىنشى، جاسىل، تومەن كومىرتەكتى كوركەم قالا قۇرۋعا كۇش سالۋ كەرەك. ەكولوگيالىق ورتانى جونگە سالۋدىڭ ونىمدىلىگىن بەكەمدەپ، اناعۇرلىم ءونىمدى شارالار قولدانىپ، قالانىڭ اۋاسىن جونگە سالۋ، اۋىز سۋ قاينارىن قورعاۋ، جاڭا لاس زاتتاردى جونگە سالۋ سياقتى جاقتارداعى ماسەلەلەردى شەشىپ، لاستانۋدى ازايتىپ، كومىر قىشقىل گازىن تومەندەتىپ، جاسىلدىقتى كەڭەيتىپ، سايكەستى ونىمدىلىكتى ارتتىرىپ، قالا ورگانيزمدەرىنىڭ الۋان تۇرلىلىگىن جوعارىلاتۋ كەرەك. بەسىنشى، حاۋىپسىز، سەنىمدى يكەمدى قالا قۇرۋعا كۇش سالۋ كەرەك. قالانىڭ نەگىزدىك قۇرىلعىلارىنىڭ جان تامىر حاۋىپسىزدىگى ينجەنەرياسى قۇرىلىسىن ىلگەرىلەتىپ، كونە، توزىڭقى قۇبىر جەلىلەرىن جاڭالاۋدى، دارەجەسىن جوعارىلاتۋدى جەدەلدەتۋ؛ ءزاۋلىم عيماراتتاردى قاتاڭ شەكتەپ، ءۇي حاۋىپسىزدىگىن قامتاماسىزداندىرۋ دەڭگەيىن جاپپاي جوعارىلاتۋ؛ قالانىڭ جاراتىلىستىق اپاتتان ساقتانۋ جانە ونى جونگە سالۋىن كۇشەيتىپ، قالانىڭ تاسقىننان ساقتانۋ جۇيەسى مەن ىشكى تاسقىن سۋىن جونگە سالۋدى ءبىر تۇتاس جوسپارلاۋ؛ قوعام اماندىعىن جالپى تۇلعالىق جاقتان تىزگىندەۋدى كۇشەيتىپ، قالانىڭ الەۋمەتتىك حاۋىپسىزدىگىن شىنايى قورعاۋ كەرەك. التىنشى، ءمورالدى قاستەرلەپ، ىزگىلىككە تالپىناتىن وركەنيەتتى قالا قۇرۋعا كۇش سالۋ كەرەك. تاريحي مادەنيەتتى قورعاۋ، جالعاستىرۋ جۇيەسىن كەمەلدەندىرىپ، قالانىڭ بەت - بەينەسىن باسقارۋ ءتۇزىمىن كەمەلدەندىرىپ، قالانىڭ وزگەشە تاريحي مادەنيەت جۇلگەسىن، گۋمانيتارلىق جاعراپياسىن، جاراتىلىستىق كورىنىستەرىن قورعاۋ؛ قالانىڭ مادەنيەت جۇمساق كۇشى قۇرىلىسىن كۇشەيتىپ، قالا تۇرعىندارىنىڭ وركەنيەت ساپاسىن جوعارىلاتۋ كەرەك. جەتىنشى، قولايلى، جوعارى ءونىمدى زەردەلى قالا قۇرۋعا كۇش سالۋ كەرەك. پارتيا قۇرىلىسى ارقىلى جەتەكشىلىك ەتۋگە تاباندى بولىپ، قالانى زاڭمەن جونگە سالۋعا تاباندى بولىپ، قالانى جونگە سالۋ ۇستانىمىندا، ۇلگىسىندە، تاسىلىندە جاڭالىق اشىپ، قالا تۇرعىندارىنىڭ قىزمەت وتەۋ ارناۋلى لەنياسى سياقتى مەحانيزمدەردەن ويداعىداي پايدالانىپ، بۇقارانىڭ شۇعىل، قيىن، ۋايىمداعان، ءزارۋ ماسەلەلەرىن ءونىمدى شەشۋ كەرەك.

ءماجىلىس بىلاي دەپ باسا دارىپتەدى: وسىزاماندانعان حالىق قالاسىن قۇرۋدا، ءسوز جوق، پارتيانىڭ قالا قىزمەتىنە جاپپاي باسشىلىعىن كۇشەيتۋ كەرەك. باسشىلىق ءتۇزىلىسى مەن قىزمەت مەحانيزمىن ونان ارى اقاۋسىزداندىرىپ، قالا ساياساتىنىڭ سايكەسىمدىلىگىن، ءار جاقتىڭ اتقارۋ قۋاتىن كۇشەيتۋ كەرەك. دۇرىس ساياسي ناتيجە كوزقاراسىن ورناتىپ جانە امالياتتا ايگىلەپ، قالانىڭ دامۋىن باعالاۋدىڭ عىلمي جۇيەسىن ورناتىپ جانە كەمەلدەندىرىپ، قالا قىزمەتى قوسىنىنىڭ ساپاسى مەن قابىلەت قۇرىلىسىن كۇشەيتىپ، قالىڭ پارتيالى كادرلاردى ءىس تىندىرىپ، شارۋاشىلىق قۇرۋعا، جاۋاپكەرشىلىك ارقالاپ، ىسكەرلىك كورسەتۋگە شابىتتاندىرۋ كەرەك. شىندىقتى ءىس جۇزىنەن ىزدەۋگە، شىندىققا جۇگىنىپ، ناقتى ءىس ىستەۋگە تاباندى بولىپ، فورماشىلدىققا، تورەشىلدىككە باتىل قارسى تۇرۋ كەرەك.

ءماجىلىس بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى ءسوزى قالانىڭ دامۋى كىم ءۇشىن بولۋ، كىمگە سۇيەنۋ، سونداي - اق قانداي قالا قۇرۋ، قالانى قالاي قۇرۋ سياقتى كەلەلى نازاريالىق جانە امالياتتىق ماسەلەلەرگە عىلمي جاۋاپ بەرىپ، جاڭا ءداۋىردىڭ جاڭا جورىعىنداعى قالا قىزمەتىن ويداعىداي ىستەۋگە ءتۇبىرلى تياناق ازىرلەدى، مۇقيات ۇيرەنىپ، ءتۇسىنىپ، تياناقتاندىرۋدى قاز - قالپىندا ويداعىداي يگەرۋ كەرەك. ەلىمىزدىڭ قالا دامۋىنىڭ تاريحي ورنىن تەرەڭ يگەرىپ، قالا قىزمەتىن اناعۇرلىم كەڭ كوز ايامەن ويداعىداي ىستەۋ؛ وسىزاماندانعان حالىق قالاسىن قۇرۋدىڭ نىسانالىق ورنىن تەرەڭ يگەرىپ، حالىقتى وزەك ەتكەن دامۋ يدەياسىن سانالى تۇردە امالياتتا ايگىلەۋ؛ قالانىڭ ماندىك دامۋىنىڭ ستراتەگيالىق بەتالىسىن تەرەڭ يگەرىپ، قالانىڭ دامۋ ساپاسىن اناعۇرلىم باعىتتامالى تۇردە جوعارىلاتۋ؛ قالا دامۋىنىڭ قوزعاۋشى كۇشىن، ومىرشەڭدىك كۇشىن نىعايتۋدىڭ ىشكى تالابىن تەرەڭ يگەرىپ، رەفورما جاساپ، جاڭالىق اشۋ ۇلى ءىسىن ويداعىداي ىستەۋ؛ قالا قىزمەتىنىڭ جۇيەلىلىگىن، كۇردەلىلىگىن تەرەڭ يگەرىپ، ءتۇرلى مىندەتتەردى تياناقتاندىرۋ قابىلەتىن كۇش سالا جوعارىلاتۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى قاتىستى باسشى جولداستار، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستەگى قاتىستى باسشى جولداستار ماجىلىسكە قاتىناستى.

ولكەلەردىڭ، اۆتونوميالى رايونداردىڭ، توتە قاراستى قالالاردىڭ جانە شينجياڭ ءوندىرىس - قۇرىلىس بيڭتۋانىنىڭ پارتيا، ۇكىمەت ورىندارىنداعى نەگىزگى جاۋاپتى جولداستار مەن قالا قىزمەتىنە جاۋاپتى جولداستار، جوسپارى بولەك جاسالاتىن قالالاردىڭ، ولكە ورتالىعى قالالارىنىڭ، قاتىستى ايماق دارەجەلى قالالاردىڭ پارتكومدارىنداعى نەگىزگى جاۋاپتى جولداستار، ورتالىق پەن مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ، ورتالىقتىڭ باسقارۋىنداعى ءىشىنارا فينانس قۇرىلىمدارىنىڭ، كاسىپورىنداردىڭ جانە جوعارى مەكتەپتەردىڭ، ورتالىق اسكەري ىستەر كوميتەتى ورگانىنىڭ قاتىستى تاراۋلارىنداعى نەگىزگى جاۋاپتى جولداستار قاتارلىلار ماجىلىسكە قاتىناستى.

كەلۋ قاينارى: حالىق تورابى